Pagpauswag sa Atong Pagkaepektibo Ingong mga Ministro
1 Sanglit ang intereses sa Gingharian ginauna man sa atong mga kinabuhi, gusto ta gayod nga mouswag diha sa ministeryo. (Mar. 13:10) Walay sapayan kon unsang gidugayon na nga kita nagsangyaw, buot ta nga padayong mouswag sa atong pagkaepektibo ingong mga ministro. Unsaon ta man sa pagbuhat niini?
2 Daghan diha sa propesyonal nga nataran ang padayong nagapauswag sa ilang kahibalo ug mga kahanas. Ingong mga ministro, kita usab kinahanglang makugihon sa pagpauswag sa atong katakos sa paghimog mga tinun-an. Mangita gayod kita ug bag-ong mga paagi nga mosaler sa tanang matang sa mga tawo.—Mat. 28:19, 20.
DAWATA ANG HAGIT
3 Karon nga si Jehova nagapadali sa buluhaton sa pagpanigom, kita nagaduaw sa atong mga silingan nga mas sagad. Tungod sa atong napauswag nga kalihokan, ang mga presentasyon nga kanhi epektibo mahimong dili na mosaler ngadto sa mga tawo. Ang kalidad sa atong ministeryo hayan nagakinahanglan nga pauswagon.
4 Gikinahanglan nga pagahuptan ang positibong tinamdan aron mahimo gayong mahanason sa atong buluhaton. Ang paggamit nga maayo sa mapuslanong mga sugyot nga anaa sa Hulyo 15, 1988 nga Bantayanang Torre makabulig kanato niini. Pananglitan, sa panid 16, parapo 6, naghisgot kon sa unsang paagi ipaila mo ang imong kaugalingon diha sa maayo ug positibong paagi diha sa teritoryo nga ginaduaw mo hapit sa matag semana ug ilado ka na.
5 Gikobrehan mo na ba ang imong teritoryo pinaagig diretsong pagtanyag sa libreng pagtuon sa Bibliya sa balay? Ginasangyawan mo ba ang imong teritoryong negosyohanan? Posible bang maghimog pagsangyaw sa kadalanan sa angay nga mga panahon? Kutob gayod sa mahimo, sublia ang mga sugyot nga anaa sa Hulyo 15, 1988 nga Bantayanang Torre. Ang pagpadapat sa maong mga sugyot makabulig kanato sa pagpauswag sa atong pagkaepektibo ingong mga ministro.
6 Ang pagkahimong epektibo nagalangkit usab sa pagkabug-os. (Efe. 6:13) Magmaigmat sa pagpamatikod diin labaw sa usa ka pamilya ang nagapuyo sa usa ka balay. Ang ubang mga tawo anaa magpuyo sa mga apartment sa silong, o sa ubang mga luna nga dili daling maabot gikan sa dakong pultahan. Pangitaa ang lainlaing membro sa banay—usa ka tigulang nga sagad dili moadto sa pultahan o usa nga hayan nagatrabaho sa dihang ang kasagarang mga duaw gihimo sa maong balay. Basin sa pagduaw sa laing oras, hayan mahibalag mo ang ubang mga membro sa pamilya.
HIMOA KANA NGA ATONG TUMONG
7 Ang pagpauswag sa atong pagkaepektibo maoy takos nga tumong nga kadaghanan kanato makakab-ot niana. Nagakinahanglan kini ug kinasingkasing nga pag-ampo ug abanteng pagpangandam. Samtang ang atong pagkaepektibo mouswag, kita makaarang sa pagtabang sa uban sa paghimo sa susamang progreso.—Gal. 6:6.
8 Hinumdomi, ang atong buluhatong pagpanudlo dili matapos uban sa “dakong kasakitan.” (Mat. 24:21) Kita nagadahom ug mga katuigan sa pagtabang sa mga mabanhaw nga makakat-on sa mga paagi ni Jehova. Sa pagpauswag karon sa atong pagkaepektibo, kita dugang molampos sa ministeryo—ngadto sa kadungganan ug kadayeganan ni Jehova.