Tagda Kanunay ang Imong Pagpanudlo

“Tagda kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat niini maluwas nimo ang imong kaugalingon ug ang mga nagapatalinghog kanimo.”—1 TIMOTEO 4:16.

1. Nganong karon dili panahon nga kita maghinayhinay sa atong buluhaton sa pagwali sa Gingharian?

SI Jehova karon nagapadali sa pagtigom sa mga karnerohon. Nan, tinong karon dili panahon nga ang iyang katawhan maghinayhinay sa ilang buluhaton sa pagwali sa Gingharian ug paghimog tinun-an (Isaias 60:8, 22; Mateo 24:14; 28:19, 20) Kinahanglang kita molihok nga nahiuyon sa espiritu sa ginabuhat sa Diyos sa atong panahon. Samtang nagkahiduol ang kataposan, angay nga mas subsob nga duawon nato ang atong mga silingan. Sa pagkamatuod, ang miuswag nga pagsangyaw sa mas daghang magmamantala ug payunir karon nakapakisaw sa kanataran sa kalibotan. Ug mas mokusog pa kining masadyaong pagpanigom.—Isaias 60:11; itandi ang Salmo 126:5, 6.

2. (a) Sumala sa Isaias 40:28-31, unsang tinubdan sa kusog ang atong makuhaan alang sa gikinahanglang kusog sa pagtapos sa buluhaton sa pagwali sa Gingharian? (b) Unsa ang usa ka maayong hinungdan sa paghatag ug ekstrang pagtagad sa kalidad sa atong ministeryo niining panahona?

² Inay mopadaog sa pagbati nga ‘gitak-an’ tungod kay ang usa ka teritoryo subsob gikobrehan, atong pagailhon nga karon mao ang panahon nga kita moampo kang Jehova alang sa gikinahanglang “dinamikong kusog” sa pagtapos sa buluhaton. (Isaias 40:28-31; 1 Juan 5:14) Matuod, milyonmilyon sa “dakong panon” sa “ubang mga karnero” ang natigom na. Apan ang butang nga sa nangagi milampos sa pagtabang sa pila ka tawo basin dili na epektibo sa pagtabang sa uban nga anaa pa sa atong mga teritoryo. (Pinadayag 7:9, 10; Juan 10:16) Busa, ang kalidad sa atong ministeryo nagkinahanglag ekstrang pagtagad.

3. Sa unsang paagi ang bag-ong kadasig ikahatag nato sa atong ministeryo sa kanataran?

³ Uban ang bag-ong determinasyon, kita makahatag ug bug-os nga pagtagad sa pagpauswag sa atong kaepektibo sa ministeryo. Kini makahatag ug bag-ong kadasig sa atong pag-alagad sa kanataran. Apan sa unsang paagi mahimo kini? Pinaagi sa ‘pagtagad kanunay sa atong kaugalingon ug sa atong pagpanudlo,’ dili lamang sa paghimo sa atong ministeryo sumala sa naandan. (1 Timoteo 4:16) Ang atong mga ngabil kinahanglang motanyag ug labaw pa kay sa basta lamang nga “halad sa pagdayeg.” (Hebreohanon 13:15) Kinahanglan kita mahimong hanas sa atong buluhaton. (Proverbio 22:29) Nan, ang gikinahanglan mao ang mahanasong pagtrabaho sa atong teritoryo. Ania ang pila ka bahin sa atong ministeryo nga kinahanglang atong “tagdon kanunay.”

Kon Unsaon Pag-ugmad ang “Bag-ong” Teritoryo

4. Sa unsang paagi kita makaugmad ug “bag-ong” teritoryo diha sa atong asaynment sa kongregasyon?

⁴ Tan-awon nato ang situwasyon sa praktikal nga paagi. Sa daghang dapit, walay bag-o o talagsang masangyawan nga teritoryo. Busa nganong dili ugmaron ang “bag-ong” teritoryo sulod sa asaynment sa kongregasyon? Sa unsang paagi? Aw, kon subsob kitang moduaw, dili kita makalihok nga daw kita wala pa makaduaw nianang balaya pinaagi sa pagsulti lamang kon unsay atong kasagarang ginasulti diha sa mga pultahan. Lagmit, mailhan na kita sa tagbalay kon kita balikbalik nga nagsangyaw sa teritoryo. Ang librong Nangatarongan Pinasukad sa Kasulatan nagahatag ug kapin sa 40 ka introduksiyon nga atong magamit sa atong ministeryo. Kana maandam natog maayo ingon nga butang bag-o ug madanihon pinaagi sa pagkonektar niana sa mga butang nga bag-o ug gikaikagan sa mga tawo nianang dapita. Inay mobating mabalibaron bahin sa subsob nga pagduaw, kinahanglang huptan nato ang positibong tinamdan ug himoon ang atong teritoryo nga “bag-o” pinaagig dekalidad nga mga presentasyon. Apan makatabang ba kini kon dili mahigalaon ang mga tagbalay?

5. (a) Sa unsang paagi mapahimuslan nato ang nangaging dili-mahigalaong tinamdan sa atong kaayohan? (b) Unsay imong nakaplagan nga maayog sangpotanan diha sa inyong dapit? (c) Nganong mapuslanon ang pagpamati ug ang matinud-anong pagdayeg?

⁵ Ang pagkahibalo sa nangaging tinamdan sa usa ka tagbalay mahimong mosangpot sa negatibong mga pagbati bahin sa pagduaw pag-usab. Apan nganong dili gamiton ang maong kasayoran sa imong kaayohan? Sa unsang paagi? Tingali pinaagi sa pagpasabot niana sa sinugdan ug dayon hisgoti ang naestoryahan sa nangaging pagduaw. Tingali makaingon ka: “Maayong buntag, Mr. Hernandez!” Kon maorag haom, makadugang ka: “Komosta ka?” Unya makaingon ka: “Sa dinhi ako sa usang semana, giingnan mo ako nga ang inyong iglesya nag-atiman sa tanan nimong espirituwal nga panginahanglan ug ikaw usa ka aktibong membro. Ingong usa ka silingan nga ugdang nagaisip usab sa relihiyon, mahimo bang mangutana kon unsay ginaingon sa inyong iglesya bahin sa kalaoman sa pagkaluwas sa nukleyar nga panahon?” Unya, itugot nga mosulti siya nimo niana. Dayega ang tagbalay kon makahimo ka sa matinud-anong paagi. Ang pagpamati kaniya ug pagdayeg kaniya basin makausab sa iyang tinamdan. Kadaghanan, ang katawhan motugot sa laing pagduaw kon sila mismo makasulti. Siyempre, buot nimong ipahiuyon ang imong mensahe ngadto sa ginasulti sa tagbalay.

6. (a) Sa unsang paagi kita makabansay sa mga tagbalay sa pagdahom nga kita moduaw nga regular? (b) Unsang pangunang mga pamulong ang makatabang nato nga molampos? (c) Unsay molampos ug maayo diha sa lokal nga teritoryo?

⁶ Pinaagi sa imong ginasulti, makabansay ka sa mga tagbalay sa pagdahom nga kita moduaw nga regular. Sulayi ang pag-ingon: “Hello, Misis Federico! Komosta ka karong adlawa? Sa among pagduaw karon sa among mga silingan, kami nagahisgot sa . . . ” O makaingon ka: “Maayong buntag! Ginahimo namo ang among regular senemanang mga pagduaw. Maayo nga nakabalik ako. Nahimuot ang inyong mga silingan sa bag-ong ulohan nga among ginahisgotan niining pagduawa.” Unya magpadayon. Kini makahimo usab sa teritoryo nga “bag-o” alang kanimo. Ang aktuwal nga han-ay sa mga pulong tingali lahi diha sa inyong nasod, apan kini nagahatag sa pangunang ideya. Nganong dili kini pahimuslan, sa imong kaayohan?

7. (a) Sa pagbiya, sa unsang paagi ang pila ka Saksi nagaandam sa tagbalay alang sa laing pagduaw? (b) Niining bahina, unsay molampos gayod sa lokal nga teritoryo?

⁷ Busa sa pag-andam sa tagbalay alang sa sunod nga pagduaw, ang pipila ka Saksi nagmalamposon sa konklusyong sama niini: “Kami nagapanlantaw sa pagduaw pag-usab kaninyo.” Niadtong nagpanukong makigsulti kaninyo sa sinugdan, tingali makaingon ka: “Nagustohan ko ang atong panaghisgot. Nakapahayag kag maayong mga puntos. Mikabat kadtog pila ka minutos, apan labing menos kita wala maghisgot ug daotang balita, nga atong mabatian sa bisan unsang panahon. Maayo kaayo kadto.” Sa walay duhaduha, maugmad nimo ang ubang nahiangayng mga paagi sa pagpakigsulti sa mga tagbalay. Sa bisan unsang paagi, pinaagig positibong mga ekspresyon, dekalidad nga mga presentasyon, ug kamahigalaon, makasulay kita sa pagtabang sa publiko nga dili mayugot sa atong regular nga mga pagduaw.

Ihatag ang Bug-os nga Pamatuod

8, 9. Unsang mga sugyot ang gihatag alang sa bug-os nga pagpangita sa mga takos?

⁸ Ang laing butang atong matagad aron kanunay kitang magmadasigon mao ang pagkabug-os sa pagpangita sa mga takos. (Buhat 8:25; 20:24) Pananglitan, ang usa ka igsoong lalaki tingali makapangita sa padre de pamilya kon ang usa ka babaye o bata ang moanha sa pultahan sa mga hinapos sa semana o sa magabii. Kalagmitang ang asawa mao ang atong ikasulti sa kadaghanang panahon. Busa kita makahimog bag-ong pagsugod sa usa ka panimalay pinaagi sa pagpakigsulti sa ulo sa pamilya. Unya atong ikapasibo ang mensahe alang kaniya, pinaagi sa pag-ingon sama niini, “Sa imong hunahuna unsay makapasalig sa malipayong kaugmaon alang sa imong pamilya?” o, “Matikdi sa unsang paagi ang Bibliya nagapasiugda sa panaghiusa sa pamilya.” Dayega ang tawo tungod sa maayong mga ideya nga iyang ipahayag.

⁹ Ang laing paagi sa pagkaplag ug “bag-ong” teritoryo mao ang pagpangitag laing membro sa pamilya nga nagapuyo sa samang balay—usa ka apohang-babaye, pag-umangkon o ig-agaw nga nagatungha, usa ka bayaw nga babaye nga nagatrabaho sulod sa semana. Praktikal usab ang pagmatikod pila ka metro sa koryente o kahon sa sulat ang anaa sa pinuy-anan. Kini tingali magpaila sa dapit nga ang mga tawo nag-ayom-ayom sa silong, sa dapit sa kisami, o ubang lugar aron maabangan. Sulayi ang pagkontak niadtong nagaabang—mga estudyante, tagsaanong mga trabahante, mga biyuda, ug uban. Kini makatabang usab sa pagpadako sa mabatonang teritoryo.

10. Unsay laing paagi sa pagpadako sa atong balay-balay nga teritoryo, ug unsay gihimo sa pipila sa pagkontak sa mga trabahanteng panggabii?

¹⁰ Ang lain pang paagi sa pagpadako sa teritoryo sa balay-balay mao ang paghatag usahay nianag pahulay samtang makig-ambit kita sa ubang mga bahin sa atong ministeryo. Aron may kadaiya, kita makatrabaho sa teritoryo pinaagi sa direktang pagtanyag sa usa ka libreng pagtuon sa Bibliya sa balay. Ang pila ka tawo nga wala sa balay sa atong pagduaw basin hikaplagan diha sa ilang dapit sa negosyo o trabaho. Ug ang pagsangyaw sa mga lugar sa negosyo mahimong mabungahon kaayo. Ang pila sa maong mga tawo basin makontak usab kon kita mohimo sa pagsangyaw sa dalan sa nahiangay, mabungahong mga oras. Sa Canada ang mga payunir may maayong mga resulta sa gabii-na-kaayong pagduaw sa mga empliyado sa tibuok-gabiing gasolinahan, mga tindahan, ug mga hotel diin ang mga eskribiyente kasagarang dili puliki nianang panahona ug kadaghanan moangay nga may mabasa. Hinuon, ang mga igsoong babaye kinahanglang molikay sa pila ka lugar sa mga oras nga gabii na kaayo.

11. (a) Unsay ginabuhat sa pila ka Saksi sa dapit diin daghan ang wala sa balay sa unang pagduaw? (b) Unsa ang epekto sa pagkugi sa pagduaw sa mga wala-sa-balay diha sa atong teritoryo, nga may unsang sangpotanan sa ministeryo?

¹¹ Komosta man kadtong wala sa balay sa atong pagduaw? Dinhi na usab, kinahanglang kita magmabug-os. Ang pila ka Saksi nagagamit sa ilang maayong-pagkaatiman balay-balay nga mga rekord tapos gayod sa ilang balay-balay nga buluhaton ug mobalik sa mga dapit diin ang mga tawo wala sa balay, sayo nianang adlawa. Kadaghanan, ang mga tagbalay namauli na sa balay o ang mga panggabiing mga trabahante nagamata nianang panahona. Sa daghang lugar, 50 porsiento o labaw pa wala diha sa balay sa maadlaw. Busa kita, sa pagkamatuod, makadoble sa maong teritoryo pinaagi sa pagduaw sa mga wala sa balay sa nagkalainlaing oras hangtod nga kita may makaplagan sa balay. Ang mga payunir ug eksperyensiadong mga magmamantala mouyon nga ang kakugi sa pagduaw sa mga wala sa balay kadaghanan mohatag ug mas maayong mga bunga kay sa atong unang pagkobre sa teritoryo. Pinaagi sa pagtagad niining bahina sa atong ministeryo lagmit atong maani ang daghang panalangin.—Proverbio 10:22.

Kadtong Moreklamo

12. Angay unsay atong sanong kon moreklamo ang mga tawo nga kita subsob kaayong nagaduaw? Ngano?

¹² Unsay ikasulti ngadto sa mga tawong moreklamo nga kita kanunay nga nagaduaw? Labaw sa tanan, kinahanglang atong ipakita ang pagkamasinabtanon. (Mateo 7:12) Alang kanila, mopatim-aw nga kita mibalik ra dayon. Apan maayo nga hinumdomang bisan sa katuigan na kanhi ang mga tawo nanag-ingon, ‘Dinhi kamo sa usang semana,’ sa dihang nasayod kaayo kita nga unom na ka bulan o labaw pa ang milabay sukad sa atong pagduaw. Gawas pa, ang kanunay nga mga pagduaw makapukaw sa kaikag. Sa Guadeloupe ang usa ka tawo miagpas sa usa ka Saksi sa pag-ingon: “Nakapaniid na ako kaninyo sa daghang semana. Kasagaran, ako dili mamati sa mga Saksi, apan kinahanglang masayod ako nganong kanunay kaayo kamong nagaduaw sa katawhan!” Misangpot ang usa ka bag-ong pagtuon sa Bibliya.

13, 14. Giunsa sa pipila ka isigkamagtutuo pag-atubang ang kahimtang kon moreklamo ang mga tawo?

¹³ Ang pila ka igsoon malulutong nagsulti sa mga tigreklamo sa eksaktong petsa sa nangaging pagduaw ug nagtanyag sa kinabag-ohang mga magasin, nga nagtin-aw nga ang mga artikulo lahi gikan niadtong diha sa mga magasing atong dala sa kataposang panahon sa atong pagduaw. Sa pagpangatarongan sa maong mga tagbalay, kita makaingon nga tingali sila nagdawat ug daghang peryodiko ug mga magasin sukad sa kataposan natong pagduaw, apan kana wala kanunay makabatog maayong balita. Kita makasaysay nga kita nagadalag maayong balita ug ang atong mga pagduaw dili magdugay. Apan kon puliki kaayo ang tagbalay, kita maka-ingon: “Kon karon dili mao ang labing maayong panahong makigsulti kanimo, makaduaw ako kanimo sa usa ka semana o labaw pa.”

¹⁴ Unsa pay ikasulti? Kini depende sa tinamdan sa tagbalay ug ang kasagarang pagkamatinahoron nga gidahom sa dapit diin kita nagapuyo. Ang usa ka igsoong babaye sa Hapon nagpatin-aw sa atong subsob nga mga pagduaw niining paagiha: ‘Ang balita sa telebisyon motaho sa lakaw sa usa ka bagyo nga balikbalik, nga magsubli sa impormasyon nga subsob sa kaayohan niadtong tingali wala makadungog sa nangaging mga pagsibya. Kini gihimo tungod kay nalangkit ang mga kinabuhi. Ang kasubsob sa mga taho mosamot samtang magkaduol ang bagyo. Busa, samtang nagakahiduol ang bagyo sa Armageddon, ang mensahe sa pasidaan kinahanglang ipahayag sa makadaghan kutob sa mahimo aron sa pagluwas ug mga kinabuhi.’ Hinuon, ipahayag nato kanang maluluton ug uban ang pagkasinsero, nga laomang maabot ang kasingkasing sa naminaw.

Pag-atubang sa Hagit sa Pagkawalay-kaikag

15. (a) Unsay mahimong nagadakong hagit kon subsob natong sangyawan ang atong teritoryo? (b) Nganong ang pila ka tawo walay kaikag?

¹⁵ Samtang mosamot ang kasubsob sa atong mga pagduaw, ang nagakadakong hagit mao ang kawalay-kaikag nga kanunay natong mahibalag. Apan ang pagsusi sa pipila sa mga hinungdan sa kawalay-kaikag makadasig kanato sa pagmatikod nga basin posible pa ang pag-abot sa mga kasingkasing sa pipila niining mga tawhana. Ang ilang kawalay-kaikag basin nagabanaag sa ilang pagbati sa kapakyasan ug kawalay-paglaom. Basin gibati nilang walay lutsanan gikan sa kahimtang karon sa kalibotan, nga mangatarongan nga magkinabuhi lamang sila sa labing maayo nga maarangan nila. Ang uban mayugot kay ang pila ka relihiyosong pangulo nalangkit sa politika, sad-an sa imoral nga kagawian, o wala mobarog nga lig-on batok sa seksuwal nga imoralidad. Busa ang maong mga tagbalay nawad-ag kasibot ug nagakinabuhi lamang alang niining adlawa.

16. Sa unsang paagi maabot ang kasingkasing sa usa ka tawong walay kaikag?

¹⁶ Nasayod kitang ang unang Kristohanong mga ministro malamposong misagubang sa samang tinamdan, kay ang pila ka tawo niadto miingon: “Mangaon kita ug manginom, kay ugma kita mangamatay.” (1 Corinto 15:32) Busa, kita nasayod nga anaa kanato ang butang nga kinahanglang mabatian nianang mga tawhana. Bisan pa niana, sa unsang paagi maabot nato ang ilang kasingkasing? Ang usa ka paagi mao ang paghipos nianang gutloa sa atong basahon sa Bibliya, nga pakit-on sila nga atong gihimo kana. Unya kita tingali makasukna kanila sa maayong-pagkapalandong nga mga pangutana sama niini: “Sa imong hunahuna may kasulbaran kaha ang mga suliran karon? Mao ba kaha nga ang kadaghanang tawo wala pa lamang makakaplag sa mga solusyon? Sa imong hunahuna angay bang kita magmapositibo ug magpadayon sa pagpangita?” Alang sa uban, kita tingali makaingon: “Seguradong mouyon ka nga labi pang maayo ang pagkinabuhing may paglaom kay sa dili makalaom ug mas maayong mga butang. Unsay gilaoman nimong makita?” Kita basin makapangutana: “Unsay imong gibati mismo nga mao ang kinadak-ang babag sa panaghiusa ug kalinaw sa kalibotan?” Ang uban pa gayod tingali mangutana: “Sa imong hunahuna ang tanang relihiyon sama ba sa imong gibatbat?” Sa kadaghanan ang maong mga pangutana magpahinabo nga mopahayag ang mga tagbalay sa ilang mga hunahuna. Dayon, inigtubag nila, tinoa nga ikaw mamati. Oo, itugot nga ilang ipahayag ang sulod sa ilang kasingkasing nganha kanimo. Daghan kanila ‘nagapanghupaw ug nagaagulo tungod sa dulumtanang mga butang nga ginabuhat karon.’—Ezekiel 9:4.

17. Sa unsang paagi ang atong mga basahon magamit sa pag-abot sa pipila bisan pag sila sa sinugdan moinsistir nga sila dili interesado?

¹⁷ Ang laing paagi sa pag-atubang sa kawalay-kaikag mao ang pagmatikod sa usa ka punto o pagsupak nga gihimo sa tagbalay ug mobalik uban ang usa ka magasin o ubang basahon sa Watch Tower nga naghisgot niana. Sa sinugdan, basin kini dili pa relihiyosong ulohan, sama sa usa ka artikulo bahin sa kalit nga pagkamatay sa masuso o ang pagkapuo sa kalasangan. Isaysay nga imong gihunahuna kon unsay nakapaikag sa tagbalay ug nahinumdom ka niining artikuloha. Dayon ipunting ang pasukaranang mga ideya diha sa artikulo. Ang usa ka babaye nga bag-o pang mibalibad sa atong basahon nagdawat sa usa ka magasin mga segundo lamang sa ulahi. Ngano? Kay ang Saksi nangutana kon nasayod ba ang babaye nga may 55 milyong aborsiyon sa matag tuig. Kay nalisang sa pagkahibalo niini, nangayo siya sa magasin nga naa ang maong impormasyon.

Pagtino nga Matapos Kini

18, 19. (a) Angay kita ‘magtagad’ sa unsang dugang punto samtang kita nagatuman sa atong ministeryo? (b) Unsang sayop nga mga ideya ang nabatonan sa pila ka tawo mahitungod kanato ug sa atong mga pagtuo, ug sa unsang paagi kita makatubag kanila?

¹⁸ Labaw sa tanan, kinahanglang kitang magmapailobon sa mga tawo. Sultig hinay ug madasigon. Ipakita ang gugma ug kalulot. (Galacia 5:22, 23) Sa dili pa moadto sa sunod nga pultahan, hunahunaa kon unsay nahitabo sa nahaunang pultahan aron makita kon diin mahimo ang pag-uswag. Magmasinabtanon, kay daghang tawo ang may sayop nga mga ideya bahin sa mga Saksi ni Jehova. Sila basin moingon: ‘Nagalikay kamo sa politika ug sibikong mga katungdanan,’ ‘Dili kamo magsundalo,’ o, ‘Nagabungkag kamo sa mga pamilya.’ Apan kining tinamdana sama sa iya sa kalibotan ngadto sa atong isigkamagtutuo sa unang siglo. Ipakita kini sa mga tagbalay, tingali pinaagi sa paggamit sa mga pangutlo gikan sa ulohang “Neyutralidad” diha sa basahong Nangatarongan.

¹⁹ Mahitungod sa unang mga Kristohanon, ang historyanong si Will Durant misulat: “Alang sa usa ka Kristohanon ang iyang relihiyon maoy butang bulag ug labaw kay sa politikanhong katilingban; ang iyang kinalabwang pag-unong dili iyaha ni Cesar kondili kang Kristo. . . . Ang pagpalayo sa Kristohanon sa yutan-ong mga kahikayan alang sa pagano maorag usa ka pagkalagiw gikan sa sibikong katungdanan, paghuyang sa nasodnong kinaiya ug kabubut-on. Gitambagan ni Tertullian ang mga Kristohanon sa pagdumili sa serbisyo militar; . . . Ang mga Kristohanon gipahimangnoan sa ilang mga pangulo sa paglikay sa mga dili-Kristohanon, sa paglikay sa ilang mga dula sa piyesta ingon nga kana linuog, ug ang ilang mga teyatro samag laoya sa kalaw-ayan. . . . Ang Kristiyanidad [sa dihang nangabig] gisumbong sa pagbungkag sa panimalay.”—Caesar and Christ, panid 647.

20, 21. (a) Unsay buot natong matino sa dihang ang mga tawo dili mosanong? (b) Nganong kita angay “dili magakataka” kondili magpadayon sa atong maayong buluhaton sa pagwali sa Gingharian?

²⁰ Ang pila ka tawo dili mamati, bisan pag unsay atong isulti. Apan angay nga kana tungod sa ilang pagsalikway sa mensahe sa Gingharian, dili tungod sa kapakyasan nato sa paghimog dekalidad nga mga presentasyon sa atong ministeryo. (Lucas 10:8-11; Buhat 17:32; Ezekiel 3:17-19) Angay natong buhaton ang atong maarangan uban sa tabang sa Diyos, ug tinoon ni Jehova nga ang buluhaton matapos.—Itandi ang Filipos 1:6.

²¹ Nan, uban ang bug-os nga pagsalig magpadayon sa pagbatog “daghang buluhaton sa Ginoo, kay nahibalo kamo nga ang inyong paghago dili makawang.” (1 Corinto 15:58) “Tagda kanunay ang imong kaugalingon ug ang imong pagpanudlo. Magpaabilin ka niining mga butanga, kay sa pagbuhat niini maluwas nimo ang imong kaugalingon ug ang mga nagapatalinghog kanimo.” (1 Timoteo 4:16) Labaw sa tanan, “dili kita magakataka sa pagbuhat ug maayo, kay sa nahaigo nga panahon kita magaani kon kita dili magakaluya.”—Galacia 6:9.

Makahinumdom Ka Ba?

◻ Unsa ang pila ka paagi aron padayong mahuptan ang positibong tinamdan sa subsob gisangyawang teritoryo?

◻ Sa unsang paagi kita makapangita sa mas bug-os pa sa mga takos?

◻ Sa unsang paagi kita makasulay sa pag-atubang niadtong moreklamo nga kita subsob kaayong nagaduaw?

◻ Sa unsang mga paagi kita makaatubang sa hagit sa kawalay-kaikag?

◻ Unsay makapauswag sa kalidad sa atong ministeryo?

[Kahon sa panid 20]

SAMTANG MASUBSOB NATONG SANGYAWAN ANG TERITORYO,

“Tagda kanunay” ang:

◻ Positibong mga paagi sa pagduol ug mga presentasyon

◻ Mas bug-os nga pagpangita sa mga takos

◻ Pagpailob sa mga moreklamo

◻ Pag-atubang sa mga hagit sa kawalay-kaikag ug sayop nga pagsabot