Pag-atiman sa Binhi sa Gingharian
1 Ang usa ka mag-uuma nagaandam sa yuta ug nagapugas sa binhi, ug unya pagkadako sa iyang kalipay sa dihang motubo na ang binhi! Si Jesus mipakasama sa “pulong sa Diyos” ngadto sa binhi nga gipugas. (Luc. 8:11) Busa, kita buot nga bug-os moambit sa pagpugas sa binhi sa Gingharian, uban sa paglaom nga makaabot kini sa mga tawo kansang mga kasingkasing gipakasama sa “maayong yuta” diha sa sa ilustrasyon ni Jesus.—Mat. 13:19, 23; Luc. 8:15.
2 Nakapribilehiyo ka ba sa miaging bulan sa pagpahimutang ug pipila ka daandaang mga libro, o nahuptan ba nimo ang maayong mga panaghisgot sa Kasulatan uban sa mga tawo diha sa inyong teritoryo? May mahimo ka pa bang dugang sa pag-ugmad sa ilang interes sa mensahe sa Gingharian? Ang mga balikduaw maoy epektibong paagi sa pag-atiman sa interes nga gipakita. Sagad kini mahimo man sa paglabay sa usa o duha ka adlaw sa unang pagkakontak.
3 Sa Pebrero, aduna kita ing dugang kahigayonan sa pagtanyag sa daandaang mga basahon. Ang anaa niana basin mao ra ang gikinahanglan sa maong tawo aron halingon ang iyang tinguha sa pag-uswag sa espirituwal. Usab, mangandam nga ipaambit ang pipila ka punto maylabot sa mga panalangin nga ipatungha sa Gingharian ngadto kanilang may madinawatong mga kasingkasing.
4 Ang pag-oksilyare payunir motagana sa uban sa kahigayonan sa paghimog dugang mga balikduaw ug pagsugod ug bag-ong mga pagtuon. Sa kada tuig daghan ang nagpahimulos sa higayon sa pag-oksilyare payunir sa Marso ug Abril. Niining tuiga ang Marso adunay lima ka Sabado ug ang Abril adunay lima ka Dominggo, usa ka bentaha alang kanilang adunay bug-os-panahong sekular nga mga trabaho.
5 Sa pipila ka kongregasyon, ang interong lawas sa mga ansiyano, ministeryal nga mga alagad, ug ilang mga asawa nagpasunod sa maayong ehemplo pinaagig pag-oksilyare payunir. Sa miaging Abril ang usa ka kongregasyon adunay 83 ka oksilyare payunir ug 12 ka regular payunir. Pagkadakong tinubdan sa kalig-on alang sa tanan sa kongregasyon!
MGA BALIKDUAW MAHIMONG MGA PAGTUON
6 Aron mahimong epektibo sa mga balikduaw, gikinahanglan mo nga adunay mga nota diha sa imong house-to-house record. Kini moabag kanimo sa pagtino sa ulohan nga hisgotan sa dihang mobalik ka. Ang pipila ka magmamantala nagatugot sa tagbalay nga patughan siya sa pagsulti sa unang duaw aron mahibaloan kon unsang mga ulohana ang magpainteres kaniya. Kon sayop ang iyang mga ideya, maoy maalamon nga dili maoy dakong hisgotan ang maong mga komento sa sinugdan, apan, hinunoa, ipasiugda ang mga saad sa Gingharian.
7 Ang buluhatong pagtuon sa Bibliya mao ang dako gayong paagi sa pagbulig sa mga tawong makakat-on sa mga katuyoan sa Diyos. Gamitang usa ka punto diha sa mga basahon nga magpainteres sa tawo. Mangutana, ug dayon ipakita kon sa unsang paagi ang literatura aduna ing andam nga tubag nga iya sa Bibliya. Magamit mo ang libro nga napahiluna mo sa tagbalay o ang lain nga iya nang nakuha.
8 Maingon nga makapagana ang pagpugas sa literal nga binhi ug sa pagsud-ong nga ang mga tanom nagatubo samtang kana atong giatiman, kita aduna gani ing mas dakong katagbawan sa dihang atong makita “ang pulong sa gingharian” nga nagagamot ug nagatubo diha sa mga kasingkasing niadtong atong ginatun-an.