Maisogong Imantala ang Maayong Balita
1 Subay sa kasaysayan, ang matuod nga mga Kristohanon nailhan sa ilang kaisog. Ang mga apostol nga si Pedro ug Juan maoy dakong panig-ingnan niini. (Buh. 4:18-20, 23, 31b) Si Pablo usab nagpadayon sa iyang ministeryo bisan pa sa iyang pagkasugamak ug dakong paglutos.—Buh. 20:20; 1 Cor. 11:23, 28.
2 Sa unsang paagi nga ang mga apostol maingon man ang ubang mga Kristohanon latas sa kasaysayan nakahimo sa pagpadayong maisogong pagmantala sa maayong balita? Nagatubag ang 1 Tesalonica 2:2, “Kami nagbaton ug kaisog pinaagi sa atong Diyos sa pagsulti nganha kaninyo sa maayong balita sa Diyos.” Sa samang paagi, si Pedro ug Juan maingon man ang ubang mga disipulo nakahimo sa pagpahayag sa maayong balita nga maisogon.—Buh. 4:29, 31.
PAGPAKITAG PAGSALIG KANG JEHOVA
3 Ang mga apostol masaligon nga si Jehova nagpaluyo kanila. Ang tanang saad nga gihimo ni Jehova pinaagi sa iyang Pulong nagmatuod. Ug ang uban nga tumanon pa gipasaligan pinaagi ni Jesu-Kristo. Aduna ba kita ing samang pagsalig niini aron imantalang maisogon ang maayong balita? Sa dihang atong makita ang katumanan sa tagna sa Bibliya, kita ba mapalihok sa pagsulti sa maayong balita sa Gingharian sa Diyos uban ang kaisog?
4 Pagadahomon, hinuon, nga ang maong maisogong pagsangyaw makahibalag ug pagsupak. (Juan 15:20) Mao kana ang kahimtang ni Jesus ug sa unang-siglo nga mga Kristohanon. Apan wala kini magpugong kanila ni mopahinay sa gidak-on nga uban niana sila nagsangyaw. (Buh. 4:3, 8-13a) Tungod sa atong Kristohanong pagsunod sa Pulong sa Diyos sa hinungdanong mga gumonhap, kita sa kasagaran gipahatag ug rason sa atong baroganan. Atong isipon ang maong mga okasyon ingong kahigayonan sa maisogong pagmantala sa maayong balita. Sa pagbuhat niana, atong gisundog si Jesu-Kristo ug ang iyang mga apostol.
5 Ang oksilyare payuniring mohatag kanatog mas dakong kahigayonan sa pagmantala sa maayong balita. Daghan nga nag-oksilyare payunir sa Abril gustong mopadayon sa pagbuhat niana sa bulan sa Mayo. Ang imo bang mga kahimtang motugot kanimo sa pag-aplay? Pinaagig panlimbasog nga moambit sa buluhatong katabang nga pagpayunir, atong mapamatud-an ang atong kaugalingon nga sama kang Pablo ug Bernabe. Sa Buhat 14:3 kini nag-ingon nga “sila migugol ug dakong panahon sa pagsulti uban ang kaisog pinaagi sa pagbulot-an ni Jehova.” Kon kita makahimo sa paggahin ug panahon gikan sa ubang kalihokan aron makagugol ug labing menos 60 oras diha sa ministeryo sa kanataran sulod sa usa ka bulan, sa walay duhaduha madugangan ang atong mga panalangin.
6 Ang pagkamaisogon sa ministeryo ilabinang makabulig sa pagtanyag sa mga suskrisyon. Ang mga magasin nasudlan sa nagaluwas-kinabuhi nga mensahe nga gipasukad sa Pulong sa Diyos. Dili kita manuko kondili mosangyaw uban ang kaisog sa pagsundog sa atong Panig-ingnan, si Jesus, ug sa iyang mga apostol.