Andam Ka ba sa Pagsagubang sa Nagahagit-Pagtuo nga Kahimtang sa Pagpatambal?
Hupti kining impormasyona sa lugar nga dali nimong makaplagan ingon sa gikinahanglan
1 Walay nagahunahuna ug dako sa pagkaospital karon o ugma. Sa gihapon, ang ‘panahon ug wala damhang hitabo mahinabo kanatong tanan.’ (Eccl. 9:11) Bisan pa kon dili ka modawat sa medikal nga pagpatambal ingon nga imong gipalabi nga paagi sa pag-atiman sa imong panglawas, unsa may imong buhaton sa pagpanalipod sa imong kaugalingon gikan sa wala-kinahanglanang pagdugang ug dugo kon ikaw maaksidente nga walay panimuot ug dad-on ka dayon ngadto sa usa ka ospital? Oo, ang usa ka aksidente o kalit nga pagkadaot sa imong panglawas mahimong sa hinanali magpasagubang nimo sa usa ka hagit sa imong pagtuo.
2 Kon ikaw maospital gayod tungod sa unsa mang rason, unsa may buhaton mo aron makapabiling matinumanon kon adunay mosulti nimo didto nga ikaw mamatay kon dili magpadugang ug dugo? Magdalidali ka ba sa pagdawat niini nga pangangkon nga mao gayoy morepresentar sa imong kahimtang? Ikaw ba sa bug-os kombensido nga dili ka gusto sa dugo? Andam ba ikaw sa pagsagubang niining hagita sa imong pagtuo ug ‘maglikay gikan sa dugo’?—Buh. 15:28, 29.
3 Ang malamposong pagsukol sa wala-kinahanglana, makadaot nga pagdugang ug dugo sa espirituwal nga paagi magsumikad sa hugot gayod nga pagtuo. Ang maong hugot nga pagtuo kinahanglang ipasukad sa matin-aw nga pagsabot kon unsa ang giingon sa Bibliya bahin sa dugo. Basin hinuon, ikaw, tungod sa emosyon sa maong panahon, madali nga hadlokon sa laing tawo kinsa nagaangkon nga labaw nga nahibalo maylabot sa imong kahimtang kay kanimo. Ikaw ba mapasalaag ngadto sa paghunahuna nga hayan ang mga doktor labaw nga nahibalo bahin sa dugo kay sa Diyos? Sa pagkamatuod, niining mga kahimtanga ikaw buot nga “lig-ong determinado” sa pagbuhat “kon unsa ang maayo” diha sa mga mata ni Jehova, bisan unsa man tingali ang isulti sa mga tawo lamang. (Deut. 12:23-25) Apan mag-inusara ka ba lang sa pagsagubang niini nga hagit?—Eccl. 4:9-12.
‘HOSPITAL INFORMATION SERVICES’ UG ‘HOSPITAL LIAISON COMMITTEES’
4 Sa pagbulig niadtong nagakinahanglan ug tabang sa dihang atubangon sa suliran sa pagdugang ug dugo, ang Sosyedad nagtukod ug Hospital Information Services sa Brooklyn, ug Hospital Information Desk sa sangang opisina sa Quezon City. Kini usab nagtukod ug upat ka Hospital Liaison Committees sa Baguio City, Cebu City, Davao City, ug Metro Manila. Kining maong mga komite gilangkoban sa 18 ka ansiyano nga sa linain gibansay alang niining buluhatona.
5 Ang ‘Hospital Information Services’ makaarang man sa pagsusi sa kapin sa 3,600 ka basahon sa pagpanambal sa tibuok-yuta aron kaplagon ang impormasyon sa pagkamabatonan ug pagkaepektibo sa daghang porma sa wala-ing-dugo nga operasyon ug pagpanambal. Dayon kini mosuplay sa ‘Hospital Liaison Committees,’ sa mga sentro sa pag-atiman sa panglawas, ug pipila ka doktor uban sa impormasyon niining medikal nga mga pag-uswag. (Dihay mga panahon ang ‘Hospital Information Services’ nagpadala ug medikal nga mga artikulo nga nagpakita kon unsay mahimo nga walay dugo ug sa malamposon nagwagtang sa nahimong komprontasyon diha sa usa ka ospital.) Kini padayon nga nagpaalinggat sa mga komite maylabot sa mauyonong mga desisyon sa korte nga makabulig sa mga huwes sa pagtino sa atong mga kaso uban sa dugang pagsabot. Kini usab nagahupot sa mga rekord bahin sa maduyogong mga doktor mao nga ang mga komite aduna ing nunot-panahong mga payl nga magamit sa dihang ang mga suliran sa pagdugang ug dugo motungha.
6 Ginadumala usab sa ‘Hospital Information Services’ ang pagbansay ug buluhaton sa ‘Hospital Liaison Committees.’ Sa mga siyudad nga didto sila nahimutang, ang ‘Hospital Liaison Committees’ sa regular nagahimog matulon-anong mga presentasyon ngadto sa mga kawani sa ospital aron mapauswag ang relasyon uban kanila. Ilang gilista usab kining maong mga kawani aron pangitaon ang dugang mga doktor nga motambal kanato nga walay pagdugang ug dugo. Kining maong mga igsoonang lalaki andam sa pagtabang kanimo, apan dunay hinungdanon abanteng mga tikang nga imong pagabuhaton aron ipahimutang ang pasukaranan alang kanila sa pagbuhat niini nga mas epektibo.
HINUNGDANON ABANTENG MGA TIKANG—WALA PA BA NIMO KINI MABUHAT?
7 Una, paneguroa nga ang tanan diha sa pamilya aduna ing personal medikal direktiba nga dokumento nga bug-os nasulatan—gipetsahan, gipermahan, ug gisaksihan. Ang ubang mga igsoon miadto sa ospital nga dala ang walay-petsa ug/o wala-masaksihi nga dokumento gilalis o gisupak ang pagkabalido niana. Ug ang tanan ba sa atong wala pay bawtismo nga mga anak adunay ilang nasulatan na nga identification cards? Kon wala, diha sa usa ka emerhensiya nga maglangkit sa imong anak, unsaon man sa mga kawani sa ospital sa pagkasayod sa imong baroganan bahin sa dugo ug kon kinsa ang tawgon?
8 Dayon tinoa nga ang tanan magdala niining mga dokumentoha SA TANANG PANAHON. Susiha kini sa inyong mga anak sa di pa sila moadto sa eskuwelahan sa matag adlaw, oo, sa dili pa gani sila moadto sa dulaanan o sa dapit lulinghayawan. Ang tanan kanato kinahanglang magseguro nga dala ta ang maong mga dokumento sa trabahoanan, kon nagabakasyon, o atua sa Kristohanong kombensiyon. Ayaw gayod pagpawala niini!
9 Hunahunaa kon unsay mahitabo kanimo kon ikaw mahidangat sa ospital diha sa ‘emergency room’ sa grabeng kondisyon, nawad-an ug panimuot ug/o dili makasulti sa imong kaugalingon. Kon wala ka ing dala nga dokumento, ug wala pa mahiabot sa ospital ang paryente o ansiyano sa pagsulti alang kanimo, ug gihukman nga ikaw ‘nagakinahanglan ug dugo,’ lagmit gayod nga madugangan ka ug dugo. Intawon, kini nahitabo ngadto sa pipila. Apan kon dala ta ang dokumento, kini maoy mosulti alang kanato, nga mobutyag sa atong pagbuot.
10 Maoy hinungdan nga ang medikal nga dokumento mas maayo kay sa medikal nga polseras o kulentas. Kining naulahi wala magpatin-aw sa atong gibase-Bibliya nga mga rason sa atong baroganan ug wala kanay mga pirma nga nagpamatuod sa gihisgotan. Ang desisyon sa usa ka korte sa Canada nag-ingon bahin sa dokumento sa usa ka sister: “[Ang pasyente] mipili sa bugtong paagi nga posibleng mapahibalo ang mga doktor ug ubang mga magtatagana sa pag-atiman sa panglawas, kon siya gayod mawad-an sa panimuot o sa laing paagi dili makasulti sa iyang gimbut-an, nga siya dili mouyon sa mga pagdugang ug dugo.” Busa ayaw gayod pagpawala niana!
11 Tungod kay ang atong medikal nga direktiba gidesinyo man gayod alang sa emerhensiya nga mga kahimtang, nan diha sa kapilian nga operasyon ikaw magmaalamon sa pagsulat sa imo mismong personal, mas kompleto abanteng direktiba (binase sa atong medikal nga direktiba) aron imong ikalakip ang mga katinoan, sama sa tipo sa operasyon ug mga ngalan sa mga doktor ug ospital. Maoy imong katungod sa pagbuhat niini ug sa ingon makapaneguro sa pagtambal nga imong napili. Bisan tuod ikaw ug ang doktor dili tingali magdahom ug seryosong mga problema, ipatin-aw nga kini nga direktiba pagasundon kon adunay motunghang wala-damhang mga hitabo.—Prov. 22:3.
12 Ang sunod hinungdanong tikang mao ang pagpakigsulti ngadto sa gikinahanglang medikal nga mga kawani nga ikaw makiglabot diha man sa gipili o emerhensiya nga pagtambal. Ngadto kang kinsa ilabina nga ikaw makigsulti?
PAKIGSULTI NGADTO SA MEDIKAL NGA MGA KAWANI
13 ANG MEDIKAL NGA TIM: Kini maoy panahon nga dili gayod mohari ang kahadlok sa tawo. (Prov. 29:25) Kon ikaw daw di-segurado, hayan ang lain mohukom nga ikaw dili tim-os. Sa dihang gikinahanglan ang operasyon, pinili man o emerhensiya, ikaw o ang labing duol nga membro sa pamilya kinahanglang uban sa determinasyon mosuknag pipila laktod nga mga pangutana sa nangulo sa tim nga mag-opera. Ang usa ka importanteng sukna mao, Ang maong tim ba motahod sa gimbut-an sa pasyente ug sa tanang mga kahimtang motambal nga walay dugo? Kon wala kining maong pasalig ikaw dili kaayo protektado.
14 Isulti nga matin-aw ug uban ang halangdong hugot nga pagtuo kon unsa ang imong mga gimbut-an. Himoang matin-aw nga gusto mo ang kapiliang walay-dugo medikal nga pagdumala sa imong problema. Sa kalmado ug masaligon hisgoti ang imo mismong abante medikal nga direktiba ug usab ang pagkanahigawas sa ospital gikan sa ‘liability form.’ Kon ang siruhano dili mouyon sa imong mga gusto, makadaginot ka ug panahon kon mohangyo ka sa administrador sa ospital sa pagpangita ug laing doktor alang kanimo. Bahin kana sa iyang trabaho.
15 ANESTESIYOLOHISTA: Sa tanang medikal tim nga kinahanglang ikaw makigsulti sa dili pa ang operasyon, KINAHANGLANG DILI MO PAKYASON NGA MAKIGSULTI NIINI NGA DOKTOR. May tulubagon nga ikaw magpabiling buhi samtang ang siruhano nagaopera, ang anestesiyolohista mao ang maghimog mga desisyon bahin sa mga butang sama sa paggamit ug dugo. Busa dili ka bug-os napanalipdan kon sa siruhano ka lang makigsulti. Busa, kinahanglang makigsulti ka ug kombensihon ang anestesiyolohista bahin sa imong baroganan, kon kini ba tahoron o dili.—Itanding Lucas 18:3-5.
16 Ang kasagarang paagi, maorag, ang anestesiyolohista sa makadiyot moduaw sa pasyente nga gabii na sa di pa ang operasyon—nga ulahi na kaayo kon ugaling siya supak sa imong baroganan bahin sa dugo. Pakigbisog nga ang siruhano mopili daan ug maduyogong anestesiyolohista nga imong ikasulti nga abante pa kaayo sa gipiling operasyon. Unya may panahon pa sa pagpangita ug lain kon ang una dili mosugot sa imong mga gimbut-an. Ayawg tugoti nga adunay mohikaw kanimo niini nga katungod nga matagbaw sa pagpakigsulti sa anestesiyolohista para sa imong operasyon.
17 Niini nga tanan, ikaw gayod magpatin-aw sa imong di-masabotsabotan nga baroganan: WALAY DUGO. Mohangyo ug mapiliang di-dugo medikal nga pagdumala sa imong kahimtang. Hisgoti ang bisan unsang nailhang mga kapuli sa dugo alang sa imong kahimtang. Kon ang medikal tim mobati nga kini dili mapuslanon sa imong kahimtang, hangyoa sila nga magdukiduki sa ubang mga posibilidad diha sa medikal nga mga basahon. Pasaligi sila nga ikaw makakuhag pipila ka impormasyon kon buot nila pinaagig paghangyo sa imong mga ansiyano nga kontakon ang labing duol nga ‘Hospital Liaison Committee.’
PAGGAMIT SA IMONG MGA KATUNGOD
18 Tinoa pag-ayo ang pormang ‘release from liability’ ug ang ‘consent form’ nga ang ospital mohangyo kanimo sa pagpirma sa dihang dawaton ka na. May mga panahon nga human gayod hisgoti nga sila motahod sa imong mga gimbut-an, ang sunod nga parapo magpahayag nga ang nagpirma mouyon nga ang ospital makapadapat sa “makaluwas-kinabuhi” nga pagtambal sa dihang sila makasagubang ug mga suliran. Mahimong maglakip kana sa dugo. Ikaw aduna ing katungod nga bag-ohon ang bisan unsang mga pulong aron dili ilakip ang dugo o bug-os nga kurusan kana. Ang mga nars mahimong mosulti kanimo nga dili ka makabuhat niana, apan ikaw sarang makahimo! Ipatin-aw nga ang maong porma maoy usa ka kontrata uban kanila ug nga ikaw dili makapirma ug kontrata nga dili mo mauyonan. Kon adunay mosulay sa pagpugos kanimo sa pagpirma batok sa imong kabubut-on, mohangyo nga mikigsulti ka sa administrador ug/o sa hawas sa pasyente alang niana nga sentro sa pag-atiman sa panglawas.
19 Ikaw ba makahimo sa maong mga butang? Oo, makahimo ka. Busa angay ka nga masayod sa imong mga katungod ingong pasyente. Kining maong mga katungod sa tawo dili kutob ra sa pultahan sa dihang makasulod ka na sa ospital. Dili kinahanglan nga imong isurender kini aron matambalan. Ayawg tugoti ang bisan kinsa sa pagsulti kanimo sa laing paagi.
20 Ang usa sa maong katungod gitawag nga katungod sa napahibalo nga pag-uyon, nga nagkahulogang walay pagtambal sa bisan unsang matang nga ipadapat kanimo gawas kon imong gitugotan. Mahimo gani nga modumili ka sa tanang pagtambal kon gusto mo. Ang imong pag-uyon sa pagpatambal kinahanglang subay sa matin-aw nga pagpatin-aw kon unsa ang pagabuhaton sa medikal tim, apil na ang tanang riyesgo. Sunod, sila kinahanglang motug-an kanimo bahin sa tanang kapilian nga mabatonan. Dayon, human ikaw mapahibalo, ikaw makapili kon unsang pagtambala ang imong gusto.
21 Aron sa pagseguro kon unsa ang imong giuyonan, KINAHANGLANG mosukna ka ug maayong mga pangutana sa bisan unsang butang nga wala mo masabti, ilabina kon gamiton sa mga kawani sa ospital ang dagkong mga pulong o medikal nga mga termino. Pananglitan, kon ang doktor moingon nga siya gustong mogamit ug ‘‘plasma,’ mahimong sa walay katahap magkanayon ka nga ang iyang gipasabot maoy “plasma volume expander,” apan dili mao kana. Sa di pa mouyon, mangutana: “Kana ba may sagol nga dugo?” Mahitungod sa iyang mga paagi, mosukna: “Kana bang pagtambala nagalangkit sa paggamit ug mga produktong dugo?” Kon mohubit siya sa pipila ka himan nga buot niyang gamiton, mangutana: “Ang ako bang dugo tipigan (ipundo) sa bisan unsang panahon atol sa paggamit niini nga himan?”
22 Apan unsa may imong buhaton kon nabuhat mo na kining tanan nga gihisgotan sa itaas ug sa gihapon walay kooperasyon o aduna ganiy pipila ka pagsupak sa imong baroganan? Ayaw pagduhaduha sa pagpangayo ug tabang. Ang uban naghulat ug dugang kaayo sa paghangyog tabang ug nagbutang sa peligro sa ila mismong mga kinabuhi.
BILILHONG TABANG SA PANAHON SA PANGINAHANGLAN
23 Matikdi ang mosunod nga paagi sa pagbaton sa gikinahanglang tabang: (1) Sa dihang ikaw o usa ka minahal nagaatubang sa pinili o emerhensiyang operasyon diin adunay pagsupakay kay ang ospital gustong mogamit ug dugo; o (2) kon ang imong medikal nga kahimtang o kaha sa usa ka minahal nagakagrabe; o (3) kon sa kahimtang sa usa ka bata (o hamtong), ang doktor, nars, o administrador moingon nga sila mokuhag order sa korte, nan:
24 TAWGA ANG IMONG LOKAL NGA MGA ANSIYANO kon ugaling wala pa nimo matawag. (Sa pagkamatuod, tungod sa atong baroganan bahin sa dugo, maoy dalan sa kaalam sa pagpaalinggat sa atong mga ansiyano sa bisan unsang panahon nga kita moadto sa ospital.) Sunod, kon gikinahanglan gayod, ANG MGA ANSIYANO MOTAWAG SA LABING DUOL NGA ‘HOSPITAL LIAISON COMMITTEE.’ Kon gusto mo, ang pipila ka membro sa ‘Hospital Liaison Committee’ moadto sa ospital sa maong panahon sa pagtabang kanimo.—Isa. 32:1, 2.
25 Kining mga ansiyano sa ‘Hospital Liaison Committee’ nahibalo kon kinsa ang maduyogong mga doktor diha sa inyong dapit ug kamo makakontak kanila ug mosugod sa paghan-ay sa ubang mga doktor o mga sentro sa pag-atiman sa panglawas aron sa pagbulig. Kon walay mabatonan diha sa lokal, ang mga ansiyano mosusi sa sunod labing duol nga komite. Kon kana dili molampos, sila motawag sa ‘Hospital Information Desk’ sa Quezon City. Sila usab mahimo mang makahikay para sa konsultasyon uban sa maduyogong doktor nga makaarang sa pagpatin-aw sa imong presenteng medikal tim kon unsay pagabuhaton nga walay dugo. Ang mga igsoong lalaki sa ‘Hospital Liaison Committee’ gibansay sa pagdumala sa maong mga kahimtang.
26 Ang mga membro sa ‘Hospital Liaison Committees’ mahinangop usab sa pagbulig kanimo o sa usa ka paryente sa pagpakigsulti sa usa ka doktor o administrador, apan kinahanglang hangyoon mo ang maong tabang. Siyempre, kining mga igsoona dili makahimog mga desisyon alang kanimo, kondili sagad sila makabulig kanimo sa pagtagad sa panghunahuna sa Sosyedad sa maong mga butang ug magpaalinggat kanimo sa mga kapilian sa medikal ug legal nga paagi.
27 Kon ang medikal tim sa gihapon di-inklinado sa pagkooperar, pakigsulti ngadto sa administrador sa ospital nga pulihan sila sa uban nga kaubanan sa iyang kawani kinsa motahod sa imong mga gimbut-an. Kon ang administrador magduhaduha sa pagbuhat niana ug kon sa diha LAMANG nga natino nga nahan-ay na nimo sa laing lugar ang laing siruhano ug ikaw mahimong ikabalhin, nan ikaw aduna ing kapilian nga hatagan ang administrador sa pinetsahan ug pinermahang sinulat nga pahayag nga nagngalan sa di-mokooperar nga mga doktor ug ibutyag nga sila gipapahawa na sa pagtambal kanimo.
28 Imo ba kanang mahimo? Oo, ikaw aduna niana nga katungod. Ug kon ang maong butang sa ulahi moabot atubangan sa usa ka huwes, ang imong sinulat nga pahayag may dakong purohan nga iyang ilhon ang imong mga gimbut-an. Kini usab posibleng magbukas sa dalan sa etikal nga paagi alang sa ubang mga doktor sa maong panahon nga makiglabot ug motanyag sa ilang mga serbisyo alang kanimo. Ug, nga mas importante, ang gikinahanglan mong medikal nga pagtagad maatiman sa dili pa mograbe kaayo ang imong kahimtang. Ayaw paghulat ug dugay kaayo!
29 Samtang dili kami makaaghat kang bisan kinsa sa pagbaton ug ‘health insurance,’ kamo amo gayong pahibaloon nga sagad aduna kitay grabeng mga problema sa pagkuhag sagad may-kooperasyon nga doktor sa pagtambal niadtong wala ing igo o unsa mang medikal nga pagtapal o bayad.
PAGBANTAY SA MAPIT-OSON NGA MGA PANGUTANA
30 Kinahanglang mahibalo ka nga adunay pipila ka pangutana nga isukna sa mga doktor ug sa uban pa nga dili kanunay maayo ang motibo. Ang usa nga sagad ginasukna sa mga doktor (ug sa pipila ka huwes) maoy:
• “Magpakamatay ka ba hinuon (tugotang mamatay ang anak mo) kay sa modawat ug ‘nagaluwas-kinabuhing pagdugang ug dugo’?”
31 Kon moingon kang oo, husto man kana sa relihiyosong kahulogan. Pero kanang tubaga sagad gisabot nga sayop ug may mga panahon gani nga magpatunghag makadaot nga mga desisyon sa korte. Kinahanglang hinumdoman mo nga ikaw wala diha sa ministeryo niini nga kahimtang. Hinunoa, ikaw nakigsulti bahin sa gikinahanglang medikal nga pag-atiman. Busa, kinahanglang ipahiangay mo sa imong tigpaminaw, medikal man o legal.—Sal. 39:1; Col. 4:5, 6.
32 Ngadto sa usa ka doktor, usa ka huwes, o usa ka administrador sa ospital, ang “oo” mahimong magkahulogan nga buot mong mahimong martir o gusto nga isakripisyo ang imong bata tungod sa imong pagtuo. Ang pagsulti kanila bahin sa imong malig-ong pagtuo sa pagkabanhaw niini nga kahimtang dili sagad mapuslanon. Sila mosaway nimo nga usa ka relihiyosong panatiko, nga dili makahimo ug makataronganong mga desisyon sa dihang ang kinabuhi nameligro. Sa kahimtang sa mga bata, ila kang isipon ingong mapasagdanong ginikanan nga nagadumili sa gikaingong “nagaluwas-kinabuhing’ medikal nga pag-atiman.
33 Apan WALA mo isalikway ang medikal nga pag-atiman. Dili ka lang makauyon sa doktor kon UNSANG MATANGA sa pagtambal. Kini nga baroganan sagad mag-usab sa bug-os nga hulagway alang kanila ug kanimo. Gawas pa, maoy sayop alang kanila nga ipakita nga daw ang dugo dili makadaot ug mao LAMANG ang pagtambal nga “makaluwas-kinabuhi.” (Tan-awang How Can Blood Save Your Life?, mga panid 7-22.) Mao nga imo gayong ipatin-aw pag-ayo kanang puntoha. Unsaon mo man sa pagpatin-aw niana? Mahimong makatubag ka:
• “Dili ko gusto (dili ko buot nga ang akong bata) mamatay. Kon gusto ko pa kana (buot ang akong bata) nga mamatay, nagpabilin na lang unta ko sa balay. Apan mianhi ko sa pagdawat ug medikal nga pag-atiman aron (akong bata) mabuhi. Ang gusto ko mao ang kapiliang walay-dugo medikal nga pagdumala sa akong (akong bata) sakit. Aduna may mga kapilian nga mabatonan.”
34 Ang pipila pa ubang mga pangutana nga sagad isukna sa mga doktor ug mga huwes maoy:
• Unsa may mahitabo kanimo kon ang pagdugang ug dugo ipugos kanimo pinaagig mando sa korte? Ikaw ba ang responsable?
• “Ang pagdawat ba o ipugos ang pagdugang ug dugo nganha kanimo magpahinabo kanimo nga mapahawa sa imong relihiyon o mawad-an sa kinabuhing dayon? Unsa man ang pag-isip sa inyong kongregasyon kanimo?”
35 Usa ka sister mitubag sa huwes nga sa maong kahimtang siya dili ang responsable kon unsa ang gihukom sa huwes. Samtang sa usa ka punto husto kadto, ang huwes misabot niadto kay di man diay ang sister ang responsable, nan siya ang manubag alang kaniya. Siya mimando nga dugangan ug dugo.
36 Kinahanglang imong sabton nga sa pagpangutana niining mga suknaa, ang uban sagad nagapangita ug paagi nga makayuhot sa imong pagdumili ug dugo. Ayawg pasagad nga ihatag kana ngadto kanila! Busa unsaon ta man nga malikayan ang maong sayop nga pagsabot? Ikaw makatubag:
• “Kon ang dugo ipugos nganhi kanako sa bisan unsang paagi, kana pareho ra nga ako gilugos. Ako mag-antos sa emosyonal ug espirituwal nga sangpotanan sa maong wala-kinahanglang atake sa tibuok kong kinabuhi. Ako mosukol uban sa tibuok kong kusog batok sa paglapas sa akong lawas nga wala ko uyoni. Ako manlimbasog gayod sa pagdemanda sa akong mga tig-atake sama sa ako gayong buhaton sa kaso sa paglugos.”
37 Ang kusganon, tataw nga impresyon kinahanglang himoon nga ang pinugos nga pagdugang ug dugo alang kanato maoy dulumtanang paglapas sa atong mga lawas. Dili kini inayom-ayom nga butang. Busa barog nga malig-on. Himoang matin-aw nga gusto mo ang kapiliang walay-dugo nga medikal nga pag-atiman.
UNSA MAY IMONG BUHATON ARON MAANDAM?
38 Atong narepaso ang pipila ka butang nga imong gikinahanglan aron mapanalipdan ang imong kaugalingon ug ang imong pamilya gikan sa wala-kinahanglanang pagdugang ug dugo. (Sa ulahi, nagalaom kami nga makataganag mas nga mga detalye sa pagdumala sa mga suliran nga motungha sa dihang ang mga bata ginahulga nga dugangan ug dugo.) Atong nakita usab nga ang Sosyedad sa mahigugmaon nagtaganag tabang sa panahon sa panginahanglan. Unsa man gayoy imong buhaton niini nga impormasyon aron sa pagseguro nga ikaw andam na sa pagsagubang sa nagahagit-pagtuo nga kahimtang sa pagpatambal?
Una: Himoon ang panaghisgot sa pamilya aron ensayohon kining mga butanga ug andamon kon unsa ang inyong isulti ug buhaton, ilabina sa usa ka emerhensiya.
Sunod: Tinoa nga nabatonan mo ang tanang dokumento ang imong gikinahanglan.
Dayon: Sa tim-os iampo kining butanga ngadto kang Jehova nga paluyohan ka sa imong hugot nga tinguha sa ‘paglikay gikan sa dugo.’ Ang pagsunod sa iyang sugo maylabot sa dugo magpaseguro kanato sa iyang pag-uyon alang sa kinabuhing dayon.—Buh. 15:29; Prov. 27:11, 12.
[Kahon sa panid 5]
Kon ang bisan unsang medikal nga kahimtang nagakagrabe na gayod ngadto sa punto nga ginahulga nga dugangan ug dugo, kudliti kining maong kahon kon unsa ang kinahanglang buhaton mo:
1. Tawga ang mga ansiyano sa inyong kongregasyon sa pagtabang kanimo.
2. Patawaga ang mga ansiyano sa labing duol nga ‘Hospital Liaison Committee’ kon gikinahanglan.
3. Ang ‘Hospital Liaison Committee’ makabulig kanimo sa pagpakigsulti ngadto sa mga doktor ug uban pa.
4. Ang ‘Hospital Liaison Committee’ makaabag kanimo sa pagkontak sa ubang mga doktor para sa konsultasyon uban sa presenteng mga siruhano maylabot sa mga kapilian.
5. Ang ‘Hospital Liaison Committee’ makatabang usab kanimo nga ikabalhin ka ngadto sa mas may-pagtahod nga pasilidad alang sa gikinahanglang pagtambal.