Pagpakitag Suportar sa mga Payunir
1 Ang katawhan sa Diyos nailhan sa ilang masibotong pakig-ambit sa ministeryo. Bisan pa nga dili tanan makapayunir, kinahanglan natong panlimbasogan nga maugmad ang espiritu sa pagpayunir. Kita nagamaya uban sa daghan kinsa nakahimo sa pagsulod sa payunir nga pag-alagad.
2 Ang pagkapayunir ug pagpabiling ingon niana maoy usa ka dakong kahimoan. Ang mga payunir nagapas-an sa dakong bahin sa pagwali ug pagpanudlo nga buluhaton. Kini nagakinahanglag dakong paningkamot ug sakripisyo. Sa unsang paagi ang uban makasuportar ug makadasig niining masiboton bug-os panahong mga alagad?
3 Kon Unsay Mahimo: Ang mga payunir nagakinahanglan sa suportar sa mga ansiyano. Dakong pagdasig ang ikatagana sa dihang ang mga ansiyano mosangyaw uban sa mga payunir. Daghang ansiyano mosulay sa pagsangyaw uban sa matag payunir sa kongregasyon labing menos makausa sa usa ka tuig. Usab, ang mga ansiyano gustong magseguro nga ang igong teritoryo mabatonan sa mga grupo. Ang dugang mga tigom sa dayon na nga pagsangyaw ikaeskedyol man sa mahapon o magabii aron mapahiuyon sa mga eskedyol sa mga payunir. Kini ilabina gayong tinuod sa mga bulan sa dihang adunay ubay-ubay nga mga oksilyare payunir.—Isa. 40:11.
4 Ang mga ministeryal nga alagad anaa sa maayong posisyon nga makaabag sa mga payunir pinaagig pagsuportar kanila diha sa ministeryo ug sa makugihong pag-atiman sa mga kahikayan sa kongregasyon. Ang mga payunir nga sister magapabili nga adunay mga igsoong lalaki nga magapanguna sa pag-organisar sa mga grupo sa pag-alagad sa kanataran. Kadtong nagadumala sa literatura ug mga magasin magaseguro nga adunay igong suplay nga mabatonan.
5 Matag Usa Makatabang: Ang mga magmamantala makatabang pinaagig paghikay nga makasangyaw nga mas subsob uban sa mga payunir. Ang mga payunir malipay sa panag-uban ug suportar sa ubang mga magmamantala. Tingali mahikay mo nga makauban sa mga payunir kausa sa semana o kaduha sa usa ka bulan. Ang materyal nga mga butang ikapaambit man sa mga payunir, ug kining pagkamanggihatagona gipabilhan kaayo nila.—Filip. 4:14-19.
6 Ang mga pamilya makabuhat ug labaw pa sa pag-abag sa ilang mga membro nga nagpayunir. Kasagaran, ang mga buhatonon sa panimalay mahikay pag-usab aron matugotan ang usa o dugang pang membro sa pamilya nga makapayunir. Usa ka sister nga may tulo ka anak nagatrabaho sa duha ka adlaw sa semana. Ang iyang mga anak nga lalaki miabag pinaagig pag-atiman sa pagpamalit ug pagtrabaho palibot sa balay. Ang anak nga babaye mitabang sa pagpanghinlo ug pagpangluto. Sukad sa iyang graduwasyon, siya usab misugod na sa pagpayunir, nga nagabanosbanos sa mga adlawng-igtrabaho sa iyang inahan. Ang maong pagbinuligay sulod sa pamilya nakapaarang sa dugang pa nga makapayunir ug nagadalag mga panalangin sa pamilya.
7 Ang makugihong mga payunir nagapamatuod sa ilang kaugalingon nga nahimong usa ka panalangin sa kongregasyon sa daghang paagi. Ang ilang kasibot ug panig-ingnan makadasig sa daghan nga mobuhat ug labaw pa diha sa pag-alagad. Sa pagkatinuod, buot gayod natong himoon ang atong maarangan sa pagsuportar kanila. Kanang nahiusang panikaysikay makapalipay sa tanan ug mosangpot sa pagdayeg kang Jehova.