Pagbalik Uban ang Tumong sa Pagsugod og Pagtuon sa Bibliya
1 Human nga makaplagan ang usa ka interesadong tawo, buot natong huptang buhi ang interes. Ang paghimog mga balikduaw motultol sa mga pagtuon sa Bibliya. Tagda kining mga sugyot sa paghimog epektibong mga balikduaw.
Sa kataposan sa unang duaw, makapahiluna ka ug pasukaranan sa pagbalikduaw pinaagig pagsukna:
▪ “Nahibulong ka ba gayod kon ngano nga daghan man kaayo ang relihiyon?” Sa pagbalik makaingon ka: “Sa miagi nakong duaw, atong nahisgotan kon nganong adunay daghan kaayong relihiyon. Buot nakong mobasa ug usa ka butang nga makapaikag nga akong nakaplagan bahin niining pangutanaha.” Pakliang panid 362 sa librong Nangatarongan (panid 322 sa Ingles) ug basaha ang seksiyon ubos sa sub-ulohang “Nganong adunay daghan kaayong relihiyon?”
2 Ang Diyos ba makaplagan diha sa tanang relihiyon? Alang sa Diyos nga maanaa sa usa ka relihiyon, kinahanglang kini magapatunghag hustong mga bunga.
Sa pagsugod sa usa ka balikduaw, makasukna ka:
▪ “Sa unsang paagi ang relihiyon kinahanglang mag-apektar sa panggawi sa usa ka tawo? Kon unsay giingon ni Jesus sa Mateo 7:17-20 nagahatag kanatog lagda nga kinahanglang sundon sa matuod nga relihiyon.” Basaha ang teksto nga diretso gikan sa kataposan sa parapo 19 sa panid 12 sa librong Pagpangita sa Katawhan sa Diyos. Dayon suknaang tagbalay kon unsay nakita niya diha sa hulagway sa panid 13. Sunod, basaha ang unang duha ka laray sa mga pulong sa parapo 20. “Kining mapintas nga mga buhat nagapaila sa mga relihiyon nga wala magasunod sa pagtultol ni Kristo sa paghigugma sa usag usa, bisan sa atong mga kaaway. Sa akong sunod nga duaw, tingali atong mahisgotan ang maayong mga bunga nga kinahanglang ipatungha sa matuod nga relihiyon.”
3 Unsa may anaa sa umaabot alang niadtong nagapangita sa matuod nga Diyos? Ang usa ka panaghisgot niining pangutanaha diha mismo sa librong Pagpangita sa Diyos motultol sa usa ka pagtuon sa Bibliya.
Sa pagsugod sa usa ka panaghisgot, makaingon ka:
▪ “Tungod sa ekonomikanhong mga suliran, daghang tawo ang nahibulong kon makabaton ba kaha silag positibong panglantaw sa umaabot. Apan ang Bibliya makapadasig kaayo bahin niini. Tugoti ko sa pagpakita kanimo sa saad sa Diyos sa Isaias 65:21, 22, 25. [Basaha ug komentohi sa mubo.] Ang librong Pagpangita sa Katawhan sa Diyos nagatubag sa pipila ka pangutana niining bahina, sugod sa parapo 17 sa panid 372.” Unya ipasundayag ang usa ka pagtuon sa Bibliya, nga nagagamit sa mga parapo 17-20. “Sa sunod semana buot nakong tagdon ang pangutanang, Unsa man ang pundasyon alang sa bag-ong kalibotan nga gisaad sa Bibliya?”
4 Gamitang maalamon ang panahon nga nahibilin sa paghatag og bug-os nga pagpamatuod. [Itanding Buhat 20:21.] Ang paghimog mga balikduaw uban ang tumong nga makasugod og usa ka pagtuon sa Bibliya mahimong magkahulogan sa walay kataposang kinabuhi alang niadtong atong giwalihan.