Magmatibuok-Kalag sa Imong Pag-alagad
1 Ingon nga mga tinun-an ni Jesus, kita natudlo nga magwali sa maayong balita bahin sa Gingharian sa Diyos ug maghimog mga tinun-an ni Jesu-Kristo. (Mat. 24:14; 28:19, 20) Walay laing buluhaton niining yutaa nga ikatandi sa pagkadinalian o pagkamahinungdanon. 4Ang mga kinabuhi sa minilyong katawhan nalangkit. Kana takos gayod sa atong labing maayong pagpaningkamot. Ang tambag ni Pablo mapadapat pag-ayo: “Bisan unsa ang imong pagabuhaton, buhata kana nga tibuok-kalag ingon nga ngadto kang Jehova.” (Col. 3:23) Ang “tibuok-kalag” gihubit ingong nagabaton ug “mabinationg pagkamainiton o nausang-hunahuna nga debosyon.” Ikaw ba tibuok-kalag sa imong pag-alagad?
2 Unsa man ang gikinahanglan sa pagkatibuok-kalag alang kanato? Si Jehova nagtumong sa dalawatong pag-alagad ingong usa ka ikapulo, o ikapulong bahin. (Mal. 3:10) Inay nga nagatudlog usa ka espesipikong kantidad, ang ikapulong bahin nagahawas sa panahon ug panikaysikay nga atong gideboto sa pag-alagad kang Jehova ingong kapahayagan sa atong gugma alang kaniya ug sa pag-ila sa atong dedikasyon ngadto kaniya. (bt92 12/1 p. 15) Ang atong kalihokan kinahanglang magabanaag sa kalalom sa atong debosyon ug gugma kang Jehova. Ang usa ka tawo nga tibuok-kalag mobating natukmod sa pag-alagad kang Jehova diha sa bug-os nga maarangan ngadto sa gilapdon nga itugot sa iyang panglawas ug mga kahimtang.
3 Si Pablo namulong ug pagdayeg sa mga Kristohanon nga “nagapangabudlay ug nagapanlimbasog” sa ilang kaugalingon pinasukad sa paglaom. (1 Tim. 4:10) Sila nagantihan uban sa panalangin ni Jehova, nga ‘nagapadato kanila.’ (Prov. 10:22) Sa kasukwahi, kadtong nagahatag sa paaging dinaginot o mahikawon mapakyas sa pagtagamtam sa kalipay nga magsumikad sa paghatag. (Buh. 20:35) Ang pagpasagad sa paghatag sa atong kinamaayohan sa aktuwal nagakawat kang Jehova sa “ikapulong mga bahin” nga angay kaniya.—Mal. 3:8.
4 Paghatag sa Atong Kinamaayohan: Sa dihang kita makig-ambit sa pagsangyaw ug mohulog sa atong taho, ang taho ba tukma? Ang librong Atong Ministeryo, panid 104, nagapahayag: “Ang imong oras sa pag-alagad sa kanataran mosugod sa dihang mosugod ka sa pagsangyaw ug matapos sa dihang mahuman ka sa kataposang duaw diha sa matag hugna o yugto sa imong pagsangyaw. Ang oras alang sa mga represment o pagkaon sulod sa yugto sa pag-alagad sa kanataran dili ihapon.” Ang maayong pagplano ug panlimbasog gikinahanglan aron makapalampos ug labing maayo sulod sa panahon nga kita anaa sa pag-alagad sa kanataran.
5 Ang paghatag sa atong kinamaayohan nagapasabot nga buhaton nato ang kutob sa atong maarangan sa dihang makig-ambit sa pagsangyaw. Ang usa nga tibuok-kalag dili sa tinuyo maglimite sa iyang pagsangyaw sa panalagsang mga pagsulay sa impormal nga pagpamatuod inay kay sa pakig-ambit sa balaybalay nga buluhaton. Ang usa ka tibuok-kalag, batan-on, di-bawtismadong magmamantala dili mogula sa pagsangyaw tungod lamang sa pag-insister sa iyang mga ginikanan, nga nagapasundayag ug diyutayng interes sa pag-adto sa mga pultahan o pagpakig-ambit sa paghatag ug pamatuod.
6 Si Pablo nagadasig kanato sa pagmentinar sa atong kamakugihon aron dili mahimong tapolan. (Heb. 6:11, 12) Pagkamakapalipay ang pagrepaso sa atong personal nga pag-alagad ug nga walay katarongang maulaw—tungod kay kita nagtibuok-kalag! (2 Tim. 2:15) Ang atong labing dakong kalipay mamatuman sa dihang atong makita taliwala niadtong mga makalabang-buhi sa dakong kasakitan kadtong atong natabangan sa personal. Segurado, si Jehova dagayang nagaganti kanilang nagaalagad kaniya sa tibuok-kalag.