Bag-ong Espesyal Asembliyang Adlaw nga Programa
1 Ang atong pagtuon sa Ang Labing Bantogang Tawo nga Nabuhi Sukad nakapausbaw sa atong pagpabili kang Jesu-Kristo. Sa pagkatukma, ang espesyal asembliyang adlaw nga programa nga magsugod sa Marso magatagik sa temang “Suod nga Nagasunod sa Atong Dakong Sumbanan,” nga magatabang kanato sa pagsabot sa mas bug-os pa kon unsay kahulogan sa pagsunod kaniya.
2 Bisan pa sa edad o mga tuig sa kamatuoran, ang tanan nga motambong sa asembliya mapalig-on nga mahimong labaw pa nga samag Kristo. Ang bahin sa programa magpaila sa tambag ilabina alang sa mga batan-on. Kini magasangkap kanila sa pag-atubang sa mga hagit maylabot sa edukasyon, kalingawan, ug materyalismo. Adunay mga pakigpulong, mga kasinatian, ug mga pasundayag nga nagapatugbaw kon unsaon pagsukol ang impluwensiya sa kalibotan ug himoong sumbanan ang kaugalingon sunod kang Kristo.—1 Ped. 2:21.
3 Ang bag-ong dedikadong mga tawo makabaton ug kahigayonan sa pagpaila sa publiko pinaagi sa pagpabawtismo nga sila mga sumusunod ni Kristo. Ang makapalagsik nga Kasulatanhong panaghisgot sa maong ulohan mag-una sa seremonya sa bawtismo. Kadtong nagatinguhang magpabawtismo sa espesyal adlaw nga asembliya kinahanglang magpahibalo sa ilang tinguha ngadto sa ilang nagadumalang magtatan-aw sa igong panahon aron mahikay niya ang mga ansiyano nga magrepaso sa gilagdang mga pangutana alang sa mga kandidato sa bawtismo.
4 Ang bisita nga mamumulong, kon mabatonan, mohatag sa pangunang pakigpulong, nga nag-ulohang “Pagsunod sa Atong Dakong Sumbanan—Ngadto sa Unsa Kita Natultolan?” Paneguroang madapit ang tanang interesadong mga tawo ngadto niining makapadasig ug makapalig-on-pagtuong programa. Wala nay mas labaw pa o mas magantihong kurso kay sa pagsunod sa atong Dakong Sumbanan, si Jesu-Kristo.—Mat. 19:27-29.