Sila Wala Mobiya sa Pagsangyaw
1 Ang atong ngalan, mga Saksi ni Jehova, nagahubit kon unsa ang atong ginabuhat. Kita nagasangyaw sa mga kahalangdon sa atong Diyos, si Jehova. (Isa. 43:10, 12) Ang matag usa kinahanglang makig-ambit sa paghatag niining maong pagpanaksi kon siya buot nga mahimong membro sa kongregasyon. Ang pagsangyaw nagalakip sa pagduaw sa balaybalay, pagsangyaw sa kadalanan, paghimog mga balikduaw, ug pagdumalag mga pagtuon sa Bibliya. Kitang tanan sa tukma giawhag sa pagpangab-ot alang sa bug-os nga pagpakig-ambit.—1 Cor. 15:58.
2 Ang pipila ka membro sa kongregasyon, hinunoa, limitado kon unsa ang ilang mahimo. Ang seryosong balatian o kaluyahon basin magpugong kanila. Ang masupakong mga paryente hayan maghatag ug malisod nga mga kababagan. Ang usa ka batan-on mahimong pugngan sa di-magtutuong ginikanan. Kadtong nagapuyo sa nahilit nga mga dapit mahimong mobati nga halos imposible ang pagsangyaw. Ang pagkamatahaon makapasibog sa mga maulawon. Ang pipila ka magmamantala niining kahimtanga basin mobati nga dili sila takos ingong mga Kristohanon tungod kay kulang ang ilang mabuhat kay sa uban. Walay katarongan nga ilang pakamenoson ang ilang mga paningkamot. (Gal. 6:4) Sila malipay sa pagkasayod nga si Jehova nahimuot sa dihang ilang gibuhat ang ilang kinamaayohan sa bisan unsang kahimtang nga ilang giatubang.—Luc. 21:1-4.
3 Pagpangitag Paagi nga Makaambit: Linibo ang mga kasinatian nga nagapakita kon sa unsang paagi wala tugoti sa mga indibiduwal ang mga kababagan nga magpugong kanila sa pagsangyaw. Sa ilang pagpanguna, ilang namugna ang nagkadaiyang mga paagi sa paghimog impormal nga pagsangyaw. Silang anaa ra sa balay naggamit sa telepono aron makasangyaw. Ang matag bisita gilantaw nga usa ka malaomang mamiminaw. Bisan pag ang usa ka asawa nga may masupakong pamilya dili makasangyaw sa panimalay, siya magapahimulos sa mga kahigayonan sa pagsulti sa mga silingan o sa uban pa diha sa iyang adlaw-adlawng kalihokan.
4 Ang usa ka batan-on basin did-an sa iyang di-magtutuong ginikanan sa pagpakig-ambit sa dayag nga pagsangyaw. Inay nga dawaton kana ingong di-mabuntog nga babag, mahimong iyang isipon ang iyang mga klasmet ug mga magtutudlo ingong iyang personal nga “teritoryo” ug makahatag ug maayong pamatuod ug tingali makadumala pa gani ug mga pagtuon sa Bibliya. Daghan nga nagapuyo sa halayong mga dapit nakahimo sa pagpakig-ambit pinaagig mga sulat. Kadtong natukmod sa Kristohanong kasibot kanunay gayong makakitag pipila ka paagi aron malikayan ang pagkahimong “dili-aktibo o dili-mabungahon labot sa tukmang kahibalo sa atong Ginoong Jesu-Kristo.”—2 Ped. 1:8.
5 Si Jehova nagapahilunag managsamang suntoan alang sa tanan, nga mao, nga kita kinahanglang “tibuok-kalag” sa atong pagsangyaw. (Col. 3:23) Bisan pag magkalainlain ang gidaghanon sa panahon nga atong gigugol, ang motibo managsama—tiunay nga gugma nga nagagikan sa “usa ka hingpit nga kasingkasing.” (1 Cron. 28:9; 1 Cor. 16:14) Kon atong ginahatag ang atong kinamaayohan, dili gayod nato bation nga kita walay pulos ingong mga membro sa kongregasyon tungod kay diyutay ra ang panahon nga atong mahimo. Sama kang Pablo, kita sa pagkamatinud-anon makaingon nga kita ‘wala magpugong sa pagsulti sa mga butang nga makaayo ni sa pagtudlo diha sa dayag.’—Buh. 20:20.