Pangutana

◼ Unsa may angay huptan sa hunahuna bahin sa pagbasa sa mga parapo diha sa mga tigom?

Dakong bahin sa panahon nga gigahin alang sa Pagtuon sa Bantayanang Torre ug Pagtuon sa Libro sa Kongregasyon gigamit sa pagbasa sa mga parapo. Nagakahulogan kini nga ang igsoong lalaki nga gitudlo sa pagbasa nagahupot sa bug-at nga responsabilidad ingong magtutudlo. Angay niyang basahon kana sa paagi nga ‘makahatag ug kahulogan’ nganha sa materyal aron nga ang mga mamiminaw dili lamang makasabot niana kondili usab madasig sa pagbuhat. (Neh. 8:8) Busa, angayng mangandam pag-ayo ang magbabasa alang sa iyang asaynment. (1 Tim. 4:13; tan-awa ang tun-anan 6 sa Giya sa Tunghaan.) Aniay pipila ka kinahanglanon alang sa makahuloganong pagbasa sa publiko.

Paggamit sa Tukmang Pagpasiugda: Tinoang abante asang mga pulonga ang nanginahanglan ug pagpasiugda aron ikapahayag ang hustong pagsabot.

Litokang Tukma ang mga Pulong: Ang tukmang paglitok ug tin-awng pagsulti gikinahanglan aron ang mamiminaw makasabot sa mga pulong nga anaa sa publikasyon. Tan-awa ang di-sinati nga mga pulong sa diksiyonaryo.

Sulti nga may Gikusgon ug Kainit: Ang pagsulting mainiton makapatunghag interes, makadasig sa mga emosyon, ug makapukaw sa mamiminaw.

Magmainiton ug Magkukabildo: Ang pagkakinaiyanhon moduyog uban sa kalarino. Uban ang pagpangandam ug pagbansay, ang magbabasa mahimong relaks, ug ang resulta mahimong makapadasig inay kay makapuol ug makapakapoy.​—Hab. 2:2.

Basaha ang Materyal Ingon sa Napatik: Ang mga potnot maingon man ang impormasyon sa mga parentesis o mga braket kasagarang ginabasag kusog kon kini nagapatin-aw sa napatik nga teksto. Ang mga eksepsiyon lamang mao ang mga reperensiya nga yanong nagapaila sa tinubdang materyal. Ang potnot kinahanglang basahon kon kini gipunting diha sa parapo, nga paunhan kana sa pag-ingon: “Ang potnot mabasa . . . ” Human mabasa kana, padayon na sa nahibilin sa parapo.

Kon ang pagbasa sa publiko maayong pagkahimo, usa kini sa mga paagi nga kita ‘makatudlo sa uban sa tanang butang nga gisugo’ sa atong Dakong Magtutudlo.​—Mat. 28:20.