Nganong Mohatag Kang Jehova?

SAMTANG naglagiting ang kainit sa adlaw sa gamayng Sidonianhong lungsod sa Sarepta, usa ka babayeng balo mitikubo aron mamunit ug mga tipik sa kahoy. Kinahanglang siya maghaling aron makalutog diyutayng pagkaon​—lagmit ang kataposang pagkaong makaon niya ug sa iyang batang lalaki. Siya nakigbisog aron siya ug ang iyang batang lalaki mabuhi latas sa dugayng hulaw ug tinggutom, ug kini misangko niining makapasubong kahimtang. Sila gigutom.

Usa ka lalaki miduol. Elias ang iyang ngalan, ug ang babayeng balo sa wala madugay nakasabot nga siya usa ka propeta ni Jehova. Daw nakadungog siya bahin sa maong Diyos. Si Jehova lahi kay kang Baal, kansang mapintas, daotang pagsimba kaylap sa iyang yuta sa Sidon. Busa sa dihang si Elias nangayo kaniyag mainom, siya maikagong mitabang. Tingali iyang gibati nga sa pagbuhat niana iyang maangkon ang pabor ni Jehova. (Mateo 10:41, 42) Apan unya si Elias nangayog dugang pa​—diyutayng pagkaon. Gipatin-aw sa babaye nga siya may igong pagkaon alang lang sa kataposang pagpangaon. Bisan pa niana, si Elias nagmalugoton, nga nagpasalig kaniya nga si Jehova milagrosong magtaganag pagkaon kaniya hangtod matapos ang hulaw. Unsay iyang gibuhat? Ang Bibliya nag-ingon: “Busa siya milakaw ug nagbuhat sumala sa pulong ni Elias.” (1 Hari 17:10-15) Kining yanong mga pulong nagbatbat sa usa ka buhat sa dakong pagtuo​—dako kaayo, sa pagkatinuod, nga gidayeg ni Jesu-Kristo ang maong babayeng balo sa halos usa ka libo ka tuig sa ulahi!​—Lucas 4:25, 26.

Bisan pa niana, morag katingad-an nga dako kaayo ang gipangayo ni Jehova gikan sa usa ka babayeng kabos kaayo. Kini matuod ilabina kon atong palandongon ang pag-ampo nga kaniadto gipahayag sa usa ka ilado kaayong tawo. Ang pagkolekta ni Haring David ug mga amot aron gamiton sa iyang anak nga si Solomon sa pagtukod sa templo midasig sa dakong kamahinatagon. Sa modernong mga termino, ang bili sa mga gasa nga giamot maoy binilyong dolyares! Ugaling, si David miingon diha sa pag-ampo kang Jehova: “Kinsa ba ako ug kinsa ba ang akong katawhan, nga kami magbaton ug gahom sa paghimog kinabubut-ong mga halad nga sama niini? Kay ang tanang butang maoy gikan kanimo, ug gikan sa imong kamot mismo kami naghatag kanimo.” (1 Cronicas 29:14) Sumala sa giingon ni David, ang tanang butang iya ni Jehova. Busa sa dihang kita maghatag aron pagpauswag sa maputling pagsimba, kita yanong nagahatag kang Jehova kon unsay iyaha na. (Salmo 50:10) Busa, ang pangutana motungha, Nganong gusto man ni Jehova nga kita mohatag sa unang bahin?

Usa ka Bililhong Bahin sa Matuod nga Pagsimba

Ang labing yanong tubag mao nga sukad sa karaang kapanahonan si Jehova naghimo sa pagpanghatag nga usa ka hinungdanong bahin sa maputling pagsimba. Ang matinumanong tawo nga si Abel naghalad sa pipila sa iyang bililhong kahayopan kang Jehova. Ang mga patriarkang si Noe, Abraham, Isaac, Jacob, ug Job mihimog susamang mga halad.​—Genesis 4:4; 8:20; 12:7; 26:25; 31:54; Job 1:5.

Ang Moisesnong Balaod nagsugo ug naglagda pa gani sa paghatag ug mga amot kang Jehova. Pananglitan, ang tanang Israelinhon gisugo nga mohatag sa ikapulo, o modonar sa ikanapulong bahin sa abot sa yuta ug sa nadugang sa ilang kahayopan. (Numeros 18:25-28) Ang ubang mga amot wala kaayo ilagda. Pananglitan, ang matag Israelinhon gibaoran nga mohatag kang Jehova sa mga unang bunga sa iyang kahayopan ug abot. (Exodo 22:29, 30; 23:19) Bisan pa niana, gitugot sa Balaod nga ang matag indibiduwal maoy magtino kon unsa ka daghan sa iyang unang bunga ang igahatag, basta iyang ihatag ang kinamaayohan. Ang Balaod naghatag usab ug lagda bahin sa mga halad sa pasalamat ug sa panaad, nga bug-os nga kinabubut-on. (Levitico 7:15, 16) Gidasig ni Jehova ang iyang katawhan sa paghatag sumala sa gipanalangin kanila. (Deuteronomio 16:17) Sumala sa nahitabo sa pagtukod sa tabernakulo ug sa ulahi sa templo, ang matag usa mihatag kon unsay gidasig sa iyang kasingkasing nga ihatag. (Exodo 35:21; 1 Cronicas 29:9) Seguradong ang maong kinabubut-ong mga amot labing makapahimuot kang Jehova!

Ubos sa “balaod sa Kristo,” ang tanang paghatag maoy kinabubut-on. (Galacia 6:2; 2 Corinto 9:7) Kana wala magpasabot nga ang mga sumusunod ni Kristo wala na maghatag o mihatag ug menos. Kasukwahi hinuon! Samtang si Jesus ug ang iyang mga apostoles misangyaw sa Israel, ang usa ka grupo sa kababayen-an nagsunodsunod kanila ug nag-alagad kanila gikan sa ilang kaugalingong mga katigayonan. (Lucas 8:1-3) Si apostol Pablo susamang nakadawat ug mga gasa nga nagsuportar sa iyang misyonaryong buluhaton, ug siya sa baylo nagdasig sa pipila ka kongregasyon nga mohatag ug salapi ngadto sa uban nga anaa sa mga kahimtang sa kawalad-on. (2 Corinto 8:14; Filipos 1:3-5) Ang nagamandong lawas sa Jerusalem nagtudlo ug kasaligang mga lalaki sa pagtino nga ang inamot nga mga butang ug salapi giapod-apod ngadto sa nanginahanglan. (Buhat 6:2-4) Tin-aw, nakasabot ang unang mga Kristohanon nga usa ka pribilehiyo ang pagsuportar sa maputling pagsimba sa maong mga paagi.

Bisan pa, basin mahibulong kita kon nganong si Jehova naghimo sa pagpanghatag nga usa ka bahin sa iyang pagsimba. Tagda ang upat ka katarongan.

Kon Nganong Kita Mohatag

Una, si Jehova naghimo sa pagpanghatag nga usa ka bahin sa matuod nga pagsimba tungod kay ang pagbuhat niana maayo alang kanato. Nagpasiugda kini sa atong pagpabili sa pagkamaayo sa Diyos. Pananglitan, kon ang usa ka bata mopalit o mogamag usa ka gasa alang sa usa ka ginikanan, nganong ang ginikanan mopahiyom sa kahimuot? Ang gasa ba nagtagbaw sa usa ka dakong panginahanglan nga dili matagana sa ginikanan sa laing paagi? Lagmit dili. Hinunoa, ang ginikanan malipay sa pagkakitang ang bata nakaugmad sa mapabilhon ug mahinatagong espiritu. Tungod sa susamang mga katarongan si Jehova nagdasig kanato sa paghatag ug malipay sa dihang ato kanang buhaton. Kini ang paagi nga ikapakita nato kaniya nga gipabilhan gayod nato ang tanan niyang way-kinutobang kalulot ug iyang kamahinatagon kanato. Siya mao ang maghahatag sa “matag maayong gasa ug matag hingpit nga hatag,” busa dili gayod kita kawad-ag mga katarongan sa pagpasalamat kaniya. (Santiago 1:17) Labaw sa tanan, gihatag ni Jehova ang iyang hinigugmang Anak mismo, nga nagtugot nga siya mamatay aron kita mabuhing walay kataposan. (Juan 3:16) Makapasalamat ba gayod kita kaniya sa igong paagi?

Ikaduha, kon atong batasanon ang paghatag, pinaagi niana kita makakat-on sa pagsundog kang Jehova ug sa iyang Anak, si Jesu-Kristo, sa labing hinungdanong bahin. Si Jehova sa way-pagkausab nagahatag, sa kanunay mahinatagon. Sumala sa giingon sa Bibliya, siya nagahatag kanatog “kinabuhi ug gininhawa ug tanang butang.” (Buhat 17:25) Tukma nga atong pasalamatan siya alang sa matag pagginhawa nato, matag hungit sa pagkaon nga atong kinaham, sa matag malipayon ug makapatagbawng gutlo sa kinabuhi. (Buhat 14:17) Si Jesus, sama sa iyang Amahan, nagpakitag mahinatagong espiritu. Siya nag-alagad nga walay tihiktihik. Nahibalo ka ba nga sa dihang si Jesus mihimog mga milagro, siya nagbuhat niana nga may kapildihan sa iyang kaugalingon? Dili lamang kas-a ang Kasulatan nagsugid kanato nga sa dihang siya nag-ayo ug mga tawong masakiton, ang gahom ‘migula kaniya.’ (Lucas 6:19; 8:45, 46) Si Jesus mahinatagon kaayo nga gibubo gani niya ang iyang kaugalingong kalag, iyang kinabuhi, ngadto sa kamatayon mismo.​—Isaias 53:12.

Busa kon kita mohatag, kon kaha sa atong panahon, atong kusog, o atong mga kabtangan, atong ginasundog si Jehova ug ginalipay ang iyang kasingkasing. (Proverbio 27:11; Efeso 5:1) Atong ginasunod usab ang hingpit nga sulondan sa tawhanong panggawi nga gibilin kanato ni Jesu-Kristo.​—1 Pedro 2:21.

Ikatulo, ang pagpanghatag magatagbaw sa tinuod ug hinungdanong mga panginahanglan. Tinuod, sayon nga ikatagana ni Jehova ang mga panginahanglan sa intereses sa Gingharian nga wala ang atong tabang, maingon nga siya makahikay nga ang mga bato mosinggit inay nga kita ang gamiton aron pagwali sa pulong. (Lucas 19:40) Apan iyang gipalabi nga pasidunggan kita sa maong mga pribilehiyo. Busa sa dihang mohatag kita sa atong mga katigayonan aron pagpauswag sa intereses sa Gingharian, kita adunay dakong katagbawan sa pagkasayod nga kita nagatuman sa usa ka tinuod nga bahin sa labing hinungdanong buluhaton nga ginahimo niining kalibotana.​—Mateo 24:14.

Dili na kinahanglang isulti nga gikinahanglan ang salapi aron masuportahan ang tibuok-kalibotang buluhaton sa mga Saksi ni Jehova. Sulod sa 1995 tuig sa pag-alagad, ang Sosyedad migastog duolag $60 milyon sa pag-atiman lamang sa mga espesyal payunir, mga misyonaryo, ug mga nagapanawng magtatan-aw diha sa ilang mga asaynment sa pag-alagad. Hinuon, kana gamay lang nga gastos kon itandi sa konstruksiyon ug pagpadagan sa mga sangang buhatan ug mga imprentahan sa tibuok kalibotan. Bisan pa niana, kanang tanan naposible tungod sa kinabubut-ong mga amot!

Ang katawhan ni Jehova kasagarang dili mangagpas nga kon sila mismo dili dato, itugyan lamang nila sa uban ang pagpas-an sa lulan. Ang maong tinamdan mahimong mosangpot nga malaktawan nato ang maong bahin sa atong pagsimba. Sumala ni apostol Pablo, ang mga Kristohanon sa Macedonia nag-antos sa “hilabihang kakabos.” Bisan pa niana, sila nangaliyupo alang sa pribilehiyo nga makahatag. Ug ang ilang gihatag, si Pablo nagpamatuod, “maoy labaw sa ilang maarangan”!​—2 Corinto 8:1-4.

Ikaupat, gihimo ni Jehova ang pagpanghatag nga usa ka bahin sa matuod nga pagsimba tungod kay ang pagpanghatag motabang sa paghimo kanatong malipayon. Si Jesus mismo miingon: “Adunay labaw nga kalipay sa paghatag kay sa pagdawat.” (Buhat 20:35) Kanay paagi sa pagdisenyo kanato ni Jehova. Kini lain pang katarongan kon nganong mahimong mobati kita nga bisan kon pilay atong ihatag kaniya, dili gayod nato matumbasan ang pagpabili nga atong gibati alang kaniya diha sa atong mga kasingkasing. Ikalipay, hinunoa, si Jehova wala magdahom ug labaw kay sa atong ikahatag. Kita makasalig nga siya malipay kon kita malipayong maghatag kon unsay atong maarangan!​—2 Corinto 8:12; 9:7.

Mga Panalangin ang Resulta sa Pagpakitag Mahinatagong Espiritu

Sa pagbalik ngadto sa atong sayosayong panig-ingnan, handurawa nga ang babayeng balo sa Sarepta nangatarongan nga may laing makaatiman sa panginahanglan ni Elias sa pagkaon. Pagkadakong panalangin ang iya untang nalaktawan!

Walay duhaduhang si Jehova magapanalangin niadtong magpakitag mahinatagong espiritu. (Proverbio 11:25) Ang babayeng balo sa Sarepta wala mag-antos tungod sa paghatag sa iyang gihunahuna nga kataposan niyang pagkaon. Gigantihan siya ni Jehova pinaagi sa usa ka milagro. Sumala sa gisaad ni Elias, ang iyang mga panudlanan sa harina ug sa lana wala mahutdi hangtod natapos ang hulaw. Apan iyang nadawat ang labi pang dakong ganti. Sa dihang ang iyang anak lalaki nasakit ug namatay, si Elias, ang tawo sa matuod nga Diyos, nagpasig-uli sa batang lalaki kaniya. Nalig-on gayod siya sa espirituwal tungod niadto!​—1 Hari 17:16-24.

Karong adlawa dili kita magdahom nga mapanalanginan ug mga milagro. (1 Corinto 13:8) Apan gipasaligan gayod kita ni Jehova nga iyang tagan-an sa pangabuhi kadtong nag-alagad kaniya nga tibuok-kalag. (Mateo 6:33) Busa kita mahisama sa babayeng balo sa Sarepta nianang bahina, nga mohatag nga madagayaon, kay masaligon nga si Jehova magaatiman kanato. Sa susama, makapahimulos kitag dagkong espirituwal nga mga ganti. Kon ang atong paghatag maoy bahin sa regular nga rutina, inay kay panagsa, kon makahinumdom lamang, kini magtabang kanato nga himoong yano ang atong mata ug itutok sa intereses sa Gingharian, sumala sa gisugyot ni Jesus. (Lucas 11:34; itandi ang 1 Corinto 16:1, 2.) Kini magtabang usab kanato nga mobating mas suod kang Jehova ug kang Jesus ingong ilang mga isigkamagbubuhat. (1 Corinto 3:9) Ug kini magpausbaw sa dili-tihik, mahinatagong espiritu nga nagtimaan na sa mga magsisimba ni Jehova sa tibuok kalibotan.

[Kahon sa panid 31]

MGA PAAGI SA PAGHATAG NGA GIPILI SA PIPILA

MGA AMOT NGADTO SA TIBUOK-KALIBOTANG BULUHATON

Daghan mogahin o magbadyet ug salapi nga ilang ibutang sa mga kahon sa amot nga ginganlang: “Mga Amot Alang sa Tibuok-Kalibotang Buluhaton sa Sosyedad​—Mateo 24:14.” Kada bulan ang mga kongregasyon magpadala niining salapia ngadto kaha sa tibuok-kalibotang hedkuwarter sa Brooklyn, New York, o sa lokal nga sangang buhatan.

Ang kinabubut-ong mga donasyong salapi mahimong ipadala usab nga direkta ngadto sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, o sa opisina sa Sosyedad nga nag-alagad sa inyong nasod. Ang alahas o ubang mahalong mga butang mahimong ikadonar usab. Ang mubong sulat nga nagpahayag nga kana maoy dihadihang gasa angayng ipataban sa maong mga amot.

KONDISYONAL​-DONASYON NGA KAHIKAYAN

Ang salapi ikahatag ngadto sa Watch Tower Society nga huptang gisalig o in trust hangtod sa pagkamatay sa tigdonar, nga may kondisyon nga engkasog personal nga gikinahanglan, ibalik kini sa tigdonar. Alang sa dugang impormasyon, palihog pagkontak sa Treasurer’s Office sa adres nga gitala sa itaas.

GIPLANONG PAGHATAG

Dugang pa sa dihadihang mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini sila nag-apil sa:

Insyurans: Ang Watch Tower Society manganlan nga benepisyaryo sa usa ka polisa sa life insurance o sa pagretiro/pensiyon nga programa. Ang Sosyedad angayng pahibaloon bahin sa bisan unsang ingon nga kahikayan.

Mga Kuwenta sa Bangko: Mga kuwenta sa bangko, mga sertipiko sa mga deposito, o indibiduwal nga mga kuwenta sa pagretiro mahimong ikabutang nga in trust for o himoong payable on death to sa Watch Tower Society, nga nahiuyon sa mga kinahanglanon sa lokal nga bangko. Ang Sosyedad angayng pahibaloon bahin sa bisan unsang ingong mga kahikayan.

Stocks and Bonds: Ang mga stock o aksiyones ug mga bond ikadonar ngadto sa Watch Tower Society ingong dihadihang gasa o ilalom sa kahikayan diin ang kinitaan magpadayong ibayad ngadto sa tigdonar.

Balay ug Yuta: Ang ikabaligyang balay ug yuta ikadonar ngadto sa Watch Tower Society pinaagi kaha sa paghatag dihadiha o pagreserba sa tibuok kinabuhi sa balay o yuta alang sa tigdonar, kinsa mahimong magpadayon pagpuyo niana samtang buhi pa siya. Ang usa angayng magkontak sa Sosyedad sa dili pa buhatag papeles ang bisan unsang balay o yuta nga idonar sa Sosyedad.

Wills and Trusts: Ang propiedad o salapi mahimong ikabilin ngadto sa Watch Tower Society pinaagi sa usa ka legal-pagkabuhat nga testamento, o ang Sosyedad kanganlang usa ka benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan. Ang usa ka kopya sa testamento o trust agreement angayng ipadala ngadto sa Sosyedad.

Ang Sosyedad nag-andam ug Iningles nga brosyur nga nag-ulohang Planned Giving. Kadtong atua sa Tinipong Bansa nga nagaplano sa paghimog espesyal nga gasa ngadto sa Sosyedad karon o magbilin ug sulondon sa pagkamatay mahimong matabangan sa maong impormasyon. Kana tinuod ilabina kon ilang gitinguha ang pagpalampos sa usa ka tumong sa pamilya o propiedad-plano nga tumong samtang pahimuslan ang mga benepisyo sa buluhisan aron mamenosan ang bili sa gasa o sulondon.

Alang sa dugang impormasyon bahin sa nahisgotan sa ibabaw, pagsulat sa Watch Tower, P.O. Box 2044, 1099 Manila, o sa opisina sa Sosyedad nga nag-alagad sa inyong nasod.