Tanang Matang sa mga Tawo Mamaluwas
1 Maoy kabubut-on ni Jehova “nga ang tanang matang sa mga tawo maluwas ug makadangat sa tukmang kahibalo sa kamatuoran.” (1 Tim. 2:4) Bisan tuod ang katawhan maimpluwensiyahan sa pipila ka sukod tungod sa ilang kagikan ug palibot, sila adunay kabubut-ong gawas ug makapili sa indibiduwal nga paagi kon unsaon nila paggamit ang ilang kinabuhi. (Mat. 7:13, 14) Sa unsang paagi kini makaapektar sa atong panglantaw sa katawhan nga atong sangyawan?
2 Kinahanglang dili kita maghunahuna nga ang interes sa usa ka tawo sa kamatuoran gidiktaran pinaagig iyang nasodnon o kultural nga kagikan o pinaagig posisyon sa katilingban. Ang kamatuoran makadani man niadtong may limitado o taas nga edukasyon, niadtong anaa sa politika, ug ngadto sa mga propesyonal, mga ateyista, ug bisan sa iladong mga mamumuhat ug daotan. Ang katawhan gikan sa tanang kagikan ug sa sosyal nga mga kahimtang nagbag-o sa ilang kanhing kurso sa panggawi ug karon nagalantaw sa kinabuhi sa bag-ong kalibotan sa Diyos. (Prov. 11:19) Busa, dili kita magpanuko sa pagduol sa mga tawo sa tanang matang sa katilingban uban sa mensahe sa Gingharian.
3 Matikbi Kini nga mga Pananglitan: Usa ka lalaki nagplano sa pagpatay sa iyang amaama apan wala kahimo. Sa ulahi mihukom siyang magtubok apan napakyas sa pagbuhat sa ingon. Tapos nga siya nabilanggo gumikan sa pangawat ug pagpayuhot ug droga, ang iyang kaminyoon nadaot. Karong adlawa kining tawhana nagapahimulos sa usa ka malipayong kaminyoon maingon man sa usa ka maayong relasyon uban sa iyang amaama. Unsa may nakapausab? Nagtuon siya sa Bibliya duyog sa mga Saksi ni Jehova ug nagpadapat sa iyang nakat-onan. Wala siya isipa ni Jehova nga dili na matabang.
4 Ang kabantog sa usa ka batan-ong babaye ingong artista sa TV wala makapalipay kaniya. Apan, kay nakadayeg sa maayong moral nga panggawi sa mga Saksi, midawat siya ug usa ka pagtuon sa Bibliya, ug sa wala madugay nagsangyaw na siya ngadto sa uban. Nailhan siya bisan asa siya miadto sa ministeryong pultahan ngadto sa pultahan, apan iyang gisaysay nga buot niyang mailhan ingon nga usa sa mga Saksi ni Jehova inay kay usa ka artista.
5 Sa dihang ang usa ka Saksi misugod sa pagtuon sa Bibliya uban sa usa ka suskritor sa Bantayanang Torre, nadunggan kini sa usa ka silingan ug mitambong sa pagtuon. Ang silingan dihadiha nakaila sa kamatuoran nga maoy iyang ginapangita! Siya ug ang iyang bana mikanselar sa baod sa diborsiyo nga gitugot kanila ug nagpasig-uli sa ilang kaminyoon. Nalangkit siya (asawa) sa astrolohiya ug sakop sa usa ka espiritistikanhong kulto, apan andam niyang gilabay ang mahalong mga libro ug ang tanan pa niyang nabatonan nga nalambigit sa demonismo. Sa wala madugay siya misugod sa pagtambong sa mga tigom ug pagpakigsulti ngadto sa mga paryente ug mga higala bahin sa iyang bag-ong nakaplagang pagtuo. Karon siya mainitong nagapamatuod ngadto sa uban.
6 Dili gayod nato hukman daan ang bisan kinsa. Hinunoa, tugoting ipakig-ambit ta ang maayong balita uban sa katawhan bisan diin. Kita masaligon nga si Jehova, kinsa “nakakita kon unsay anaa sa kasingkasing,” mamahimong ang “Manluluwas sa tanang matang sa mga tawo.”—1 Sam. 16:7; 1 Tim. 4:10.