Kausaban sa Kinahanglanong Oras Alang sa mga Payunir
1 Ang tanan kanato nagapabili sa pagkabaton ug kugihang regular ug oksilyare nga mga payunir diha sa kongregasyon. Bisan sa teritoryo nga limitado ug bug-os nga nakobrehan nga makanunayon, ang mga payunir nagpahimutang ug maayong panig-ingnan pinaagi sa ilang masibotong pag-alagad sa Gingharian. Nadasig nila ang tanang magmamantala nga magpadayong puliki sa pagpangita niadtong “sa husto nahimutang.”—Buh. 13:48.
2 Namatikdan sa Sosyedad ang nagakadaghang kalisdanang giatubang sa mga payunir, ilabina maylabot sa pagpangitag di-bug-os-panahong sekular nga trabaho nga magtugot kanilang igong makaatiman sa ilang personal nga mga panginahanglan aron nga makapabilin diha sa bug-os-panahong pag-alagad. Ang presenteng kahimtang sa ekonomiya sa daghang nasod dugang usab nagpalisod niini alang sa uban nga mosulod sa payunir nga buluhaton, bisan tuod nga kana ang ilang kinasingkasing nga tinguha. Sulod sa di pa dugayng mga bulan, kini ug ang ubang mga hinungdan maampingong ginatagad.
3 Busa, tungod sa mga puntos sa itaas, gikunhoran sa Sosyedad ang kinahanglanong oras alang sa regular ug oksilyare nga mga payunir. Sugod sa 1999 kalendaryong tuig, ang kinahanglanon alang sa regular nga mga payunir mahimong 70 ka oras sa matag bulan, o sa total nga 840 ka oras alang sa tuig. Ang binulang kinahanglanon alang sa oksilyare nga mga payunir mahimong 50 ka oras. Ang kinahanglanong oras alang sa espesyal nga mga payunir ug mga misyonaryo nagpabiling wala mausab, sanglit gihimo sa Sosyedad ang tagana aron tabangan silang maatiman ang ilang gikinahanglang materyal nga mga panginahanglan. Sa ingon, ilang mapunting nga mas bug-os pa ang ilang buluhatong pagsangyaw ug paghimog tinun-an.
4 Gilaoman nga kining kausabana sa mga kinahanglanong oras motabang sa mas pang mga payunir nga makapabilin niining bililhong pribilehiyo sa pag-alagad. Kini usab mag-abli gayod sa dalan sa mas daghang magmamantala sa pagsulod sa regular ug oksilyare payunir nga buluhaton. Pagkadakong panalangin kini alang sa tanan diha sa kongregasyon!