“Magmapailobon”
1 Samtang atong nakita ang kataposan sa daang sistema ni Satanas nga mas nagakahaduol na, hinungdanon nga kita “magmapailobon” samtang nagahulat sa adlaw ni Jehova sa kaluwasan. Ilabina niining talitapos nga panahon, ang tuman-kadaotang mga puwersang kaaway determinado sa pagpatipas sa atong pagtagad gikan sa pangunang isyu sa pagkasoberano ni Jehova ug pagtental kanato nga malinga sa daghang personal nga mga interes. Niining paagiha, si Satanas maglingla kanato ngadto sa paghunong o paghinayhinay diha sa pagwali-sa-Gingharian nga buluhaton. (Sant. 5:7, 8; Mat. 24:13, 14) Diha sa unsang mga paagi nga atong ikapakita ang maong gikinahanglang pailob?
2 Pinaagi sa Pagkamainantoson: Sa dihang atong mahibalag ang kawalay-interes o pagsupak sa atong ministeryo, ang pagkamainantoson motabang kanato nga molahutay sa pagwali. Kita dili daling mahadlok o masakitan kon ang mga tawong atong mahibalag mga bagis o di-maluloton. (1 Ped. 2:23) Kining pangsulod nga kalig-on makapugong kanato sa pagsultig negatibo sa mga tawo sa atong teritoryo kinsa nagpakitag kawalay-pagtagad o kayugot sa atong buluhaton, sa pagkaamgo nga ang maong pahayag magpaluya kanato ug niadtong miduyog kanato sa ministeryo.
3 Pinaagi sa Mapailobong Paglahutay: Makapabug-at kini sa atong pailob sa dihang human sa usa ka maayong panaghisgot diha sa pag-alagad sa kanataran, dili na usab nato maabtan sa balay ang interesadong tawo. Ang samang pagbati tinuod kon kadtong atong ginatun-an hinay ang pag-uswag o pagbarog dapig sa kamatuoran. Bisan pa niana, ang mapailobong paglahutay sagad gantihan sa maayong mga resulta. (Gal. 6:9) Usa ka sister ang mihimog ubay-ubayng mga pagbalikduaw sa usa ka batan-ong babaye antes masugdi gayod ang usa ka pagtuon sa Bibliya. Sa unang lima ka pagduaw, ang babaye napuliki sa ubang mga butang. Sa ikaunom nga pagduaw, ang sister nadigo tungod sa usa ka bunok, apan lamang nakaplagan nga walay tawo sa balay. Bisan pa niana, kay determinado sa paghatag sa babaye ug usa pa ka higayon, ang sister miduaw pag-usab ug nakaplagan ang babaye nga andam motuon. Human niadto, ang estudyante padayong nagmauswagon ug sa wala madugay nagpahinungod sa iyang kinabuhi ngadto kang Jehova.
4 Nahibalo kita nga ang adlaw ni Jehova dili maulahi. Busa maghulat kita sa iyang paghuman sa mga butang, sa pagkahibalo nga ang diyosnong pailob mopatunghag maayong mga bunga. (Hab. 2:3; 2 Ped. 3:9-15) Kita kinahanglang magmapailobon ingon sa gibuhat ni Jehova ug dili mohunong sa ministeryo. “Pinaagi sa pagtuo ug pailob,” mosalig kang Jehova nga moganti kanimo sa imong paghago.—Heb. 6:10-12.