Pangutana
◼ Andam ka ba sa usa ka emerhensiya?
Karong adlawa, “ang panahon ug ang wala damhang panghitabo” sagad nga magmugnag medikal nga emerhensiya. (Eccl. 9:11) Aron makaseguro nga kita andam nianang hitaboa, si Jehova nagtaganag tabang pinaagi sa iyang organisasyon, apan siya nagdahom kanato nga buhaton ang atong bahin. Sa ubos mao ang listahan nga makatabang kanimo.
• Dad-a ang bag-ong kard nga Advance Medical Directive/Release sa tanang panahon.
• Seguroa nga ang imong mga anak nagdala sa bag-ong Identity Card.
• Repasoha ang Enero 1993 nga pasukip sa Atong Ministeryo sa Gingharian, nga nag-ensayo kon unsaon pagpangatarongan sa mga doktor bahin sa pagtambal sa imong anak.
• Repasoha ang mga artikulo bahin sa mga sangkap sa dugo ug mga kapuli sa dugo. (Gisugyot: Ang Bantayanang Torre, Oktubre 1, 1994, panid 31; Hunyo 1, 1990, mga panid 30-1; Marso 1, 1989, mga panid 30-1; Pagmata!, Disyembre 8, 1994, mga panid 23-7; Agosto 8, 1993, mga panid 22-5; Nobyembre 22, 1991, panid 10; ug Atong Ministeryo sa Gingharian, Enero 1993 ug Pebrero 1991 nga mga pasukip. Ibutang kini sa polder aron daling magamit.)
• Matanlagon nga modesisyon kon makatugot ka ba nga gamiton ang mga makina nga magpasirkular sa dugo gawas sa lawas o kon ikaw makadawat ba sa mga produkto nga adunay mga sangkap sa dugo.
• Sa dili pa moadto sa ospital, kon posible gayod, pahibaloa ang mga ansiyano aron sila makapaluyo kanimo ug makakontak sa Hospital Liaison Committee (HLC) kon gikinahanglan.
Himoang Tin-aw ang Imong Pagdumili sa Dugo: Ang mga taho nagpakita nga ang pipila ka igsoon maghulat pa hangtod nga ulahi na kaayo sa pagsulti sa nagaatiman nga mga doktor nga sila dili magpaabonog dugo. Kini dili maayo alang sa medikal nga mga kawani ug magbutang kanimo sa kapeligrohan nga maabonohan. Kon ang mga doktor nahibalo sa imong hugot nga mga pagtuo ug ang imong mga tinguha gipaluyohan sa pinirmahang mga dokumento nga nagsaysay sa imong espesipikong mga gimbut-an, motabang kini kanila sa paglihok nga walay langan ug sagad maghatag kanilag dugang mga kapilian alang sa di-dugo medikal nga pagtambal.
Tungod kay ang medikal nga emerhensiya mahimong mahitabo sa bisan unsang panahon, nga kasagaran sa panahong wala nimo gayod dahoma kini, ang mga tikang himoon karon sa pagpanalipod sa imong kaugalingon ug sa imong mga anak gikan sa pag-abonog dugo.—Prov. 16:20; 22:3.