Tagbawa ang Imong Espirituwal nga Panginahanglan

¹ Ang atong nagsingabot nga “Masibotong mga Magmamantala sa Gingharian” Distritong Kombensiyon maghatag kanatog talagsaong kahigayonan sa pagtagbaw sa atong espirituwal nga panginahanglan. Sama sa lamiang pisikal nga pagkaon, ang programa magapahimsog gayod kanato sa espirituwal uban “sa mga pulong sa pagtuo.” (1 Tim. 4:6) Magpaarang kini kanato nga mas pang masuod kang Jehova. Ug makadahom kita nga makadawat ug tambag ug pagdasig nga makatabang kanato sa pagsagubang sa mga pagsulay sa atong kinabuhi. Si Jehova nagpasalig kanato: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” (Sal. 32:8) Pagkabulahan nato nga nakabaton sa iyang mahigugmaong paggiya sa atong kinabuhi! Tagda ang pipila ka praktikal nga mga lakang nga atong mahimo aron makapahimulos sa labing maayo gikan sa programa sa kombensiyon.

² Kinahanglan Natong Andamon ang Atong Kasingkasing: Kitang tanan adunay kaakohan sa pag-amping sa atong mahulagwayong kasingkasing. (Prov. 4:23) Kini nagkinahanglan nga atong disiplinahon ang atong kaugalingon ug magmatinud-anon kita sa atong mga pagbati. Ang kombensiyon maoy panahon sa pagpamalandong sa atong relasyon uban kang Jehova, panahon sa ‘pagsud-ong pag-ayo sa hingpit nga balaod nga iya sa kagawasan.’ Aron maandam ang atong kasingkasing nga ‘modawat sa pagtisok sa pulong,’ angay natong hangyoon si Jehova sa pagsusi kanato, sa pag-ila sa bisan unsang “masakit nga dalan” nga kinahanglang tul-iron, ug sa pagtultol kanato sa “dalan nga hangtod sa panahong walay tino.”​—Sant. 1:​21, 25; Sal. 139:​23, 24.

³ Paminaw ug Pamalandong: Gidayeg ni Jesus si Maria tungod sa pagpaminaw pag-ayo sa iyang mga pulong, nga nag-ingon: “Gipili ni Maria ang maayong bahin, ug dili kini pagakuhaon gikan kaniya.” (Luc. 10:​39, 42) Kon aduna kitay samang panghunahuna, dili nato tugotan ang gagmayng mga butang nga makabalda kanato. Atong paneguroon nga nakapahiluna na ug atentibo panahon sa tibuok programa. Likayan nato ang pagpakighinabi o paglakawlakaw nga wala kinahanglana ug magmabinantayon nga dili makabalda sa uban pinaagi sa mga cellphone, pager, camera, ug mga camcorder.

⁴ Sa dihang maminaw kita sa mga pakigpulong, maayong magkuha kitag mubong mga nota nga motabang kanato sa pag-analisar kon sa unsang paagi giugmad ang ulohan. Angay natong ilangkit ang atong mabatian sa ato nang nahibaloan. Motabang kini kanato sa pagsabot ug paghinumdom sa impormasyon. Sa dihang repasohon ang atong mga nota, kinahanglang himoon nato kana sa tuyo nga ipadapat ang impormasyon. Ang matag usa kanato makapangutana: ‘Sa unsang paagi makaapekto kini sa akong relasyon uban kang Jehova? Unsang mga pagpasibo ang akong kinahanglang himoon sa akong kinabuhi? Sa unsang paagi akong ikapadapat kining impormasyona sa akong mga pakiglabot sa uban? Sa unsang paagi ako kining magamit diha sa akong ministeryo?’ Ipakighisgot sa uban ang mga punto nga ilabinang nakapalipay kanato. Ang pagbuhat niining mga butanga motabang kanato sa paghupot sa mga pulong ni Jehova ‘diha sa kinataliwad-an sa atong kasingkasing.’​—Prov. 4:​20, 21.

⁵ Atong Ipadapat ang Atong Makat-onan: Human makatambong sa distritong kombensiyon, usa ka delegado miingon: “Ang programa maoy personal kaayo, nga magpalihok sa usa sa pagsusi sa kahimtang sa iyang kasingkasing ug nianang sa iyang pamilya, ug sa paghatag ug mahigugmaong Kasulatanhon nga tabang kon gikinahanglan. Mas nakapaamgo kini kanako sa akong obligasyon nga tabangan pa gayod ang kongregasyon.” Lagmit daghan kanato ang mibati sa ingon. Apan alang kanato dili kay igo na ang pagbiya lamang gikan sa kombensiyon nga mibating napalig-on ug napalagsik. Si Jesus miingon: “Kon nahibalo kamo niining mga butanga, malipayon kamo kon inyo kining buhaton.” (Juan 13:17) Kita kinahanglang makugihong motuman sa mga punto nga mapadapat kanato sa personal. (Filip. 4:9) Kini mao ang paagi sa bug-os nga pagtagbaw sa atong espirituwal nga panginahanglan.

[Kahon sa panid 5]

Pamalandonga Kon Unsay Imong Nadunggan:

■ Sa unsang paagi makaapektar kini sa akong relasyon uban kang Jehova?

■ Sa unsang paagi mag-impluwensiya kini sa akong mga pakiglabot sa uban?

■ Sa unsang paagi akong ikapadapat kini sa akong kinabuhi ug sa akong ministeryo?