“Himoa ang Inyong Sinultihan nga Kanunayng . . . Tinimplahan ug Asin”
1. Unsay buot ipasabot sa paghimo sa atong ‘sinultihan nga tinimplahan ug asin’?
1 “Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.” (Col. 4:6) Ang tinimplahag asin nga mga pulong nagpasabot nga mogamit kitag hustong mga pulong ug mosulti nga madanihon ngadto sa mamiminaw. Hinungdanon gayod ang paghimo niini diha sa ministeryo.
2. Sa unsang paagi nasangyawan ni Jesus ang usa ka Samarianhong babaye?
2 Panig-ingnan ni Jesus: Samtang nagpahulay duol sa usa ka atabay, nangitag paagi si Jesus aron iyang maestorya ang usa ka Samarianhong babaye nga nagkalos ug tubig. Pipila ka higayon sa ilang pag-estoryahay, nahisgotan sa babaye ang dugay nang panagbingkil tali sa mga Hudiyo ug sa mga Samarianhon. Siya mipahayag sa iyang pagtuo nga ang mga Samarianhon naggikan kang Jacob, samtang ang mga Hudiyo usab lig-ong nagtuo nga ang mga Samarianhon naggikan sa mga langyaw. Wala kontraha ni Jesus ang iyang opinyon, hinuon gihimo niyang positibo ang ilang pag-estoryahay. Ingong resulta, iyang nasangyawan ang babaye ug nakabenepisyo usab niana ang mga tawo sa siyudad.—Juan 4:7-15, 39.
3. Sa unsang paagi nato masundog ang ehemplo ni Jesus diha sa ministeryo?
3 Sa dihang kita magsangyaw angay natong hinumdoman ang atong tumong—ang ‘pagpahayag sa maayong balita sa maayong mga butang.’ (Roma 10:15) Buot natong ipaambit sa tagbalay ang makapadasig ug makapalig-ong mensahe gikan sa Bibliya, nga dili maghatag kaniyag impresyon nga atong gidaot ang iyang tinuhoan. Kon siya mopahayag ug sayop nga panglantaw, angay nga ang atong tubag dili makapahagit kaniya. Aduna bay bahin sa iyang opinyon nga mouyon ra kita o mahimong basehan sa paghatag ug tim-os nga komendasyon? Mahimo kitang mogamit ug usa ka teksto pinaagi sa pag-ingon, “Nagtuo ka ba nga tinuod usab ang gihisgotan niining tekstoha?”
4. Unsay angay natong himoon kon ang tagbalay makiglalis?
4 Komosta kon ang tagbalay gusto lang makiglalis? Angay gihapon kitang magpakitag kalumo ug pagkamaluloton sa pulong ug sa buhat. (2 Tim. 2:24, 25) Kon dili siya interesado sa atong mensahe, labing maayo nga mobiya kitang mataktikanhon.—Mat. 7:6; 10:11-14.
5. Sa unsang paagi nakasinatig maayong mga resulta ang usa ka sister tungod sa iyang matinahorong tubag?
5 Maayong mga Resulta: Sa dihang gisangyawan sa usa ka sister ang iyang silingan, ang babaye nasuko pag-ayo ug namalikas. Sa malumong paagi, ang sister miingon: “Pasayloa ko kon mao kanay imong gibati. Mag-estorya na lang unya ta sa sunod.” Duha ka semana ang milabay, nanuktok ang babaye sa pultahan sa balay sa sister, nangayog pasaylo sa iyang gihimo, ug buot na niyang mamati sa isulti sa sister. Ang matinahorong tubag sagad mopatunghag maayong mga resulta!—Prov. 15:1; 25:15.
6. Nganong hinungdanon man ang pagsulting madanihon diha sa ministeryo?
6 Paningkamotan nato nga kanunayng madanihon ang atong sinultihan sa dihang kita magsangyaw sa maayong balita. Bisan kon ang tagbalay dili maminaw, basin mamati ra siya sa sunod higayon nga kita moduaw.