Matulon-anon Alang sa Imong Mamiminaw

ARON himoong matulon-anon ang imong presentasyon alang sa imong mamiminaw, kinahanglang imong himoon ang labaw pa kay sa pagpahayag ug mapuslanong ulohan. Suknaa ang imong kaugalingon: ‘Nganong kinahanglan nga kining maong mamiminaw makadungog niining ulohana? Unsay akong isulti nga mahimong mopabati sa mamiminaw nga sila makakuha gayod ug kaayohan gikan sa pagahisgotan?’

Diha sa tunghaan, kon maasayn ka nga ipasundayag ang paagi sa pagsangyaw sa usa ka tawo, ang imong mamiminaw mao unya ang imong tagbalay. Sa ubang mga kahimtang, ikaw tingali magpakigpulong ngadto sa kongregasyon sa katibuk-an.

Kon Unsa nay Nahibaloan sa Imong Mamiminaw. Suknaa ang imong kaugalingon, ‘Unsa nay nahibaloan sa mamiminaw bahin sa ulohan?’ Angay nga kanay basehan sa imong ipahayag. Kon ikaw magpakigpulong sa kongregasyon nga gilangkoban ug daghang hamtong nga mga Kristohanon, ayaw sublia pagpahayag ang paninugdang mga impormasyon lamang, nga nahibaloan na sa kadaghanan nila. Himoang basehan kining paninugdang mga kamatuoran. Siyempre, kon daghang bag-ong interesado usab ang nagtambong, angay nimong tagdon ang mga panginahanglan sa duha ka grupo.

Ipasibo ang paso sa imong pagpahayag sumala sa nahibaloan na sa imong mamiminaw. Kon ilakip mo ang pipila ka detalye nga lagmit nahibaloan na sa kadaghanan, lakbiti kinig hisgot. Apan hinayhinayag hisgot ang mga ideyang bag-o tingali sa kinabag-an sa imong mga tigpatalinghog aron tin-aw nilang masabtan kini.

Kon Unsay Makahatag ug Kahibalo. Ang pagkamatulon-anon wala magpasabot kanunay sa pagkaadunay bag-ong butang nga isulti. Ang pipila ka mamumulong adunay paagi sa pagsulti sa yanong paagi sa pipila ka sinating mga kamatuoran nga daghan sa mamiminaw bug-os nga makasabot sa unang higayon.

Sa ministeryo sa kanataran, dili igo ang paghisgot sa usa ka balita aron iilustrar nga kita nagpuyo sa kataposang mga adlaw. Gamita ang Bibliya aron ipakita ang kahulogan sa hitabo. Matulon-anon gayod kini alang sa tagbalay. Sa susama, sa dihang hisgotan ang detalye bahin sa kinaiyanhong balaod, o bahin sa katanoman o kahayopan, ang imong tumong angay nga dili aron ipresentar ang makaikag nga siyentipikanhong kamatuoran nga wala pa madungog sukad sa tagbalay. Sa kapulihay, ang imong tumong angay nga aron ikombinar ang ebidensiya gikan sa kinaiyahan uban sa mga pahayag sa Bibliya sa pagpakitang adunay Maglalalang nga nahigugma kanato. Kini makatabang sa tagbalay sa pagsabot sa mga butang pinasukad sa bag-ong panglantaw.

Ang pagpresentar sa usa ka ulohan ngadto sa mamiminaw nga nakadungog na niana ug daghang beses sa nangagi mahimong hagit. Apan aron mahimong usa ka epektibong magtutudlo, kinahanglang mahibalo ka kon unsaon paghimo niini nga malamposon. Sa unsang paagi mahimo kini?

Ang panukiduki makatabang. Inay ilakip lamang sa imong pakigpulong ang mga kasayoran nga mosantop dayon sa hunahuna, gamita ang mga himan sa panukiduki nga gihisgotan sa mga panid 33 hangtod 38. Tagda ang mga sugyot nga gihatag didto bahin sa mga tumong nga angayng paningkamotan nimong makab-ot. Sa imong panukiduki, basin makakaplag kag usa ka dili kaayo sinating hitabo sa kasaysayan nga direktang may kalabotan sa imong ulohan. O basin makakita kag bag-ong pahayag sa balita nga mag-ilustrar sa punto nga giplanohan nimong hisgotan.

Samtang susihon mo ang materyal, pukawa ang imong panghunahuna pinaagi sa pagsukna sa mga pangutanang sama sa unsa? ngano? kanus-a? diin? kinsa? ug sa unsang paagi? Pananglitan: Nganong tinuod kini? Sa unsang paagi kapamatud-an ko kini? Unsang popular nga mga tinuohan ang makapalisod sa pipila sa pagsabot niining kamatuorana sa Bibliya? Nganong hinungdanon kini? Sa unsang paagi mag-apektar kini sa kinabuhi sa usa ka tawo? Unsang pananglitan ang nagpasundayag sa kaayohan sa pagpadapat niini? Unsay gipadayag niining kamatuorana sa Bibliya bahin sa personalidad ni Jehova? Depende sa materyal nga imong gihisgotan, makasukna ka: Kanus-a ba kini nahitabo? Sa unsang paagi makahimo kitag praktikal nga pagpadapat niining materyala karong adlawa? Makapabuhi ka pa sa imong pakigpulong pinaagi sa pagsukna ug pagtubag sa pipila nianang mga pangutanaha sa dihang magahatag kag pakigpulong.

Basin angay sa imong pakigpulong nga imong gamiton ang mga kasulatang sinati sa imong mamiminaw. Unsay imong mahimo aron mahimong matulon-anon ang imong paghisgot niini? Ayaw lamag basaha kini; ipatin-aw kini.

Ang paghisgot sa usa ka sinating teksto tingali mahimong mas matulon-anon kon imong putolputolon ang pagsaysay sa teksto, nga lainon ang mga bahin nga may kalabotan sa tema sa imong pakigpulong ug unya ipatin-aw kini. Konsideraha ang mga posibilidad sa usa ka teksto sama sa Miqueas 6:8 diha sa Bag-ong Kalibotang Hubad. Unsa ang “hustisya”? Kansang sukdanan sa hustisya ang ginahisgotan? Unsaon nimo pag-ilustrar kon unsay ipasabot sa “pagbuhat sa hustisya”? O unsaon nimo pag-ilustrar kon unsay ipasabot sa “paghigugma sa kalulot”? Unsay pagkamakasaranganon? Unsaon nimo pagpadapat ang materyal diha sa kahimtang sa usa ka tawong tigulang? Siyempre, ang materyal nga imong gamiton pagatinoon sa mga butang sama sa imong tema, imong tumong, imong mamiminaw, ug sa panahong gitugot.

Ang simpleng mga kahulogan sa mga termino sagad makatabang. Alang sa pipila ka tawo, katingalahan ang pagkahibalo sa kahulogan sa “gingharian” nga gipunting sa Mateo 6:10. Ang pagpahinumdom sa usa ka kabatbatan basin makatabang pa sa karaang Kristohanon sa pagsabot nga mas tukma sa ginaingon gayod sa usa ka teksto. Matin-aw kini sa dihang atong mabasa ang 2 Pedro 1:5-8 ug unya batbaton ang nagkalainlaing mga hiyas nga gihisgotan nianang mga bersikuloha: pagtuo, kaligdong, kahibalo, pagpugong-sa-kaugalingon, pagkamainantoson, diyosnong pagkamahinalaron, inigsoong pagbati, ug gugma. Sa dihang gamiton sa samang konteksto ang mga pulong nga puloparehog kahulogan, ang imong pagbatbat niana makatabang sa paghatag sa kalainan sa usa ka pulong gikan sa lain. Matuod kini sa mga termino sama sa kaalam, kahibalo, katakos sa pag-ila, ug pagsabot, nga gigamit sa Proverbio 2:1-6.

Ang imong mamiminaw mahimong makatuon gikan niana kon ikaw mangatarongan lamang bahin sa usa ka teksto. Daghang tawo matingala sa una nilang pagkaamgo nga sa Genesis 2:7 diha sa pipila ka hubad sa Bibliya, si Adan giingong usa ka buhing kalag ug sumala sa Ezequiel 18:​4, ang mga kalag mamatay. Sa usa ka higayon, gipakuratan ni Jesus ang mga Saduseo pinaagi sa pagpunting sa Exodo 3:​6, nga giangkon nilang gituohan, ug unya gipadapat kana sa pagkabanhaw sa mga patay.​—Luc. 20:​37, 38.

Usahay makapatin-aw ang pagpunting sa konteksto sa usa ka kasulatan, sa mga kahimtang panahon sa pagsulat, ug kon kinsay nagsulti o nagpatalinghog. Ang mga Pariseo nahibalo kaayo sa Salmo 110. Bisan pa niana, gipaila kanila ni Jesus ang usa ka hinungdanong detalye nga makaplagan sa unang bersikulo. Siya nangutana: “‘Unsay inyong hunahuna bahin kang Kristo? Kansang anak siya?’ Sila miingon kaniya: ‘Kang David.’ Siya miingon kanila: ‘Nan, ngano man nga si David pinaagi sa pagdasig nagtawag kaniya nga “Ginoo,” nga nag-ingon, “Si Jehova miingon sa akong Ginoo: ‘Lingkod sa akong tuong kamot hangtod nga ibutang ko ang imong mga kaaway sa ilalom sa imong mga tiil’”? Busa, kon si David nagtawag kaniya nga “Ginoo,” unsaon man niya pagkahimong iyang anak?’” (Mat. 22:41-45) Sa dihang ikaw mangatarongan pinasukad sa Kasulatan sama sa gihimo ni Jesus, ikaw makatabang sa mga tawo sa pagbasang mas maampingon sa Pulong sa Diyos.

Sa dihang ipahayag sa mamumulong ang panahon sa pagsulat sa usa ka basahon sa Bibliya o ang panahon sa usa ka panghitabo, angay usab nga iyang batbaton ang mga kahimtang nga naglungtad niadtong panahona. Nianang paagiha, ang mamiminaw makasabot nga mas tin-aw sa kahinungdanon sa basahon o sa panghitabo.

Ang mga pagtandi makatabang sa paghimong mas matulon-anon sa imong ipahayag. Ikaw makatandi sa usa ka popular nga opinyon ug sa giingon sa Bibliya bahin sa samang punto. O ikatandi mo ang duha ka parehong mga asoy sa Bibliya. May mga kalainan ba? Ngano? Unsay makat-onan nato gikan niana? Ang imong paghimo niini makahatag sa imong mga tigpatalinghog ug bag-ong panglantaw bahin sa ulohan.

Kon naasayn ka nga mohisgot sa usa ka bahin sa Kristohanong ministeryo, makapanindot ka sa imong presentasyon pinaagi sa pagsugod uban sa usa ka sumaryo. Hisgoti kon unsay himoon, kon nganong kinahanglang himoon kini, ug kon sa unsang paagi nalangkit kini sa atong katibuk-ang mga tumong isip mga Saksi ni Jehova. Unya ipatin-aw kon diin, kanus-a, ug sa unsang paagi himoon ang buluhaton.

Unsa na man kon gikinahanglan sa imong pakigpulong ang paghisgot sa pipila sa “lawom nga mga butang sa Diyos”? (1 Cor. 2:10) Kon mosugod ka pinaagi sa pagpaila ug sa pagpatin-aw sa pipila ka hinungdanong mga elemento sa ulohan, ang mga detalye mas daling masabtan. Ug kon ikaw motapos uban sa mubong sumaryo sa imong materyal, ang imong mamiminaw lagmit mobating matagbawon nga sila may nakat-onan gayod.

Tambag Bahin sa Kristohanong Pagkinabuhi. Ang imong mamiminaw ilabinang makakuhag kaayohan kon tabangan mo sila sa pagsabot kon sa unsang paagi ang impormasyon sa imong pakigpulong mapadapat diha sa ilang mga kinabuhi. Samtang imong susihon ang mga kasulatan diha sa materyal nga naasayn kanimo, suknaa ang imong kaugalingon, ‘Nganong kining impormasyona gitipigan diha sa Kasulatan hangtod sa atong adlaw?’ (Roma 15:4; 1 Cor. 10:11) Palandonga ang mga kahimtang sa kinabuhi nga ginaatubang sa imong mamiminaw. Tagda ang mga kahimtang sa kahayag sa tambag ug mga prinsipyo diha sa Kasulatan. Sa imong pakigpulong, pangatarongan pinasukad sa Kasulatan aron ipakita kon sa unsang paagi kana makatabang sa usa ka tawo sa pagsagubang sa maalamong paagi sa maong mga kahimtang. Likayi ang malangkobong mga pahayag. Hisgoti ang espesipikong mga tinamdan ug mga lihok.

Sa sinugdan, ipadapat ang usa o duha sa mga sugyot sa itaas diha sa pakigpulong nga imong ginaandam. Samtang makabaton kag kasinatian, ipadapat ang daghan pa niana. Sa ngadtongadto ikaw makadiskobre nga ang mamiminaw mahinamong magpaabot sa imong mga pakigpulong, kay masaligon nga sila may madunggan nga makahatag gayod kanilag kaayohan.