Paggamit sa Giasayn nga Materyal

ANG Bibliya nagtandi sa Kristohanong kongregasyon sa tawhanong lawas. Gikinahanglan ang matag sangkap, apan “dili tanan managsamag kagamitan.” Nahiuyon niana, angay natong buhaton ang bisan unsang pribilehiyo sa pag-alagad nga gisalig kanato. Kinahanglan nga atong masabtan ug atimanon pag-ayo ang bisan unsang asaynment nga pakigpulong inay pakamenoson ang bili sa pipila ka ulohan kay gihunahuna natong mas makaiikag ang ubang mga ulohan. (Roma 12:4-8) Ang matinumanon ug maalamong ulipon nga matang mao ang may kaakohan sa pagtaganag espirituwal nga pagkaon “sa hustong panahon.” (Mat. 24:45) Kon atong gamiton ang personal natong mga katakos aron sa paghan-ay sa mga pakigpulong sumala sa mga instruksiyon nga atong nadawat, gipabilhan nato ang maong kahikayan. Makatabang kini sa hapsay nga paglihok sa kongregasyon sa katibuk-an.

Kon Unsay Ilakip. Kon giasayn kanimo ang usa ka ulohan sa tunghaan, seguroa nga han-ayon kanang ulohana ug dili ang laing ulohan. Sa kadaghanang kahimtang, ang tinong reperensiya itagana. Kon ikaw wala sultihi sa pinatik nga materyal nga gamiton ingong basehan sa imong pakigpulong, ikaw makakuhag materyal gikan sa mga tinubdan nga imong pilion. Bisan pa niana, samtang ikaw magaandam sa imong pakigpulong, seguroa nga ang tibuok nga presentasyon mahan-ay nga binase sa giasayn nga ulohan. Sa paghukom kon unsay ilakip, angay nga tagdon usab nimo ang imong mamiminaw.

Tun-ig maayo ang materyal nga anaa sa reperensiya, nga analisahon ang mga kasulatang nalakip niana. Unya palandonga kon unsaon paggamit kana sa labing epektibong paagi alang sa kaayohan sa mamiminaw. Pagpilig duha o lagmit tulo ka punto gikan sa pinatik nga materyal aron gamiton nga mga pangunang punto sa imong pakigpulong. Sa susama, pagpilig mga kasulatan gikan sa materyal nga giasayn nga giplanohan nimong basahon ug hisgotan.

Unsa ka daghan sa maong materyal ang imong hisgotan? Kon unsa lamay ikapahayag nimong epektibo. Ayawg isakripisyo ang maayong mga metodo sa pagtudlo aron ikalakip ang daghan kaayong impormasyon. Kon ang pipila sa materyal dili mohaom sa tumong sa imong pakigpulong, isentro ang atensiyon sa mga bahin nga makatabang kanimo sa pagkab-ot sa maong tumong. Gikan sa materyal nga giasayn, gamita kon unsay labing matulon-anon ug mapuslanon alang sa imong mamiminaw. Ang imong tumong niining puntoha sa talambagan sa pakigpulong maoy, dili aron tan-awon kon unsa ka daghan ang imong mahisgotan, kondili aron gamiton kon unsay giasayn ingong basehan sa imong pakigpulong.

Ang imong pakigpulong angay nga dili lamang yanong sumaryo sa materyal nga giasayn. Angay kang magplano nga ipatin-aw ang pipila ka punto, isaysay ang mas daghang detalye bahin niana, iilustrar kana, ug mahimong ihatag pa ang usa ka pananglitan sa pagpadapat niana. Ang dugang nga mga ideya angayng gamiton sa paghan-ay sa hinungdanong mga punto gikan sa materyal nga giasayn kanimo inay sa pagpuli sa maong materyal.

Ang mga igsoong lalaki nga nakabaton sa kinahanglanong mga kuwalipikasyon isip mga magtutudlo sa ngadtongadto mahimong hangyoon sa paghatag ug instruksiyon panahon sa Tigom sa Pag-alagad. Nasabtan nila nga kinahanglang gamitong epektibo ang materyal nga giasayn inay pulihan kanag lain. Sa susama, ang mga igsoong lalaki nga mohatag ug mga pakigpulong publiko hatagag mga laraw aron pagasundon. Kini mopaposible sa pagpaayon-ayon, apan kini nagpaila sa tin-aw sa mga pangunang punto nga han-ayon, sa suportar nga mga argumentong gamiton, ug sa mga kasulatan nga maoy basehan sa pakigpulong. Ang pagkat-on kon unsaon pagtudlo nga ginamit ang materyal nga giasayn ingong pasikaranan maoy usa ka hinungdanong bahin sa pagpangandam alang sa ubang mga asaynment nga pakigpulong.

Kini nga pagbansay makatabang usab kanimo sa pagdumalag progresibong mga pagtuon sa Bibliya sa balay. Makatuon ka sa pagsentro sa atensiyon nganha sa tun-anang materyal inay usbon ang ulohan pinaagi sa pagpasiugda sa ubang mga butang nga tingali makaiikag apan dili kinahanglanon aron masabtan ang ulohan. Bisan pa niana, kon imong masabtan ang tinuod nga katuyoan niining maong tun-anan, ikaw dili mahimong pig-ot kaayo sa pagpabilin diha sa ginatun-ang materyal nga mapakyas ka sa paghatag ug dugang katin-awan nga mahimong gikinahanglan sa estudyante.