Gipasimple Namo ang Among Kinabuhi

Si Madián ug Marcela haruhay ug kinabuhi sa Medellín, Colombia. Dakog suweldo si Madián, maong nagpuyo sila sa komportable kaayong apartment. Pero naay nakapalihok nila sa pagsusi pag-usab sa ilang mga prayoridad ingong mga alagad ni Jehova nga Diyos. Sila miingon: “Niadtong 2006 mitambong mi sa espesyal nga asembliya nga may temang ‘Hupting Yano ang Imong Mata.’ Ang kadaghanan sa mga pakigpulong nagdasig namo nga pasimplehon ang among kinabuhi aron bug-os nga makaalagad sa Diyos. Pagbiya namo sa asembliya, among naamgohan nga lahi ang among ginahimo sa among nadunggan. Naanad mi nga magsigeg pamalit bisag walay igong kuwarta, maong dagko mig utang.”

Ang mga pakigpulong sa asembliya nakapaamgo kang Madián ug Marcela nga kinahanglan silang mohimog kausaban, maong gipasimple nila ang ilang kinabuhi. “Gimenosan namo ang among galastohan,” sila miingon. “Mibalhin mi sa mas gamay nga apartment, gibaligya ang among sakyanan, ug mipalit ug motorsiklo.” Wala na sab sila moadto sa mga shopping mall aron dili sila matental sa pagpamalit ug mga butang. Gidugangan nila ang ilang panahon sa pagsangyaw sa ilang mga silingan bahin sa Bibliya. Ug nakig-uban sila sa ilang mga higala nga madasigong nag-alagad kang Jehova nga Diyos ingong espesyal payunir.a

Ngadtongadto, midesisyon si Madián ug Marcela nga pauswagon ang ilang ministeryo pinaagi sa pagtabang sa gamayng kongregasyon sa usa ka baryo. Aron makabalhin didto, si Madián miundang sa iyang trabaho. Ang iyang manedyer wala makasabot kon nganong moundang siya. Busa nangutana si Madián kaniya: “Dako kag suweldo, pero malipayon ba ka Ma’am?” Miangkon ang manedyer nga dili siya malipayon, kay daghan kaayo siyag problema. Dayon giingnan niya ang iyang manedyer: “Busa ang kalipay wala magdepende kon unsa ka dako ang imong suweldo kondili sa pagbuhat sa butang nga makapalipay gyod nimo. Malipayon mi sa akong asawa dihang makatudlo sa mga tawo bahin sa Diyos, ug gusto namong mas magmalipayon pinaagi sa paggahin ug dugang panahon niini nga buluhaton.”

Si Madián ug Marcela nakabaton ug tinuod nga kalipay tungod sa pagpangab-ot ug espirituwal nga mga tumong. Sa milabayng 13 ka tuig, nakaalagad sila sa mga kongregasyon sa northwest Colombia nga may dakong panginahanglan. Ug karon malipayon silang nag-alagad ingong espesyal payunir.