Pagbuntog sa Masturbasyon

Ang masturbasyon magsilsil sa pagkamahunahunaon sa kaugalingon ug magpausbaw sa daotang kaisipan, busa kini usa ka bisyo nga dili makapahimuot sa Diyos.a Ang uban mahimong isipon sa nagbisyo ingon nga galamiton lamang sa pakigsekso alang sa kaugalingong katagbawan. Ang iyang pakigsekso dili na tungod sa gugma ug nahimong naandang buhat na lang nga makahatag ug daklit nga katagbawan ug kahupayan. Apan temporaryo lang ang kahupayan. Sa pagkatinuod, inay patyon ang mga sangkap sa lawas “maylabot sa pakighilawas, kahugawan, [ug dili hustong] seksuwal nga gana,” ang masturbasyon makapukaw hinuon niana.​—Colosas 3:5.

Si apostol Pablo misulat: “Mga hinigugma, hinloan nato ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.” (2 Corinto 7:1) Kon nalisdan ka gayod sa pagtuman niining mga pulonga, ayawg wad-a ang paglaom. Si Jehova “andam [kanunay] sa pagpasaylo” ug sa pagtabang. (Salmo 86:5; Lucas 11:9-13) Sa pagkatinuod, ang imong nahasol nga tanlag ug mga paningkamot sa paghunong sa bisyo​—bisan pag panagsang mosugmat—​nagpaila ug maayong tinamdan. Hinumdomi usab nga “ang Diyos mas labaw kay sa atong mga kasingkasing ug nahibalo sa tanang butang.” (1 Juan 3:20) Dili lang atong mga sala ang makita sa Diyos; iyang makita ang tibuok nga pagkatawo. Tungod niini, iyang patalinghogan ang tim-os natong mga pangaliyupo alang sa kaluoy. Busa ayaw gayod ug hunong sa pag-ampo sa Diyos uban ang kamapainubsanon ug katim-os, sama sa bata nga modangop sa iyang amahan kon may problema. Ikaw panalanginan ni Jehova ug nahinloan nga tanlag. (Salmo 51:1-12, 17; Isaias 1:18) Siyempre, kinahanglang mohimo kag tikang uyon sa imong mga pag-ampo. Pananglitan, likayan gayod nimo ang tanang matang sa pornograpiya ug daotang mga kauban.b

Kon magpadayon gayod ang imong bisyo, palihog ipakigsulti kana sa imong Kristohanong ginikanan o sa usa ka hamtong sa espirituwal ug mabinationg higala.c​—Proverbio 1:8, 9; 1 Tesalonica 5:14; Tito 2:3-5.