“Ipadayon Ninyo ang Pagbuhat Niini”—Memoryal nga Saulogon sa Abril 5
1. Nganong hinungdanon ang pagsaulog sa Memoryal?
1 “Ipadayon ninyo ang pagbuhat niini.” (Luc. 22:19) Gisugo ni Jesus ang iyang mga sumusunod sa paghandom sa iyang kamatayon. Tungod sa benepisyo nga ikahatag sa maong lukat, ang adlaw sa tinuig nga pagsaulog sa Memoryal mao ang labing hinungdanon alang sa mga Kristohanon. Samtang nagsingabot ang Abril 5, sa unsang paagi ikapakita nato ang pagkamapasalamaton kang Jehova?—Col. 3:15.
2. Sa unsang paagi atong ikapakita ang pagpabili sa Memoryal?
2 Pangandam: Sagad mangandam ta sa mga butang nga giisip natong hinungdanon. Ingong pamilya, kita makaandam sa atong kasingkasing alang sa Memoryal pinaagi sa pagbasa ug pagpamalandong sa mga panghitabo sa hapit nang mamatay si Jesus. (Esd. 7:10) Ang listahan sa pipila ka teksto bahin niini makita sa atong kalendaryo ug sa Pagsusi sa Kasulatan sa Adlaw-Adlaw, ug ang kompletong listahan lakip ang katumbas nga kapitulo sa librong Labing Bantogang Tawo makita sa Pebrero 1, 2011 nga Bantayanang Torre, panid 23-24.
3. Unsa pay laing paagi nga atong ikapakita ang pagpabili sa Memoryal?
3 Pagsangyaw: Ikapakita usab nato ang atong pagpabili pinaagi sa bug-os pagpakigbahin sa ministeryo. (Luc. 6:45) Ang tibuok kalibotang pagpangimbitar alang sa Memoryal magsugod sa Sabado, Marso 17. Mapasibo ba nimo ang imong eskedyul aron makagahig dugang panahon sa ministeryo, tingali ingong oksilyare payunir? Nganong dili ninyo kini hisgotan sa inyong sunod nga Pamilyahanong Pagsimba?
4. Unsang mga benepisyo ang atong madawat sa pagsaulog sa Memoryal?
4 Makabenepisyo gayod kita sa pagtambong sa Memoryal matag tuig! Ang atong kalipay ug gugma sa Diyos mosamot samtang atong palandongon ang paghatag ni Jehova sa iyang bugtong Anak ingong lukat. (Juan 3:16; 1 Juan 4:9, 10) Kini magtukmod kanato nga dili na magkinabuhi alang sa atong kaugalingon. (2 Cor. 5:14, 15) Kini usab magdasig kanato nga dayegon si Jehova sa dayag. (Sal. 102:19-21) Ang mga alagad ni Jehova mahinamon gayong nagpaabot sa pagsaulog sa Memoryal sa Abril 5 aron sa ‘pagmantala sa kamatayon sa Ginoo.’—1 Cor. 11:26.