Pathian Uknak Cu Ziang A Si?

BAIBAL SIMMI

“Vancung ih Pathian in a cem dah lomi uknak a run umter ding.”—Daniel 2:44.

“Kan hrangah fapa peek a si zo; amah cu in uktu a si ding.”—Isaiah 9:6.

BAIBAL IN NA ṬHATHNEMNAK DING PAWL

• Ṭhathnemnak a lo pe theitu a dingmi uknak.—Isaiah 48:17, 18.

• A ra dingmi leithar ah famkimmi harhdamnak le lungawinak.—Thuphuan 21:3, 4.

BAIBAL SIMMI CU NA RINSAN THEI MAW?

Rinsantheinak ding a malbik thu pahnih:

• Pathian Uknak in hlawhtlinter dingmi thil pawl cu Jesuh in a tarlang. Pathian Uknak thleng ding le Pathian duhnak leitlun ah tuah dingin dungthluntu pawl kha thlacam dingah a zirh. (Matthai 6:9, 10) Cuih thlacamnak ziangtin a famkim ding ti Jesuh in a langter.

  Jesuh leilung a um laiah, rilrawng pawl rawl a do, mina a damter, mithi pawl a nungter! (Matthai 15:29-38; Johan 11:38-44) Hmailam ah Pathian Ram Uktu Jesuh in Pathian ram ih tuah dingmi pawl a rak tuah cia.—Thuphuan 11:15.

• Leitlun thil umdaan in Pathian Uknak a ra cing ding tikha a langter. Pathian Uknak in leilung parah daihnak a tuah hlanah, leitlun ah ral, paam, linghnin pawl a cang ding tin Jesuh in a sim cia.—Matthai 24:3, 7.

  Cuih thil pawl cu tucan ah kan hmu rero zo. Curuangah Pathian Uknak in cuih buainak pawl cu a hloter ding tikha kan rinsan thei.