Ifa Ussun Sipwe Tongeni Kuna Pwapwa Enlet

EMON nouwisen ewe lamalamen Buddha, ewe Dalai Lama, a apasa: “Ua luku pwe iei populapen manauach, pwe sipwe kukkutta pwapwa.” Mwirin, a awewei pwe a luku pwe emon epwe tongeni kuna pwapwa ren an epwe emiriti an ekiek me letipan. A apasa: “Ewe tufichin ekiek, ina chok ewe mettoch mi lamot fan iten ach sipwe kuna pwapwa mi unus.” A ekieki pwe esor lamoten an emon luku Kot.a

Sokko seni ena, ekieki mwo ussun Jises, emon mi fokkun luku Kot, iwe, an angangen afalafal a kku manauen fitepuku million aramas lon ekkewe fitepuku ier seni lom tori ikenai. Jises a ekilapei pwapwaan aramas. A poputa an Afalafal won ewe Chuuk mi itefoulo ren tiu poraus ussun pwapwa​—⁠tiu poraus mi poputa ren “Mi pwapwa . . . ” (Mattu 5:​1-12, NW) Lon ena chok afalafal, a aiti ngeni noun kkewe chon auseling pwe repwe atittina, alimaochu, me emiriti tupuer me letiper​—⁠repwe siwili ekkewe ekiek mi akkachofesa, limengauen manauer, me maicha ngeni ekiekin kinamwe, limelimochun manauer, me tong. (Mattu 5:​21, 22, 27, 28; 6:​19-21) Ussun emon noun we chon kaeo a peppesei mwirin, sipwe “lefareni” ekkewe mettoch mi ‘enlet, minne mi lamot, minne mi pwung, minne mi limelimoch, minne mi tipemecheres, minne mi iteuoch, ewe mi fokkun murinno, me minne mi fich ngeni ach sipwe mwareiti.’​—Filipai 4:8.

Jises a silei pwe epwe pwal kapachelong lon pwapwa enlet an aramas chiechi ngeni ekkewe ekkoch. Kich aramas sia kan saani ach sipwe nonnom ren aramas, ina minne, sisap tongeni unusen pwapwa ika sipwe kkan aimu seni aramas are osukosuk me aramas fansoun meinisin. Sipwe tongeni pwapwa ika sipwe meefi pwe aramas ra tongeikich me sipwe tongei ekkewe ekkoch. Jises a aitikich pwe longolongun ena sokkun tong, ina ach chiechioch ngeni Kot. Akkaeuin ren ei mettoch, minne Jises a asukula aramas a fokkun sokko seni aitien ewe Dalai Lama, pun Jises a aiti ngeni aramas pwe resap tongeni unusen pwapwa ika repwe imulo seni Kot. Pwata epwe ina ussun?​—Mattu 4:4; 22:37-​39.

Ekieki Ussun Met a Lamot Ngonuk Lon Pekin Ngun

Iei eu me lein ekkewe minen pwapwa: “Mi pwapwa ir mi meefi ar osupwang lon pekin ngun.” (Mattu 5:⁠3, NW) Pwata Jises a apasa ena mettoch? Popun, pun kich mi sokko seni ekkewe man, iwe, a lamot ngenikich ekkewe mettochun ngun. Pokiten Kot a forikich lon lapalapan kkewe, ukukun ach tufich, sipwe tongeni lapalapeni lapalapen Kot kkewe, ussun cho an tong, pwung, umoumoch, me tipatchem. (Keneses 1:27; Mika 6:8; 1 Jon 4:⁠8) Mi kapachelong lon ekkewe mettochun ngun ach sipwe meefi popun are lamoten manauach.

Ifa ussun sipwe tongeni pwakini ach osupwang lon pekin ngun? Esap ren ach sipwe fori transcendental meditation are sipwe chok atittina pwisin manauach. Nge Jises a apasa: “Aramas resap manau ren pilaua chok, pwe ren iteiten kapas meinisin mi tou seni auen Kot.” (Mattu 4:⁠4) Nengeni, Jises a apasa pwe Kot, I popun “iteiten kapas meinisin” mi lamot ngeni manauach. Mei wor ekkoch kapas eis Kot chok epwe tongeni alisikich le polueni. A lamot ach sipwe mirititi ena poraus ikenai pun a chommongelo sokkopaten ekiekin aramas ussun popun manauch me ewe al ngeni pwapwa.

Jiowa a silei lapalapach kkewe me met epwe unusen apwapwaikich. A silei ewe popun a anomu aramas won ach ei fonufan me met epwe fis lon fansoun mwach, iwe, a esilei ngenikich ena sokkun sile lon ewe Paipel. Minne a pwarata lon ena puk mi popu seni ngunun we a achungu letipen ekkewe aramas mi tongei minne mi pwung me a efisata pwapwa. (Luk 10:21; Jon 8:32)

Ena sokkun pwapwa epwe pochokkulelo lupwen sipwe mut ngeni ewe enlet lon ewe Paipel an epwe emmweni manauach. Ren ei mettoch, sipwe alollo pwapwa ngeni eu resim. Epwe pwalo lupwen a murinno ekkewe lapalap, nge epwe fokkun lingochulo​—⁠epwe pwal mwo nge wiliti ruu resim​—⁠lupwen a fokkun murinno ekkewe lapalap fan lang.

Apilukuluk​—A Lamot ngeni Pwapwa

Chokisikis chok repwe apasa pwe ach pwapwa ese pwal popu seni ach ekiek murinno ussun manauach me fansoun mwach kkan. Iwe nge, a lamot pwe ena sokkun ekiekoch epwe alongolong won minne mi enlet, nge esap chok won minne aramas repwe aneanei. Pwungun pwe ach chok ekieki are aneanei pwe mettoch meinisin epwe murinnolo esap aukatiu maun, nafangauen mongo, malapalap, limengauen asapwal, apwangapwangen chinnap, semmwen, are malo​—⁠ikkena ekkewe mettoch mi solani pwapwa seni chommong aramas. Iwe nge, a pwal lamot ewe mettoch ekiek murinno.

Iei eu poraus mi amairu, pwe ewe Paipel ese nounou ewe kapas optimism, weween an aramas ekiek murinno ussun minne epwe fis; a nounou eu kapas mi pochokkul seni​—⁠ina ewe fos apilukuluk allim. Vine’s Complete Expository Dictionary a awewei ewe kapas “apilukuluk allim” ussun a mak lon ewe Paipel pwe epwe wewe ngeni “witiwiti och mettoch mi murinno ren lukulukoch, . . . an emon ukkuti minne epwe murinno fan pwapwa.” Lon ewe Paipel, ewe mettoch apilukuluk a lu seni an emon chok ekieki pwe och mettoch epwe fisoch. A pwal wewe ngeni ewe mettoch an emon apilukuluk a alongolong won. (Efisus 4:4; 1 Piter 1:⁠3) Awewe chok, an Chon Kraist apilukuluk allim a wewe ngeni pwe ekiselo chok, ekkewe mettoch mi ngau meinisin ewe wokisin mwen ei a kapas ussun repwe morelo. (Kol Fel 37:​9-11, 29) Nge a pwal kapachelong och.

Ekkewe Chon Kraist ra ukkuti ewe fansoun lupwen ekkewe aramas mi tuppwol repwe kuna manau mi unusoch won eu paratisin fonufan. (Luk 23:​42, 43) Ren an awattei ena apilukuluk, Pwarata 21:​3, 4 a apasa: “Nengeni, ewe imwen Kot a nom ren aramas. Pwisin i epwe nonnom rer, o ir repwe noun aramas. . . . I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.”

Chokewe mi ekiekin eani ena sokkun manau lon fansoun mwach epwe wor popun an epwe pwapwa, inaamwo ika nonnomun manauer iei ese kon lien murinno. (Jemes 1:12) Iwe, pwata kese kaeofichi ewe Paipel pwe kopwe pwal kuna ewe popun en mi tongeni luku ena. Apochokkula om apilukuluk allim ren om kopwe aea fansoun iteiten ran le alleani ewe Paipel. Om kopwe fori ena mettoch epwe amurinnolo manauom lon pekin ngun, iwe, epwe alisuk pwe kopwe tumunuk seni ekkewe mettoch mi solani seni aramas pwapwa, me amarata om meefi kinamwe. Ewer, ewe poraus mi monomon mi auchea seni meinisin ussun pwapwa chapur epwe popu seni ach foffori letipen Kot. (Eklesiastis 12:13) Manau mi alongolong won ach alleasochisi aitien ewe Paipel epwe atoto rech pwapwa, pun Jises a apasa: “Mi pwapwa ir mi rong kapasen Kot o apwonueta!”​—Luk 11:​28, NW.

[Ppii ewe pwóróus fan]

[Pictures on page 5]

An Chon Kraist apilukuluk allim a kan apwapwai aramas