Kutten Ewe Sokkun Emmwen Mi Pwüng
Ifa ussun upwe tongeni tümünü pöchökkülen inisi?
Met upwe tongeni föri ren ai upwe alapalo pwapwaan ai famili?
Met upwe tongeni föri pwe ute towu seni ai angang?
KA KAN eäni ekkena kapas eis? Ka fen küna ewe sokkun emmwen mi enletin älisuk? Iteiten ier, mei wor 2,000 som mineföön puk mi awora emmwen ussun ekkena sokkun mettoch. Lon chök Britain, aramas ra nöünöü ina epwe $150 milion iteiten ier ren ar repwe mööni ekkan puk fän iten ar repwe sotuni le ataweei ar kewe osukosuk. Lon Merika, aramas ra nöünöü ina epwe $600 milion iteiten ier fän iten ena sokkun puk. Mi enlet pwe chommong aramas ra kükkütta emmwen mi mürinnö fän iten ar repwe ataweei ar kewe osukosuk.
Iei alon emön soumak ussun ewe sokkun emmwen a mak lon ekkena puk: “Chommong mineföön puk ra chök enniwili met a fen mak me loom.” Ren enletin, chommong ekkewe emmwen lon ekkena puk ra chök äppirü tipatchemen eü me lein ekkewe puk mi kon ierittam woon fönüfan. Ena puk a chöüfetäl lap seni puk meinisin. Ekkoch kinikinin ena puk are unusan meinisin a fen afföü ngeni 2,400 sokkun fos. Lap seni 4.6 bilion kapi ra fen peres woon unusen fönüfan. Ena puk ewe Paipel.
A ffat alon Paipel ei: “Ekkewe puk meinisin ra pop seni Ngunun Kot, ra pwal lamot ngeni afalafal, ngeni fonou, ngeni amurinnolo, o pwal ngeni angangochun ewe manau mi pung.” (2 Timoti 3:16) Pwüngün pwe sap minne ewe Paipel a mak fän iten an epwe älisi aramas pwe repwe pwisin ataweei ar osukosuk. Nge ewe Paipel a äkkäeüin mak pwe epwe pwäralo letipen Kot fän iten aramas. Meit mwo nge a mak lon Paipel chommong pworaus ussun met sipwe tongeni föri fän iten ach sipwe ataweei ekkewe osukosuk mi torikich meinisin, me a pwonei pwe chokkewe mi älleäsochisi ewe emmwen lon repwe käeö ifa ussun repwe tongeni efeiöchü pwisin ir. (Aisea 48:17, 18) Ika sipwe apwönüetä än Paipel emmwen, ena fön epwe älisikich fansoun meinisin, ese lifilifil ika met fönüach, eöreniach, are ükükün watteen ach sukul. Kopwe älleäni ena eü pworaus mwirin ei ren om kopwe ppii ika mi pwüng minne ewe Paipel a apasa ussun tümünün pöchökkülen inisich, ach famili, me ach angang.