Lipwäköch Le Nöünöü “Katilasen Ewe Ngun”

‘Oupwe pwal angei . . . katilasen ewe ngun, ewe kapasen Kot.’​—EF. 6:17, TF.

1, 2. Met sipwe föri pokiten ei osupwangen chon afalafal?

LUPWEN Jises a küna än ekkewe aramas osupwangen sile usun Kot, a ereni nöün kewe chon käeö: “Ewe räs a fokun watte, nge ekewe chon angangen räs ra chokükün. Iei mine oupwe tüngorei ewe Samolun räs pwe epwe tinala chon angang pwe repwe angang ngeni ewe räs.” Jises ese chök fos, nge a pwal “körifengeni nöün kewe engol me ruoman chon kaiö” me tiniirelo ar repwe afalafal are föri ewe angangen “räs.” (Mt. 9:35-38; 10:1, 5) Mwirin, Jises “a pwal filätä fik me ruoman mwän o a tiniirela akaruoman” pwe repwe pwal föri ena angang.​—Luk 10:1, 2.

² Ikenäi a pwal watte osupwangen chon afalafal. Lon ewe ier 2009, iei chochoon chon fiti ewe Ächechchem, 18,168,323. A chommong seni chochoon Chon Pwäratä Jiowa woon lap seni 10 million. Uwaan ekkewe tänipi ra nnupulo lon ei fansoun räs. (Jon 4:34, 35) Ina minne, sipwe iotek me tingor pwal ekkoch chon angang. Nge, met sipwe föri pwe ach föfför epwe tipeeü ngeni minne sia eäni iotek? Sipwe lipwäköchülo lon ewe angangen afalafal me föralo chon käeö fän tinikken.​—Mt. 28:19, 20; Mark 13:10.

3. Ifa usun ewe ngün mi fel a elipwäköchükich lon ewe angangen afalafal?

³ Ewe lesen mwen ei a äweweei pwe än Kot ngün mi fel a älisikich le “asilefeili än Kot kapas fän pwora.” (Fof. 4:31) Ena ngün mi fel a pwal tongeni elipwäköchükich. Äwewe chök, sipwe tongeni lipwäköchülo le afalafal ren ach nöünöüöchü ewe Paipel pun a fför fän emmwenien ewe ngün mi fel. (2 Tim. 3:16) Masouan meinisin ra pop seni Kot. Ina minne, ika sia lipwäköch le longuni ach afalafal woon ewe Paipel, ewe ngün mi fel a kan emmwenikich. Mwen sipwe käeö ifa usun sipwe föri ena, sipwe nengeni ükükün manamanen än Kot Kapas.

‘Än Kot Kapas A Manaman’

4. Än Kot kapas lon ewe Paipel a tongeni efisi met sokkun siwil?

⁴ A ifa me manamanen än Kot kapas! (Ipru 4:12) Lon kapas äwewe, masouen ewe Paipel a usun chök efoch ketilas mi kken lap seni förien aramas ketilas, pun a tongeni pwerelong me äimufeseni lekupukupun chüü me masouen chüü. Ewe enlet lon Paipel a tililong le alolloolun emön, me pwäralo enletin ekiekin me meefian. Manamanen ewe enlet a tongeni unusen ekkesiwili emön. (Älleani Kolose 3:10.) Pwüngün, än Kot Kapas a tongeni siwili manauen aramas!

5. Ifa usun ewe Paipel a emmwenikich, me met mwiriloon?

⁵ Ese pwal wor eü puk mi löllö ngeni ewe Paipel ren tipatchemen ekkewe pworaus lon. A masou ren pworaus mi älisi aramas ar repwe sopwöch lon ei fönüfan mi fokkun weires. Ewe Kapasen Kot a asarama alach lon ei fansoun me pwal lon mwachkkan. (Kölf. 119:105) A mmen älillisöch atun sia küna osukosuk are lupwen sipwe filatä chiechiach, minen kunou, angang, foutach, me met kkan. (Kölf. 37:25; SalF. 13:20; Jon 15:14; 1 Tim. 2:9) Ach apwönüetä än Kot Kapas a älisikich le kinamwefengen me aramas. (Mt. 7:12; Fil. 2:3, 4) Pokiten ewe Paipel a asarama ewe al sipwe fetäl woon, sia tongeni küna ifa usun ach kewe kefil epwe kküü manauach lon mwachkkan. (1 Tim. 6:9) Pokiten ewe Paipel a fen oesini än Jiowa kokkot fän iten mwachkkan, iwe a älisikich le manaueni ewe sokkun manau mi tipeeü ngeni ena kokkot. (Mt. 6:33; 1 Jon 2:17, 18) A ifa me apwapwaan manauen emön mi mut ngeni än Kot kapas an epwe emmweni!

6. Ifa ükükün manamanen ewe Paipel, ach we pisekin maun, lon ach fiffiu ngeni Setan?

⁶ Ekieki mwo manamanen ewe Paipel, ach we pisekin maun, lon ach fiffiu ngeni Setan. Paul a eita ngeni ewe Kapasen Kot, ‘katilasen ewe ngun.’ (Älleani Efisus 6:12, 17, TF.) Lupwen sia lipwäköch le afalafal, än Paipel pworaus a tongeni angasa aramas seni fän nemenien Setan. Ei sokkun ketilas a kan amanaua aramas nge ese fen nirelo. Ina popun, sipwe achocho ach sipwe lipwäköch le nöünöü ei ketilas.

Afalafala än Kot Kapas fän Pwüng

7. Pwata a lamot sipwe käeö ifa usun sipwe nöünöüöchü ‘katilasen ewe ngun’?

⁷ Emön sounfiu a chök tongeni sipeöch le äeä an kewe pisekin maun ika a käeöfichi äeään. Pwal ina chök usun, sipwe sipeöch le nöünöü ‘katilasen ewe ngun’ lon ach maun ngeni Setan. Paul a makkeei: “Kopwe fokun achocho ngeni pwe Kot epwe tipeeu ngenuk, pwe kopwe eman chon angang esap säw ren an angang, pun ka afalafala än Kot kapas mi let fän pwüng.”​—2 Tim. 2:15.

8, 9. Met epwe älisikich le weweöchüti met ewe Paipel a apasa? Äweweei.

⁸ Met epwe älisikich le “afalafala än Kot kapas mi let fän pwüng”? Sipwe akkomw weweöchüti ewe Paipel me mwen sipwe tongeni asukula aramas. Weween, a lamot sipwe nengeni ekkewe epwipwiin wokisin are unusen ewe pworaus. Ekkewe pworaus mwan are mwirin och kapas are wokisin ra tongeni affataöchü weween ewe pworaus.

⁹ Mi lamot sipwe nengeni ekkewe epwipwiin wokisin pwe sipwe weweiti eü pworaus lon Paipel. Alon Paul lon Kalesia 5:13 a äweweei lamoten ena. A makkeei: “Nge ämi pwii kana, Kot a körikemi pwe oupwe ngas. Nge pokiten oua ngas, ousap ekieki pwe oua tongeni mwüt ngeni mochenian fitukemi epwe chüen nemenikemi, nge oupwe angangfengen lefilemi fän tong.” Paul a kapas usun menni ngaselo? A itä kapas usun ngaselo seni tipis me mälo, are afalafal chofona, are pwal ekkoch me lukun? Ekkewe epwipwiin wokisin lon Kalesia ra pwäratä pwe Paul a kapas usun ngaselo seni ‘ewe anümamau ekewe Allük ra atoto wor.’ (Kal. 3:13, 19-24; 4:1-5) A kapas usun ewe ngaselo Chon Kraist ra kerän küna pokiten ra tapwelo mwirin Kraist. Chokkewe mi aücheani ena ngaselo ra angangfengen fän tong. Nge chokkewe esor ar tong ra kükfengen me äninifengen.​—Kal. 5:15.

10. Ren ach sipwe wewefichiti ekkewe wokisin lon Paipel, ikkefa ekkewe pworaus mi lamot sipwe nengeni? Ia sipwe küna me ie ekkena pworaus?

¹⁰ Ren ach sipwe wewefichiti eü wokisin, sipwe nengeni uruwoon, äwewe chök, ren iö a makkeei, ineet a mak, me met a fiffis atun a mak ewe wokisin. Epwe öch sipwe pwal silei met popun an a mak ewe puk, me eörenien aramas, föfförür, napanapen ar fel, me met ra kan alamota lon ena fansoun.a

11. Met sipwe tümünükich seni lupwen sia äweweei ewe Paipel?

¹¹ Ach “afalafala än Kot kapas mi let fän pwüng” ese chök wewe ngeni ach sipwe äwewefichi ekkewe pworaus mi enlet lon. Nge sipwe tümünü pwe sisap nöünöü ewe Paipel le eniwa aramas. Sia kan nöünöü ewe Paipel le apöchökkülatä ewe enlet, usun chök met Jises a föri lupwen ewe Tefil a sotuni i. Nge sisap nöünöü le äsäüa are eriäni aramas ar repwe eäni ach lükü. (Tut. 6:16; 8:3; 10:20; Mt. 4:4, 7, 10) Sipwe älleasochisi än ewe aposel Piter pesepes: “Oupwe meniniti Kraist lon lelukemi, oupwe asamolu i, pun i ämi Samol. Oupwe molotä fansoun meinisin pwe oupwe pölüeni chokewe mi aisinikemi, pwe oupwe awewe ngeniir usun ewe apilükülük oua eäni, nge oupwe kapas ngeniir fän pwetete me menin.”​—1 Pit. 3:15, 16.

12, 13. Ewe enlet lon Paipel a tongeni atai met sokkun mettoch mi pöchökkül? Äweweei.

¹² Epwe met mwiriloon ach nöünöüfichi ewe Paipel fän pwüng? (Älleani 2 Korint 10:4, 5.) Ewe enlet lon Paipel a tongeni “atai ekewe lenien pöchökül [mettoch mi fotolo, NW],” weween, a pwäralo ekkewe afalafal chofona, föfför mi efeiengaw, me ekiek mwäällin chon fönüfan. Sia tongeni nöünöü ewe Paipel le amoielo ekkewe ekiek mi “epeti än aramas repwe silei Kot.” Sia tongeni äeä äitien Paipel le älisi aramas ar repwe etipeeüfengeni ar ekiek ngeni ewe enlet.

¹³ Äwewe chök, iei pworausen emön fin India, 93 ierin. Seni le kükkünün, a lükü pwe a chök rokopwäl än aramas mälo me manausefäl woon fönüfan lon pwal ekkoch sokkun inis (reincarnation). A poputä le käeö Paipel ren ar mammakfengen taropwe me nöün we mi nom woon pwal eü fönü. A mwittir etiwa met a käeö usun Jiowa me an kewe pwon. Iwe nge, ena afalafalen reincarnation a fen fotolo lon ekiekin, ina popun ese etiwa alon nöün we usun napanapen ekkewe mi mälo, nge a makkeei: “Use weweiti ekkewe afalafal lon nöümi Paipel. Meinisin lamalam ra afalafala pwe mei wor ngünüch esap tongeni mälo. Ua fokkun lükü pwe lupwen emön a mälo, ngünün a manausefäl lon pwal eü sokkun inis, nge a tongeni rorokopwäl fän 8,400,000. Pwata esap pwüng ei? Weween pwe meinisin lamalam ra mwääl?” Iwe, “ewe ketilasen ngün” epwe tongeni atai ei lükü mi fokkun pöchökkül? Iwe, ra sopwelo ar pworausfengen lon Paipel woon ei mettoch, nge mwirin fitu wiik, ewe fefin a makkeei: “Ua poputä le weweiti ewe enlet usun mälo. Iei, ua fokkun pwapwa le silei pwe lupwen epwe fis ewe manausefäl, sipwe tongeni chuursefäli attongach kewe mi mälo. Amwo itä ewe Mwuun Kot epwe mwittirito.”

Nöünöü Paipel le Änneta Pwüngün Eü Pworaus

14. Met weween ach sipwe peppesei ekkewe chon aüseling?

¹⁴ Ese naf ach sipwe chök aloni alon Paipel ren ach sipwe lipwäköch le nöünöü lon ach afalafal. Sipwe pwal äppirü Paul le “pesei” aramas ar repwe lükü enletin alon Paipel. (Älleani Fofor 19:8, 9; 28:23.) ‘Peppesei’ a wewe ngeni ach sipwe “änneta ngeni emön pwüngün eü pworaus pwe epwe pwal eäni ach ekiek.” Ewe emön epwe “fokkun lükü, ina popun, epwe ächiföüa ewe pworaus.” Lupwen sia pesei emön an epwe lükü met Paipel a apasa me a tipeeü ngeni, iwe, epwe lükülük woon. A lamot sipwe ännetatä ngeni ewe chon aüseling enletin minne sia apasa. Sipwe föri ena ren ach apwönüetä ekkeei mettoch.

15. Ifa usun kopwe menlapei met Paipel a apasa fän iten än aramas repwe süföliti?

¹⁵ Menlapei met Paipel a apasa pwe repwe süföliti Kapasen Kot. Lupwen ka äiti ngeniir eü wokisin, menlapei lamoten ach sipwe silei än Kot ekiek usun ena pworaus. Eäni eü kapas eis, me aüseling ngeni meefien ewe chon imw. Mwirin, ka tongeni apasa: ‘Sipwe pii ifa än Kot ekiek ren ei mettoch.’ Are, ka tongeni eis: ‘Met Kot a apasa usun ei mettoch?’ Ach eäni ei sokkun kapasen le poputään me mwen ach sipwe älleani eü wokisin a menlapei pwe Paipel a pop seni Kot, iwe, epwe älisi ewe chon aüseling le süföliti Paipel. A mmen lamot sipwe föri ei mettoch, äkkäeüin ngeni chokkewe mi fen lükü Kot, nge rese kon lien silei met ewe Paipel a apasa.​—Kölf. 19:7-10.

16. Met epwe älisuk le äweweöchü ekkewe wokisin?

¹⁶ Älleani ekkewe wokisin me affataöchü weweer. Paul a eörenalo an epwe “awewe ngeniir o alletätä seni lon ekewe wokisin” met a eäni afalafal. (Fof. 17:3) A tongeni wor chommong pworaus lon eü wokisin, iwe, eli kopwe tongeni menlapei ekkewe kapas mi weneiti met oua pworausfengen woon. Kopwe föri ei ren om apasasefäli menni kinikin ka mochen menlapei, are eäni kapas eis pwe ewe chon imw epwe esilla ewe pworaus. Mwirin, äweweei ena kinikin. Säingoon, älisi an epwe küna ifa usun ena pworaus a weneiti manauan.

17. Ifa usun kopwe äweweei ekkewe wokisin pwe ekkewe chon aüseling repwe lükü?

¹⁷ Äweweei seni Paipel pwe chon aüseling repwe lükü. Paul a fokkun äweweöchü me fos seni letipan atun a “kakapas ngeni ekewe aramas seni lon ekewe Toropwe mi Pin.” (Fof. 17:2, 4) Usun chök Paul, kopwe achocho le achchüngü letipen chon aüselingok. ‘Ufata’ meefier ren om nöünöü ekkewe sokkun kapas eis mi pwäratä pwe ka äfänniir. (SalF. 20:5) Kosap kon tuwenewen. Om äwewe epwe tettelöch me fataffatöch. Ännetatä pwüngün ewe pworaus. Minne ka apasa epwe longolong woon än Kot Kapas. A fen mürinnö om äweweöchü me eäni kapas äwewe woon eü chök wokisin lap seni om älleani chommong wokisin nge kese äweweei. Om äiti ngeni pwal ekkoch pisekin ännet a ‘awattela om kapasen kait.’ (SalF. 16:23) Fän ekkoch, a lamot kopwe pwal kütta ekkoch pworaus. Mi lamot ngeni ewe chinnap fefin, 93 ierin, sia fen pworausan akkomw, an epwe silei pwata a kon chöüfetäl ewe afalafal usun ewe ngün esap tongeni mälo. Ren an epwe lükü äitien ewe Paipel usun ekkewe mi mälo, epwe pwal weweiti ia ena afalafal a pop seni ia me ifa usun lap ngeni lamalam meinisin ra poputä le lükü.b

Lipwäköchülo le Nönnöünöü ewe Paipel

18, 19. Pwata sipwe sipeöch le nönnöünöü “katilasen ewe ngun”?

¹⁸ Paipel a apasa pwe “lapalapen ei fanüfanen ikenai epwe morola.” Ekkewe aramasangaw ra fen ngangawolo. (1 Kor. 7:31; 2 Tim. 3:13) Ina popun, a lamot sipwe sopwelo le atai ‘ekewe mettoch mi fotolo’ ren ach nönnöünöü ‘katilasen ewe ngun, ewe kapasen Kot.’

¹⁹ A ifa me watteen ach pwapwa ren än Kot Kapas, pwe ren manamanan, sia tongeni üttawu ekkewe afalafal chofona me achchüngü letipen aramas mi letip wenechar! Ewe pworaus lon Paipel a mmen manaman, a tongeni wiewu ekkewe mettoch mi pöchökkül mi fotolo lon letipen aramas. Ina minne, sipwe achocho ach sipwe sipeöch le nöünöü “ewe katilasen ngün” lon wisach we me ren Kot, chon esilefeili an we Mwu.

[Ekkewe pwóróus fan]

Met Ka Fen Käeö?

• Ifa ükükün manamanen ewe Kapasen Kot?

• Ifa usun sipwe ‘afalafala än Kot kapas mi let fän pwüng’?

• Met än Paipel pworaus a tongeni fför ngeni ‘ekewe mettoch mi fotolo’?

• Ifa usun kopwe angangöchülo le peppesei aramas lon om angangen afalafal?

[Pwóór/​Sasing lon pekin taropwe 18]

Ifa Usun Kopwe Nöünöü Paipel Le Pesei Aramas

▪ Asukuler pwe repwe süföliti Paipel

▪ Affataöchü weween ekkewe wokisin

▪ Äweweöchü pwe epwe achchüngü ewe letip

[Sasing lon pekin taropwe 17]

Kopwe lipwäköchülo le nöünöü ‘katilasen ewe ngun’