Itá Kot A Kan Áfánnuk?

MINNE FÉRIEN KOT KEWE RA ÁITI NGENIKICH

Ewe áeúin awaan manawen emén ménúkol mwirin an uputiw ina ewe fansoun siwil mi fókkun lamot. Pwata? Pokiten ekkewe inelap mi riri ngeni néúr kewe upwufé lón ena fansoun mi fókkun lamot, ra enletin ámúrinnééló mámmáárin néúr kewe.a

Met a amwékútú emén inelap le túmúnú néún we upwufé fán tong? Emén sense itan Jeannette Crenshaw a áweweei lón The Journal of Perinatal Education pwe ika a chómmóng ewe hormone itan oxytocin lón emén inelap, iwe a “efisi ewe memmeefin inelap lón emén in mwirin an néúnéú atun a attapa, nennengeni, me oupwu néún we upwufé.” Pwal eú sókkun hormone mi ffér lón ewe inelap lón chék pwal ena fansoun a “álisatá án ewe inelap fóffós ngeni néún we ménúkol” me a apéchékkúla an riri ngeni néún we. Pwata a mmen aúchea ena?

Ewe riri mi péchékkúl lefilen emén inelap me néún we a pop seni ach we Chón Fératá mi tong, Jiowa Kot.b King Tafit a affata pwe Kot a atowu i “seni lon letipen” are luken inan we me a efisi an epwe meefi núkúnúkéch leupwen inan we. A iótek me erá: “Seni leuputiuei üa apilükülükuk, seni ewe fansoun inei a nöünieitiu en ai Kot.”​—Kölfel 22:9, 10.

EKIEKI EI: Ika Kot a féri ena sókkun kókkót mi mesemesekkis pwe epwe efisi án emén inelap epwe áfánni néún we fán tong me awora met mi lamot ngeni, iwe esap pwe a fich ach sipwe ekieki pwe Kot a pwal áfánnikich, ‘nöün kana’?​—Föför 17:29.

MINNE PAIPEL A ÁITI NGENIKICH USUN ÁN KOT NENNENGENIKICH PWE EPWE TÚMÚNÚKICH

Jesus Kraist, ewe a kon lap seni meinisin lón an silefichi ewe Chón Fératá, a erá: “Ifa usun, aramas resap amömöla ruoman nichok ren eföü chök kapa? Sap mwo nge eman nichok epwe turutiu lepwül lükün tipen Sememi. Nge meten möküremi kewe mwo nge ra lea meinisin. Iei mine ousap niuokus, ämi oua aüchea seni chomong nichok!”​—Mateus 10:29-31.

Lape ngenikich sise kan áteneki iteiten ekkewe kúkkún machchang, are pwal áfánni ewe atun emén me leir a túrútiu lepwúl. Nge Semach we lón láng a áfánni iteiten emén me emén machchang! Nge ekkewe machchang, are pwal mwo nge chómmóng machchang, rese aúchea me ren lap seni emén aramas. Iwe, a mmen ffat ewe lesen: Kosap “niuokus” ika ka meefi pwe Kot ese áfánnuk. Nge ren enletin, Kot a fen wesewesen tongeok!

Ekkeei Wokisin ra alúkúlúkúkich

• “Ewe Samol mi Lapalap a küna mine a fis ekis meinisin, a ouwasacha ekewe chon föföringau me chon pwüng.”​—ÄN SALOMON FOS 15:3.

• “Ewe Samol mi Lapalap a mamasa ekewe chon pwüng, selingan a rongorong ngeni ar siö.”​—KÖLFEL 34:15.

• “Üpwe mwänek o pwapwa ren om tong ellet, pun ka küna ai riaföü o silei ai kewe weires.”​—KÖLFEL 31:7.

“UA MEEFI PWE ESE WOR TONGEI ME REN JIOWA”

Itá manawach epwe múrinnéló ika sia silei pwe Kot a wesewesen mochen silei usun nónnómuch me a kan túmúnúkich fán tong? A enletin tongeni fis, usun chék met Hannah,c seni England a áweweei:

“Fán chómmóng ua meefi pwe ese wor tongei me ren Jiowa me ese kan pélúweni ai kewe iótek. Ua ekieki pwe a ina usun pokiten tipisi ren nafangawen ai lúkú. Ua meefi pwe Kot a apwúngúei are a tunaeiló pokiten use aúchea. Ua meefi pwe Kot ese tongei ei.”

Iwe nge, Hannah ese chúen tipemwaramwar ren án Jiowa áfánni me tongei. Pwata a siwil meefian? A áweweei: “Ekis me ekis a siwil ai ekiek. Ua chemeni eú afalafal mi lóngólóng wóón Paipel fitu ier a ló, usun án Jesus asorun méén kepich. A fókkun achchúngúei me álisiei le lúkúlúksefál wóón án Jiowa tong. Me lón ekkewe fansoun a pwénútá minne ua iótek usun, fán chómmóng ua kechiw pokiten ua mirititi pwe Jiowa a fen tongei ei seni me lóóm. Pwal ren ai kákkáé ewe Paipel me fiffiti án Chón Kraist kewe mwich a alapaaló ai silei Jiowa, napanapan kewe, pwal meefian usuch. Iwe a ffat ngeniei án Jiowa álillis me an tong fán iten kich meinisin me an mochen túmúnú emén me emén kich fán tipemecheres.”

Minne Hannah a erá a apéchékkúlakich. Nge ifa usun ka tongeni lúkúlúk pwe Kot a weweituk me a chechchemeni minne ka meefi? Ewe lesen mwirin ei epwe pélúweni ena kapas eis.