Áwewe fán Iten Manawach me Ach Angangen Afalafal Mwich
March 4-10
PWÓRÓUS AÚCHEA SENI KAPASEN KOT | ROM 12-14
“Weween Ach Pwári Tong án Chón Kraist”
it-1-E 55
Tong
Itá epwe wor tongen pwipwi (Krik, phi·la·del·phiʹa, weween, “án emén tong ngeni pwiin”) lefilen meinisin chón lón ewe mwichefelin Chón Kraist. (Ro 12:10; Ip 13:1; pwal ppii 1Pe 3:8.) Iwe, ekkewe riri lefilen chón ewe mwichefel repwe péchékkúl usun chék lefilen chón eú famili. Inaamwo ika chón ewe mwichefel ra kan pwári tongen pwipwi, nge Paipel a peseer ar repwe alapaaló ar féri ena.—1Te 4:9, 10.
Ewe kapasen Krik phi·loʹstor·gos a weneiti án emén fókkun péchékkúl an chiechi ngeni emén chiechian. Ei kapas a wor ruu popun kapas lón, nge eú me leir sterʹgo, a kan weneiti ewe esin tong lefilen chón eú famili. Aposel Paulus a pesei Chón Kraist ar repwe ámááraatá ena napanap. (Ro 12:10) Paulus a pwal pwáraatá pwe lón ekkewe ránin lesópwólóón, epwe wor aramas “resap eäni tong” (Krik, aʹstor·goi) me ekkena esin aramas a fich ngeniir ar repwe máló.—2Ti 3:3; Ro 1:31, 32.
“Oupwe Kinamwefengen me Aramas Meinisin”
3 Älleani Rom 12:17. Paul a äweweei pwe are emön a föri mi ngaw ngenikich, sisap liwini ngeni lon föfför mi ngaw. An ei kapasen pesepes a äkkäeüin lamot lein ekkewe famili esap iir meinisin chon lükü. Emön chon Kraist pwülüwan ese fiti lon an lükü, epwe ü ngeni ewe sossotun liwini ingaw ren an esap appölüwa eü kapas are föfför mi ngaw. Esor och mettoch mi mürinnö sipwe angei seni ach “liwini ngeni lon föför mi ngau.” Nge epwe fen chök alapalo ewe osukosuk.
“Oute Liwini ngeni Emon mi Ingau An we mi Ingau”
12 Iei än Paul kapasen pesepes ussun ach kewe föfför ngeni chon lükü me pwal chon lükün: “Oute liwini ngeni emon mi ingau an we mi ingau.” Ena pworaus a riri ngeni minne a apasa me mwan: “Oupwe oput minne mi ingau.” Pwüngün, ifa ussun emön epwe tongeni apasa pwe a enletin oput minne mi ngaü ika epwe äeä minne mi ngaü pwe epwe liwini ngeni aramas ar föfföringaü? An föri ena epwe mwäälfesen me an eäni tong “esor likotuputupun.” Mwirin, Paul a apasa: “Oupwe achocho le föri mine a öch ngeni aramas meinisin.” (Rom 12:9, 17, NW) Epwe ifa ussun sipwe apwönüetä ekkena kapas?
13 Mesemwan, lon nöün we taropwe ngeni chon Korint, Paul a mak ussun ewe riäfföü a tori ekkewe aposel. A apasa: “Am aua fen wiliti minen aweitfengen ngeni fonufan me chonlang me aramas. . . . Lupwen ra lalingau ngenikem, am aua chok efeiochur. Lupwen ra ninnikem, am aua chok likiitu. Lupwen ra aitengauakemelo, am aua chachari ir.” (1 Korint 4:9-13) Pwal ina chök ussun, aramas ra kan nennengeni föfförün Chon Kraist mi enlet ikenäi. Lupwen repwe küna ach föfför mürinnö pwal mwo nge fän pwüngüngaü, eli repwe tipemecheres le aüseling ngeni ach pworaus.—1 Piter 2:12.
Oupwe Wesewesen Omusomusfengen
13 Neman a wor eú fansoun ka meefi pwe ka tongeni álisi emén mi kirikiringaw ngonuk an epwe pwapwaiti ekkewe pwóróus lón Paipel. Ewe aposel Paulus a makkeei: “Are chon oput en a echik, kopwe amongou i; are a kaka, kopwe aunu; pun are kopwe fori iei usun, kopwe ioni mochen ekkei won mokuran. Kosap kuf ren ar fofor ingau; nge kopwe pworacho ngeni ar ingau ren om fofor murinno.” (Rom 12:20, 21, TF) Lupwen ka pwáraatá súfél pwal mwo nge atun aramas ra song ngonuk, eli repwe siwil me kirekiréch ngonuk. Ika ka pwáraatá tong me weweiti meefier, iwe, eli epwe amwékútúúr le alapaaló ar silei ewe Paipel. Ese lifilifil féfférúr ngonuk, nge pokiten óm mosonottam me kirekiréch, eli repwe ekieki ewe popun ka sókkóló seni ekkewe ekkóch.—1 Pet. 2:12; 3:16.
Kúkkútta Pwóróus Aúchea
Usun Kefilin Minen Apwapwa me Kunou mi Múrinné
5 Meinisin minne ka féri lón manawom a riri ngeni óm fel ngeni Jiowa. Lón néún Paulus we taropwe ngeni ekkewe chón Rom, a néúnéú ewe itiitin kapas mi alóllóól weween le menlapei ewe enlet ngeni chienan kewe chón lúkú. A peseer: “Oupwe fangala inisimi pwe eu asor mi manau o pin fän iten än Kot angang o i epwe pwapwa ren. Iei usun pwüngün ämi fel ngeni Kot.” (Rom 12:1) Inisum, a kapachelong ekiekum, letipom me péchékkúlom. Ekkena meinisin, ka áeá le angang ngeni Kot. (Markus 12:30) Paulus a apasa pwe ena sókkun angang seni unusen letipach a usun eú asor. Ena itiitin kapas a wor éúréúr lón. Fán ewe Allúkún Moses, Kot a oput eú asor mi ter. (Lifitikos 22:18-20) Pwal ina chék usun, ika a wor limengawen án emén Chón Kraist asor lón pekin lúkú, iwe esap ketiw me ren Kot. Ifa usun epwe fis ena?
6 Iei án Paulus éúréúr ngeni ekkewe Chón Kraist lón Rom: “Ousap fangelo ngeni tipis ekkewe kifetin inisimi.” Paulus a pwal ereniir pwe repwe “nielo foforun inis.” (Rom 6:12-14; 8:13, TF) Lepoputáán lón néún Paulus we taropwe, a apasa ekkóch mettóch mi weneiti “foforun inis.” Iei met a apasa usun ekkewe aramas mi tipis: “Auer mi ur ren ottek.” “Pecher mi feilikai ngeni ar repwe asuku chaan aramas.” “Esor mo niuokusun Kot mwen meser.” (Rom 3:13-18, TF) Emén Chón Kraist epwe elimengawa inisin ika a áeá ‘kifetin inisin’ fán iten ekkena féfférún tipis. Áwewe chék, lón ei fansoun ika emén Chón Kraist epwe wesewesen katol ekkena sókkun mettóch mi kon limengaw, usun chék sasingin me kachitoon kapasingaw are féfférún mwááneson mi masou ren án aramas pwapwaiti le eriáfféwú emén, iwe a “fangelo [mesan] ngeni tipis,” me elimengawa unusen inisin. Meinisin an kewe féfférún fel ngeni Kot repwe usun chék eú asor ese chúen pin me ketiw me ren Kot. (Tuteronomi 15:21; 1 Petrus 1:14-16; 2 Petrus 3:11) A ifa me watteen pwúnúngawen án emén filatá ekkewe minen apwapwa me kunou rese múrinné!
Menlapen Ekkewe Taropwe ngeni Chon Rom
13:1—Ifa ussun “Kot a ngeni ekewe nöüwis wiser pwe repwe nemenem”? “Kot a ngeni ekewe nöüwis wiser pwe repwe nemenem” pun a mut ngeniir ar repwe nemenem, iwe, fän ekkoch, Kot a fen oesini ussun ar nemenem. A pwäpwälo ren minne ewe Paipel a oesini ussun ekkoch sou nemenem.
March 11-17
PWÓRÓUS AÚCHEA SENI KAPASEN KOT | ROM 15-16
“Seppiti Jiowa An Epwe Elikiituk me Oururuk”
“Oupwe Eti Chokewe mi Kechü le Kechü”
11 Pwóróusen án Jesus meefi watteen letipeta lupwen Lasarus a máló, ina eú me lein ekkewe chómmóng pwóróus mi mak lón Paipel mi oururukich. Nge ese ámáirú ngenikich ena pún “meinisin mine a mak lon ekewe Toropwe mi Pin a mak fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin.” (Rom 15:4) Ika ka letipeta, ka pwal tongeni kúna oururun letipom seni ekkeei esin wokisin:
▪ “Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.”—Kölf. 34:18, 19.
▪ “Lupwen a wor chomong ai öürek, en [Jiowa] ka achipaei o apwapwai lelukei.”—Kölf. 94:19.
▪ “Püsin ach Samol Jesus Kraist me Samach Kot, ewe mi echenikich o fang ngenikich chipen letipach fansoun meinisin pwal ach apilükülüköch ren an ümöümöch, epwe echipa letipemi o apöchökülakemi.”—2 Tes. 2:16, 17
Mut Ngeni Likiitú “Epwe Chöchöla lon Föförümi Meinisin”
5 Tingorei Jiowa epwe fang ngonuk péchékkúl. Jiowa Kot, “i popun ach likitü me ach küna pöchökülen letipach.” (Rom 15:5) I chék ewe emén mi unusen weweiti ach kewe osukosuk, memmeef, me nónnómuch. Iwe i a fókkun silei met mi lamot ngenikich pwe sipwe likiitú. Ewe Paipel a apasa: “A föri mochenin ir meinisin mi niuokusiti i, a rong ar siö o amanaueer.” (Kölf. 145:19) Nge ifa usun Kot epwe pélúweni ach tingorei an epwe apéchékkúlakich pwe sipwe likiitú?
“Kopwe Tongei Jiowa Óm Kot”
11 Jiowa i ‘popun ach apilükülük, a aurakich ren watten pwapwa me kinamwe.’ (Rom. 15:13) Ei ápilúkúlúk seni Kot a atufichikich ach sipwe likiitú fán sókkópaten sóssótun ach lúkú. Ekkewe mi kepit mi tuppwél ra ápilúkúlúkún kúna manaw lón láng tori feilfeiló. (Pwär. 2:10) Ekkewe mi tuppwél mi ápilúkúlúkún kúna manaw wóón fénúfan repwe pwapwaiti ekkewe feiéch tori feilfeiló lón ewe Paratis Kot a fen pwonei. (Kölf. 37:29) Met meefiach usun ekkena mettóch repwe fis lón mwach? Sia meefi pwapwa me kinamwe, me sia pwal tongei ewe Chón Awora “lifang mi mürina meinisin me feiöch mi unusöch meinisin.”—Jas. 1:17.
Kúkkútta Pwóróus Aúchea
w89-E 12/1 24 ¶3
“Üa Sotuni Ai Üpwe Küna Enletin Ämi Chen”
A ffat pwe itá úrúrún pwiir kewe chón Jentail repwe tongeer me féri met pwe repwe tongeni awora álillis ngeniir. Ewer, “mi wor wiser pwe repwe alisi” ekkewe Chón Kraist lón Jerusalem. Esap pwe seni Jerusalem ewe kapas allim a tori ekkewe chón Jentail? Iei meefien Paulus: “Ekkewe chón Jus Chón Kraist ra awora ngeni ekkewe Jentail feiéch lón pekin lúkú, iwe, a ffat pwe wisen ekkewe Jentail ar repwe awora ngeniir álillis lón pekin aion.”—Rom 15:27, The New English Bible.
it-1-E 858 ¶5
Silei me Mwan, Filatá me Mwan
Ewe Messaia are Kraist, ina i ewe Mwirimwir mi pwonetiw meinisin aramas mi pwúng wóón fénúfan repwe kúna feiéch ren. (Kal 3:8, 14) Ewe áeúin atun a pa ewe ‘mwirimwir,’ mwirin an fis ewe angangen ú ngeni Kot lón Eten, nge me mwen uputiwen Epel. (Ken 3:15) Ena a fis ina epwe 4,000 ier mwen án ewe “monomon mi let” a pwáló ren ffatolóón ié ewe Messaia are ‘mwirimwir.’ Ina popun a pwúng met Paipel a erá pwe ena monomon “a monomonola me lom lon chomong, chomong fansoun.”—Ro 16:25-27; Ef 1:8-10; 3:4-11.
March 18-24
PWÓRÓUS AÚCHEA SENI KAPASEN KOT | 1 KORINT 1-3
“Ka Eáni án Aramas Ekiek are án Kot?”
(1 Korint 2:14, NW) Emén mi eáni án aramas ekiek, ese etiwa met mi riri ngeni án Kot we manaman mi fel pwe a ekieki pwe mi umwes me ren, me ese tongeni weweiti ekkena mettóch pokiten mi lamot álillisin án Kot we manaman mi fel an epwe etittiner.
Met Weween án Emén Epwe Ririéch Ngeni Kot?
4 Ifa usun ekiekin emén mi eáni án aramas ekiek? Emén mi eáni án aramas ekiek a eáni ekiekin fénúfan, mi chék nefotofot wóón pwisin mochenin futukan. Paulus a áweweei ena sókkun ekiek pwe ina “ewe ngün mi nemeni ekewe aramas mi aleasolap ngeni Kot iei.” (Ef. 2:2) Lape ngeni aramas ra eáni ena ekiek, iwe ra áppirú aramas. Ra chék féri minne mi pwúng me rer, nge rese áfánni án Kot kewe allúk. Emén mi eáni án aramas ekiek a kan ekieki mettóchun futuk me lap seni meinisin a fókkun aúcheani chék néún moni, nónnómun manawan, are pwisin an pwúúng.
5 Fán chómmóng, emén mi eáni án aramas ekiek a féri met ewe Paipel a eita ngeni “angangen fituk.” (Kal. 5:19-21) Paulus a fós usun pwal ekkóch féfférún chókkewe mi eáni án aramas ekiek lón néún we áechéén taropwe ngeni ekkewe Chón Kraist lón Korint. Ra pekini eú pekin, sótun etipefeseni aramas, pesei aramas ar repwe álleasolap, me uwealong aramas lón kapwúng, ésúfélúngawa nemenem, me ra kon alamota mwéngé me únúmer lón manawer. Emén mi eáni ekiekin aramas ese úppós lupwen a tori sóssót. (SalF. 7:21, 22) Jutas a erá pwe chókkewe mi eáni án aramas ekiek a tongeni pwal mwo nge péút seniir án Jiowa we manaman mi fel.—Jut. 18, 19.
(1 Korint 2:15, 16, NW) Iwe nge, emén mi eáni án Kot ekiek a etittina mettóch meinisin, nge pwisin i ese etittin me ren aramas. 16 Pwe “ié a silei án Jiowa ekiek, pwe epwe káit me ren?” Nge kich sia eáni ekiekin Kraist.
Met Weween án Emén Epwe Ririéch Ngeni Kot?
6 A sókkóló emén mi eáni án Kot ekiek, pwe a fókkun aúcheani an ririéch ngeni Kot. A onómu manawan fán emmwenien án Kot we manaman mi fel me achocho le áppirú Jiowa. (Ef. 5:1) A achocho le silei án Jiowa ekiek me met meefian wóón mettóch. Kot, i wesewesen emén me ren. Emén mi eáni án Kot ekiek a súféliti an kewe allúk lón meinisin kinikinin manawan, nge ese usun ewe emén mi eáni án aramas ekiek. (Kölf. 119:33; 143:10) Ese eáni “angangen fituk” nge a achocho le eáni uwaan án Kot we manaman mi fel.—Kal. 5:22, 23.
Met Weween án Emén Epwe Ririéch Ngeni Kot?
15 Ifa usun sipwe tongeni áppirú Kraist? Me ren 1 Korint 2:16 a lamot sipwe eáni “ekiekin Kraist.” Filipi 2:5 a pwal áchema ngenikich ach sipwe “eäni ewe chök ekiek Kraist Jesus a eäni.” Ren ach sipwe áppirú Kraist, mi lamot sipwe káé usun an ekiek, memmeef me an féffér. Jesus a aúcheani an ririéch ngeni Kot lap seni meinisin. Ina minne, ach áppirúfichi Kraist a wewe ngeni pwe sia pwal áppirúfichi Jiowa. Ina popun a fókkun lamot ach sipwe káé le eáni án Jesus ekiek.
Kúkkútta Pwóróus Aúchea
it-2-E 1193 ¶1
Tipachem
Iwe, ei fénúfan a áeá an tipachem le ú ngeni me apwúngaló pwe mi umwes minne Kot a awora ren Kraist. Inaamwo ika néún fénúfan kewe sounemenem ra lipwákéch lón wiser kewe, nge ra nieló ewe “Samol mi ling.” (1Ko 1:18; 2:7, 8) Nge Kot a pwáraatá pwe tipachemen ei fénúfan mi umwes me a ásáwa néún fénúfan kewe soutipachem. A féri ena ren an néúnéú met ra ekieki pwe aramas mi ‘umwes, apwangapwang, me uputekison’ me mettóchun “än Kot umwes” le apwénúetá minne a tipeni. (1Ko 1:19-28) Paulus a áchema ngeni ekkewe Chón Kraist lón Korint pwe “tipachem mi pop seni ei fanüfan [me] seni ekkewe chon nemenem lon ei fanüfan” epwe wesiló, ina minne ese apachaalong ena sókkun tipachem lón met a eáni afalafal. (1Ko 2:6, 13) A éúréúra ekkewe Chón Kraist lón Kolose ar resap tupuló ren “tipachemen fanüfan [phi·lo·so·phiʹas, weween lón Krik, tongen tipachem] mi aücheangau, a pop seni sokopaten uruwon lom aramas ra aiti ngeni aramas.”—Kol 2:8; apépé ngeni w. 20-23.
Menlapen Ekkewe Taropwe ngeni Chon Korint
2:3-5. Lupwen a afalafal lon Korint, iolapen än chon Kris tipatchem me sukul, eli Paul a ekieki ika epwe tongeni achchüngü letipen iir kewe mi aüseling. Iwe nge, ese mut ngeni och apwangapwang are niuokkus an epwe eppeti an apwönüetä wisan me ren Kot. Iwe, sisap pwal mut ngeni sokkopaten nonnomun manauach mi weires are sokkolo ar repwe eppeti ach esilefeili ewe kapas allim ussun Mwuun Kot. Sipwe tongeni lükülük woon Jiowa pwe epwe älisikich, ussun chök Paul.
March 25-31
PWÓRÓUS AÚCHEA SENI KAPASEN KOT | 1 KORINT 4-6
“Ekis Chök Iis A Apwola Unusen eu Pilawa”
(1 Korint 5:5, NW) Oupwe ásechaló átei ngeni Satan pwe oupwe amóeló an etipetip mi ngaw pwe ewe napanap are ekiek lón ewe mwichefel epwe kúna túmún lón fansoun ránin ewe Samol.
it-2-E 230
Iis
Ewe aposel Paulus a pwal eáni ena sókkun áwewe usun iis lupwen a ereni chón ewe mwichefelin Chón Kraist lón Korint ar repwe atowu emén mwán mi tipisin lisowumwáál, a erá: “Ousap silei pwe ekis chök iis a apwola unusen eu pilawa? Oupwe atowu ewe issin lom, a aliosunätä tipis, pwe oupwe wesewesen limöch. Mürin oupwe wewe ngeni pilawa mi fö a öüwöü, esap wor iis lon. Ngang üa silei pwe ina usumi. Pun Kraist ach we Lamen Pasofer a fen ninnila.” Mwirin, a affataéchú met weween ena “iis” ren an erá: “Iei mine ousipwe föri ewe mongön Pasofer, sap ren ewe pilawa mi wor ewe issin lom lon, a aliosunätä tipis me föföringau, nge ren ewe pilawa esap wor iis lon, a aliosunätä limöch me let.” (1Ko 5:6-8) Lón ekkena wokisin, Paulus a eáni áwewe án chón Jus we Chulapen Mwéngé Pilawa Ese Wor Iis Lón, ewe a fis mwirin chék ewe Pasofer. Lupwen ekis chék pilawa mi wor iis lón a nofit ngeni och pilawa mi ámás, iwe unusen ena pilawa epwe pwotá. Pwal ina chék usun án ewe mwichefel epwe unusen limengaw mwen mesen Jiowa ika ese atowu ewe mwán mi féri tipis, ewe a tongeni etipetipa ewe mwichefel. A lamot repwe oturawu ewe “iis” seni me leir usun chék án ekkewe chón Israel rese tongeni onómu iis lón imwer kewe atun ewe chulap.
it-2-E 869-870
Satan
Met weween “Oupwe ásechaló átei ngeni Satan pwe oupwe amóeló an etipetip mi ngaw”?
Iei alon aposel Paulus ngeni ewe mwichefelin Korint ren met repwe féri ngeni emén mwán a eáni féffér mi fókkun ngaw, a kokkongaw ngeni pwúlúwen seman: “Oupwe ásechaló átei ngeni Satan pwe oupwe amóeló an etipetip mi ngaw.” (1Ko 5:5, NW) Ena allúk a wewe ngeni pwe repwe atowu ewe mwán seni ewe mwichefel me repwe úkútiw le chiechi ngeni. (1Ko 5:13) Ar ásechaló ngeni Satan a wewe ngeni pwe repwe atowu seni ewe mwichefel me likitaló lón ótóten fénúfan, ewe Satan a kot me sounemenem wóón. Ena mwán a wewe ngeni “ekis chök iis” lón “unusen eu pilawa,” ren an atolonga lón ewe mwichefel “an etipetip mi ngaw.” Nge ren an atowu ewe mwán seni me lón, ewe mwichefel epwe ataieló “an etipetip mi ngaw” seni me lón ewe mwichefel. (1Ko 5:6, 7) Pwal ina chék usun Paulus a likiti ngeni Satan Himenäus me Aleksanter pokiten ra péútaaló ar lúkúlúk me mwelien letiper mi múrinné.—1Ti 1:20.
Féfférúch Ngeni Emén mi Katowu
Atun emén chón ach we famili are aramasach are chiechiach ese aier a katowu seni ewe mwichefel, a fókkun ámeteki letipach. Úkúkún ach apwénúetá án Paipel emmwen usun ei mettóch, pwal ina úkúkún ach pwáraatá ach tongei Kot me tuppwél ngeni an kókkót. Ekieki ekkeei ekkóch kapas eis mi ppiitá usun ei pwóróus.
Epwe ifa féfférúch ngeni emén mi katowu? Ewe Paipel a apasa: “Oute chiechi ngeni emon mi iteni pwich, are a fori lisou, are mochenia, are fel ngeni anumwal, are lalingau, are unupuch, are mocho; ousap eti ekkeei sokkun aramas le mongo.” (1 Korint 5:11, TF) Emén ese “kamwöchünük won än Kraist afalafal,” Paipel a erá pwe “ousap etiwa i lon imwemi,” ousap mwo nge kapong ngeni. “Pun eman mi eäni kapongen kinamwe ngeni, a wiliti eman chiechian lon ekewe sokun föföringau a föriir.” (2 Johannes 9-11) Sisap fós ngeni ekkewe mi katowu usun ekkewe mettóchun lúkú me chiechi ngeniir. The Watchtower minen September 15, 1981, pekin taropwe 25, a apasa: “Ach chék apasa ‘Rán allim’ ngeni emén epwe tongeni emmwen ngeni ach pwóppwóróusfengen me neman pwal mwo nge chiechifengen. Kich mi mochen poputá le féri ena mettóch ngeni emén mi katowu?”
Itá mi lamot ach sisap fókkun mwo nge ekis chiechi ngeni emén mi katowu? Ewer, pokiten a wor chómmóng popun. Áeúin, a pwáraatá ach tuppwél ngeni Kot me an we Kapas. Ach álleasochisi Jiowa esap chék atun a mecheres ngenikich nge pwal atun a weires ngenikich. Ach tongei Kot a amwékútúkich le álleasochisi meinisin an kewe allúk me sia mirititi pwe i emén mi pwúng me tong iwe, an kewe allúk ra fókkun échitikich. (Aisea 48:17; 1 Johannes 5:3) Oruuan, ach sisap chiechi ngeni emén ese aier, a túmúnúkich me ewe mwichefel seni limengaw lón pekin lúkú me manaw, me a álisatá itéchún ewe mwichefel. (1 Korint 5:6, 7) Aúlúngátin, ach úppós fán iten án Paipel kewe kapasen emmwen a tongeni álisi ewe mi katowu. Ren ach álisatá met ewe mwichen mwán mi ásimaw a apwúngaló, sia tongeni achchúngú letipen ewe mi chúen féfféringaw, ewe mi pépééni án ekkewe mwán mi ásimaw achocho le álisi. Pokiten ese chúen chiechi ngeni chókkewe mi tonger, neman ina met epwe álisi le “tipatchemelo” le mirititi choun ewe tipis me poputá le liwiniti Jiowa.—Lukas 15:17, TF.
Ifa usun ika emén chón ach famili are aramasach a katowu? Iwe lón ena atun, pokiten ewe riri lefilen ewe famili, án emén tuppwél ngeni án Jiowa kewe allúk epwele wor sóssótun. Epwe ifa féfférúch ngeni emén chón ach we famili are aramasach mi katowu? Sise tongeni eiteita meinisin nge sipwe chék menlapei ruu mi lamot.
Fán ekkóch emén chón lón ewe famili a katowu, áwewe chék, emén me lein ewe sam, ewe in are emén nau mi kúkkún mi chúen nónnóm lón imwer. Án emén katowu ese muti ewe ririin famili nge a tongeni sópwósópwóló ar angangen famili me kókkót iteiten rán. Iwe nge pokiten met ewe mi katowu a féri, a filatá an epwe atai ewe riri lón pekin lúkú lefilan me chón an we famili mi angang ngeni Jiowa. Ina popun, chón an we famili mi tuppwél resap chúen chiechi ngeni lón pekin lúkú. Áwewe chék, ika ewe mi katowu a nónnóm atun án ewe famili káéfengen ewe Paipel, iwe epwe chék fanafaneló. Iwe nge, ika emén nau mi kúkkún mi chúen nóm fán túmúnúen ekkewe sam me in nge a katowu, iwe wiser ar repwe asukula me emiriti. Ina popun, ekkewe sam me in mi tong ra tongeni káé ngeni néúr na.—Än Salomon Fos 6:20-22; 29:17.
Fán ekkóch, ewe mi katowu i aramasach nge ese nónnóm rech. Inaamwo ika fán ákkáeú epwe wor fansoun sipwe fós ngeni ewe mi katowu wóón met mi fókkun lamot mi weneiti ewe famili, nge epwe chék fókkun aúkúk. Chón lón ewe famili iir chón Kraist mi tuppwél rese kútta popun ar repwe tongeni fósfengen me aramaser we mi katowu ese nónnóm rer. Ar tuppwél ngeni Jiowa me an we mwicheich a amwékútúúr le álisatá án ewe Paipel kókkót usun katowu. Ar tuppwél a pwáraatá pwe ra ekieki lón letiper met epwe échiti ewe mi katowu me a tongeni álisi le angei álillis seni ewe angangen kapwúng a kúna.—Ipru 12:11.
Kúkkútta Pwóróus Aúchea
(1 Korint 4:9, TF) Pun ua meefi pwe Kot a fen likitalo am chon kuno mwirifochofoch, usun chok aramas mi amol ngeni malo, pun am aua fen wiliti minen aweitfengen ngeni fonufan me chonlang me aramas.
Ekkewe Chonläng—Iir ‘Ngün Mi Angang Fän Iten Aramas’
16 Fän sossot, ekkewe Chon Kraist, iir ‘minen aweitfengen ngeni chonlang.’ (1 Kor. 4:9, TF) Ekkewe chonläng ra pwapwa le küna ach kewe föfförün tuppwöl me pwal än emön chon tipis aier. (Luk 15:10) Ekkewe chonläng ra pwal küna föfföröchün fefin mi tapwelo mwirin Kraist. Ewe Paipel a apasa pwe “epwe wor esisinen nemenem won mokurer, pokiten ekkewe chonlang.” (1 Kor. 11:3, 10, TF) Enlet, ekkewe chonläng ra pwapwa le küna ekkewe fefin me meinisin Chon Kraist woon fönüfan ar repwe anomuur fän mökürer kewe me än Kot kokkotun nemenem. Ar älleasochis, ina eü minen ächechem ngeni ekkena chonlängin Kot.
it-2-E 211
Allúk
Allúk Ngeni Chónláng. Inaamwo ika ekkewe chónláng ra tekia mwen aramas, nge ra pwal nóm fán án Kot kewe allúk. (Ip 1:7, 14; Kf 104:4) Jiowa a pwal mwo nge allúkú Satan, ewe mi ú ngeni i, me aúkúkú mwékútúkútún. (Hp 1:12; 2:6) Mikael ewe meilapen chónláng a pwáraatá pwe i a nóm fán nemenien Jiowa, ewe Soukapwúng mi Tekia seni meinisin, ren an ereni ewe Tefil: “Ewe Samol epwe apwünguk!” (Jut 9; apépé ngeni Sek 3:2.) Mwirin án Jesus Kraist manawsefál me angei lingan, Jiowa Kot a onómu meinisin ekkewe chónláng fán nemenian. (Ip 1:6; 1Pe 3:22; Mat 13:41; 25:31; Fp 2:9-11) Áwewe chék, Jesus a allúkú ngeni emén chónláng an epwe uwei ngeni Johannes och pwóróus. (Pwä 1:1) Nge lón 1 Korint 6:3, aposel Paulus a fós usun án pwiin Kraist kewe repwe apwúngú ekkewe chónláng. Neman ena a wewe ngeni pwe epwe wor wiser le apwénúetá ewe kapwúng wóón ekkewe chónláng mi ngaw.