Minne Paipel A Pwári Usun ewe Sounemenemen Makkan

1. Pwata ka kilisou ren án Kot awora ewe Paipel?

SIA mmen fókkun kilisou ngeni Jiowa Kot ren ewe Paipel. A awora ngenikich me lón ewe Paipel kapasen fén mi tongeni álisikich le silei met sipwe féri atun a torikich osukosuk lón ei fansoun. A pwal ngenikich eú ápilúkúlúk mi amwarar fán iten mwachkkan. Nge ewe a kon aúchea seni meinisin, Jiowa a néúnéú ewe Paipel le pwáraaló chómmóng napanapan kewe. Atun sia ekieki napanapan kana mi múrinné, a fókkun chúng letipach me sia mochen chiechiéch ngeni.​—Kölf. 25:14.

2. Ikkefa ekkóch alen án Jiowa pwáraaló pwisin i ngeni aramas?

² Jiowa a mochen án aramas repwe silei i. Lón fansoun lóóm, a pwáraaló pwisin i ren an efisi án ekkóch néún kewe aramas repwe eáni ekkewe ttan, kúna ekkewe lángipwi, me néúnéú ekkewe chónláng. (Num. 12:6; Föf. 10:3, 4) Nge ifa usun sia tongeni káé ekkena ttan, lángipwi, are pwóróus seni ekkewe chónláng ika rese makketiw? Jiowa a néúnéú ekkóch mwán le “makei lon eu puk” met ekkewe a mochen sipwe silei. (Jer. 30:2) Iwe, pokiten “än Kot kewe föför ra unusen pwüng,” sia tongeni lúkúlúk pwe alen an pwóróus ngenikich, a fókkun múrinné me epwe álisikich.​—Kölf. 18:30.

3. Ifa usun Jiowa a túmúnú án ewe Paipel esap kamwóóló? (Aisea 40:8)

³ Álleani Aisea 40:8. Ren fitengeréú ier, án Kot we Kapas a akkawora kapasen emmwen mi múrinné ngeni ekkewe mwán me fefin mi tuppwél. Ifa usun a tufich ena? A éch ena kapas eis, pokiten me lóóm ewe Paipel a akkomw mak wóón ekkewe mettóch mi mwittir taló. Ina popun, ese chúen nóm rech ekkena mettóch ewe Paipel a akkomw mak lón. Nge, Jiowa a túmúnú pwe epwe wor kapiin ekkewe taropwe mi pin. Inaamwo ika rese unuséch ekkewe chón kapiini, nge ra fókkun túmúnúéch. Áwewe chék, iei met emén soukáé a makkeei usun ewe Tesin Ipru: “Sia tongeni apasa fán lúkúlúk pwe ese pwal wor och mettóch minen lóóm lóóm a chúen nóm tori ei fansoun nge a mmen pwúng.” Iwe, inaamwo ika ewe Paipel a mak me lóóm wóón mettóch mi mwittir taló, me ekkewe chón kapiini rese unuséch, nge sia tongeni lúkúlúk pwe minne sia álleani lón néúch we Paipel lón ei fansoun, a pwáraaló ekiekin Jiowa, ewe Sounemenemen Makkan.

4. Met sipwele káé lón ei lesen?

⁴ Jiowa a awora ngenikich “lifang mi mürina meinisin me feiöch mi unusöch meinisin.” (Jas. 1:17) Ewe Paipel, ina eú me lein ekkewe liffang mi múrinné Jiowa a fang ngenikich. Atun emén a liffang ngenikich, an na liffang a áiti ngenikich úkúkún an silekich me silei met a lamot ngenikich. A pwal ina usun ren ewe Chón Liffang, ewe Paipel. Atun sia etittinafichi ena liffang, a chómmóng met sia káé usun Jiowa. Sia kúna pwe i a silekich me silei met mi lamot ngenikich. Lón ei lesen, sipwe ppii met sipwe káé seni ewe Paipel usun úlúngát me lein napanapen Jiowa kewe: Ikkeei, an tipachem, an pwúng, me an tong. Iei sipwe akkomw ppii ifa usun ewe Paipel a affata pwe Kot a tipachem.

EWE PAIPEL A PWÁRI ÁN KOT TIPACHEM

5. Ifa eú alen án Paipel pwári án Kot tipachem?

⁵ Jiowa a silei pwe a lamot ngenikich an emmwen mi tipachem. An we liffang, ewe Paipel, a masou ren an tipachem. Ekkewe kapasen emmwen lón Paipel, ra fókkun álilliséch ngeni aramas. Ewe Paipel a ekkesiwili manawen aramas. Atun Moses a makkeei ekkewe puk mi akkomw lón Paipel, iei met a ereni néún Kot kewe aramas, ekkewe chón Israel: “Ei allük esap fos pön ngenikemi, nge i fen manauemi.” (Tut. 32:47) Chókkewe mi álleasochisi masouen ekkewe Taropwe mi Pin, ra tongeni eáni manaw mi sópwéch me pwapwa. (Kölf. 1:2, 3) Inaamwo ika án Kot Kapas a mak lóóm lóóm, nge a chúen wor manamanan le émúrinnéló manawen aramas. Áwewe chék, lón ewe kinikin itelapan “The Bible Changes Lives” wóón jw.org, ka tongeni kúna lap seni 50 pwóróusen chókkewe lón ei fansoun mi féri watteen siwil me émúrinnéló manawer pokiten ra poputá le álleasochisi án Paipel kapasen emmwen.​—1 Tes. 2:13.

6. Pwata sia tongeni erá pwe ese wor eú puk mi léllé ngeni ewe Paipel?

⁶ Ese wor eú puk mi léllé ngeni án Kot we Kapas. Pwata sia erá ena? Pún ewe Sounemenemen Makken ena puk, Jiowa Kot, i mi unusen manaman, esap tongeni máló, me a tipachem seni meinisin. A wor chómmóng puk aramas ra sópweló le ákkállea pwal mwo nge mwirin án ewe minneká makeian a fen máló, me lape ngeni ese chúen wor lamoten ekkewe kapasen emmwen lón ekkena puk mwirin och fansoun. Nge án Paipel kewe kapasen emmwen ra álilliséch fansoun meinisin me a fen álisi iteiten táppin me táppin aramas. Lupwen sia álleani ena puk mi pin me ekilonei met sia káé, ewe Sounemenemen Makkan epwe áeá an we ngún mi fel le álisikich pwe sipwe kúna ifa usun sia tongeni apwénúetá an kewe kapasen emmwen lón manawach. (Kölf. 119:27; Mal. 3:16; Ipru 4:12) Ewer, ewe Sounemenemen Makken Paipel, i mi manaw, me a fókkun mochen álisuk. Ach silei ena, a efisi ach sipwe mochen álleani ewe Paipel iteitan!

7. Ifa usun ewe Paipel a etipeeúfengeni néún Kot kewe aramas lón fansoun lóóm?

⁷ Pwal och mettóch mi pwári pwe a masou ewe Paipel ren án Kot tipachem, ina an álisi néún kewe aramas ar repwe tipeeúfengen. Atun ekkewe chón Israel ra tolong lón ewe Fénúen Pwon, ra en me nóm lón sókkopaten kinikinin. Ekkóch ra wiliti chón attaw, ekkóch chón fol man, me ekkóch chón atake. A tongeni mecheres án ekkena chón Israel mi nóm lón kinikinin ena leeni repwe túmúnúngaw ngeni met pwiir kewe mi nóm lón pwal ekkewe ekkóch kinikin ra osupwangan. Nge, Jiowa a akkóta ar repwe kochufengen lón ekkóch atun pwe repwe rongorong álleaan me áweween an we Kapas. (Tut. 31:10-13; Ne. 8:2, 8, 18) Anchangei úkúkún pwapwaan emén chón Israel mi tuppwél atun a wareiti Jerusalem me kúna fite million chienan kewe chón fel ngeni Kot seni kinikinin ena leeni! Án Jiowa na kókkót, a álisi néún kewe aramas ar repwe chék tittipeeúfengen. Mwirin och fansoun, atun a fférútá ewe mwichefelin Chón Kraist, a wor ekkewe mwán me fefin mi eáni sókkopaten fós lón ena mwichefel, ekkóch me leir iir mi iteféúló, me ekkóch iir mi tekisosson, ekkóch mi wéúéch, me ekkóch iir mi osupwang. Nge pokiten ra aúcheani ewe Paipel, ra tipeeúfengen lón ar fel ngeni ewe Kot mi enlet. Chókkewe mi wiliti chón lúkú ra tongeni chék weweiti án Kot we Kapas ren álillisin chiener kewe chón fel ngeni Kot me ren ar mwichfengen.​—Föf. 2:42; 8:30, 31.

8. Ifa usun ewe Paipel a etipeeúfengeni néún Jiowa kewe aramas lón ei fansoun?

⁸ Ach we Kot mi tipachem a sópweló le asukula me etipeeúfengeni néún kewe aramas ren álillisin ewe Paipel. A masou ewe Paipel ren meinisin ekkewe pwóróus mi enlet usun Jiowa mi lamot sipwe silei. Sia kan chufengen lón ach kewe mwich me mwichelap pwe sipwe rongorong álleaan me áweween ewe Paipel, me pwóróusfengen wóón. Ina popun ewe Paipel, ina eú minen álillis mi fókkun aúchea Jiowa a néúnéú le álisi néún kewe aramas le ‘angang ngeni fän tipeeu.’​—Sef. 3:9.

9. Ifa ewe napanap mi lamot sipwe napanapeni ren ach sipwe weweiti masouen ewe Paipel? (Lukas 10:21)

⁹ Pwal iei eú mettóch mi pwári án Jiowa tipachem. A féri an epwe mak chómmóng kinikinin ewe Paipel lón ewe esin napanap ekkewe chék mi tipetekison repwe tongeni weweiti atun ra álleani. (Álleani Lukas 10:21.) Aramas ekis meinisin ra álleani ewe Paipel. Emén soukáé a erá pwe a chómmóng aramas ra álleani ewe Paipel lap seni pwal ekkewe ekkóch puk, me ra álleaniéchú lap seni meinisin puk. Nge ekkewe chék mi tipetekison ra enletin weweiti me apwénúetá met a erá.​—2 Kor. 3:15, 16.

10. Pwal ifa eú alen án ewe Paipel pwári án Jiowa tipachem?

¹⁰ Sia káé usun án Jiowa tipachem lón ewe Paipel lón pwal eú napanap. Jiowa ese chék néúnéú ewe Paipel le asukula néún kewe aramas lón ar mwichfengen, nge a pwal néúnéú le asukula me oururu emén me emén. Atun sia álleani an we Kapas, kich meinisin sia tongeni meefi an chúngú emén me emén kich. (Ais. 30:21) Lupwen ka nóm lón eú osukosuk, fán fite ka kan seppiti ewe Paipel me álleani eú wokisin usun itá a chék mak fán itom? Iwe nge, ewe Paipel a mak pwe fite million aramas repwe tongeni weweiti. Nge pwata a tufich an epwe makketiw ekkewe pwóróus mi weneituk me fich ngeni met mi lamot ngonuk? A chék tufich ena pokiten ewe Sounemenemen Makken Paipel, i mi unusen tipachem seni meinisin lón láng me fénúfan.​—2 Tim. 3:16, 17.

EWE PAIPEL A PWÁRI ÁN KOT PWÚNG

11. Ifa usun Kot a pwári pwe ese lifilifil aramas atun a mak ewe Paipel?

¹¹ Pwúng, pwal ina eú napanapen Jiowa. (Tut. 32:4) Emén aramas mi eáni ewe napanap pwúng, lape ngeni ese kan lifilifil aramas, me Jiowa ese lifilifil aramas. (Föf. 10:34, 35; Rom 2:11) Sia tongeni kúna pwe Jiowa ese lifilifil aramas ren án ewe Paipel mak lón ewe sókkun fós chómmóng aramas ra eáni lón ena atun. Ekkewe 39 puk lón Paipel lape ngeniir ra mak lón fósun Ipru, ewe fós mi mecheres án néún Kot kewe aramas repwe weweiti lón ena atun. Iwe nge, lón fansoun ekkewe aposel, lape ngeni aramas ra eáni fósun Krik, ina popun ekkewe 27 puk lón Paipel ra mak lón fósun Krik. Jiowa ese filatá an epwe mak an we Kapas lón eú chék fós. Lón ei fansoun, arapakkan walu billion aramas wóón fénúfan ra eáni sókkopaten fós. Pwata a tufich án chómmóng repwe tongeni káé usun Jiowa?

12. Ifa eú mettóch mi pwári pwénúetáán Taniel 12:4 lón ekkeei fansoun sópwólóón?

¹² Jiowa a pwonei me ren ewe soufós Taniel pwe lón ekkewe fansoun sópwólóón, ewe sile mi enlet lón ewe Paipel epwe “lapala.” Chómmóng aramas repwe weweiti. (Álleani Taniel 12:4.) Eú mettóch mi álisi chómmóng le weweiti ewe Paipel, ina án ewe Paipel me ekkewe álillisin Paipel chiyakú, peres, me einet ngeni chómmóng aramas. Ewe Paipel ina ewe puk mi chómmóng chiyakúún me einetin lap seni puk meinisin wóón fénúfan. Ekkewe Paipel chiyakúúnien ekkóch kompeni, fán ekkóch ra fókkun mémmóng. Néún Jiowa kewe aramas ra chiyakúúni unusen ewe Paipel are kinikinin chék lón lap seni 240 fósun fénúfan, me emén a tongeni angang néún nge ese pwal kamé. Ina popun, aramas seni fénú meinisin ra tongeni káé ewe “Pworausen Manau usun ewe Mwün Kot” me mwen warotoon ewe sópwólóón. (Mat. 24:14) Ach we Kot mi pwúng, a mochen suuki ngeni chómmóng aramas alen ar repwe silei i ren ar álleani an we Kapas. A féri ena pokiten a fókkun tongekich meinisin.

EWE PAIPEL A PWÁRI ÁN KOT TONG

13. Pwata sia tongeni erá pwe ewe Paipel a pwári án Jiowa tong? (Johannes 21:25)

¹³ Ewe Paipel a álisikich le weweiti pwe tong ina napanapen Jiowa we mi lap seni meinisin. (1 Joh. 4:8) Ekieki usun met ekkewe Jiowa a apachaalong lón ewe Paipel me met ekkewe ese apacherelong. A chék apachaalong met ekkewe mi lamot ngenikich pwe sipwe riri ngeni, eáni manaw mi pwapwa lón ei fansoun, me eáni manaw esemuch. Iwe nge, pokiten a tongekich, iwe ese achowukich ren chómmóng pwóróus esap ki ngenikich.​—Álleani Johannes 21:25.

14. Ifa usun masouen ewe Paipel a pwal pwári án Kot tongekich?

¹⁴ Jiowa a pwal pwári an tong ren an pwóróus ngenikich lón ewe napanap mi pwári pwe a súfélitikich. Ese eiteitaatiw chómmóng allúk lón ewe Paipel, me ese erenikich met sia tongeni féri are met sise tongeni féri lón meinisin kinikinin manawach. Nge a fen áeá pwóróusen manawen aramas, ekkewe oesini mi amwarar, me ekkewe kapasen emmwen mi álilliséch pwe epwe álisikich le eáni kefil mi múrinné. Ina alen án an we Kapas epwe amwékútúkich le tongei i me álleasochisi seni letipach.

15. (a) Ifa usun Jiowa a pwári pwe a áfánni chókkewe mi álleani an we Kapas? (b) Lón ei sasing, pwóróusen ié kewe lón Paipel ei kúkkún nengngin, ei alúwél, me ei chinnap fefin ra ekilonei? (Ken. 39:1, 10-12; 2 King 5:1-3; Luk. 2:25-38)

¹⁵ Ewe Paipel a pwári pwe Jiowa a fókkun áfánnikich. Ifa usun? A masou an we Kapas ren pwóróusen ekkewe aramas sia tongeni weweiti meefier pwe iir aramas “usun chök kich.” (Jas. 5:17) Nge lap seni meinisin, ach kúna féfférún Jiowa ngeni ekkewe aramas usun chék kich, a atufichikich le wewefichiti pwe i “a uren kirikiröch me tong.”​—Jas. 5:11.

16. Met sia káé usun Jiowa atun sia álleani pwóróusen chókkewe lón Paipel iir mi mwáálliló? (Aisea 55:7)

¹⁶ Ewe Paipel a pwári án Jiowa tongekich lón pwal eú napanap. A alúkúlúkú ngenikich pwe ach we Kot esap likitikicheló atun sia mwáálliló. Fán chómmóng, ekkewe chón Israel ra tipis ngeni Jiowa, nge atun ra enletin aier, a omusereló. (Álleani Aisea 55:7.) Ekkewe Chón Kraist lón fansoun ekkewe aposel ra pwal silei pwe Kot a fókkun tongeer. Fán emmwenien Kot, aposel Paulus a pesei chienan kewe chón lúkú ar repwe ‘amusala tipisin . . . o echipa letipen’ emén mi sópweló le féfféri eú tipis mi chou nge a aier. (2 Kor. 2:6, 7; 1 Kor. 5:1-5) A ifa me amwararen án Jiowa ese likitaló ekkewe chón fel ngeni pokiten chék ra mwáálliló! Nge a fen álisiir fán tong, áwener, me etiwer le chiechisefál ngeni. A pwonei pwe epwe pwal féri ena lón ei fansoun ngeni meinisin chókkewe mi féri tipis nge ra aier.​—Jas. 4:8-10.

AÚCHEANI ÁN KOT WE KAPAS EWE “LIFANG MI MÜRINA”

17. Pwata ewe Paipel ina eú liffang mi fókkun aúchea?

¹⁷ Jiowa a fang ngenikich eú liffang mi fókkun aúchea. Pwata a kkóló aúchean an we Kapas? Sia fen káé pwe ewe Paipel a pwári án Kot tipachem, an pwúng, me an tong. Ena puk a pwári pwe Jiowa a mochen ach sipwe silei i me a mochen ach sipwe wiliti chiechian.

18. Ifa usun sia tongeni pwári ach aúcheani ewe Paipel, ewe “lifang mi mürina” me ren Jiowa?

¹⁸ Sise mochen aúcheangawa án Kot we Kapas, ewe “lifang mi mürina.” (Jas. 1:17) Ina minne sipwe sópweló le pwári pwe sia aúcheani. Sia tongeni féri ena, ren ach álleani fiti iótek masouan kewe mi pin me ekilon woor. Atun sia féri ena, sia tongeni lúkúlúk pwe ewe Sounemenemen Makkan epwe efeiéchú ach achocho me sipwe ‘fefeitä lon ach silei Kot.’​—SalF. 2:5.