Ewe Tefil A Asemmwenikich?

ESAP ITA WOR SEMMWEN. Kot a forikich fan iten ach sipwe manau tori feilfeilo chok nge sisap semmwen. Emon ngun lon lang, Setan, a efisi semmwen, metek, me malo an epwe tori aramas meinisin lupwen a emmweni semach me inach akkom, Atam me If, ngeni tipis.​—KENESES 3:1-5, 17-19; ROM 5:12.

WEWEEN pwe semmwen meinisin a pop seni angangen ekkewe ngun mi ngau? Ussun a mak lon ewe poraus akkom, a ina ussun lukuen chommong. A pwal ina lukuen inen Owmadji we chinnap. Nge an Owmadji feil seni​—eu semmwen mi tongeni nnielo semirit lon ekkewe leeni mi pwichikkar​—a fis pokiten ekkewe ngun mi ngau?

Angangen Setan

Mi ffat poluen ei kapas eis lon ewe Paipel. Akkom a affata pwe ngunun aramasach rese tongeni kku ekkewe mi chuen manau. Lupwen aramas ra malo, “rese silei och mettoch.” Esor ngunur mi chuen manau mwirin ar malo. Ir mi onnut lon peias, ikewe esor “ekiek, silelap, ika tipachem” ie. (Än Salomon Afalafal 9:5, 10) Emon mi malo ese tongeni asemmweni emon mi manau!

Iwe nge, alon ewe Paipel pwe mei wor ekkewe ngun mi ngau. Ewe aemonun chon u ngeni lon unusen lang me fonufan a wiliiti ewe ngun mi ngau itan Setan. Pwal ekkoch, iter timon, ra fiti Setan. Setan me noun kewe timon mi tongeni asemmwenikich? A fen fis. Ekkoch ekkewe manaman Jises a fori ra fen alisi aramas mi semmwen pokiten ekkewe timon. (Luk 9:37-43; 13:10-16) Iwe nge, lape ngeni ekkewe aramas Jises a apochokkula ese uriir semmwen seni ekkewe timon. (Mattu 12:15; 14:14; 19:2) A ussun we chok ikenai, lape ngeni ekkewe semmwen a urikich a pop seni apwangapwangen pwisin inisich nge esap seni angangen ekkewe ngun mi ngau.

A Ifa Ussun Setan A Fori An we Angang?

Arapakan fansoun meinisin, ewe riri lefilen an aramas semmwen me Setan a wewe ngeni an Setan sotuni ewe aewin peaan aramas, me ar turutiu lon tipis. Setan me noun kewe timon rese efisi eu me eu semmwen. Iwe nge, Setan epwe tongeni etipetipakich pwe sipwe filingau me tunalo ach luku, me feiengauen inisich mi tongeni pop seni ena. Setan ese tota wor, nnielo are asemmweni Atam me If. A etipetipa If an epwe alleasopapa Kot, me Atam a tapwelo mwirin lon an alen alleasolap. Mwiriloon ar foffor, semmwen me malo.​—Rom 5:19.

Inen Owmadji chinnap a sotun le etipetipa Hawa pwe epwe kutta ttiit me minen magic ren an epwe awora tumun seni semmwen. Met epwe fen fis ika Hawa a fen fori alon mama chinnap? Epwe fen pwalo nafangauen an luku Jiowa Kot, me esap chuen tongeni lukuluk won an we tumun.​—Ekistos 20:5; Mattu 4:10; 1 Korint 10:21.

Ach luku pwe ekkewe ngun mi ngau ra efisi ekkewe semmwen meinisin mi urikich a wewe ngeni eu ssar. Epwe tongeni efisi niuokkus watte ngeni ekkewe ngun mi ngau. Iwe, lupwen sia semmwen, eli sipwe mochen sotun le apwapwai ekkewe timon lap seni ach towaualo seniir. Ika Setan mi tongeni aniuokkusukich pwe sipwe kutta alillis seni ekkewe sou roong, epwe wewe ngeni ach afangema ewe Kot mi enlet, Jiowa. (2 Korint 6:15) Sipwe ita mwokut me ren ach sufoliiti me nioukkusiiti Kot, sap ren och niuokkus mi alongolong won nafangauen sile ren ewe Chon Oput Kot.​—Pwarata 14:7.

Sokkopaten Popun A Urikich Semmwen

Lape ngeni aramas rese luku pwe mei wor ngun mi ngau. Lupwen ra semmwen, repwe chuuri emon tokter​—ika mei naf ar moni. Pwungun pwe emon mi tongeni kutta alillis seni emon tokter nge esap chikar. Ekkewe tokter rese tongeni fori manaman. Chommong aramas mi nafangau sileer repwe tongeni chikar ren alillisin tokter nge ra mmang le feilo. Ra akkom kutta alillis seni ekkewe sou roong, nge lupwen rese pochokkulelo repwe chuuri tokter. Chommong ra malo nge uruurun pwe resap malo ika ra fen akkom chuuri ewe tokter.

Pwal ekkoch ra muttir malo pokiten nafangauen sileer. Rese esinna esissinen ekkewe semmwen me rese angang ngeni ar repwe eppeti semmwen. Sile mi tongeni tumunukich seni riaffou. A kisikis maloon noun ekkewe inelap mi silei allea seni maloon noun ekkewe inelap rese silei allea. Ewer, nafangauen sile mi tongeni emmwen ngenikich malo.

Tumunungau pwal eu popun sia semmwen. Ren chok awewe, chommong ra semmwen pokiten ra mut ngeni kakiros me nong ar repwe tota are sotiu won aner mongo mwen repwe ani are pokiten ewe emon mi kuku ewe mongo ese fen tolu poun kewe. Lon pekin ach pochokkul, a fokkun enlet pwe “eppetiin semmwen a auchea mwen safei.”

Lapalap mi ngau ren manauer a fen efisi an fite milion aramas semmwen me muttir malo. Unnupuch, lisowu mwaal, aeamwaalli safei, me suupwa a fen efeiengaua chommong. Ika emon a fori ekkeei sokkun mettoch me a uri semmwen, an semmwen a fis pokiten pout are pokiten ngun mi ngau a tota won? Aapw. Pwisin tipisin. An tipi ngeni ekkewe ngun mi ngau a wewe ngeni an chipwang le apasa pwe an semmwen pwisin tipisin.

Met Epwe Awesalo Semmwen

Kot ese asemmwenikich. “Esor emon mi tongeni oturukapa Kot o Kot esap oturukapa emon.” (Jemes 1:13) Ewer, Kot mi tong. A mochen alisikich, esap efeiengaukich.

Pwungun pwe Jiowa a awora ewe minen awesalo semmwen​—maloon Jises me an we manausefal. Ren an Jises moon kepichilo, a moonisefalli aramas, rese chuen nom fan nemenemen tipis, me lon mwach kkan repwe tufichin kuna pochokkulen inisir me manau esemuch lon eu paratis won fonufan. (Mattu 5:5; Jon 3:16) Ekkewe manaman Jises a fori a fen aiti ngenikich ewe sokkun chikar Muun Kot epwe wato. Esap pwal chuen nom Setan me noun kewe timon. (Rom 16:20) Pwungun pwe Jiowa epwe awora mettoch mi amwarar ngeni ekkewe aramas mi luku i. Sipwe chok mosonottam me likiitu.

Lon ei fansoun, Kot a ngenikich tipatchem mi alisikich iei me emmwen lon pekin ngun seni ewe Paipel me ewe mwichen aramas mi tuppwol lon ar fel ngeni i won unusen fonufan. Kot a aiti ngenikich ifa ussun sipwe ti senikich ekkewe minen efeiengaua inisich. A pwal awora chienach kewe mi murinno pwe ir repwe alisikich lupwen a piita och osukosuk.

Met a fis ngeni Owmadji? Inan we a chechchemeni och poraus lon chiechien Ewe Leenien Mas itan Awake!, ussun oral rehydration therapy.a A fori alon ewe kapasen emmwen me a ammonlata ewe safei pwe Owmadji epwe unumi. Iei Owmadji a pochokkulsefal.

[Footnote]