Sufol Ngeni Nemenem Met Popun Esor?
“An aramas u ngeni sokkopaten nemenem, nemenemen lamalam are fonufan, nemenemen aramas me muu, nge a fiffis won unusen fonufan, neman ina ewe foffor aramas repwe ingeiti lap seni meinisin lon ekkewe engol ier a lo.”
FITE ier ra fen lo seni ekkewe engol ier mi poputa lon 1960, ekkewe ier ewe sou kaeo uruwo me souaak Hannah Arendt a fos ussun. Ikenai, sufolungau ngeni nemenem a ussun chok eu no mi fokkun watte.
Ren chok awewe, eu poraus mi mak lon ewe simpung The Times seni London a apasa: “Ekkoch sam me in rese tipeeu pwe ekkewe sense epwe wor ar pwuungun apwungu semirit lon sukul me lupwen a fis, ra song.” Fan chommong, lupwen nour kewe ra kuna kapwung lon sukul, ekkewe sam me in rese chok feilo lon nan sukul ren ar repwe amosoku ekkewe sense nge ra mochen fiu ngeniir.
Emon a tupuni eu mwichen sense lon Britain a fen apasa: “Aramas ra kan apasa ‘Mei wor ai pwuungun fori mettoch,’ mwen ar apasa ‘Mei wor wiisei kewe.’” Ekkoch sam me in rese ffotukalong sufol ngeni nemenem lon letipen nour kewe are apwunguur—me rese pwal mut ngeni aramas ar repwe pwal fori. Semirit ra fos ussun ar ‘pwuungun fori alon pwisin ar mochen’ me a mumu ar u ngeni nemenemen sam me in me sense. Sia silei uwaan ei mumu—“eu minefoon tettelin aramas esap sufoliiti nemenem me ese kon lien weweiti minne mi pwung are mwaal,” alon emon soumak lon simpung itan Margarette Driscoll.
Ewe chassi Time a awewei lon eu poraus itelapan “Ewe Tettelin Aramas Mi Poutulo” ussun menemenengauen chommong sarafo lon Russia ren an aloni alon emon sou kol mi eani ewe sokkun kol itan rap: “Ifa ussun emon mi uputiu iei, ia esor och mettoch epwe pwung are nomofoch ie, epwe eani lukuluk lon an aramas kewe kokkot?” Emon sou kaeo ekkewe riri lefilen aramas, Mikhail Topalov, a tipeeu ngeni ena ekiek: “Ekkeei sarafo rese tiparoch. Ra fen kuna ifa ussun ewe muu a kapas chofona ngeni iner me semer, me poutuloon nour moni me ar angang. Sipwe tongeni ekieki pwe repwe sufoliiti nemenem?”
Iwe nge, mei mwaal ach eani ekiek pwe ekkewe sarafo chok ra sufolungau ngeni nemenem. Ikenai, aramas, ese lifilifil ierir, rese eani lukuluk won nemenem are ra pwal mwo nge oputa nemenem. Weween pwe ita esap wor och nemenem sipwe tongeni lukuluk won? Ika mwokutukutun eu nemenem mi murinno, sipwe tongeni awewei ewe kapas iei ussun: “Ewe manamanen are pwuungun nemeni, apwungu, are pinei fofforun aramas.” Ei sokkun nemenem mi tongeni auchea. Epwe tongeni efeiochu aramas me fonuer. Ewe poraus mwirin ei epwe awewe won ifa ussun ena poraus a pwung.