Alleasochis Eu Lesen Mi Lamot Sia Kaeo Le Kukkunuch?
“SAM Me In Ra Mochen Pwe Nour Kewe Repwe Sokkolo Lapalaper, Lap Seni Ar Repwe Alleasochis.” Ina alon eu simpung. Ei poraus a pop seni eu kaeo a fis lon New Zealand mi pwaralo pwe “22 percent chok me lein chokkewe mi fiti ewe kaeo ra meefi pwe semirit repwe kaeo alleasochis lon imwer.” Ewe kaeo a pwal pwalo pwe ekkewe sam me in ikenai ra luku pwe ar aiti ngeni nour kewe mennin, ifa ussun repwe pwisin tumunu manauer, me ifa ussun repwe meefi wiiser, ikkena ekkewe mettoch mi lamot seni meinisin.
Lon ei fansoun an aramas akkomwa meefier me ekieki chok pwisin ar mochen, esap eu minen amairu pwe lapengeni aramas rese aucheaani alleasochis me rese aiti ngeni semirit. Nge weween pwe sipwe chok eani ewe ekiek pwe an semirit kaeo alleasochis fofforun chok chon loom me ese chuen fich ngeni ach ei fansoun? Are alleasochis eu me lein ekkewe lesen mi lamot ekkewe semirit repwe kaeo me feioch ren? Ewe mei lamot seni, met meefien Jiowa Kot ussun alleasochis ngeni sam me in pokiten i ewe Chon Poputaani kokkotun famili me ikkefa ekkewe feioch seni ena esin alleasochis?—Fofor 17:28; Efisus 3:14, 15.
“Ei Sokkun Fofor Mi Chok Pung”
Ewe aposel Paul a makkei ngeni ewe mwichefel lon Efisus lon ewe aewin senturi: “Ami semirit kena, oupwe alleasochisi sememi kewe me inemi lon ewe Samol, pun ei sokkun fofor mi chok pung.” (Efisus 6:1) Iwe, alleasochis mi lamot pokiten a tipeeu ngeni allukun Kot ussun minne mi pwung. Ussun Paul a makketiu, “ei sokkun fofor mi chok pung.”
Iei ussun, ewe Kapasen Kot a awewei pwe an sam me in emmiriti nour kewe lon tong a ussun chok eu pisek mi ling, “epa mwaramwar won mokurom, ika epa mwaramwar fan uom,” me “ach Samol epwe pwapwa ren ei sokkun foffor.” (An Salomon Fos 1:8, 9; Kolose 3:20) Mi mwaalfesen met a pop seni alleasolap pun alleasolap a asonga Kot.—Rom 1:30, 32.
“Pwe Kopwe Sopwoch”
Paul a pwal aiti ngenikich pwal eu feioch seni alleasochis lupwen a makkeei: “Kopwe asamolu semom kewe me inom” (iei aeuin alluk mi fiti pwon), “pwe kopwe sopwoch, o manauettam won fonufan.” (Efisus 6:2, 3; Ekistos 20:12) Ifa ussun emon epwe sopwoch pokiten an alleasochisi seman me inan?
Akkom, ese pwung pwe ierin me met ekkewe sam me in ra kuna mi watte seni ekkewe nau? Inaamwo ika rese kon silei computer are pwal ekkoch subject chon sukul ra kaeo, nge ra fokkun silei ussun manauach me ifa ussun sipwe pwakini ach kewe osukosuk. Nge ekkewe kukkun resaamwo mirit pokiten mirit epwe toriir lupwen ra asimauolo. Ina popun, ra muttir ekiekieta och mettoch, me fan chommong ra kkuf fan etipetipengauaen chiener kewe. Ewe Paipel a apasa: “Semirit ra chok fori foforun chon tiparoch.” Met epwe alisiir? “Lupwen ra angei wichiwich, repwe kaio mine a och.”—An Salomon Fos 22:15.
Ewe feiochun alleasochis a lululo seni ewe riri lefilen sam me in me nour kewe. A lamot angangfengen ika an aramas kewe kokkot repwe mwokutukutoch me sopwoch, me alleasochis a lamot ika epwe wor angangfengen. Ren chok awewe, lon eu pupulu, kinamwe, tipeeu, me pwapwa, ra pop seni tipemecheres nge sap seni an emon titchik me an ese meefi meefien aramas me pwungun an fori sokkopaten mettoch. Lon eu business, epwe lamot an ekkewe chon angang alleasochis ika ewe business are angang epwe sopwoch. An emon alleasochisi allukun ewe muu ese chok tumunu emon seni kapwung nge a pwal wato alillisoch me tumun.—Rom 13:1-7; Efisus 5:21-25; 6:5-8.
Fan chommong ekkewe sarafo mi alleasolapa nemenem rese kinamwe le nonnom lein aramas. Nge, kaeoon alleasochis me le kukkunur epwe awora aillis ren unusen manauer. A ifa me murinnoon ach kaeo ei mettoch seni le kukkunuch!
Ewe Feioch Mi Lap Pokiten Alleasochis
Alleasochis ese chok wato pwapwa lefilen chon famili me feioch tori feilfeilo nge a pwal atufichi ach amaaraata ewe riri mi lamot seni meinisin lefilen emon aramas me noun we Chon Forata. Pokiten Jiowa Kot ewe “Chon Forata Mi Lap”, “ewe popun manauach,” mi fich ngeni ach sipwe unusen alleasochisi.—An Salomon Afalafal 12:1; Kol Fel 36:9.
Ewe kapas “alleasochis” a mak fan chommong lon ewe Paipel. Pwal och, mei wor fitepuku porausen an Kot alluk, afalafal, minne a kutta senikich, kapasen apwung, me emmwen, me a lamot alleasochis ngeniir meinisin. A ffat pwe Kot a kutta senikich alleasochis ika sipwe apwapwai i. Ewer, alleasochis mi fokkun lamot ren ach sipwe ririoch me Jiowa. (1 Samuel 15:22) A mmen alolillen pwe aramas ra pae ngeni alleasolap lap seni alleasochis. “Ekiekin leluken aramas a ngau seni lekisikisin,” alon ewe Paipel. (Keneses 8:21) Ina popun, mi lamot ach sipwe kaeo alleasochis esap chok seni le kukkunuch nge lon unusen manauach. Ach sipwe fori epwe atoto rech eu feioch mi watte.
Chechchemeni mwo pwe, ussun chok ewe aposel Paul a fen apasa, ewe alluk ussun alleasochis ngeni semach me inach a fiti ekkeei ruu pwon, “pwe kopwe sopwoch o manauettam won fonufan.” An Salomon Fos 3:1, 2: “Nei, kosap manlukala mine ua aiti ngonuk, nge kopwe iseis lon lelukom ai kewe alluk. Pun ren om fori ei, ierin manauom repwe langatamala, kopwe pwal uren feioch.” Ewe feioch mi lap fan iten chokkewe mi alleasochis, ina ar ririoch me Jiowa iei me manau esemuch lon ewe fonufan sefo mi kinamwe.—Pwarata 21:3, 4.
[Pictures on page 30, 31]
Alleasochis a wato pwapwa lon ewe famili, lon ewe leenien angang, me ren Jiowa