Jiowa A Oputa Ewe Fofforun Kirikiringau
‘Ousap kirikiringau lefilemi.’—MALACHI 2:10, NW.
1. Met Kot epwe kutta senikich ika sipwe kuna manau esemuch?
EN mi mochen kuna manau esemuch? Ika en mi luku ena apilukuluk ewe Paipel a pwonei, eni kopwe apasa, ‘Aapwu.’ Nge ika ka mochen pwe Kot epwe ngonuk manau esemuch lon an we fonufan sefo, epwe lamot om kopwe apwonueta minne epwe kutta sonuk. (An Salomon Fos 12:13; Jon 17:3) Esap mwaal an epwe kutta seni aramas rese unusoch ar repwe fori ena mettoch? Aapw, pun Jiowa a apasa: “Ua pwapwaiiti kirikiroch fiti tong, nge sap eu asor; lon sileien Kot lap seni ekkewe asor mi kek.” (Osea 6:6, NW) Iwe, mei tufich aramas mi mecheresin mwaalilo ar repwe tongeni apwonueta minne Kot epwe kutta senir.
2 Iwe nge, sap minne aramas meinisin repwe mochen fori letipen Jiowa. Osea a pwarata pwe pwal mwo nge chommong chon Israel rese mochen fori letipan. Chon ewe muu meinisin ra fen tipeeu pwe repwe tolong lon ewe pwon, eu etipeeu, pwe repwe alleasochisi an Kot kkewe alluk. (Ekistos 24:1-8) Nge, muttir chok ra ‘ipweri ewe pwon’ ren ar atai an kkewe alluk. Ina minne, Jiowa a apasa pwe ekkena chon Israel ra “atai ai pwon ngeniir.” (Osea 6:7) Iwe, a pwal ina ussun fofforun chommong aramas seni ena fansoun tori ikenai. Nge Jiowa a oputa ewe alen kirikiringau, ese lifilifil ika aramas repwe fori ngeni I are ngeni ekkewe mi tongei me angang ngeni.
3 Osea ese alaemon chok lein ekkewe soufos mi aporausa ekiekin Kot ussun ewe fofforun kirikiringau, ewe ekiek mi lamot ach sipwe eani ika sipwe mochen manaueni eu manau mi pwapwa. Lon ewe lesen me mwen ei, sia fen poputa le atittina chommong an Malakai kkewe oesini, poputa chok ren ewe aeuin sopwun lon noun we puk. Iei sipwe suuk ngeni ewe oruuen sopwun lon ena puk me kaeo pwal ekkoch porausen ekiekin Kot ussun ewe fofforun kirikiringau. Inaamwo ika Malakai a kapas ussun lapalapen noun Kot kkewe aramas fite fite ier mwirin ar liwin seni Papilon, nge ewe oruuen sopwun a lamot chapur ngenikich ikenai.
Ekkewe Samol-fel mi Tipis
4 Sopwun 2 a suuk ren an Jiowa apwungu ekkewe samolfel chon Jus pokiten ar rikilo seni an kkewe alen pwung. Ika resap alleasochisi an we kapasen fon me awenechara ar kkewe al, repwe kuna liwiningau. Nengeni met ekkewe popun ruu wokisin (NW) ra apasa: “Iei alon Jiowa, ‘Ami souasor kana, iei ai alluk ngenikemi: Oupwe asamoluei. Nge are ousap mochen auselinga mine ua urenikemi, murin upwe awarato anumamau womi o anumamaua feiochumi kewe.’ ” Ika ekkewe samolfel ra fen asukula ekkewe aramas an Kot kkewe alluk me alleasochisiir, repwe kuna feioch. Nge pokiten ar tunalo letipen Kot, epwe toriir anumamau. Pwal mwo nge ekkewe feioch mi katou seni ekkewe samolfel repwe wiliti eu anumamau.
5 Pwata ekkewe samolfel ra fokkun tipis watte? Wokisin 7 (NW) a affata: “Pun wisen eman souasor, epwe aiti ngeni aramas mine repwe silei Kot ren. Repwe feito ren pwe repwe kaio seni, pun i eman chon kuno noun Jiowa mi Unusen Manaman.” Lap seni engerou ier me mwan, an Kot kkewe alluk ekkewe chon Israel ra angei me ren Moses ra apasa pwe ekkewe samolfel repwe wisen “aiti ngeni ekkewe aramasen Israel ekkewe alluk meinisin Jiowa a ngeniir.” (Lifitikos 10:11, NW) Nge iei eu poraus mi alolilen pwe mwirin och fansoun, ewe sou makkeien 2 Kronika 15:3, NW, a repotei: “Fansoun langattam esap wor an chon Israel Kot mi enlet, esap wor noun souasor mi afalafaleer, esap pwal wor ar alluk.”
6 Lon fansoun Malakai, lon ewe animuen senturi B.C.E., a pwal ina ussun ekkewe samolfel. Rese aiti ngeni aramas an Kot kkewe alluk. Ina minne, mi fich ngeni ekkena samolfel ar repwe kuna kapwung. Nengeni ekkewe kapas pochokkul Jiowa a apasaou ngenir. Malakai 2:3 a apasa: “Upwe tofi ngeni won mesemi kiten enen ami kewe monun asor.” Ifa me choun ena kapasen apwung! Repwe ita uweialo lukun ewe leeni me ireilo lon eu pwang kiten mongoon ekkewe monun asor. (Lifitikos 16:27) Nge lupwen Jiowa a erenir pwe epwe tofi ngeni won meser ewe kiten enen ekkewe monun asor, a affata pwe a oputa me ese fokkun etiwa ar kkewe asor me ekkewe mi asoresiniir.
7 Fitepuku ier mwen fansoun Malakai, Jiowa a awisa ngeni ekkewe chon Lifai ar repwe tumunu ewe imw mangaku fan iten ar fel, me mwirin, ewe imwenfel me ewe angangen afalafal mi pin. Ir ekkewe sense lon ewe muun Israel. Ika ra apwonueta wiser we, epwe atoto ngeniir me chon ewe muu manau me kinamwe. (Numperis 3:5-8) Iwe nge, a pout seni ekkewe chon Lifai ar niuokkusiti Kot ra pin eani. Ina minne, Jiowa a ereniir: “Nge ami oua kul seni ewe al mi pwung. Chommong aramas ra chepetek ren lapalapen ami aiti ngeniir ekkewe alluk. Oua atai ewe pwonen Lifai . . . Ouse akkamwochu ai kkewe al.” (Malakai 2:8, 9, NW) Ren ar rese aiti ngeni aramas ewe enlet me pwal ar we leenien appiru mi ngau, ekkewe samolfel ra arikalo chommong chon Israel, iwe, epwe pwung pwe Jiowa epwe song ngeniir.
Akkamwochu An Kot kkewe Alluk
8 Sisap ekieki pwe mi fich ngeni ekkena samolfel ar repwe kuna chen me omusamus pokiten rese unusoch me rese tongeni unusen apwonueta meinisin allukun Kot kkewe. Pwungun pwe mei tufich ngeni aramas ar repwe alleasochisi an Kot kkewe alluk, pun Jiowa ese kutta senir minne resap tongeni fori. Ese mwaal, ekkoch samolfel lon ena fansoun ra alleasochisi an Kot kkewe alluk, iwe, ese wor tipemwaramwar ussun emon mi alleasochis—Jises, ewe “Samol-fel lapalap.” (Ipru 3:1) Sipwe enletin tongeni apasa ussun i: “A aiti ngeni aramas minne a enlet, nge ese apasa och mi mwaal. A etiei le fetal fan kinamwe me wenechar, nge a okullu letipen chommong aramas pwe resap fori tipis.”—Malakai 2:6, NW.
9 Pwal ussun chok, lon ach ei fansoun ren lap seni eu senturi, pwin Kraist kkewe mi kepit, ekkewe mi apilukulukuni ewe apilukulukun manau lon lang, ir “eu mwichen samol-fel mi fel, pwe oupwe iseta asor mi fich ngeni ngun, o mi apwapwai Kot.” (1 Piter 2:5) Ra aiti ngeni ekkewe ekkoch ekkewe poraus mi enlet seni Paipel. Atun ka kaeo ekkewe poraus mi enlet ra aiti ngeni aramas, kese kuna pwe ewe allukun enlet a tou seni auer? Ra fen okullu chommong aramas seni ekkewe afalafal mi mwaal lon pekin lamalam, pwe iei mei wor fitu milion aramas won unusen fonufan mi silei ekkewe poraus mi enlet seni Paipel me eani ewe apilukulukun manau esemuch. Chokana ra pwal eani ewe wis mi sokkolo aucheaan pwe repwe aiti ngeni pwal fitu milion aramas ewe allukun enlet.—Jon 10:16; Pwarata 7:9.
Popun Ach Sipwe Tuttumunu
10 Iwe nge, mei wor popun ach sipwe mammasa. Epwe tufich ach sisap mirititi ekkewe lesen lon Malakai 2:1-9. Kich mi pwisin tumunu pwe minne ese pwung esap tou seni tinauach? Awewe chok, chon ach we famili repwe tongeni luku minne sipwe apasa? Epwe pwal ina ussun ren pwich kkewe lon pekin ngun lon ewe mwichefel? Epwe mecheres ach sipwe eani ewe sokkun fos esap wesewesen chofona, iwe nge, epwe otupu chon auseling. Iwe, emon epwe pwal tongeni tunummong are aopa och mettoch lon pekin sopai. Jiowa esap kuna? Iwe, ika sipwe pwal foffori ekkena sokkun foffor, epwe etiwa ekkewe asorun mwareiti seni tinauach?
11 Malakai 2:7, NE, epwe eu kapasen ourour ngeni chokkewe mi wisen asukula an Kot we Kapas lon ekkewe mwichefel ikenai. A apasa pwe tinauer “epwe amwochu sile, o ewe alluk ekkewe aramas repwe kutta” seni auer. Epwe chou wisen ekkena sense, pun Jemes 3:1 a apasa pwe repwe “angei apung lap seni ekkewe ekkoch.” Inaamwo ika repwe mwotores le asukula aramas, epwe lamot watte pwe minne repwe aiti ngeni aramas epwe alongolong won an Kot we Kapas me ekkewe kapasen emmwen mi katou seni an Jiowa we mwicheich. Epwe ina ussun repwe “tongeni afalafala ekkewe ekkoch.” Iwe, iei ewe kapasen fon ngeniir: “Kopwe achocho ngeni om kopwe achengicheng me ren Kot, usun chok emon chon angang esap saueiti och mettoch, emon mi forfichi lon an anganga ewe kapas mi enlet.”—2 Timoti 2:2, 15.
12 Ika sise tuttumunu, sipwe tongeni ekiekin nofiti pwisin ach kkewe memmeef lon minne sipwe aiti ngeni aramas. Epwe mecheres an epwe fis ena ngeni emon mi eani lukuluk won pwisin an kkewe ekiek, inaamwo ika repwe sokko seni aitien an Jiowa we mwicheich. Nge Malakai sopwun 2 a pwarata pwe sipwe tongeni kutta seni ekkewe sense lon ewe mwichefel ar repwe akkamwochu ewe sile seni Kot nge sap pwisin ar ekiek, pun repwe tongeni oturukapa ekkewe siip. Jises a apasa: “Nge are emon epwe oturukapa emon me lein ekkewe mi kisikis mi lukuei, epwe fen murinno ngeni i are repwe rieta efou foummongen fau fan uan o a malumelo ikewe mi alollol ie le matau.”—Mattu 18:6.
Pulueni Emon mi Ese Luku
13 Seni wokisin 10, NW, feilo, Malakai sopwun 2 a mmenlapei ewe fofforun kirikiringau. Malakai a kapas ussun ruu sokkun foffor me a nounou ewe kapas “kirikiringau” are “allukulukungau”.” Akkom, nengeni pwe Malakai a poputa an kapasen fon ren ekkeei kapas eis: “Ifa usun, kich meinisin sisap semeni eman chok Sam? Ifa usun, sap eman chok Kot a forikich? Pwota chok sisap allukuluk, emon ngeni emon, nge sia aucheangauei ewe pwon Kot a fori ngeni semelapach kewe?” Mwirin, wokisin 11, NW, a apasa pwe an ewe chon Israel alen kirikiringau a wewe ngeni ar “apiningaua pinin Jiowa.” Ifa ewe mettoch mi ngau ra foffori? Ena wokisin a pwarata eu me lein ekkewe fofformwaal: Ra “pulueni noun emon koten ekis.”
14 Weween, ekkoch chon Israel, chon ewe muu mi fen fangelo manauer ngeni Jiowa, ra pulueni ekkewe mi rese fel ngeni. Masouen ewe sopwun a alisikich le weweiti met popun a kon chou. Wokisin 10 a apasa pwe ra semeni emon chok sam. Ese wewe ngeni Jekop (siwilin itan, Israel) are Eperiam are pwal mwo nge Atam. Malakai 1:6 a pwarata pwe Jiowa, i ewe “emon chok sam.” Ewe muun Israel a riri ngeni pun ra nom fan ewe pwon lefilen Kot me semelaper kkewe. Iei eu me lein ekkewe alluk lon ewe pwon: “Iwe, ousap pwupwulu ngeniir, ousap pwal apwupwulua noumi fopwul ngeni nour mwan, ika noumi mwan ngeni nour fopwul.”—Tuteronomi 7:3.
15 Eni ekkoch ikenai repwe ekieki: ‘Emonewe ua sani a fokkun murinno. Eni mwirin och fansoun, epwap fokkun nguuri ewe fel mi enlet.’ Ena sokkun ekiek a pwarata pwungun ewe kapasen ourour seni Kot: “Letipen aramas a fokkun atuputup lap seni mettoch meinisin, a unusen ingau.” (Jeremaia 17:9) Ekiekin Jiowa ussun an emon pulueni emon chon lukun a mak lon Malakai 2:12, NW a era: “Epwe aralo iteiten aramas meinisin mi fori ei sokun fofor.” Ina minne, ewe Paipel a pesei Chon Kraist ar repwe pupulu “lon chok ewe Samol.” (1 Korint 7:39) Fan ewe ototen Chon Kraist, emon chon luku esap “aralo” pokiten an epwe pulueni emon chon lukun. Iwe nge, ika ewe chon lukun esap wiliti emon chon luku, met epwe fis ngeni lupwen Kot epwele ataielo ei otot?—Kol Fel 37:37, 38.
Kirikiringau ngeni Puluach
16 Mwirin, Malakai a kapas usun pwal eu fofforun kirikiringau: an emon kirikiringau ngeni puluan, akkaeuin, ren mufesen mi mwaal. Wokisin 14, NW, lon sopwun 2 a apasa: “Pun Jiowa a silei met a fis lefilemi me pwuluom we, lupwen ka alual. Iwe, en ka kirikiringau ngeni, nge i fen chiechiom me pwuluom fan ewe pwon.” Ren ar kirikiringau ngeni puluer, ekkewe re Jus ra efisi pwe an Jiowa rongen asor epwe ‘chochon ren chonun meser.’ (Malakai 2:13) Ekkena mwan ra poutalo puluer seni lealuwoler, nge ese pwung ekkewe popun, eni, fan iten ar repwe pulueni fopul are fin lukun. Iwe, ekkewe samolfel mi ngau ra mutata! Iwe nge, Malakai 2:16, NW, a apasa: “Jiowa ewe Koten Israel a apasa, ‘ua oput mufesen.’ ” Lo, lo, lo, Jises a pwarata pwe lisoumwaal, ina ewe eu chok popun an epwe fis mufesen pwe ewe emon ese tipis epwe tongeni pupulusefal.—Mattu 19:9.
17 Ekieki mwo won alon Malakai, me pi ifa ussun repwe achungu letipach me ameef ngenikich pwe sipwe kirikiroch. A kapas ussun “chiechiom me pwuluom fan ewe pwon.” Emon me emon ekkena mwan ra fen pulueni emon chienan chon luku, emon fin Israel, iwe, a filata neminewe pwe epwe chienan we mi achengicheng ren unusen manauer. Inaamwo ika eni ar pupulu a fis lealuwoluer me fopulur, nge fetalin fansoun me ar chinlapelo esap atai ewe pwon lefiler, weween, ewe pwonen apupulu.
18 Ewe kapasen fon ussun ekkena mettoch a pwal wor an manaman ikenai. Ina eu minen alolilen pwe ekkoch ra tunalo an Kot emmwen pwe repwe pupulu lon chok ewe Samol. Iwe, a pwal eu minen alolilen pwe ekkoch rese akkachocho le angang pwe ar ririin pupulu epwe pochokkul. Iwe nge, ra kuletipengen me aleni ewe al Kot a oput ren ar mufesen ese tipeeu ngeni Paipel fan iten ar repwe pulueni pwal emon. Ren ar foffori ekkena mettoch, ra “aweiresi Jiowa.” Lon fansoun Malakai, ekkewe mi tunalo an Kot kapasen fon ra pwal lamalam tekia me meefi pwe ese pwung an Jiowa ekiek. Ra ussun ita nge apasa: “Ifa ewe Koten pwung?” Met ren watten ar na ekiekmwaal! Sisap turutiu lon ena ser.—Malakai 2:17, NW.
19 Iwe nge, iei eu poraus mi murinno, Malakai a pwarata pwe ekkoch mwan pupulu rese kirikiringau ngeni puluer. Ra ‘eani lusun an Kot we ngun mi fel.’ (Wokisin 15) Sia fokkun pwapwa pun an Kot we mwicheich ikenai a ur ren ekkena sokkun mwan mi ‘asamolu puluer.’ (1 Piter 3:7) Rese kirikiringau ngeni puluer ren ar kkewe foffor are fos, rese echimwer ar repwe fori minne mi limengau lon ewe fofforun chufengen lefiler, me rese aucheangaua puluer ren ar repwe eani kapasen sikepwach ngeni pwal ekkoch fefin are ar repwe katol sasing are puk are kachito mi limengau. A pwal feioch an Jiowa we mwicheich pun mei wor chommong fin Kraist mi tuppwol ngeni Kot me an kkewe alluk. Ekkena sokkun mwan me fefin meinisin ra silei met Kot a oput, me ra atipeeufengenni ar ekiek me foffor ngeni. Sipwe chok ussur, sipwe ‘alleasochisi Kot pwe ach sou nemenem’ me kuna feioch seni an we ngun mi fel.—Foffor 5:29.
20 Arapakan chok, Jiowa epwe apwungu unusen fonufan. Iteiten aramas meinisin repwe pwarata en me manauan ngeni i ren ar luku me ar kkewe foffor. “Kich meinisin sipwe pwarata en me manauan ngeni Kot.” (Rom 14:12) Iwe, iei eu kapas eis mi lamot: Io kkewe repwe manau lon ewe ranin Jiowa? Ewe aulungatin lesen lon ei tettelin lesen epwe weneiti ena itelap.
En mi Tongeni Awewei?
• Ifa ewe popun Jiowa a apwungu ekkewe samolfel lon Israel?
• Pwata sisap tongeni apasa pwe ese tufich ngeni aramas are repwe alleasochisi an Kot kkewe alluk?
• Pwata sipwe tumunu minne sipwe asukula aramas ikenai?
• Ikefa ekkewe ruu sokkun foffor Jiowa a akkaeuin oput?
2. Ifa ussun chommong chon Israel ra kirikiringau ngeni Jiowa?
3. Met sipwe kaeo lon ei lesen?
4. Ifa ewe kapasen ourour Jiowa a ngeni ekkewe samolfel?
5, 6. (a) Pwata a watte tipisin ekkewe samolfel? (b) Ifa ussun Jiowa a pwarata an oput ngeni ekkewe samolfel?
7. Pwata Jiowa a song ngeni ekkewe chon asukula ewe alluk?
8. Sia tongeni era pwe esap tufich ngeni aramas ar repwe alleasochisi an Kot kkewe alluk? Awewe.
9. Io a wisen esileifeili ewe enlet seni Paipel lon ach ei fansoun?
10. Pwata mei wor popun ach sipwe tuttumunu lapalapen ach afalafal?
11. A akkaeuin lamot ngeni io kkewe ar repwe mammasa?
12. Met a lamot ekkewe mi asukula aramas repwe tuttumunu?
13, 14. Ifa eu fofforun kirikiringau Malakai a itelapei?
15. (a) Ifa ussun ekkoch repwe sotun era pwe esor ngauen ar repwe pulueni emon chon lukun? (b) Ifa alon Jiowa ussun ewe mettoch pupulu?
16, 17. Ifa ewe alen kirikiringau ekkoch ra aleni?
18. Ifa ussun an Malakai kapasen fon ussun ewe fofforun kirikiringau a weneiti ikenai?
19. Ifa ussun ekkewe mwan me puluwer repwe tongeni angei an Kot we ngun mi fel?
20. Menni fansoun a chok arapoto ngeni aramas meinisin?
[Picture on page 11]
Lon fansoun Malakai ekkewe samolfel ra kuna kapwung pun rese akkamwochu an Jiowa we al
[Picture on page 12]
A lamot ach sipwe tumunu pwe sipwe aiti ngeni aramas alen Jiowa kkewe, nge sap pwisin ach ekiek
[Picture on page 14]
Jiowa a pwarata an oput ngeni ekkewe chon Israel mi poutalo puluer ren popun ese pwung me ra pulueni ekkewe fin lukun
[Picture on page 14]
Chon Kraist ikenai repwe asamolu ar pwonen pupulu