Jiowa “A Liwini Ngeni Ir Ekkewe Mi Kukutta I”
“Pun are emon mi mochen arap ngeni Kot, epwe fakkun luku pwe a wor Kot, o a liwini ngeni ir ekkewe mi kukutta i.” —IPRU 11:6.
BARBARAa a apasa: “Ngang emon Chon Pwarata Jiowa ren arapakan 30 ier nge, use meefi pwe ua fich ngeni wiisei Chon Pwarata inaamwo ika ua fen pioneer me eani chommong wiisei mi sokkolo aucheaar.” A pwal ina ussun meefien Keith. A apasa: “Fan ekkoch ua riaffou pokiten ita mei wor chommong popun noun Jiowa kewe chon angang repwe pwapwa nge, use pwapwa. Pokiten use pwapwa ua mengiringir me ai mengiringir a alapalo ai riaffou.”
2 Chommong noun Jiowa kewe chon angang me loom me ikenai ra osukosuk ren ena esin memmeef. Ka pwal meefi ina ussun fan ekkoch? Eli ka choutiu ren chommong osukosuk nge, a ussun ita pwe chienom kewe chon luku ra unusen pwapwaiti manauer. Iwe, mwiriloon, eli ka meefi pwe Jiowa ese pwapwa reom are ese fich ngonuk an chen. Kesap muttir eani ena ekiek. Ewe Paipel a alukulukukich: “Pun [Jiowa] ese mo anioputa are oput riaffoun ir kewe mi fen kuna riaffou; o ese mo opalo won-mesan seni ir, nge a chok auseling, lupwen ra kori i.” (Kol Fel 22:24) Ekkena kapasen oesini ussun ewe Messaia ra pwarata pwe Jiowa ese chok auselinga noun kewe mi tuppwol nge a pwal liwiniir.
3 Osukosuk a tori aramas meinisin kapachelong noun Jiowa kewe aramas. Ach ei fonufan a nonnom fan nemenien Setan ewe Tefil, ewe mi oput Jiowa lap seni meinisin. (2 Korint 4:4; 1 Jon 5:19) Setan a mochen efeiengaua noun Jiowa kewe aramas nge Jiowa ese fori eu manaman ren an epwe tumunur. (Hiop 1:7-12; Pwarata 2:10) Ina popun, tori ewe fansoun Kot a filata, a lamot ach sipwe ‘likiitu lon ach riaffou’ me “achocho ngeni iotek,” fan ach lukuluk pwe Jiowa a tongeikich. (Rom 12:12) Sise mochen kkuf fan ewe ekiek mwaal pwe Jiowa Kot ese tongeikich!
Porausen Aramas Loom Mi Likiitu
4 Chommong noun Jiowa kewe chon angang loom ra likiitu fan riaffou watte. Ren chok awewe, Hana a ‘fokkun weires lon letipan’ pokiten ese nounou. A luku pwe Kot a likitalo. (1 Samuel 1:9-11) Lupwen Kiwin Jesepel a mochen nnielo Elias, Elias a niuokkus me a iotek ngeni Jiowa: “Ai Samol mi Lapalap, a kon naf ngeniei ai weires, kopwe angei seniei manauei, pun ngang usap murina seni ai kewe lewo.” (1 King 19:4) Iwe, eli ewe aposel Paul a fokkun lolileniesini an kewe apwangapwang lupwen a apasa: “Lupwen ua mochen fori minne mi murinno, minne mi ingau a chok nonnom rei. . . . Ngang emon aramas mi chok riaffou!”—Rom 7:21-24.
5 Sia silei pwe Hana, Elias, me Paul ra likiitu lupwen ra angang ngeni Jiowa, me Jiowa a liwiniir. (1 Samuel 1:20; 2:21; 1 King 19:5-18; 2 Timoti 4:8) Nge, ra chuen osukosuk ren letipechou, apilukulukungau, me niuokkus. Ina popun, sisap mairu lupwen sia ekiekmwaal fan ekkoch. Nge, met kopwe fori lupwen osukosuk a efisi om tipemwaramwar pwe Jiowa a tongeok? An Kot we Kapas a tongeni auruuruk. Ren chok awewe, lon ewe lessen mwen ei, sia poraus ussun alon Jises pwe Jiowa ‘a alleaani meten mokurach meinisin.’ (Mattu 10:30) Ekkena kapas ra pwarata pwe Jiowa a tongei noun kewe chon angang meinisin. Kopwe pwal chechchemeni an Jises kapas awewe ussun ekkewe litchok. Ika Jiowa a kuna lupwen emon lein ekkewe litchok a turutiu won ewe ppwul, met popun esap afannuk lupwen ka osukosuk?
6 Mei tufich pwe ewe Chon Forata mi manaman seni meinisin mi tongeni aucheaani aramas rese unusoch? Ewer! Ren enletin, mei wor chommong wokisin lon Paipel mi anneta ena luku. Lupwen sia ekiekifichi ussun ekkeei wokisin, sipwe tongeni appiru met ewe soumak kol mi fel a apasa: “Lupwen letipei a aureki chommong mettoch, om kewe kapasen achipa ra apwapwai nguni.” (Kol Fel 94:19) Sipwe poraus ussun ekkoch lein ekkeei poraus seni Paipel repwe alapalo ach weweiti pwe Kot a aucheaani kich me epwe liwinikich lupwen sia sopweilo le fori letipan.
Noun Jiowa Aramas
7 Fofforingau ra choufetal lein ekkewe chon Jus atun ewe alimuen senturi B.C.E. Ekkewe samol fel ra angei ekkewe man mi tter fan iten asor won an Jiowa rong. Ekkewe sou kapwung ra lifilifil. Angangen roong, kapas chofona, rauangau, me mocheisou ra choufetal. (Malakai 1:8; 2:9; 3:5) Iwe, Malakai a apasawu eu oesini mi amwarar ngeni ei muu mi ppwor. Lo, lo, lo, Jiowa epwe alisi noun kewe aramas pwe repwe uoch sefal mwen mesan. Sia alleaani: “Iei alon ewe Samol mi Unusen Manaman, ‘Ir repwe nei, repwe fokun nei aramas lon ewe ran upwe awora. Ngang upwe eani umoumoch ngeniir, usun eman sam a umoumoch ngeni noun mwan mi angang ngeni.’—Malakai 3:17.
8 A wor pwonuetaan an Malakai oesini ikenai won ekkewe chon Kraist mi kepit, chokkewe mi choni ewe muu lon pekin ngun. Choochoor 144,000. Pwungun pwe ena muu ‘epwe fokkun noun,’ are “eu mu mi fel,” ngeni Jiowa. (1 Piter 2:9) An Malakai we oesini epwe pwal apochokkula ewe “mwich mi fakkun lapalap, . . . ra ukkuta mwen ewe leenien motun king, o mwen mesen ewe Lam, ra ufouf mangaku pwechepwech mi langattam.” (Pwarata 7:4, 9) Repwe wiliiti eu chok mwich ren ekkewe mi kepit, fan emon chok Chon Mas, Jises Kraist.—Jon 10:16
9 Ifa an Jiowa ekiek ussun chokkewe mi filata ar repwe angang ngeni i? Ussun a mak lon Malakai 3:17, a ekeiki ussur ussun chok emon sam a tongei noun we. Me nengeni ifa ussun a apasa ussur pwe “repwe fokkun nei.” Ekkoch Paipel ra chiyakuni ekkena kapas ngeni “pwisin nei,” “nei mi auchea seni meinisin,” me “nei kewe fau mi auchea.” Met popun a ina ussun ekiekin Jiowa ngeni chokkewe mi angang ngeni? Eu popun, pokiten i emon Kot mi aucheaani aramas. (Ipru 6:10) A arap ngeni me a aucheaani chokkewe mi angang ngeni seni letiper.
10 En mi tongeni ekieki ussun eu pisek ka fokkun aucheaani? Pwungun pwe kopwe fokkun tumunuoch. Jiowa a pwal fori ina ussun ren ‘noun’ kewe. Ren enletin, ese tumunu noun kewe aramas seni sossot me riaffou. (An Salomon Afalafal 9:11) Nge Jiowa a tumunu noun kewe chon angang mi tuppwol lon pekin ngun. A apochokkuleereta pwe repwe likiitu fan sossot meinisin. (1 Korint 10:13) Iwe, Moses a ereni noun Kot kewe aramas loom, ekkewe chon Israel: “Oupwe apochokulakemi o tipepwora, . . . ewe Samol mi Lapalap ami we Kot epwe etikemi. Esap tumwunungau ngenikemi, esap pwal likitikemi.” (Tuteronomi 31:6) Jiowa a liwini noun kewe aramas. A meefi pwe ‘repwe fokkun noun.’
Jiowa “Ewe Chon Liwini”
11 An Jiowa liwini noun kewe chon angang, ina pwal eu pisekin annet mi annetata pwe Jiowa a aucheaaniir. A ereni ekkewe chon Israel: “Ren ei oupwe sotuniei ika usap suki ekewe asammwachon lang fan itemi o ninatiu womi chomong sokun feioch mi somwola. (Malakai 3:10) Pwungun pwe, lo, lo, lo, Jiowa epwe liwini noun kewe chon angang ren manau esemuch. (Jon 5:24; Pwarata 21:4) Ei liwin mi watte aucheaan a pwarata watteen an Jiowa tong me kisaseu. A pwal pwarata pwe a fokkun aucheaani chokkewe mi filata ar repwe angang ngeni i. Ach ekiek pwe Jiowa emon Chon Liwinikich mi kisaseu epwe alisikich le u ngeni tipemwaramwar ussun ach uoch mwen mesen Kot. Ren enletin, Jiowa a peseikich le eani ewe ekiek pwe i emon Chon Liwinikich! Paul a makkei: “Pun are emon mi mochen arap ngeni Kot, epwe fakkun luku pwe a wor Kot, o a liwini ngeni ir ekkewe mi kukutta i.—Ipru 11:6.
12 Pwungun pwe sia angang ngeni Jiowa pokiten sia tongei i nge esap chok pokiten a pwon pwe epwe efeiochukich. Nge, saminne sia mwaal are maicha lupwen sia ekieki ussun ach angei liwinich. (Kolose 3:23, 24) Pokiten an tongeer me aucheaaniir, Jiowa a liwini chokkewe mi kukkutta i.
13 Ukuukuun an Jiowa aucheaani kich a pwalo ren kaworen ewe moon kepichilo. Ewe aposel Jon a makkei: “Pwe a chok iei usun an Kot tongei fonufan, pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch. (Jon 3:16) An Jises Kraist asoresini manauan ren an epwe awora ewe moon kepich a u ngeni ewe ekiek pwe kich mi lamot mwaal are pwe Jiowa ese tongeikich. Pwungun pwe ika Jiowa a wattiu eu liwin mi fokkun watte, pwisin Noun we, iwe, a wesewesen tongeikich.
14 Iwe, ach ekkekieki ussun ewe moon kepich epwe alisikich ika sia ekiekmwaal fan ekkoch. Kopwe ekieki pwe Jiowa a ngonuk ei liffang. Ina met ewe aposel Paul a fori. Chechchemeni mwo met a apasa: “Ngang emon aramas mi chok riaffou!” Nge mwirin a pwal apasa: “Kilisou ngeni Kot ren Jises Kraist,” . . . ewe mi tongeiei o pwisin fangelo manauan fan asengesi.” (Rom 7:24, 25; Kalesia 2:20) Paul ese lamalam tekia ren an apasa ena. A chok lukuluk pwe Jiowa a wesewesen aucheaani i. Ussun chok Paul, kopwe eani ewe ekiek pwe ewe moon kepich eu liffang seni Kot fan itach. Jiowa esap chok emon chon Amanau mi manaman nge pwal emon chon Liwini mi tong.
Tumunu Seni An Setan Kewe ‘Rauangau’
15 Nge, eli a weires ngonuk om kopwe luku pwe ekkewe kapasen auruur lon an Kot we Kapas ra weneituk. Eli ka meefi pwe ewe liffangen manau esemuch lon an Kot we fonufan sefo epwe fan iten ekkewe ekkoch chok nge ese fich ngonuk. Ika a ina ussun meefiom, met kopwe fori?
16 Ese mwaal en mi silei an Paul kapasen fon ngeni ekkewe chon Efisus: “Oupwe pwilitalong womi unusen an Kot kewe pisekin maun, pwe oupwe tongeni u ngeni ekkewe tipatchem-sola an ewe tefil.” (Efisus 6:11) Lupwen sia ekieki ussun an Setan kewe rauangau, eli sia muttir ekieki ussun tongen pisek me lisowu mwaal. Mi fich ach fori ena. Ekkeei sossot ra fen otupu chommong noun Kot kewe aramas me loom me ikenai. Iwe nge, sisap monukalo pwal eu lein an Setan kewe rauangau. Setan a mochen fotukalong lon letipach ewe luku pwe Jiowa ese tongei kich.
17 Ewe Tefil a fokkun angoch le alamota ena esin memmeef ren an epwe arikalo aramas seni Kot. Chechchemeni an Bildad kewe kapas ngeni Jop: “Ifa usun an eman aramas epwe tongeni kuna pwung fan mesen Kot? If usun eman mi uputiu seni eman fefin a tongeni limoch? Nengeni, pwal ewe maram esap saram, nge ekewe fu resap limoch me fan mesan. Nge aramas a kon kis seni, pun i eman motto, noun aramas a eman moso chok.” (Hiop 25:4-6; Jon 8:44) Ekieki mwo ifa ukuukun watteen letipechoun Jop lupwen a rongorong ekkena kapas. Ina popun, kesap mut ngeni Setan an epwe aletipechouk. Nge, kopwe ekieki ussun an Setan kewe rauangau pwe epwe wor om pwora me pochokkul le fori minne mi pwung. (2 Korint 2:11) Inaamwo ika Jiowa a awenechara an Jop we ekiekmwaal nge, Jiowa a liwini i pokiten an likiitu ren an enniwili fan ruu minne a pout seni. (Hiop 42:10)
Jiowa “Mi Lapalap Seni Letipach”
18 Pwungun pwe a weires ach awesi letipechou akkaewin lupwen a fokkun chou. Iwe nge, an Jiowa ngun mi fel a tongeni “atailo ekkewe leeni mi pochokkul . . . mi polueni sineilapen Kot.” (2 Korint 10:4, 5) Lupwen kese silei ifa ussun kopwe likiitu fan ekiekmwaal , ekkekieki ussun an Jon kewe kapas: “Iwe, epwe chok iei usun ach sipwe sinei are kich noun ewe mi enlet, o sipwe achipa letipach fan mesan, are letipach epwe apungukich; pun Kot mi lapalap seni letipach, o a fen sinei mettoch meinisin.” (1 Jon 3:19, 20)
19 Met weween “Kot mi lapalap seni letipach”? Fan ekkoch, letipach a apwungukich, akkaewin lupwen sia meefi watteen ach kewe tipis me apwangapwang. Are eli, pokiten lapalapach, sia ekiekmwaal ussun pwisin kich me sia luku pwe sise tongeni apwapwai Jiowa. An Jon kewe kapas a alukulukukich pwe Jiowa ese tufichin eani ena esin ekiekmwaal! Ese anefota ach kewe tipis nge a kuna met sia tongeni fori. A pwal silei letipach me met popun sia fori och mettoch. Tafit a makkei: “Pun a fen sinei usun meeta sia fisita seni; a pwal chechemeni pwe kich seni falangen pwul.” (Kol Fel 103:14) Ewer, Jiowa a sileikich lap seni sia silei pwisin kich!
“Epa Mwaramwar Mi Ling” Me “Epa Mwarin King”
20 Jiowa a ngeni noun kewe aramas loom ewe apilukuluk pwe repwe liwinlo fonuer ren ewe soufos Aisea. Lupwen ra eolo Papilon, ei kapasen auruur me alukuluk a apochokkula chokkewe mi letipechou! Jiowa a poraus ussun ewe fansoun repwe liwinlo fonuer ren an apasa: “Kopwe wewe ngeni epa mwaramwar mi ling lepoun ewe Samol mi Lapalap, kopwe pwal wewe ngeni epa mwarin king lepoun om we Kot.” (Aisea 62:3) Ren ekkeei kapas, Jiowa a alingalo noun kewe aramas. A fori ussun we chok ren muun Israel lon pekin ngun ikenai. A ussun ita a atekiareta pwe meinisin repwe ingeitiir.
21 Pokiten ei oesini a akkom pwonueta ren ekkewe mi kepit, a pwarata ewe ling Jiowa a ngeni meinisin mi angang ngeni i. Ina popun, lupwen ka tipemwaramwar, chechchemeni mwo pwe inaamwo ika kese unusoch, en ka tongeni wiliiti “epa mwaramwar mi ling” me “epa mwarin king” ngeni Jiowa. Ina popun, kopwe achocho le apwapwai Jiowa ren om foffori letipan. (An Salomon Fos 27:11) Ren om fori ena, kopwe lukuluk pwe Jiowa epwe ngonuk liwinin om tuppwol!
[Footnotes]
a Ekkoch it ra siwil.
En Mi Chechchemeni?
• Ifa ussun kich “noun” Jiowa mi sokkolo aucheaach?
• Met popun a lamot ach eani ewe ekiek pwe Jiowa ewe chon Liwini?
• Ikkefa an Setan kewe ‘rauangau’ sipwe tumunu seni?
• Ifa ussun Kot “mi lapalap seni letipach”?
[Ekkewe kapas eis fan iten ewe lesen]
1, 2. Met popun ekkoch noun Jiowa kewe chon angang ra osukosuk ren ekiekmwaal?
3. Met popun osukosuken ei fonufan ra torikich?
4. Apasaawu porausen noun Jiowa kewe chon angang mi likiitu fan riaffou.
5. (a) Ifa ussun Kot a efeiochu Hana, Elias, me Paul?(b) Ifa ussun an Kot we Kapas a auruuru letipach lupwen sia ekiekmwaal?
6. Ifa ussun ewe Paipel epwe auruuru chokkewe mi ekiekmwaal?
7. Menni oesini Jiowa a ngeni ewe muu mi ppwor ren Malakai?
8. Met popun Malakai 3:17 a weneiti ewe mwich mi lapalap?
9. Met popun Jiowa a apasa pwe noun kewe aramas “repwe fokkun nei”?
10. Ifa ussun Jiowa a tumunu noun kewe aramas?
11, 12. Ifa ussun ach weweiti pwe Jiowa ewe Chon Liwini, a alisikich le u ngeni tipemwaramwar?
13. Met popun ewe moon kepich a anneta pwe Jiowa a tongeikich?
14. Met a pwarata an Paul ekiek ussun ewe moon kepich?
15-17. (a) Ifa ussun ewe Tefil a alamota ekiekmwaal ren an epwe otupukich? (b) Ifa ussun porausen Jop a tongeni alisikich?
18, 19. Ifa ussun Kot “mi lapalap seni letipach,” me ifa ussun a ‘silei mettoch meinisin’?
20. An Aisea oesini ussun an Israel liwinlo fonuer a pwarata met ussun an Jiowa ekiek ussun noun kewe chon angang?
21. Ifa ussun kopwe amaaraata om luku pwe Jiowa epwe ngonuk liwinin om tuppwol le likiitu?
[Lios lon pekin taropwe 24]
Paul
[Lios lon pekin taropwe 24]
Elias
[Lios lon pekin taropwe 24]
Hana
[Lios lon pekin taropwe 26]
An Kot we Kapas a masou
ren chommong
poraus mi auruurukich