Dhowakula dha Mabasa na Yeddelo Yehu ya Okristu
6-12 YA JULYU
MAFUMO A MAZU A MULUGU | OBUDDUWA 6-7
“Onowona Ovanene Enamwirele Miyo Faraó”
(Obudduwa 6:1) Nabuya omwakula: “Onowona Ovanene Enamwirele Miyo Faraó. Agarurumutxiwa n’owodha waga, onowathiya odhowa; namapadduwo-ene abo, mwinyene ddinawigare mwilaboni mwaye”.
(Obudduwa 6:6, 7) “Nona awaddelé akadda Izrayel: ‘ Miyo ddili Yehova! Ddinouvunani mmabasani olemela aumageleleni akadda Ejipitu, ddinowobolani mudharini, ddinoufurulani na guru dhaga, na matikiniho awopiha. 7 Miyo ddinouwirani nlogo naga, ddikalaga Mulugu wenyu. Dhahene panaziwenyu elimi: ddili Nabuya Mulugu wenyu, onuvunani mupujiwani na akadda Ejipitu.
it-3 16 ddima 7
Mizé
Vahoneya vina matxinjo apadduweliwe ana Izrayel. Voroma ana Izrayel ahirumela dhaloga Mizé, mbwenye varomilani otabutxiwa na mabasa olemela aruma Faraó, ahiroma ompatteliha Mizé muladduya, ejene yamuttukulele Mizé okumuwa mpaka omunlela Yehova. (Obud 4:29-31; 5:19-23) Mudhidhene obule Namawodha-wodha omulibiha alogaga wila onele wakwanihedha nipikirelo najedhela Abrahamu, Izaki na Jakobi, sabwa ya omunonihedhamo entapulela nzina naye, modhela wafurula ana Izrayel vina sabwa ya wawira nlogo naye mwilaboni yapikiriliye. (Obud 6:1-8) Masiki dhahene, ana Izrayel kamuwelelevi Mizé. Mbwenyi vapadduwile mulili wanotanu na nayi, ahiroma omukamihedha vina omwiwelela, nona muvirele mulili wanokumi, kiyamurutxile Mizé wasasanyedha vina waweddiha wila avenyemo mu Ejipitu ‘otadanene’—Obud 13:18.
(Obudduwa 7:4, 5) Apo Faraoyá kanauvuruwanenivi. Venevo panàgwihedhe miyo goi akadda Ejipitu. Ddamala walaga na goyidhá, ddinere wabuddutxa mw’Ejipitu anyakoddo aga, nlogo naga na Izrayel. 5 Vanamale miyo wawoniha goyi akadda Ejipitu, ddàbuddutxamo akadda Izrayel mwilaboni mwawa, panaziwe anyayá wi miyo ddili Yehova”.
it-3 16 ddima 5-6
Mizé
Bali Vamentoni va Faraó w’o Ejipitu. Nsaka nagudulana akadda Ejipitu na akadda Izrayel Mizé na Aroni ‘ahapemberha amulugu a mu Ejipitu.’ Faraó na nikamihedho na akumbayisa aye aromoliwa Janes na Jambres ohatugumaniha amulugu otene a mu Ejipitu na efunelo ya ompembera Yehova (2Tim 3:8). Matikiniho oroma akosile Aroni na nikamihedho na Mizé, ahoniha-wene wi Yehova okana guru enddimuwa opitta amulugu a mu Ejipitu, masiki Faraó avaddihagavi murima waye. (Obud 7:8-13) Nona vapaduwile milili waneuraru akumbaysa a Faraó ahona wila a mulugu awa kana-wene ewodhelo, vina esili dhapadduwa ‘na ebuno ya Mulugu!’ Akumbaysaya vabulelani sabwa ya maputte, kawodhile ovyoniya vamentoni va Faraó wi amuzugunuwele Mizé.—Obud 8:16-19; 9:10-12.
Milili onotota okurumuwa vina ovadda murima. Mizé na Aroni bavuwihile milili esile kumi. Mililidha dhipadduwile dhawene ninga mwalogeliwani, yonihaga-wene wi Mizé wali mwimeleli wa Yehova. Nzina na Mulugu nahivuwa vina nanlogiwetxa vaddiddi mu Ejipitu, jijene —yattukulela akadda Izrayel na nikuru ning’onovi na akadda Ejipitu okurumuwa vina jijene yatukulela Faraó na akumbayisa vina na ena amukamihedha okana murima wovadda. (Obud 9:16; 11:10; 12:29-39) Akadda Ejipitu ahidha onelamo-wene wi ddi Yehova waattonga amulugu awa. Muvirele mulili wanotanu na nayi, ‘Mizé wanrihiwa vaddiddi mu Ejipitu, wanrhemeziwa na amoso a Faraó vina na attu otene.’—Obud 11:3.
Nipepese Mafumo a Omuyani
(Obudduwa 6:3) Ddannimuttanyuwela Abrahamu, Izaki na Jakobi n’ekalelo ya Mulugu wowodha-wodha; ddattanyuwelevi, kaddaziwihile nzina naga, nili Yehova.
it-3 723 ddima 6-7
Namawodha-wodha
Yehova olabihedhe mazu aba “Mulugu Namawodha-wodha” (ʼEl Shad·daiʹ) nsaka nampikireliye Abrahamu mwaha wa obaliwa wa Izaki, modhela nipikirelo ntti Abrahamu wanfanyela okana nroromelo noliba wila Mulugu nowodha waye onele wakwaniha nipikirelo naye. Pavenevale varomilani wona wila ddi Mulugu agamururihile Izaki na Jakobi sabwa yokala adhuli a Abrahamu.—Wita 17:1; 28:3; 35:11; 48:3.
Mowiwanana na ejene, Yehova agahimwaddela Mizé: ‘Ddannimuttanyuwela Abrahamu, Izaki na Jakobi n’ekalelo ya Mulugu wowodha-wodha [beʼElʹ Shad·daiʹ], ddattanyuwelevi, kaddaziwihile nzina naga, nili Yehova.’ (Obud 6:3) Eji kintapulela wi Abrahamu, Izaki, na Jakobi kaaziwa nzina ntti Yehova, vowi awene vina makolo awa anlabihedha nzina ntti dila dhinjene. (Wita 4:1, 26; 14:22; 27:27; 28:16) Munivuruni na Wita nzu ntti Namawodha-wodha nilebiwe dila 6, mbwenyi nzina na Mulugu, Yehova nilebiwe dila 172 mmaleboni a Ebrayiko. Masiki alobwana aba aziwaga wi ‘Namawodha-wodha’ ddi Mulugu, kaziwa txini entapulela nzina ntti na Mulugu; Yehova. Nivuru dhahi ninkuweliwa O Novo Dicionário da Bíbilia (Vol. 1, nikuku 411) mulebiwa dhahi: ‘Abrahamu, Izaki, na Jakobi ahonihiwa dhilobo dhigapadduwile musogorho, masiki dhawene yanfuneya okamihedhiwa ononelamo wi Yahweh, wali Mulugu (ʼel) wowodha (sadday) onwodha wakwanihedha dhipikireliye. Mulugu wonihile ewodhelo yaye yowumiha milomo, vamuttanyuweliye Mizé munikupuni nattidda oku nihivurheyaga vina mwa mapadduwo mena ereyile. Esene dhinowoniha entapulela nzina naye Yahweh.’—Olebile ddi J. D. Douglas, 1980.
(Obudduwa 7:1) Nabuya ologa na Mizé: ‘Kewa! Miyo ddinouwira ninga Mulugu vamentoni va Faraó; mbalo Aroni ddinakale namalogayá.
it-3 16 ddima 2
Mizé
Yehova wahimuttomela Mizé mabasa masiki Mizeya ahivyonagana ewodhelo ya wakwanihana. Mizé vaniyena vyaka 80 kavyonana ewodhelo; wahiloga wi kanwodhetxa ologa, ejiya kiromile nzilo, mbwenye bana vyaka 40 wahivyonana ewodhelo ya wafurula ana Izrayel ali mutxedhiwani. Iyene wahimunlela vaddiddi Mulugu wila amuttomele muttu mwina mabasaya. Mulugu ottiya osilidhiwa na Mizé wahimuruma Aroni wi akale namalogaya. Vowi Mizé wali mwimeleli wa Mulugu, iyene wali ninga Muluguya, Aroni bakala namalogaya. Mizé na Aroni vagumanilani na anddimuwa a mu Izrayel vina bali vamentoni va Faraó, Mulugu wamwaddela Mizé dhafwanyelani ologa, Mizé bamwaddela Aroni nomala Aroniya bakala ninga namalogaya. (oddu wali Faraó mwina wamuhabile mpaddo Faraó woroma walamulela Mizé bana vyaka 40). (Obud. 2:23; 4:10-17) Yehova wahimuttoma Aroni wila akale namavuhulela wa Mizé, dhahene ninga yali Mizé ‘namavuhulela’ wosakuliwa na Mulugu. Nona Aroni wanfwanyela orumela weddihiwa na Mizé. Mulugu wahimwaddela Mizé wi Iyene onakale ninga Mulugu vamentoni va Faraó, kuloga kagamovile mwene wa Ejipitu.—Obud 7:1, 2.
13-19 YA JULYU
MAFUMO A MAZU A MULUGU | OBUDDUWA 8-9
“Ahiziwaga, Faraó Wahikosa Efunelo ya Yehova”
(Obudduwa 8:11) [Obudduwa 8:15 Tradução do Novo Mundo] Faraó moneliye ovuguweliwa, ohiyelela ovadda waye murima; kàvuruwanile Mizé na Aroni, ninga mwalogele Nabuya mutanene.
it-3 117 ddima 2
Ovadda Maru
Oromana masaka a mundduni, Yehova onowavilelaga attu ankosa dhilobo dhinimusilidha. (Wita 15:16; 2Ped 3:9) Mbwenye mwa aboya ahikalawo anrugunutxa murima baroma okosa dhilobo dhinimuzivela Mulugu. (Jos 2:8-14; 6:22, 23; 9:3-15), ena anovaddihavi murima wawa akoddaga ofwara dhinfuna Mulugu oku vina nifwara-fwaraga nlogo naye. (Olib 2:30-33; Jos 11:19, 20) Yehova kanimukoddiha muttu okala ddiyamaru. Mulugu onomuttiya muttu okana ofuru wosakula akala anfuna akale ‘ddiyamaru’ obe ‘wovadda murima.’ Mbwenye nigafiya nsaka nowatolotxa addiyamaru, panoneye owodha waye onddimuwa vina panattittimihiwe nzina naye.—Kaladdaniha na Obud 4:21; Jo 12:40; Rom 9:14-18.
(Obudduwa 8:14, 15) [Obudduwa 8:18, 19 Tradução de Novo Mundo]
Akumbaysa antamela wira yokokene na opyaga wawa, afuna wita dhibu dhawa; vano kawodhile. Dhibu dhiakalelavi ntidi attu na vinama. 15 Venevo akumbayisayá aloga na Faraó: “Esi, guru dha Mulugu!” Murima wa Faraó okalavi wovaddene; kàvuruwanile Mizé na Aroni ninga mwalogele Nabuya mutanene.
(Obudduwa 9:15-17) Miyo kofuna, ddigawodha walene oupa n’ezíni: Weyo, akadda nlogo nawo, murimela mwilaboni. 16 Miyo ddiuttiya okalawo: Ddirelé wi wone guru dhaga, vina nzina naga nittittimihiwe mwilaboni mwetemwene. 17 Ogadidelavi okoddiha odhowa wa nlogo naga.
it-2 397 ddima 1-3
Avuti
Avuti anotabutxa nlogo na Yehova. Oku anya ahiziwaga, dhinirani dila dhina dhinottittimiha nzina na Yehova vina anowakwanihedha efunelo yaye. Masiki avutiya akalaga ninga animwidda Mulugu, enirani enokamihedha nlogo naye okala oweddeyana vina omukurumuwela Iyene. (Rom 3:3-5, 23-26; 8:35-39; Masal 76:10) Makaniya aba anfwanyeya va Gano 16:4: ‘Dhetene dhittanddile Mulugu, dhikana epaddutxeliye; nvuti okoyeliwe siku norutxa.’
Jijene epadduwile na Faraó, Yehova wahimulabihedha Mizé na Aroni wila amwaddele Faraó àfurule ana Izrayel. Wuma murima wa Faraó ototile kahiyo Mulugu, masiki Yehova aziwaga obure wali mmurimani mwa Faraó, iyene wahimuttiya okalawovi vina wahimuttiya okosa dhilobo dhigamuttukulele okwa waye. Yamuttukulela Yehova omuttiya Faraó okalawovi jiji enfanyeya va Obudduwa 9:16: ‘Miyo ddiuttiya okalawo: Ddirelé wi wone guru dhaga, vina nzina naga nittittimihiwe mwilaboni mwetemwene.’
Milili kumi dhagwele akadda Ejipitu vina otolotxiwa wa anyakoddo a Faraó na Farawoya mmwinjeni wofila ehoniha-wene ewodhelo enna Yehova. (Obud 7:14–12:30; Masal 78:43-51; 136:15) Masiki muvirele vyaka dhinji, malogo mena anlogavi mwaha wa nipadduwona, dhahene attittimihaga nzina na Mulugu mwilaboni mwetemwene. (Jos 2:10, 11; 1Sam 4:8) Yehova komaguvela ompa Faraó attu kagawodhile wona ewodhelo yaye ninga monilani na matikiniho akosiliye vamentoni va ana Izrayel na akadda Ejipitu vina ofuruliwa wa nlogo naye.
Nipepese Mafumo a Omuyani
(Obud 8:17) [Obud 8:21, Tradução do Novo Mundo] Ogapambiha, ddinoutatamulela txentxe, dhinautotele viredda weyo, anddimuwa a mmuthegoni mwawo, athu a nlogo nawo, mirala dhawo. Txentxedhá dhinere odhala mba mwa akadda Ejipitu na mmamiruddani munkalani.
it-3 33 ddima 5-6
Txentxe
Txentxe elabihedhi Mulugu ninga mulebeliwani na elogelo ya Ebrayiko yali mulili wanonayi, kunziweya deretu. Muliliya obu kuwagwelile ana Izrayel valani Ogósen. (Obud 8:21, 22, 24, 29, 31; Masal 78:45; 105:31) Nzu ntti ʽA·rovʹ ninotapuleliwa na mazu ottiyana-ttiyana, ena antapulela “nibulula” (JB, NW, Ro), “etteba suzu” (Yg), “txentxe” (AS, KJ, RS), “dhibu” (AT), “txentxe dhinluma ng’ombe” (LXX).
Nzu ntti ‘txentxe’ entapulela txentxe dhottiyana-ttiyana. Txentxe dha mukolo dhinowaluma attu vina dhinama bagafofonya nikamina. Dhigakala dhing’inig’ini dhinkala mmaningoni mwa dhinama obe mwa muttu. Txentxe dhinkuweliwa txentxe dha berne dhigabaliwaga-wene dhinkala mmaningoni mwa dhinama na mwa attu; txentxe dhinkala mmaningoni mwa attu dhinfwanyeya o tropico. Txibarene mulili obu wa txentxe ohatotela goyi enddimuwa vaddiddi akadda Ejipitu vamodha na dhinama dhawa, dila dhina dhatotelaga okwa.
(Obud 8:21-23) [Obud 8:25-27, Tradução do Novo Mundo] Apa Faraó omwithana Mizé na Aroni, oawaddela: “Dhowaní, mwamukuthele mukutho Mulugu wenyu mpuno mw’Ejipitu.” 22 Mizé omwakula: “Kinwodheya-wene okutha mpuno, vowi mukutho onimukuthela iyo Nabuya Mulugu wehu, onowatakalela akadda Ejipitu. Nigakutha vamentoni vawa dhinama dhinakwaruliha, kandha onivokela malugu anipana? 23 Nindhowa mwiddeddereni oleddo wa malabo mararu, namukuthele mukutto nabuya Mulugu wehu ninga munnirumeliye”.
w04 15/3 25 ddima 9
Otapuleliwa wa Nivuru na Obudduwa
8:22, 23 [Obud 8:26-27, Tradução do Novo Mundo]—Mizé walogeleni wi mukutto onakuttela ana Izrayel Mulugu wawa ‘onoatakalela akadda Ejipitu’? Akadda Ejipitu annebedha maladdaniho a vinama. Nona mazu alogile Mizé awi ninfuna namperhekele mukutto Mulugu wehu, ahoniha-wene ofuneya wa Faraó wattiya ana Izrayel odhowa mwiddeddereni, omukuttela mukutto Mulugu wawa Yehova.
20-26 YA JULYU
MAFUMO A MAZU A MULUGU | OBUDDUWA 10-11
“Mizé na Aroni Ahoniha Oliba Murima Onddimuwa Vaddiddi”
(Obudduwa 10:3-6) Mizé na Aroni adhowa wa Faraó, amwaddela: “Nabuya Mulugu wa akadda Hebreu ologa dhahi: ‘Weyo onatxelele siku gani oddivanya? Onarome mudhidhi gani oddikurumuwela? Kathiya nlogo nidhowe naddikuthele. 4 Ogakoddihagavi odhowa, mangwana ddinomudhiha nyazombe, awazeyele mwilaboni mwetemwene, adhalemo ahithiyaga vego. 5 Nyazombe onóredha esile dhihipiwe na maralala, onononga miri si miri dhili mmunddani mwawo. 6 Onodhala mba mwawo, mba mwa amoso awo, mmawani mwetemwene mwa akadda Ejipitu. Malaviya anele othabwa: “amambalawo na azamani awo, oromana mfiyedhani okuno mpaka ddabuno, kanonaga malavi ninga aba-wene.”
w09 15/7 20 ddima 6
Laleyà Noliba Murima—Omutagihaga Yezu
6 Faraó wali mulamuleli wawopiha woniwa ninga mulugu, Rá wali babe wa Faraó webedhiwa ninga mulugu wa nzuwa; nona yanfuneya oliba murima wi Mizé awodhe ologa na Faraó. Txino Faraó na ena vina amwabile mpaddo annebedha maladdaniho awa. Attuya anfuniwana osoriha dhotedhene dhalogiye, agagwiha nlamulo kavo wawodha ofudha. Faraó wali mwene wovuwa, wovittukulela, wahafuna orumiwa.
Masiki na mikalelo esi dhotene, Mizé mukumbuzi wa mabila wahinfiyedha Faraó dila dhinji—oku ahiwobiwe. Txini yalogile Mizé? Wahiloga sabwa ya milili kumi. Iyene wakumbira eni? Ofuruliwa wa ana Izrayel. Yanfuneya Mizé oliba murima? See yanfuneya-wene!—Oleb. 12:3; Aheb. 11:27.
(Obud 10:24-26) Faraó omwithaniha Mizé, omwaddela: “Kadhowani mwamukuthele mukutho Nabuya, Mabilenyu na ñgombe dhenyu kathiyani veneva. Aninyu vina kadhowanina”. 25 Mizé omwakula: “Onanivahe ddi nyuwo dhinfuneya vamukuthoni wa milima, na wa vinama dhoddumeya? 26 Nne. Iyo dhifuwo dhehu ninodhowana. Okuno kinahalewo nne mmodha, vowi vari va dhinamadhá punasakulehu dh’omukuthelana mukutho Nabuya Mulugu wehu. Iyo nihinafiya vamburonivá, kaninwodha oziwa vinamadhá dhinamukuthele iyo Nabuya.”
(Obudduwa 10:28) Faraó omwaddela Mizé: “Kavenyavo! Kusabele wiyelela vamentoni vaga! Siku ninadhewe vali miyo, onopiwa”.
(Obudduwa 11:4-8) Mizé omuziwiha Faraó: “Nabuya ologile dhahi: ‘Miyo vari va mithiyu ddinovira mw’Ejipitu. 5 Ana athaji otene ali mu Ejipitu anokwa, oromana mwana muthaji wa Faraó onjikiriwana ohaba mpaddo wa babe, ofiyedha mwana muthaji wa mudhari wa muyana oli namatxila, vina ana athaji a vinama si vinama. 6 Ejiyá enere otomoliha kutho enddimuwa mwilaboni mwetemwene mwa Ejipitu. Munakutho ninga obwene kunakalagawo, kunakalewo vina; 7 oku munkala akadda Izrayel, muhiweyaga kutho, nne vina mwanabwa amuwaga muthu peno enama. Dhahene munoziwa makalelo athiyanihilena Nabuya akadda Ejipitu na ana Izrayel. 8 Dhigapaduwa esidhá, amoso aba awo otene anere odha vali miyo, anoddipigiriyela eraga: Kadhowa weyo na nlogo nawo notene. Ngamala miyo ddinodhowa”. Mizé murima omutakuna venjene, ovenya va Faraó.
it-3 17 ddima 4
Mizé
Yanfuneya oliba murima vina nroromelo wila muttu agumane na Faraó. Mizé na Aroni awodhile wakwaniha mabasa attomeliwani na nikamihedho na muya wokoddela wa Yehova. Vakala mpaddo wa Faraó vannopiha. Mburoya wali wokoddela, iyeneya wanvyona ninga mulugu; wahikana anamalaga, akazembe, ang’aneli vina adhari. Nsaka nene nttile mwilabonimwa mwahikala anddimuwa a marelijau, akumbaysa, na ena anfwara-fwara Mizé. Alobwanenaba balitxi awopiha. Otene amukamihedha Faraó woniwa ninga mulugu wa amulugu. Mizé na Aroni katxelele ofiya vamentoni va Faraó, masiki na guru dhotene dhakosani, Faraoya wahumihavi murima sabwani wahigana ohafurula ana Izrayel. Mizé na Aroni mmwaddelilani Faraó mulili wa noutanu nauraru ahitotiwa vamentoni vaye. Mulogelani mwaha wa mulili wanoutanu naunayi, ahaddeliwa wi ahinyigale vamentoni va Faraó kotagiha agahipiwa.—Obud 10:11, 28.
Nipepese Mafumo Omuyani
(Obudduwa 10:1, 2) Nabuya ologa na Mizé: “Dhowa wa Faraó. Miyo ddivaddiha murima waye, murima wa amoso aye; ddirelé wi ddawonihe dhotikiha dhaga,2 ddirelé vina wi weyo waziwihe anawo na adhulawo dhikosile miyo mw’Ejipitu, matikiniho erilemi vementoni vawa. Dhahene panaziwe nyuwo wi miyo ddili Nabuya”.
w95 1/9 11 ddima 11
Anamoona Akamihedhile Ovituliwa wa Amulugu Òttambi
11 Ana Izrayel balivi mw’Ejipitu, Nabuya ologa na Mizé: “Dhowa wa Faraó. Miyo ddivaddiha murima waye, murima wa amoso aye; ddirelé wi ddawonihe dhotikiha dhaga, 2 ddirelé vina wi weyo waziwihe anawo na adhulawo dhikosile miyo mw’Ejipitu, matikiniho erilemi vamentoni vawa. Dhahene panaziwe nyuwo wi miyo ddili Yehova”.(Obudduwa 10:1, 2) Ana Izrayel ororomeleya annawaddela anawa mapadduwo aba otikiniha a Yehova. Aimaya abo vasogorova anawaddela anawa vina, nona nlogo notene nanziwa nipadduwona. Dhawene mapadduwo otikiniha a Yehova anowubuweliwa. Masaka abano amambali vina akana muttorho wa wasunzihaga anawa.—Olibiha 6:4-7; Gano 22:6.
(Obudduwa 11:7) oku munkala akadda Izrayel, muhiweyaga kutho, nne vina mwanabwa amuwaga muthu peno enama. Dhahene munoziwa makalelo athiyanihilena Nabuya akadda Ejipitu na ana Izrayel.’
it-2 79 ddima 2
Ofuruliwa
Yehova ohoniha ewodhelo yaye mwa furuliye ana Izrayel, ejuwene ettittimiha nzina naye. Mwabuwelani kobela yina ya Mwinje Wofila Mizé na akadda akadda Izrayel atomola jibo yomutamalelana Yehova. Venevo Miriã murogora wa Aroni wàli namavuhulela, ottukula masekere, ayana amfwara na masekere awa, ebaga ninga iyene. (Obud 15:1, 20, 21) Venevo ana Izrayel na akadda Ejipitu agawana kakamwe. Akadda Izrayel abudduwaga mw’Ejipitu, Nabuya wahabarela kaavo okweliwe obe orimeliwe enama yaye; nne vina mwanabwa kamuwile muttu obe enama. (Obud 11:7) Masiki mazu ali va nivuru na Obudduwa ahilogaga wi Faraó wali na anayakodddo aye mudhidhi obwinilani o mwinjene wofila; nivuru na Masalmo ninromola wi Yehova ‘omuririmihamo Faraó Mmwinjeni Wofila na anyakoddo aye.’
27 YA JULYU–2 YA AGOSTO
MAFUMO A MAZU A MULUGU | OBUDDUWA 12
“Mattanga a Paskwa—Antapulela Eni Mwa Akristu a Masaka Abano?”
(Obudduwa 12:5-7) Mwana enamayá ahikale woragala, akale wapogo wa yaka modha; apa munorumeliha omusakula mwana nibila peno mwana-mbuzi. 6 Mmukoye mpaka malabo kumi na manayi a mweri obu; sikuná-ntho vati vagariba enama ejo epiwe vamentoni va athu atugumanilevo. 7 Nikaminá munosigiha myeddo dha misuwo na vadhulu va misuwodhá dha numba munajiwe mwana-nibila.
w07 1/1 20 ddima 4
‘Mwagalale na Murima Wotene’
4 Yezu okwile 14 ya Nisani yaka ya 33 EC. Labo 14 ya Nisani nali labo nowagalala najiwa mattanga paskwa mu Izrayel. Vyaka dhotedhene labo 14 ya Nisani ana Izrayel anja vamodha, mwa dhoja dhawa ankana nama ya mwana-nibila yohiragala. Mudhidhi wajani mattanga, annubuwela ttima yana nikami na mwana-nibila nasigihiwa mmweddoni dha misuwo na vadhuluva nsaka navirile anju wa Mulugu apaga attaji otene a mu Ejipitu labo 14 Nisani yaka ya 1513 AEC. (Obudduwa 12:1-14) Mwana-nibila najiwana mattanga a paskwa namutonya Yezu, nona murumiwi Paulo wahiloga dhahi: ‘Kristu oli paskwa wehu ohimala okuttiwa.’ (1 Korinto 5:7) Dhahene ninga nikame na mwana-nibila, nikami nikuttulile Yezu nihavuna attu enjene.—Joau 3:16, 36.
(Obudduwa 12:12, 13) Mathiyu-ene abo miyo ddinere ovira mwilaboni mw’Ejiputu, ddinowapamo ana athaji abaliwemo, oroma a athu mpaka a vinama si vinama. N’ejiyá ddinere wakona amulugu otene a mw’Ejipitu, ddonihaga wi Nabuya ddimiyene bahi. 13 Nikamená musigihe misuwo dha numba dhinkalamo nyuwo. Dhahene vanadhemi wapa akadda Ejipitu, mwa nyuwo kamunapiwe muthu nne mmodha; vanonemi nikame ntho, ddinokwaranyavo. Nyuwo kamunafwanyiwe segedho entolotxa siku ninalate miyo elabo yo’ Ejipitu.
it-3 181 ddima 5
Paskwa
Mapadduwo mena aniwanana na Mattanga a Paskwa ahakwanihedheya mwa Yezu. Nipadduwo nimodha, ttintti newanana na nikami nasigihiwana misuwo dha numba dha ana Izrayel, nttuwene nàvunile ana a attaji a ana Izrayel mmadani mwa anju warumiwe watolotxa ana a attaji ali mw’Ejipitu. Murumiwi Paulo onowaromola akristu ottikitteliwa ninga ana a attaji a Mulugu (Aheb 12:23) vina otapulelamo wi Yezu ddwawobolile na nikami naye. (1Tes 1:10; Ef 1:7) Kiyarumeliwa otwa magogoddo a mwana nibila wajiwana mattanga a paskwa. Ejo vina epadduwa na Yezu; mmaleboni mwahilebiwa wi magogoddo aye kanatwiwe. Mazuya aba ahakwanihedheya nsaka nikwiliye. (Masal 34:20; Jo 19:36) Mattanga a Paskwa ajiwa na Ayuda mwari mwa vyaka dhinjidhene yazinddiyela dhilobo dhafuna opadduwa musogorho, dhamutonya Yezu ninga ‘Mwananibila wa Mulugu’—Aheb 10:1; Jo 1:29.
(Obudduwa 12:24-27) Mukoyegevi magano aba nyuwo na aninyu muhiviriganihaga-wene. 25 Vanavolowe nyuwo mwilaboni enauvaheni Nabuya ninga mwapikireliye, eraganivi muthupo obu. 26 Aninyu agauvuzani enkoseliwa muthupoyá, awakuleni dhahi: 27 ‘Obu bu mukutho wa Paskwa womuthithimihana Nabuya. Iyene oalata akadda Ejipitu, oku akwaranyaga numba dha akadda Izrayel ali mwenemo, avunaga mirala dhehu’.
w13 15/12 20 ddima 13-14
‘Mubuwelegevi Sikuna Nthi’
13 Aima abaliwa, ansunzihiwa dhilobo dhipadduwile. Motagiha annaddeliwa ekosile Yehova wila avune nlogo naye. Venevo aniwaya annonelamo wi Yehova kahiyo mulugu-muluguvi, mbwenye Mulugu webaribari ontanala vina onvuna nlogo naye. Iyene ohoniha otanala waye ‘mwatolotxeliye ana a attaji a kadda Ejipitu’ oku avunaga ana a attaji a akadda Izrayel.
14 Masaka abano amambali ali Akristu kandideliwa watapulelamo anawa vyaka dhotedhene entapulela mattanga a Paskwa. Koddi onowasunzihaga anawo yakakene yasunziha ana Izrayel aniwa—yawi Yehova onobarela nlogo naye? Vina munowawoniha aninyu na merelo wi Yehova Onobarelavi nlogo naye? (Masal 27:11; Iza 12:2) Koddi munowakamihedha aninyu ononelamo makaniya aba na mazu ofwasa ottiya na mazu ovadda? Kavilibihedheni olabihedha yotagiha ya ana Izrayel wila mukamihedhe murala wenyu wunnuwa mpaddi womuyani.
Nipepese Mafumo a Omuyani
(Obudduwa 12:12) Mathiyu-ene abo miyo ddinere ovira mwilaboni mw’Ejiputu, ddinowapamo ana athaji abaliwemo, oroma a athu mpaka a vinama si vinama. N’ejiyá ddinere wakona amulugu otene a mw’Ejipitu, ddonihaga wi Nabuya ddimiyene bahi.
it-3 180 ddima 2
Paskwa
Milili kumi dhagele akadda Ejipitu ehoniha-wene wi amulugu kahiyo elobwene, ttabwa-ttabwa mukweli ana a attaji a akadda Ejipitu na dhinama dhawa. (Obud 12:12) Mwana nibila wanttittimihiwa vaddiddi na mulugu wakuweliwa Rá, nona osigihiwa wa nikame na mwana nibila mmyeddoni dha misuwo na vadhulu va misuwodhá yali ninga aveyiha akadda Ejipitu. Ng’ombe vina yanttittimiwa vaddiddi, nona otolotxiwa wa ana a attajiya a ng’ombedha yali ninga ombedda mulugu Osíris. Faraó wanttittimihiwa sabwa yokala mwana wa mulugu Rá. Nona okwa wa mwana wa muttajiya wa Faraó ehoniha wi mulugu Rá na Faraoya kahiyo elobwene.
(Obudduwa 12:14-16) Mubuwelegevi sikuná-tho, mujaga mathanga omuthithimihana Nabuya. Aninyu otene anadhegewo, adhowegenavi muthupoyá obu. 15 Mvireli malabo matanu na meli, muhijaga mikathe dhinna emela. Ovenyana siku noroma buddutxanimo emela mba mwenyu, vowi onaje mukathe onna emela mwari mwa masiku abo, onowigariwa munlogoni mwa Izrayel. 16 Siku noroma vina nomariha, mutugumanele omuthithimihana Mulugu. Masiku abo meli kamunthiwa othidda mabasa, ahilí opiya dhoja bahi.
it-1 543 ddima 7
Mutugumano wa Ttattamwa
Matugumano otene a ‘ttattamwa akosiwa’ anligana, sabwani attu karumelihiwa ottidda mabasa. Ninga motagiha siku noroma vina siku nomariha Ttajiwa Mikatte Dhohikana Emela sabwani ali ‘mathanga a ttima.’
Mowiwanana na mattangaya Yehova wahiloga: ‘Masiku abo meli kamunthiwa othidda mabasa, ahilí opiya dhoja bahi.’ (Obud 12:15, 16) Mudhidhi wajiwa ‘matangaya anamakutta’ anttidda mabasa awa a omukuttela mukutto Yehova. (Onam 23:37, 38) Arumelihiwa ottiddda mabasa awa ba anamakutta bahi. Masaka ajiwa mattangaya, ana Izrayel ampurelamo venjene masunziho a Mulugu àkelani. Siku na Sabuddu nlogo notene nantugumanela omwebedha Mulugu vina osunzihiwa magano aye. Nlogona nampurelamo wengesiwa vina otapuleliwa wa malebo dhahene ninga mwakoseliwa mu sinagoga. (Mer 15:21) Masiki nlogona nihittiddaga mabasa siku na Sabuddu na masiku ajiwa mattanga mena, awene anvilevela malobelo vina annimubuwela mpaddutxi wawa na dhogana dhaye.—Koona ASSEMBLÉIA.