NIPADDUWO 23
Dhoroha Dha Farao
VYAKA biili dhihivira, nanda Zuze olivi mu kambura. Namaperheka dhomwa kanimubuwela iyene. Musogorhomwa omathiyu dhahi Farao ohikaana dhoroha biili dha va woka vaddiddi, nanda iyene onovivuza mwaha wa ejile entapulelani. Weyo onomoona iyene bagagona apa? Mmangwananimwa na membesi Farao ohatxemerha aziwi aye nanda ohapanga dhilobo dharohiliye. Mbwenye awene kanwodha ompanga iyene ejile entapulela dhoroha dhaye.
Dhaene omamalelowa namaperheka dhomwa ohimubuwela Zuze. Iyene ohimpanga Farao dhahi: ‘Baddili mu kambura mwahikala mulobwana agawodhile ologa ejile entapulela dhorohadha.’ Mohigoneela Farao ohimburutxiha Zuze mu kambura.
Farao ohimpanga Zuze dhoroha dhaye: ‘Ddahoona ñgombe tanu na biili dhokuma, dhokoddela. Mumalelani ddahoona ñgombe tanu na biili dhowodda vaddiddi vina dhopodeya. Nanda esile dhowodda dhahija ñgombe esile dhokuma dhotene.
‘Mwa yoroha yaga yanawili ddahoona magala matanu na meeli odhaala thaga dhowarala badhigonuwa mu nigalani nimodha. Mumalelani ddahoona magala a thaga matanu na meeli owodda vina oonyala. Nanda magala a thaga dhowodda aahiroma omedha magala a thaga matanu na meeli aderetu.’
Zuze ohiloga na Farao dhahi: ‘Dhoroha dhobiili dhintapulela elobo yakakene. Ñgombe tanu na biili dhokuma vamodha na magala a thaga matanu na meeli odhaala, antapulela vyaka tanu na biili, nanda ñgombe tanu na biili dhowodda vamodha na magala a thaga matanu na meeli owodda, antapulela vyaka dhiina tanu na biili. Onela okala vyaka tanu na biili dhinakalewo dhoja vaddiddi mu Ejipito. Ogamala onela okala vyaka tanu na biili dhihinakaletxewo dhoja.’
Noona Zuze ohimpanga Farao dhahi: ‘Kamusakule muthu wa zelu nanda omuthome ninga mwañganeli wa oddoddela dhoja mwari mwa vyaka tanu na biili dhaderetu. Dhaene nlogo kaninakwe dala mwari mwa vyaka tanu na biili dhabure dhindawo venevo vahinakaletxewo dhoja.’
Farao ohiziveliwa yubuwelo eji. Nanda iyene ohimusakula Zuze wila addoddelege dhoja, nanda akoyege. Zuze ohidha okala muthu wa mpaddo munddimuwa vaddiddivene wanfarela Farao mu Ejipito.
Vyaka tanu na tharu musogorho, vari va dala, Zuze ohawoona alobwana dhahi bagadha. Weyo onowaziwa awene bani? Mwa otikina waye aba ba abali aye 10 anddimuwaya! Babi wawa Yakobi wela waruma wiJipito sabwani o Kana wakalani dhoja dhela ovuguwawo. Zuze ohazinddiyela abali aye, mbwenye awene kamuzinddiyeli iyene. Weyo onoziwa sabwaya? Sabwani Zuze wahimala wunuwa bakala munddimuwa, nanda iyene wabalile guwo dhiina dhothiyana.
Zuze ohubuwela wila bali muzombwe iyene waharoha abali aye bagadha omukokorela iyene. Weyo onowubuwela wengesa eji? Noona Zuze ohoona wila ddi Mulugu wamurumile iyene odhowa wiJipito, nanda na sabwa yaderetu. Weyo onoona ninga Zuze okosile eni? Ndoweni noone.
Wita 41:1-57; 42:1-8; 50:20.