NIPADDUWO 34
Mukalelo Muswa Wa Yoja
WEYO onowodha ologa txini enddodda athu aba vati? Eji enkala ninga maralala. Eji jotxena, nanda jopepeya vina jomomorowa. Mbwenye aba kayo maralala; eji elobo enjiwa.
Ovirile mweri mmodha bahi ovenya mudhidhi obudduwile Aizraeli mu Ejipito. Awene ali mwiddeddereni. Mpu mummela milima dhiñgonovi, noona athu anologa thogorogo, bagaloga dhahi: ‘Mbwenye Yehova konipawene wiJipito. Wenewale mbwenyimbwenyi nankaana dhoja dhotene dhaafunihu.’
Noona Yehova ohiloga dhahi: ‘Ddinfuna ddirubwihe dhoja ovenyedha odhulu.’ Nanda ji ejene ekosile Yehova. Mmangwananimwa na membesi Aizraeli moonelani elobo ejile yotxena yamothile, awene aahivuzana dhahi: ‘Eji txini?’
Moize ohiloga dhahi: ‘Eji ji yoja yuvahileni Yehova wila mujege.’ Nlogo nihitxemerha eji MANA. Eji yaziva ninga mikathe dhopepeya dhitaganyihiwe na wiyi.
Moize wahipanga nlogo wila: ‘Munofanyeela oddoddaga muthengo onwodha oja kadda muthu.’ Noona ji ejene yakosani kadda omembesi. Venevo, nzuwa nigaviha, mana abale aahala vati ela onyuguluwa.
Moize ohiloga vina: ‘Kavo onfanyeela okoya mana mpaka siku nindawo.’ Mbwenye athu ena a nlogo kavuruwanile. Weyo onoziwa txini epadduwile? Mmangwananimwa na membesi mana abale aakoyilani ahidhaala mitipa, nanda aba ahiroma onuka!
Oli siku nimodha bahi na sumana naapangile Yehova nlogo wila niddoddege mana wilimo. Nthi thi siku nanotanu na nimodha. Nanda Yehova ohiloga wila akoyege mana mpaka siku nindawo, sabwani iyene kanamothihe elobo va siku nanotanu na wili. Awene agakoya mana mpaka siku nanotanu na wili, aba kankaana mitipa vina kannuka! Nthi ntikiniho niina!
Vyaka dhotene dhili Aizraeli mwiddeddereni Yehova ohajiha awene mana.
Obudduwa 16:1-36; Olebeliwa 11:7-9; Josue 5:10-12.