Kafwanya Mafumo Omuyani wi Olabihedhe Siku na Siku

Nigengesaga Bibilia, enowodheya ofwanya mafumo omuyani modhela opepesa. Kito ninawodhe dhavi opurelamo dhopepesa esi?

Opepese matibelo a mapadduwo a mBibiliani. Motagiha, kavivuze: ‘Olebile nipadduwo ntti bani? Wamulebela ani? Nipadduwona nilebiwe mudhidhi gani? Dhilobo gani dhapadduwa? Txini epadduwile nipadduwona nihinalebiwa? Vina txini epadduwile vasogorhova?’

Katanalela ensunziha nipadduwona. Motagiha, kavivuze: ‘Attu anlogiwa mu nipadduwoni ntti aviwamo dhavi? Alagihile mikalelo gani? Ddinfwanyelela nni otagiha mikalelodha? Merelo gani abure anfwanyelimi orabela?’

Kalabihedha dhinsunza weyo ogakala mmabasani a olaleya obe ogakala na attu ena siku na siku. Ogakosa dhawene, onele olagiha wi oli muttu wa eziwelo, dhahene ninga enloga Bibilia: “Onna malago, onere otanalela esidhá.”—Masal. 107:43.

• Monelo: Koona mukalelo onnikamihedha miselu dhinfwanyeya epaddi ya Mafumo a Mazu a Mulugu mmatugumanoni a vari va sumana ozuzumela ovirihamo ensunzihu mBibiliani. Epaddi eji enodhana mavuzo anfwanyelihu ovikosa, dhilobo dhinfwanyelihu otanalela vina mafoto anwodhihu osunzana.