Yehova Onfuna wi Attu Otene Atxinuwe

1. Txini entapulela otxinuwa?

NIGAKOSA elobo yabure ninofwanyelela otxinuwa. Mowiwana na enloga Bibilia, muttu ontxinuwa onowidda elobo yabure ekosiliye, onotxinja mweddelo waye, onottiya yakosiliye vina onogana ohiyelela okosa yottega yakakene.—Mt. 3:8; Mer. 3:19; 2 Ped. 3:9.

2. Notene ninfwanyelela nni osunza mwaha wa otxinuwa? (Nehemiya 8:​9-11)

² Attu otene anofwanyelela osunza mwaha wa otxinuwa, sabwaya jani? Sabwani malabo otene iyo ninottega. Iyo nili ana Adamu na Eva, nona nihirava yottega na okwa. (Rom. 3:23; 5:12) Kawo muttu ohinttega. Masiki attu ororomeleya a masaka awale ninga murumiwi Paulo, anfwanyela wang’anela dhifunelo dhawa dhabure. (Rom. 7:​21-24) Sabwa ya dhotega dhehu ninofwanyelela okala wokumuwene mudhidhi wotene? Nne, Yehova ddattagaraga iyene onfuna wi nikale attu owagalala. Kobuwela yapadduwele Ayuda nsaka na Nehemiya. (Kengesa Nehemiya 8:​9-11.) Yehova kafuna wi awene akale okumuwene obuwelaga dhotega dhikosilani mundduni, iyene wafuna wi Ayuda amwebedhe nowagalala. Yehova onoziwa wi ole ontxinuwa onowodha okana wagalala. Nona iyene ononisunziha wi nigatxinuwa mwa dhotega dhehu, nikane ebaribari wi Babi wehu wa ttagaraga onele onilevelela.

3. Txini enawone iyo mwari mwa nsunzo ntti?

³ Mwari mwa nsunzo ntti ninele wona dhilobo ttaru dhinanikamihedhe osunza mwaha wa otxinuwa. Yoroma, txini yasunzihile Yehova ana Izrayel mwaha wa otxinuwa? Yanawili, txini enkosa Yehova wi akamihedhe attegi otxinuwa? Yaneraru, txini yasunzihile Yezu anamafwara aye mwaha wa otxinuwa?

TXINI YASUNZIHILE YEHOVA ANA IZRAYEL MWAHA WA OTXINUWA

4. Yehova wasunzihile eni ana Izrayel sabwa ya otxinuwa dhottega?

⁴ Musakulile Yehova nlogo na Izrayel, iyene wahikosa nipagano na awene obe wahilagana. Yehova wahavaha ana Izrayel malamulo agabarele vina agattukulele orurihiwa, awene kowiwelela. Yehova wahawaddela mwaha wa malamuloya: “Malamulo aba anuvahani miyo ddabuno, kaiyo ourutxelani bure, kaiyo ohiviriheyamo.”(Olib. 30:​11, 16) Ana Izrayel kokala addiyamaru—vina kohiwelela malamulo aba vina kosakula wawebedha amulugu ena—Yehova agahittiya waruriha, awene agahitabuwa sabwa ya ejuwene. Masiki dhawene eji kintapulela wi Yehova agahanyanyala kakamwe, awene ahikana gari ya omwiyelela Yehova vina onvuruwana. (Olib. 30:​1-3, 17-20) Na mazu mena awene ahikana gari ya otxinuwa. Awene kotxinuwa Yehova agahafiyedha vina agaharuriha wili.

5. Yehova walagihile dhavi wi kanyanyalile nlogo naye? (2 Amwene 17:​13, 14)

⁵ Masiki nikalaga nlogo nosakuliwa na Yehova ana Izrayel ahimusadduwela dila dhinjene. Ottiya wawebedha amilugu ena awene ahikosa dhilobo dhinji dhotakala, sabwa ya ejuwene ahitabuwa venjene. Mbwenyi Yehova kattiyile wakamihedha sabwa ya awene okosa dhilobo dhabure. Dila dhinjene iyene oharuma anamakutta wi awaddele awene otxinuwa vina omwebedha Yehova na murima wotene.—Kengesa 2 Amwene 17:​13, 14.

6. Yehova walabihedhile dhavi anamavuhulela aye osunziha nlogo ttima ya otxinuwa? (Koona vina foto.)

⁶ Mone mukalelo wakamihedhile Yehova ana Izrayel alabihedhaga anamavuhulela aye wi alagihe dhottega dhakosani vina wakamihedha otxinuwa dhottega dhawa. Motagiha, Yehova ohimulabihedha Jeremiya wila awaddele: “Namavanya Izrayel, keyela . . . kaddinawañganena vina kove yowali, yowi miyo ddili muthu wopisa murima, onyanyuwa waga kundhowavi . . . [Koona] dhothega dhawo, vowi omvanya [Yehova] Mulugu wawo.” (Jer. 3:​12, 13) Modhela Jowel Yehova ohiloga: “Eyelelaní wa miyo na murima wenyu wotene.” (Jow. 2:​12, 13) Yehova ohimulabihedha vina Izaiya wi aloge: “Muvikoddelihe, muvikupe; kamuddonihe vina obure wenyu!” (Iza. 1:​16-19) Modhela Ezekiyel Yehova wahivuza: “Txino munubuwela wi miyo ddinoziveliwa na okwa wa muthegi? Miyo [Yehova] Mulugu ddinziveliwetxa wi iyene arugunutxe murima, akalewo. Miyo kaddinziveliwa na okwa wa muthu ddi muthu. Txinuwaní, munele okalawo.” (Ezek. 18:​23, 32) Yehova onoziveliwa vaddiddi agamona muttu ontxinuwa sabwani iyene onfuna wi otene akalewo—namukalakala! Yehova kanimujedha muttu otxinuwa wila amukamihedhe. Ndowe none dhotagiha dhing’onovi dhinlagiha ejuwene.

7. Alogaga sabwa ya empadduwele Ozeya na mwadhiye txini yasunzihile Yehova nlogo naye?

⁷ Koona yotagiha yowoneya elabihedhile Yehova wi asunzihe nlogo naye mwaha wa otxinuwa. Yehova wahiloga empadduwele—Gomer mwadhi wa namavuhulela Ozeya. Iyene wahikosa mararuwo bamuttiya mamunaye Ozeya wi akale na alobwana ena. Yakosiye yali yottabwa vaddiddi ohifiyedha wakela nikamihedho? Yehova onwodha wona eli mmirimani ohimwaddela Ozeya: “Dhowa wamutele muyana, onfuniwa na mwina ajeberiwagana. Omukwele ninga enira [Yehova] onakwela akadda Izrayel, anzugunuwela wa amulugu ena.” (Oz. 3:1; Gano 16:2) Koona wi mwadhi Ozeya wankosavi dhilobo dhabure vina dhottega dhottabwa. Masiki dhawene Yehova wahimwaddela Ozeya wi wanfwanyela onveda mwadhiye vina amulevelele, amwiyelele.a Na mukalelo wakakene Yehova kattiyile nlogo naye Izrayel masiki awene akalaga addiyamaru vina ohitxinuwa. Masiki akosaga dhilobo dhottabwa Yehova wanakwela vina wanfuna wakamihedha okosa matxinjo mwigumini mwawa. Nonaga yotagiha eji ninodhaga okosa nivuzo ntti: Eji entapulela wi Yehova onowattamagela abale ankosa yottega enddimuwa attukulelaga otxinuwa? (Gano 17:3) Ninele wona.

TXINI ENKOSA YEHOVA WI AKAMIHEDHE ATTEGI OTXINUWA

8. Txini ekosile Yehova wi amukamihedhe Kayini otxinuwa? (Wita 4:​3-7) (Koona vina foto.)

⁸ Kayini wali mwana woroma wa Adamu na Eva. Dhahene ninga aima otene Adamu na Eva Kayini vina wahibaliwa na efunelo ya okosa yottega. Bibilia onologa wi: “Dhawira dhaye dhali dhabure.” (1 Jo. 3:12) Txino jijuwene emuttukulele Yehova ohang’ana mukutto waye mwakosiliye nvahoya. Ottiya otxinja mubuwelo waye, Kayini osilidhiwa vaddiddi vina wahinyimuwa. Yehova wakosile nni wi amukamihedhe? Iyene wahiloga na Kayini. (Kengesa Wita 4:3-7.) Kang’ana wi Yehova wahitanalela na Kayini wila agahimururiha kotxinja mubuwelo waye akosa dhilobo dhapama, ottiya ejo Yehova wahimwaddela egapadduwile iyene kodidela mubuwelo waniyena. Mokubanyiha, Kayini kanvuruwanile Yehova. Iyene kafunile nikamihedho na Mulugu vina katxinuwile na dhawira dhaye, eji yahimukubanyiha venjene Yehova. Kito ejo entonyihedha wi iyene kagamukamihedhile muttu mwina otxinuwa dhawira dhaye? Kahiyo mwenemo!

9. Txini ekosile Yehova wi amukamihedhe Davidi otxinuwa?

⁹ Yehova wannimukwela Mwene Davidi, ofiyedha ologa wi “muthu wa murima waga.” (Mer. 13:22) Mbwenyi Davidi wahikosa yottega enddimuwa, okosa mararuwo vina ompa muttu. Mowiwanana na Malamulo a Mizé, Davidi wanfwanyela opiwa. (Onam. 20:10; Oleb. 35:31) Yehova wanfuna omuttukulela mwene Davidi otxinuwa.b Iyene wahimuruma namavuhulela Natan wi amoone mwene, masiki Davidi ahitonyihedhaga wi wahitxinuwa. Natan wahilabihedha yotagiha ya medida wi addiginye murima wa Davidi. Eji yahimukamihedha Davidi wona wi wahimuttegela venjene Yehova, nona iyene wahitxinuwa. (2 Sam. 12:​1-14) Davidi ohileba nivuru na Masalmo atonyihedhaga wi wahitxinuwa na murima wotene mwa dhawira dhaye. (Masal. 51, musorho) Attu enjene akosile yottega anoziveliwa na nlebo ntti na masalmo vina anotxinuwa. Weyo oniviwamo dhavi mwaha wa okwela omutonyihedhile Yehova Davidi wi amuttukulele otxinuwa?

10. Oniviwamo dhavi ogatanalela ovilela vina olevelela wa Yehova?

¹⁰ Yehova onowidda yottega, iyene kanziveliwa muttu agakosa yottega. (Masal. 5:​4, 5) Mbwenyi, iyene onoziwa wi iyo notene nili attegi, vowi iyene ononikwela venjene, onokosa muli-mwetemwene wi anikamihedhe owanana yottega. Iyene oli womala-nawale wi amukamihedhe muttu okosile yottega enddimuwa wi atxinuwe vina anfiyedhe iyene. Japama oziwa ejuwene! Nigobuwela ovilela wa Yehova vina olevelela waye, iyo ninogana okala ororomeleya na iyene, otxinuwa momaguva-mwene akala ninokosa yottega. Ovano ninele wona yasunzihile Yezu anamafwara aye mwaha wa otxinuwa.

TXINI YASUNZIHILE YEZU ANAMAFWARA AYE MWAHA WA OTXINYUWA

11-12. Txini yasunzihile Yezu anamafwara aye mwaha olevelela wa Yehova? (Koona ya kapa.)

¹¹ Sekulu yoroma wali, mudhidhi ogafiyile Mesiya. Ninga monelihu nsunzo nivirele, Yehova wahimulabihedha Joau Batista vina Yezu wi àsunzihe attu ttima ya otxinuwa.—Mt. 3:​1, 2; 4:17.

¹² Vali Yezu velaboni ya vati, wahasunziha anamafwara aye wi Yehova onowalevelela attegi. Yezu wahiloga musibo wa mwana wopawula. Mwari mwa musibo obu iyene wahimuloga muzombwe waganile ovenyavo vatakulu nanda badhowa okosa dhilobo dhabure. Musogorhomwa iyene wahitxinuwa vina wahigana wiyelela vatakulu. Babe omwakele dhavi? Yezu wahiloga wi iyene adhaga wuddayiwene babe omona, ttagaraga emwedda, omuttamagela vina omukubatta. Mwanaye afuna akale mulabeli wa babe ninga alabeli ena, mbwenyi babe ohiloga “mwanaga oddu waikwa” ddabuno ohiyelela okalawo, wahirimela ddabuno ohoneya. Dhahene babe wahimwakela wili vatakulu. (Lk. 15:​11-32) Mudhidhi wali Yezu wirimu ahinadha velaboni ya vati, mohaganyedha iyene wahimona Babe atonyihedhaga ttagaraga vina momaguva-mwene analevelela abale atxinuwa. Musibo obu ologile Yezu ononipangarhaza vina ononitonyihedha wi Babi wehu Yehova dwa ttagaraga vaddiddi!

13-14. Murumiwi Pedro osunzile eni sabwa ya dhottega dhaye, txini yasunzihiliye attu ena? (Koona vina foto.)

¹³ Pedro osunza venjene na Yezu sabwa ya otxinuwa dhottega dhaye vina oleveleliwa. Pedro wahikosa dhovonya dhinjene vina Yezu wali womala-nawale wila amulevelele. Motagiha, Pedro wahimukodda Yezu dila ttaru alogaga wila kaamuziwa, mmalelani Pedro wahikumuwa vaddiddi sabwa ya ejile yakosiliye. (Mt. 26:​34, 35, 69-75) Mbwenyi muvenyile Yezu mukwani, iyene wahimuttanyuwela Pedro—enoneya ninga wamuttanyuwele iyene bali yeka. (Lk. 24:​33, 34; 1 Kor. 15:​3-5) Ndde Yezu wahiziwa wi Pedro wahitxinuwa dhottega dhaye vina Yezu wafuna amulagihe wi wahimulevelela.—Koona Marko 16:7.

¹⁴ Sabwa ya oleveleliwa na Yehova vina Yezu, Pedro ovano wanasunziha attu sabwa ya otxinuwa vina olevelela. Muvirile mattanga a Pentekoste, Pedro wahakosela diskursu nlogo na Ayuda ahamurumela Yezu, atapulelaga wi awene bampile. Masiki dhawene, Pedro wahatonyihedha okwela vina wahakumbirha: “Mutxinyuwe, mmurugunutxele murima Mulugu; awodhe oulevelelani dhothega dhenyu.” (Mer. 3:​14, 15, 17, 19) Pedro wahitonyihedha wi muttu ontxinuwa ddule oniyelela okosa dhilobo dhapama—obe onotxinja mubuwelo waye vina mweddelo waye—dhahene muttuya ottegile onowiyelela okana egumi eswa, ejo entapulela wi onomwagalaliha Yehova. Pedro wahitonyihedha wi Yehova agahifudha dhottega dha attu obe kagawubuwelile nne vang’ono. Vyaka dhinjene musogorho, Pedro wahawaddela Akristu: “Nabuya . . . onowuvilelani, vowi kanfuna orimela wa muthu nne mmodha; onfuna wi etene afwanye mudhidhi worugunutxa murima.” (2 Ped. 3:9) Ntti njdhelo napama masiki nigakosa yottega enddimuwa—enowodheya oleveleliwa na Yehova!

15-16. (a) Namukalelo gani esunzile Paulo olevelela? (1 Timóteo 1:​12-15) (b) Txini enawone iyo nsunzo ninfwarela?

¹⁵ Muttu mmodha wafwanyelela oleveleliwa na Mulugu wali Saulo w’o Tarsu. Iyene wanafwara-fwara Akristu nowali. Mwa Akristu enjene Saulo kali muttu wafwanyela oleveleliwa, sabwa ya merelo aye. Mbwenyi, mukalelo wamona Yezu Paulo wahittiyana na mukalelo wamona attu ena. Yezu wanziwa wi Saulo agahitxinuwa na dhottega dhaye vina agahitxinja. Yezu na Yehova annoona mikalelo dhapama dhana Saulo. Nona Yezu aloga dhahi: “Miyo ddimusakula muthu oddo.” (Mer. 9:15) Wi amulagihe Saulo mukalelo wa otxinyuwa dhottega dhaye. (Mer. 7:58–8:3; 9:​1-9, 17-20) Mmaleli Saulo okala Mukristu,—vaziwiwiye na nzina na murumiwi Paulo—wahilagiha dila dhinjene otamalela oderetu wakoseliwiye vina ttagaraga yalagihile Yehova na Yezu. (Kengesa 1 Timóteo 1:​12-15.) Otamalela oku wahimuttukulela murumiwi Paulo ologa mazu awi: Mulugu n’ofwasa waye onouwobela omurugunutxela murima.—Rom. 2:4.

¹⁶ Dila modha Paulo wahiziwa makani apadduwile mmulogoni w’o Korinto, mulobwana mmodha wahikosa mararuwo masiki dhawene wankosavi mpaddi wa mulogo, txini ekosile Paulo? Paulo wahilebela mulogo w’o Korinto, anisunzihaga mukalelo onnitonyihedha Yehova okwela agasunzihaga alabeli aye vina mukalelo onimutonyihedhiye ttagaraga muttu otxinuwile. Nsunzo ninfwarela ninele wona mpaddi-mpaddi na epadduwile na mulogo obule vina osunza mukalelo onfwanyelihu otagiha ttagaraga ya Yehova.