Anddimuwa a Mmulogoni​—Kasunzani na Yotagiha ya Jedeau

1. Mowiwanana na 1 Pedro 5:2, mabasa gani attomeliwe anddimuwa a mmulogoni?

ANDDIMUWA a mmulogoni ahittomeliwa na Yehova mabasa a weddiha mabila aye. Alobwana aba anolaba venjene, anovaha ttima mabasa aba a okumbuza vina osapiha mabila a Yehova. (Jer. 23:4; kengesa 1 Pedro 5:2.) Iyo ninotamalela venjene sabwa ya okana alobwana aba mmulogoni mwehu!

2. Dhoweha gani dhingumanana anddimuwa ena a mmulogoni?

² Anddimuwa a mmulogoni anogumanana dhoweha dhinjene, mudhidhi ondowanina vasogorho mabasa awa. Elobo modha jawi, ozuzumela mulogo mabasa manddimuwa vaddiddi. Tony, munddimuwa mmodha wa mmulogoni onkala o Estados Unidos, ohiloga wi enofuneya osunza okala muttu wovipimelela akala onottomeliwa mabasa menjene a okosa. Iyene owenjedhedha: “Varomile COVID-19, miyo ddahikana mabasa menjene a okosa, osasanyedha matugumano vina mabasa olaleya. Mbwenyi masiki vakosimi mabasa menjene, ankalawo mena a okosa. Mokubanyiha-mwene vang’ono-vang’ono, wengesa waga wa Bibilia, nsunzo nomwinya na olobela dhela wiyelela mundduni.” Munddimuwa mmodha wa mulogo wa elabo y’o Kosovo, wahigumanana yoweha yottiyana. Valiye murudda wawaniwa koddo, yahimukalela yorutxa wiwelela malago avahiwiye. Iyene ohiloga dhahi: “Oliba waga murima waheyiwa vakumbirhiwimi na abali o filiali wi ddakamihedhe abali na arogora ali murudda wowopiha. Miyo ddahova vina malagoya akala ninga kobuweliwe deretu.” Tim, misionario mmodha wo Ásia, enimurutxa odhowanavi mabasa aye siku na siku dhahene ninga mwafuneliye. Iyene ohiloga dhahi: “Dila dhina ddinkala olemene.” Txini enakamihedhe anddimuwa a mmulogoni angumanana dhoweha dholaddana?

3. Iyo notene ninawodhe dhavi opurelamo na yotagiha ya Jedeau?

³ Anddimuwa a mmulogoni anofwanyela osunza na yotagiha ya Jedeau. (Aheb. 6:12; 11:32) Iyene wana mittorho minli, obarela na okumbuza nlogo na Mulugu. (Anam. 2:16; 1 Map. 17:6) Dhahene ninga Jedeau, anddimuwa a mmulogoni ahittomeliwa weddiha nlogo na Mulugu mmidhidhini dhorutxa. (Mer. 20:28; 2 Tim. 3:1) Iyo ninele osunza na ovipimelela wa Jedeau, ovyeviha vina wiwelela waye. Ovilela waye waheyiwa mudhidhi wadhowiyena vasogorho mabasa attomeliwiye. Kintanala akala nili anddimuwa a mmulogoni obe nne, ninofuniwana watamalela venjene anddimuwa a mmulogoni. Enowodheya iyo wakamihedha abali aba anlaba mudhidhi mwinjene mmulogoni mwehu.—Aheb. 13:17.

OVIPIMELELA NA OVYEVIHA WAWO OGEHIWA

4. Jedeau wonihile dhavi ovipimelela vina ovyeviha?

⁴ Jedeau wali mulobwana wovipimelela vina w’ovyeviha.b Mulogile anju wa Yehova wi Jedeau wahittomeliwa wavuna ana Izrayel mmadani mwakadda Midia, mulobwana oddu w’ovyiviha wahimwakula dhahi: “Mwa nihimo na Manassé, murala woyelegetxayá bwehu, miyo ddili muñgonoyávo.” (Anam. 6:15) Iyene wavyona ninga kafwanyelile ottomeliwa mabasa aba, mbwenyi Yehova wanziwa wi iyene agahakwaniha pama mabasaya. Na nikamihedho na Yehova, Jedeau wahakwaniha mabasa attomeliwiye.

5. Dhilobo gani dhigehile ovyeviha na ovipimelela wa munddimuwa wa mulogo?

⁵ Anddimuwa a mmulogoni anofwanyela ovilibihedha okala attu ovyeviha vina ovipimelela mwa dhotedhene dhinkosani. (Mik. 6:8; Mer. 20:18, 19) Awene kanfwanyela ovigwarula sabwa ya dhilobo dhikosilani obe dhinwodhani okosa; kili yofuneya vina ohivyonana ttima sabwa ya dhovonya dhawa. Mbwenyi, dila dhina enokalaga yorutxa anddimuwa a mmulogoni olagiha ovyeviha vina ovipimelela. Motagiha, enodhaga opadduwa iyene orumela mabasa menjene, omamalelowa kuhuwodha wakwaniha. Enodhaga okala yorutxa olagiha ovyeviha vina ovipimelela akala ena anosisigula mukalelo onkosiye dhilobo obe akala attu ena anomutamalela sabwa ya dhilobo dhikosiliye. Txini ensunza anddimuwa a mmulogoni na yotagiha ya Jedeau enakamihedhe agagumanana dhoweha ninga esi?

6. Txini ensunza anddimuwa a mmulogoni na ovipimelela wa Jedeau? (Koona vina foto.)

⁶ Okumbirhe nikamihedho. Muttu oli wovipimelela, onoziwa vangomela guru dhaye. Jedeau wali wovipimelela, ohoniha ejuwene modhela wakumbirha attu ena nikamihedho. (Anam. 6:27, 35; 7:24) Anddimuwa a mmulogoni anofwanyela okosa yakene. Tony, ologiwe omaromo, onotapulelamo dhahi: “Sabwa ya elemelelo ya murudda wunuwile miyo, ddanrumela mabasa menjene ahawodhami opuliha. Miyo ddahigana ologa va webedha wehu a ntakulu makani anloga sabwa ya ovipimelela vina ofwara monelo wa mwadhaga. Ddahidhowa wona wili vidiyu Imite Jesus no Modo de Treinar, Confiar e Delegar mu jw.org.” Tony wannawoba attu ena wi amukamihedhe na mabasa aye. Yopurelavoya? Tony ohiloga dhahi: “Mabasa a mmulogoni adhowavi azuzumeliwaga, vina miyo ddahikana mudhidhi mwinjene wa olibiha mandano aga na Yehova.”

7. Anddimuwa a mmulogoni, anamutagihe dhavi Jedeau akala anopambihiwa? (Tiago 3:13)

⁷ Wakule nofwasa ogapambihiwa. Elobo yina enkala ninga yoweha mwa anddimuwa a mmulogoni, empadduwa akala awene anopambihiwa. Mbwenyi yotagiha ya Jedeau, enele wakamihedha. Iyene wanziwa wi wali muttu wohiligana, sabwa ya ejuwene wahakula nokurumuwa vapambihiwiye na akadda Efraim. (Anam. 8:1-3) Iyene kawakulile n’osilidheya. Wahoniha wi wali muttu woviyeviha modhela wavuruwana sabwaya yampabihelani vina wahawakula na mukalelo wapama, mukoseliye ejuwene awene ahifwasa. Anddimuwa a mmulogoni a zelu anofwanyela omutagiha Jedeau modhela ovuruwana na ofwasa vina wakula noriheya agapambihiwaga. (Kengesa Tiago 3:13.) Eji enele okamihedha wi mmulogoni mukale murenddele.

8. Anddimuwa a mmulogoni anfwanyela wakulela dhavi agavahiwaga matamalo? Kavaha yotagiha.

⁸ Matamalo otene omperhekele Yehova. Attu ena vamutamalelani Jedeau sabwa ya iyene wapemberha akadda Midia, matamalo otene onvahile Yehova. (Anam. 8:22, 23) Anddimuwa a mmulogoni anamutagihe dhavi Jedeau? Dhilobo dhotene dhinkosani, matamaloya anvahege Yehova. (1 Kor. 4:6, 7) Motagiha, akala munddimuwa mmodha wa mmulogoni onotamaleliwa sabwa ya ttotto yaye ya osunziha, iyene onofwanyela ologa wi eji epadduwile sabwa ya masunziho akeliliye na Nzu na Mulugu, obe sabwa ya maswagiho anakeliye na nlogo na Yehova. Mudhidhi na mudhidhi, anddimuwa a mmulogoni anofwanyela opima akala masunziho awa anomuttittimiha Yehova obe anfuna attittimihiwe na attu. Koona yotagiha modha ya munddimuwa wa mulogo onkuweliwa Timothy. Vamaromo vattomiwiye ninga munddimuwa wa mulogo, Timothy wanziveliwa venjene okosa diskursu dha vattaddo. Iyene ohiloga dhahi: “Miyo ddaroma diskursu dhaga na dhotagiha dholapa vina dhorutxa ononelamowa. Dila dhinji dhotagiha esi dhattittimiha attu ena. Mokubanyiha-mwene, attuya afwaseyela oddizuzumela miyo ottiya esile dhindela mBibiliani vina masunziho a Yehova.” Na mudhidhiya, Timothy wahona wi wanfwanyela okosa matxinjo a makalelo aye osunziha wi arabele otamela osibiwa na attu. (Gano 27:21) Yopurelamoya? Iyene ohiloga dhahi: “Attu ottiyana-ttiyana anda oddaddela mukalelo wakamihedhile diskursu yaga owanana makattamiho, ovilela dhoweha vina okala ofiyedheya na Yehova. Matamalo anakelimi ovanene anoddagalaliha venjene opitta matamalo akelimi vyaka dha mundduni.”

AKALA WIWELELA VINA OLIBA WAWO MURIMA ONOWEHIWA

9. Wiwelela na oliba murima wa Jedeau wehiwe dhavi? (Koona foto ya kapa.)

⁹ Mmaleli Jedeau ottomiwa ninga namattonga, wiwelela na oliba waye murima waheyiwa. Iyene wahittomeliwa mabasa orutxa vaddiddi, otwa ebuwa yammageli babe Baal. (Anam. 6:25, 26) Vasogorhova, vagumanihiliye anyakoddo, Jedeau wahifwara malago addeliwiye a wavugule anyakoddoya. (Anam. 7:2-7) Omamalelowa, Jedeau wahaddeliwa wi adhowe alupele amwiddani vasanjarhani valani na mattiyu.—Anam. 7:9-11.

10. Wiwelela wa anddimuwa a mmulogoni ogadhile dhavi wehiwa?

¹⁰ Anddimuwa a mmulogoni anofwanyela okala attu owiwelela. (Tia. 3:17) Munddimuwa wa mmulogoni wowiwelela kangonela ovirihamo enloga Malebo obe ovirihamo malago a nikuru na Mulugu. Masiki dhawene wiwelela wawa onodhaga wehiwa. Dila dhina munddimuwa wa mmulogoni onodhaga ovivuza, akala malago akeliliye bapama obe anolaba. Onodhaga ovivuza akala mabasa attomeliwiye anodha wika egumi yaye vangovini. Mmakattamihoni ninga aba, anddimuwa a mmulogoni anawodhe dhavi otagiha wiwelela wa Jedeau?

11. Txini enakamihedhe anddimuwa a mmulogoni okala attu owiwelela?

¹¹ Ofwaseyele ovuruwana malago vina ovirihemo. Mulugu wahimmwaddela Jedeau wi atwe ebuwa yamagile babe, vamburoniva ammagelevo Yehova ebuwa eswa vina amukuttelevo mukutto wa dhinama. Jedeau kapambihile wahivirihamo—dhotedhene dharumiwiye. Masaka abano, anddimuwa a mmulogoni anowakela malago anvaha nikuru na Yehova ninga motagiha; makarta, dhovuwiha na malago mena annibarela mpaddi womaningoni vina womuyani. Iyo ninowagalala sabwa ya anddimuwa a mmulogoni ororomeleya anfwara malago a munikuruni na Yehova. Sabwani agakosa dhawene mulogo wotene onopurelamo.—Masal. 119:112.

12. Anddimuwa a mmulogoni anawodhe dhavi ovirihamo mazu a Ahebreu 13:17 akala nikuru na Yehova ninowawaddela wi atxinje mukalelo wokosa dhilobo?

¹² Kala womala-nawale wi okose matxinjo. Yehova wahimwaddela Jedeau, wi arume anyakoddo ena adhowe mmawani mwawa. (Anam. 7:8) Iyene txino agahivuza, ‘Ejiya enofuneya txibarene? Malagoya aba anolaba?’ Jedeau kakosile ejuwene, iyene wahiwelela. Masaka abano anddimuwa a mmulogoni anofwanyela ofwara yotagiha ya Jedeau mwa ovirihamo matxinjo a munikuruni na Yehova. (Kengesa Ahebreu 13:17.) Motagiha, yaka ya 2014 Nikuru Nolamulela nihitxinja marhe a olabihedha kobiri dha omagiwana Nyumba dha Omwene vina Nyumba dha Asembeleya. (2 Kor. 8:12-14) Wale nikuru na Yehova ttaburutxa kobiri dha omagiwana Nyumba dha Omwene, mgamala abaliya a mulogoya ampitxa korowaya ettiddiwena mabasaya. Mbwenyi ovanene nikuru na Yehova ninlabihedha mivaho dhinkosiwa na milogo dhili orugunuwa elabo yotene wi dhimagiwena Nyumba dha Omwene na dha Asembeleya, mowiwanana na dhofuneya dha vamulogoniva kintanala akala abali a mulogoya asokile korowa eng’onovi. José muziweliye matxinjo aba, wahaganyedha akala ejiya egahilaba, iyene wobuwela dhahi: ‘Akala eli dhawene kinamagiwe nne Nyumba modha Yomwene. Mpaddi obuno wa elabo dhilobodha kadhinkosiwa dhawene.’ Txini emukamihedhile José okamihedha matxinjo aba? Iyene ohiloga: “Mazu a Gano 3:5, 6 ahiddubutxedha omukuluvela Yehova vina yodhelavoya yahiddagalaliha vaddiddi! Ottiya omaga Nyumba Dhomwene dhinjene nihisunza omaga Nyumba na mukalelo wottiyana-ttiyana.”

13. (a) Jedeau wana nikuluvelo gani? (b) Anddimuwa a mmulogoni anamutagihe dhavi Jedeau? (Koona vina foto.)

¹³ Na oliba murima kakosa efunelo ya Yehova. Masiki na wova vina egumi yaye okala vangovini Jedeau wahimwiwelela Yehova. (Anam. 9:17) Mmaleliye okuluvelihiwa na Yehova, Jedeau wahikana ebaribari wi Yehova agahimukamihedha owodha obarela nlogo naye. Anddimuwa a mmulogoni ankala mwilaboni munkoddihiwa mabasa ehu anomutagiha Jedeau. Na oliba murima awene anosogorhela matugumano, mabasa a olaleya, masiki akala anottukuleliwa mukambura, omuttegoni, anoyelela ganyo dhawa obe akala anotabutxiwa.c Goi enddimuwa egaroma, enele ofuneya anddimuwa a mmulogoni oliba murima wi avirihemo malago anakelani—masiki akala enowoneya wi jawopiha ofwara malagoya. Motagiha, ninodhaga ovahiwa malago ananikamihedhe olaleya muselu wottonga vina enfwanyelihu okosa wi niviluwe nsaka ninalupele Gog wa Magog nlogo na Mulugu.—Ezek. 38:18; Ovuh. 16:21.

OVILELA WAWO OGEHIWA

14. Ovilela wa Jedeau wehiwe dhavi?

¹⁴ Vattomiwe Jedeau wi akale namattonga wahikana mabasa menjene a okosa. Akadda Midia vattawilani vari va mattiyu Jedeau wahiroma wattamagela oromana Nttittwa no Jezrayel ofiyedha Mwinje Jordau. (Anam. 7:22) Koddi Jedeau wahatxelela sabwa ya Mwinje Jordau? Newene! Masiki vattawilani, iyene na alobwana aye 300 ahabuwa Mwinje Jordau vina wahididelavi wattamagiha. Omamalelowa, iyene wahafwanya anyakoddo abale akadda Midia vina wahatata.—Anam. 8:4-12.

15. Dila dhina, elobo gani eneha ovilela wa anddimuwa a mmulogoni?

¹⁵ Anddimuwa a mmulogoni dila dhina anolema sabwa ya ozuzumela mulogo vina murala wawa. Mmakattamihoni ninga aba, anawodhe dhavi omutagiha Jedeau?

16-17. Txini emukamihedhile Jedeau ovilela, nanda nikuluvelo gani ninfwanyela okana anddimuwa a mmulogoni? (Izaiya 40:28-31) (Koona vina foto.)

¹⁶ Kakuluvela wi Yehova onele wulibiha. Jedeau wahikuluvela wi Yehova agahimulibiha, nanda jijuwene epadduwile. (Anam. 6:14, 34) Dila modha, Jedeau na alobwana aye elo wattamagiha na myeddo amwene eli akadda Midia attawile na akamelo. (Anam. 8:12, 21) Mbwenyi na nikamihedho na Mulugu, ana Izrayel ahafwanya bapemberha koddoya. Na mukalelo wakakene anddimuwa a mmulogoni anofwanyela omukuluvela Yehova, odduwene ohinlema vina ohinojeya. Awene agafuna olibihiwa iyene onele walibiha.—Kengesa Izaiya 40:28-31.

¹⁷ Katanalela yotagiha ya Mateu, mbali mmodha wa Nikuru na Abali Anlaba Mumodhani na Masipitale. Iyene onwodha dhavi ovilela? Mateu ohiloga dhahi: “Miyo ddihisunza okuluvela mazu a Filipi 4:13. Dila dhinjidhene ddigakala olemene ddinolobelaga venjene, ddimukumbirhaga Mulugu wi addivahe guru wila ddiwodhe wakamihedha abalaga. Mudhidhi onkalimi wolemene ddinowona wi muya wa Mulugu onowodha oddikamihedha wi ddiwodhe ovilela.” Dhahene ninga Jedeau, anddimuwa a mmulogoni anogumanana makattamiho menjene venevo vadhowani asapihaga mabila a Yehova. Bili dhawene, enofuneya awene okala attu ovipimelela vina ononelamo wi kanawodhe okosa dhilobo dhotene dhigaziveliwani okosa. Anofwanyela omukuluvela Yehova wi onele ovuruwana malobelo awa agamukumbirha nikamihedho vina onele walibiha wi awodhe ovilela.—Masal. 116:1; Fil. 2:13.

18. Nigwaddelaga dhotene dhisunzilihu, ninawodhe dhavi omutagiha Jedeau?

¹⁸ Anddimuwa a mmulogoni anele osunza venjene na yotagiha ya Jedeau. Awene anofwanyelela ovipimelela vina oviyeviha mowiwanana na mabasa anrumelani okosa vina akala anopambihiwa na attu ena obe anotamaleliwa. Anofwanyela okala attu owiwelela vina oliba murima, makamaka apa vanaddamelihu omagomo wa elabo eji. Ottiya ejo, awene anofwanyela okana nikuluvelo nawi kintanala dhorutxa gani dhinagumananina, Mulugu onele walibiha. Iyo ninofwanyelela watamalela vina wariha abali aba ansogorhela milogo.—Fil. 2:29.