Zango lia Zambi Liakununga ku Miaka Yeswe

1-2. Mu yipikalo yika Akwa-Kristu anji akupalika?

WATO uze uli ha kangonga munene, mikanya ya kalunga-lwiji yakuutwala sali ni sali. Nyi kukwasolokele mutu niumwe hanga akonge ankora mu meya, wato wacho muununga ni kuya kweswako mikanya ya meya muyiutwala, mumu ankora yakukwasa hanga wato uhone kutekenga ha meya.

² Nyi unapalika mu yihungumiona, muhasa kupwa ngwe wato uno ha kangonga. Manyonga je mahasa kwalumuka susumuku. Tangwa limwe, muhasa kujikijila ha zango lia Yehova ni ha ukwaso wenyi. Alioze tangwa likwo, muputuka kukakajana nyi Yehova kanamono lume yize yinalingiwa kuli yena. (Samu 10:1; 13:1) Umwe sepa hanji makulweza maliji a utakamiso, ni kukukwasa kulivwa kanawa ha limwe shimbu. (Yishi. 17:17; 25:11) Alioze, yena nihindu muputuka kukakajana cheka, nyi Yehova makukwasa lume. Chocho muputuka kunyonga ngwe, kuushi ni ulemu kumeso ja Yehova, nawa kuwatelele zango lienyi. Mba kuchi muhasa kukonga ankora ye muze unapalika mu kapinda yono? Hanji ngwetu, kuchi muhasa kununga ni kupwa ni shindakenyo ngwe, Yehova kakukuzanga nawa makukwasa?

3. Kulita ni Masamu 31:7; 136:1, utu wa zango yika unalumbunuka, nawa mumu liaka mutuhasa kwamba ngwetu Yehova kali chilweza chinene cha utu wa zango? (Tala nawa chizulie.)

³ Jila yimwe muhasa kukongelamo ankora ye muze mupalika mu yipikalo, yili kwiuluka utu wa zango lia Yehova. (Tanga Masamu 31:7; 136:1.) Liji utu wa zango, liakutala hali atu aali waze akulilema umwe ni mukwo. Yehova kali chilweza chinene cha utu wa zango. Kwamba umwenemwene, Mbimbiliya yakwamba ngwo, ‘utu wa zango lienyi walumbama.’ (Kutuhu. 34:6, 7) Mbimbiliya yakwamba nawa ngwo: ‘Utu wa zango lia Yehova kuwakulumbama kuli waze eswe masanyika kuli iye.’ (Samu 86:5) Maliji a yisoneko yino kanalumbunuka ngwo, Yehova kechi kehuka tuvumbi jenyi ashishika nilimwe tangwa. Kwiuluka ngwo Yehova kashishika, muchihasa kukujikijisa muze mupalika mu yipikalo ngwe chizechene ankora yakujikijisa wato ha kangonga.—Samu 23:4.

IWULUKA NGWE UTU WA ZANGO LIA YEHOVA LILI LONGESO LITANGU LIA MU MBIMBILIYA

4. Tongola limwe longeso litangu lia mu Mbimbiliya lize walilongesele, nawa lumbununa mumu liaka wakulifuliela.

⁴ Jila yikwo ya kukongelamo ankora muze mupalika mu yipikalo, yili kunyonga ha utu wa zango lia Yehova ngwe longeso litangu lia mu Mbimbiliya. Yika maliji, “malongeso atangu a mu Mbimbiliya” analumbunuka kuli yena? Kota unanyongo ha umwenemwene twafuliela uze twalilongesele mu Mbimbiliya. Ngwe chilweza, walilongesele ngwo jina lia Zambi Yehova, Yesu kali Mwana wa wika wa Zambi, afwu kanyingikine chuma nichimwe, nawa hashi muhakapwa paraisu haze atu makatwama ku miaka yeswe. (Samu 83:18; Chilu. 9:5; Yoa. 3:16; Uso. 21:3, 4) Hanyima lia kutayiza umwenemwene uno, yena kuwakechele hanga mutu niumwe akupiangule. Mumu liaka? Mumu wanyingikine ngwe, yuma yacho yili umwenemwene. Tutalenu chize kumona utu wa zango lia Yehova ngwe longeso litangu lia mu Mbimbiliya, muchihasa kutukwasa kwehuka manyonga akwamba ngwo, Yehova keshi kumona yize tunapalika, nawa keshi kulihulumba hali yetu.

5. Lumbununa chize mutu mahasa kwehuka malongeso a mahuza.

⁵ Muze walilongesele Mbimbiliya ha chisuho chitangu, yika yakukwashile kulituna malongeso a mahuza? Kota chuma chakukwashile, chapwile kutesa malongeso a uwayilo wa mahuza ni umwenemwene uze te unalilongesa mu Yisoneko. Ngwe chilweza, tuchinyongenu ngwentu, wapwile ni kwivwa ngwo Yesu kali Zambi mukwa-ndundo jeswe. Alioze muze walilongesele Mbimbiliya, yiulihula ngwe, ‘Shina longeso lino lili lume liamwenemwene?’ Hanyima lia kuhengwola umwenemwene wa mu Mbimbiliya, yiunyingika ngwe, Yesu Kristu hi Zambi ko mukwa-ndundo jeswe. Chocho, hiusalakanyisa malongeso a mahuza ni malongeso a mu Mbimbiliya akwamba ngwo, Yesu Kristu kali “mwana mutangu wa yitangiwa yeswe,” nawa ngwo kali “Mwana wa wika wa Zambi.” (Kolo. 1:15; Yoa. 3:18) Kwamba umwenemwene, malongeso a mahuza mahasa kukwata chinji ha mwono wetu ni kupwa akalu kwaecha. (2 Kori. 10:4, 5) Alioze, hanyima lia kulilongesa umwenemwene yena yiulitwamina kufuliela ha malongeso jacho a mahuza.—Fwili. 3:13.

6. Kuchi muhasa kupwa ni shindakenyo ngwe utu wa zango lia Yehova wakununga ku miaka yeswe?

⁶ Chino, che muhasa nawa kulinga hakutwala ku yize Mbimbiliya yakulongesa ha zango lia Yehova. Nyi ngwe mukakajana hakutwala ku zango lia Yehova muze mupalika mu yipikalo, lihule ngwe, ‘Shina nyonga lino linalite?’ Nyi muchinunga ni kukakajana, hengwola maliji a Samu 136:1, ali ha mutwe wa longeso lino, ni kulihula ngwe, mumu liaka Yehova akulisolola ngwo kakwete “utu wa zango”? Mumu liaka maliji “utu wa zango lienyi wa mutolo,” anaafunyina ha Samu yino yisuho 26? Ngwe chize hitwamona kulu, utu wa zango lia Yehova lili limwe lia ku malongeso atangu a mu Mbimbiliya waze twalilongesele ni kwatayiza. Kashika, nyonga lia kwamba ngwo Yehova keshi kukulemesa, nawa ngwo kuwatelele zango lienyi, hi liamwenemwene ko. Kashika ehuka manyonga wano ngwe chizechene wehukile malongeso a mahuza.

7. Hana chilweza cha chize yisoneko yakusolola ngwo Yehova kakutuzanga.

⁷ Mu Mbimbiliya muli yuma yinji yize yakutwaha shindakenyo ngwo, Yehova kakutuzanga. Ngwe chilweza, Yesu kalwezele tumbaji twenyi ngwenyi: “Yenu nuli ni ulemu unji kuhiana tujila anji.” (Mateu 10:31) Yehova mwene kalwezele atu jenyi ngwenyi: “Kumungukutakamisa, kumungukukwasa, kumungukuzundula ni kwoko liami lia chindume lia ululi.” (Iza. 41:10) Maliji wano kali a ujikijilo. Yesu kakambile ngwenyi ‘Yenu munuhasa kupwa ni ulemu,’ Yehova neye kakambile ngwenyi, ‘Munguhasa kunukwasa.’ Alioze o kambile ngwo: “Yenu nuli alemu,” nawa ngwo, Yami “kumungukukwasa.” Nyi muyambashana ha zango lia Yehova muze unapalika mu yipikalo, yisoneko kuyichi kukukwasa wika kulivwa kanawa. Alioze muyikukwasa nawa kupwa ni shindakenyo ngwo, Yehova ni Yesu kakukuzanga. Maliji a yisoneko yino kali a mwenemwene. Nyi mupukuna ha yisoneko yino ni mbunge yeswe, muwamba maliji waze ali ha 1 Yoano 4:16 ngwo: “Tunanyingika zango lize Zambi akwete hali yetu, twakufuliela ha zango liacho.”a

8. Nyi ha yisuho yimwe muchikukaliwila kutayiza ngwe Yehova kakukuzanga, yika muhasa kulinga?

⁸ Mba yika mulinga nyi ha mashimbu amwe mununga ni kukakajana ha zango lia Yehova? Tesa manyonga je ni yize unanyingika. Yuma yize wakunyonga hi yamwenemwene ko ngwe yuma yize unanyingika. Alioze zango lia Yehova ngwe chize twakulilongesa mu yisoneko, lili liamwenemwene. Nyi mutuhona kufuliela ngwetu Yehova kakutuzanga, chino muchitutwala tulelese chitanga chenyi chilemu, zango.—1 Yoa. 4:8.

NYONGA HA CHIZE YEHOVA AKUKUSOLWELA ZANGO

9-10. Ha yika te Yesu anahanjikila muze ambile maliji akwamba ngwo “Tata kakunuzanga” ali ha Yoano 16:26, 27? (Tala nawa chizulie.)

⁹ Mutuhasa nawa kulilongesa hakutwala ku zango lia Yehova, ha kuhengwola maliji waze Yesu alwezele tumbaji twenyi ngwenyi: “Tata kakunuzanga.” (Tanga Yoano 16:26-27.) Yesu kakahanjikile maliji wano hanga evwise wika tumbaji twenyi kuwaha. Kwamba pundu, muze twakutanga versu jize jinalianga ha versu yino, twakulilongesa ngwetu, Yesu te kasolo kuhanjika ni tumbaji twenyi hakutwala ku chize te analivu. Alioze te kanahanjika no hakutwala ku chikuma chikwo chalisa, kulemba.

¹⁰ Yesu kaliangile kulweza tumbaji twenyi ngwenyi, te kaatamba kulemba mu jina lienyi, alioze hi kulemba kuli iye ko. (Yoa. 16:23, 24) Chapwile chilemu chinji kuli ayo kunyingika chikuma chino, mumu hanyima lia kuhinduka chenyi, tumbaji hanji te meseka kulemba kuli iye. Mumu liaka? Mumu o kamunyingikine ngwe sepa lio, kashika te mahasa kunyonga ngwo zango lienyi hali ayo mulimutwala apanjike kulemba cho, ni kuchihetesa kuli Tato. Alioze Yesu yaalweza ngwenyi te katambile kulinga chocho. Mumu liaka? Iye yaalweza ngwenyi, “Tata kakunuzanga.” Umwenemwene uno, uli chihanda cha malongeso atangu a mu Mbimbiliya hakutwala ku kulemba. Tutalenu yize maliji wano analumbunuka kuli yena. Muze walilongesele Mbimbiliya, wanyingikine Yesu ni kumuzanga. (Yoa. 14:21) Alioze chizechene ngwe tumbaji a ku sekulu yitangu, yena muhasa kulemba kuli Zambi ni kupwa ni shindakenyo ngwe, iye kakukuzanga. Chisuho cheswe wakulemba, wakusolola ufulielo we ha maliji wano.—1 Yoa. 5:14.

NYINGIKA YIZE YAKUKUTWALA KUKAKAJANA HAKUTWALA KU ZANGO LIA YEHOVA

11. Mumu liaka Satana mahasa kuwahilila nyi mutuputuka kukakajana ha zango lia Yehova?

¹¹ Kulihi kukakajana hakutwala ku zango lia Yehova chakukatuka? Hanji mutuhasa kukumbulula ngwetu, chakukatuka kuli Satana. Uno muuhasa kupwa umwenemwene, Satana ‘kanafupu’ yoze malia, kashika iye te mawahilila chinji nyi mutukakajana ha zango lia Yehova. (1 Petu. 5:8) Zango lia Yehova hali yetu liamutwalile kutwaha ukuule wa Mwanenyi. Alioze Satana kanazange tunyonge ngwetu, tuli yivulumunyi chinji, kashika kutwatelele ukuule. (Hepre. 2:9) Mba iya mayuka nyi mutukakajana ha zango lia Yehova? Satana. Nawa, iya unazange hanga tweche kuwayila Yehova muze mutupalika mu yipikalo? Cheka nawa Satana. Satana kanazange hanga tunyonge ngwetu, Yehova keshi kutuzanga, alioze uno hi umwenemwene ko. Satana mwe watokesele zango lia Yehova, kashika umwe wa ku miheto yenyi, uli kweseka kututwala tunyonge ngwetu, Yehova keshi kutuzanga, nawa kakutuhisa. (Efwe. 6:11) Nyi mutunyingika mukwa-kole wetu ni yize akweseka kulinga, mutukwata chiyulo cha ‘kulimika ni Ndiapu.’— Tia. 4:7.

12-13. Kuchi shili yize twahingile muyihasa kututwala kukakajana ha zango lia Yehova?

¹² Kukakajana hakutwala ku zango lia Yehova, chakukatuka nawa ha chuma chikwo. Chuma chika chenacho? Shili yize twahingile. (Samu 51:5; Roma 5:12) Chocho, shili yacho yiyipihisa usepa hakachi ka atu ni Zambi. Shili yakusongwela nawa manyonga jetu, mbunge ni mujimba wetu.

¹³ Shili yakukwata ha manyonga jetu mu jila yipi. Yakututwala tulihise, tusakalale, tuhone kulijikijila ni kwivwa sonyi. Mutuhasa kupwa ni manyonga wano nyi mutulinga shili, alioze manyonga wano mahasa nawa kwiza mumu lia kunyingika ngwetu, tuli yihenge. Yehova kakatutangile hanga tupwe yihenge. (Roma 8:20, 21) Chizechene ngwe mashinyi waze ali ni maroda afwa keshi kuhasa kukalakala kanawa, ni yetu nawa mumu lia uhenge kutushi kuhasa kulinga kanawa yuma ngwe chize Yehova azangile muze atutangile. Kashika, kutushi kukomoka nyi ha yisuho yimwe mutukakajana ha zango lia Yehova. Nyi chino muchilingiwa, twatamba kunyingika ngwetu Yehova, “Zambi munene kole ni woma, kakusolola utu wa zango kuli waze akumuzanga ni kufunga shimbi jenyi.”—Nehe. 1:5.

14. Kuchi kunyonga ha ukuule muchitukwasa kupwa ni shindakenyo ngwetu Yehova kakutuzanga? (A-Roma 5:8) (Tala nawa mushete “Lifunge ku Ndundo ja Kwonga cha Shili.”)

¹⁴ Umwenemwene uli ngwo, ha mashimbu amwe mutuhasa kunyonga ngwetu, kutwatelele zango lia Yehova. Kwamba pundu kutwalitelele lume, mumu zango lia Yehova lili lilemu chinji. Yetu kutushi kuhasa kulizuka ku tachi jetu. Chipwe chocho, Yehova yatwaha ukuule hanga afuke shili yetu. Iye katuhele ukuule uno mumu kakutuzanga. (1 Yoa. 4:10) Yesu kejile hanga alamwine yivulumunyi, hi atu angunu ko. (Tanga A-Roma 5:8.) Niumwe wa kuli yetu mahasa kulinga yuma ni ungunu weswe wakuhi, Yehova neye keshi kushimbwila chino hali yetu. Nyi mutumona ngwetu uhenge wetu unatutwale hanga tukakajane ha zango lia Yehova, twatamba kusa tachi hanga chino chihone kulingiwa.—Roma 7:24, 25.

NUNGA NI KUSHISHIKA

15-16. Nyi twanunga ni kushishika kuli Yehova, shindakenyo yika mutuhasa kupwa nayo, nawa mumu liaka? (2 Samuele 22:26)

¹⁵ Yehova kanazange hanga tukwate chiyulo cha “kulikwachilila kuli iye.” (Shimbi 30:19, 20) Nyi mutuchilinga, mutuhasa kupwa ni shindakenyo ngwetu, iye manunga ni kushishika kuli yetu. (Tanga 2 Samuele 22:26.) Shimbu mutununga ni kushishika kuli Yehova, mutuhasa kupwa ni shindakenyo ngwetu, iye matukwasa kunyongonona mu yuma yeswayo muyilingiwa ku mwono wetu.

¹⁶ Ngwe chize twamona, kuli yuma yinji yize muyitukwasa tununge ni kujikijila muli Yehova muze mutupalika mu yipikalo. Twanyingika ngwetu, Yehova kakutuzanga nawa matukwasa. Yino ye Mbimbiliya yakulongesa. Nyi ha shimbu limwe mutuyambashana ha zango lia Yehova, twatamba kulihulikila ha yize tunanyingika hakutwala ku zango liacho, shimbu tulihulikile ha chize tunalivwu. Tunazange nawa kununga ni kupwa ni shindakenyo ngwetu, utu wa zango lia Yehova, muununga ku miaka yeswe ngwe chize Mbimbiliya yakwamba.