Jehovah Nih Kan Thlacamnak A Kan Leh Ning

1-2. Thla kan cam tikah zei kong dah kan ruah awk a si?

JEHOVAH nih ka thlacamnak a ka let hnga maw tiah na ruat bal maw? Cutin na ruah ahcun nangmah lawng na si lo. Unau tampi zong nih a hleiin harnak an ton tikah cutin an chim tawn. Sifah harnak kan ton tikah Jehovah nih kan thlacamnak a kan leh ning kha hngalh awkah kan i harh ve men lai.

² Jehovah nih amah a biami pawl an thlacamnak a leh hna ti kan zumh khawhnak a ruang kha i ruah hna u sih. (1 Johan 5:15) Mah biahalnak zong kan i ruah hna lai: A caan ah zeicah Jehovah nih kan thlacamnak a kan leh lomi a lawh khawh men? Tuchan ah Jehovah nih zei ti lam in dah kan thlacamnak a kan leh?

Jehovah Nih Kan I Ruahchanmi Lam In A Kan Let Men Lai Lo

3. Jehovah nih zeicah a sinah thlacam hna seh ti a kan duh?

³ Jehovah nih a kan dawt tuk i a caah kan sunglawi tuk ti kha Baibal nih a kan zumhter. (Hag. 2:7; 1 Johan 4:10) Mah ruangah a sinah thlacam ding in a kan sawmmi a si. (1 Pet. 5:6, 7) Amah he naih tein um peng awk le kan tonmi harnak hna kha hlawhtling tein tawnghtham awkah bawmh a kan duh.

4. Jehovah nih amah a biami hna cu an thlacamnak a leh hna ti kha zeitindah kan hngalh? (Hmanthlak zong zoh.)

⁴ Baibal ah Jehovah nih amah a biami hna i an thlacamnak a lehmi hna kong kha kan rel tawn. An kong kha na ruat kho maw? Siangpahrang David kong tah zeitin? A nun chung ah ṭih a nungmi ral tampi a ngei i Jehovah sinah thlacam in bawmhnak a hal lengmang. Voikhat cu Jehovah kha hitin a nawl: “BAWIPA, ka thlacamnak cu ka theihpiak law kaan nawlnak cu ka ngaihpiak ko. Nang cu na ding i zumhawktlak na si caah ka thlacamnak cu ka let tuah.” (Salm 143:1) David nih luatnak a hmuh nakhnga thla a cammi kha Jehovah nih a leh. (1 Sam. 19:10, 18-20; 2 Sam. 5:17-25) Cucaah David nih zumhnak he hitin a chim khawh: “A autu vialte hna cu an pawng khin a umhnawh hna, lungtak in a autu vialte hna cu.” Kannih zong cu bantuk zumhnak kan ngei kho ve.—Salm 145:18.

5. Jehovah nih hlanlio i amah a biami hna kha an i ruahchanmi ningin an thlacamnak a let peng hna maw? Tahchunhnak pe. (Hmanthlak zong zoh.)

⁵ Jehovah nih kan thlacamnak kha kan i ruahchanmi lam in a kan let men lai lo. Lamkaltu Paul cungah cutin a rak cang. Pathian sinah ‘a pum ah a ummi fahnak pakhat’ kha hlohpiak dingin a rak hal. Paul nih mah a fak tukmi zawtnak he aa tlaiin a hleiin voithum tiang thla a rak cam. Jehovah nih mah thlacamnak kha a let maw? A leh, asinain Paul nih aa ruahchanmi lam in a si lo. A fahnak hlohpiak canah Jehovah nih zumhfek tein a rian a ṭuan peng khawh nakhnga a herhmi thazaang tu a rak pek.—2 Kor. 12:7-10.

6. A caan ah zeicah Jehovah nih kan thlacamnak a kan leh lomi a lawh khawh men?

⁶ Kannih zong a caan ah kan i ruahchan lomi lam in kan thlacamnak leh kan si ve men lai. Jehovah nih kanmah bawmh awkah a ṭha bikmi lam a hngalh ti kha kan zumh khawh. Anih cu “kan hal khawh leng le kan ruah khawh leng in thil a tuah khotu Pathian” hmanh a si. (Efe. 3:20) Cucaah kan thlacamnak kha kan i ruahchan lomi caan asiloah kan i ruahchan lomi lam in a kan leh khawh.

7. Kan thlacammi kha zeicah kan thlen a herh khawh men? Tahchunhnak pe.

⁷ Jehovah duhnak kha fiang deuh in kan hngalhthiam tikah kan thlacammi kha kan thlen a hau kho men. Martin Poetzinger kong hi ruathmanh. Unaupa Poetzinger cu nupi a ṭhit tlawmpal ah Nazi rian hrang ṭuannak thonginn ah thong a rak tla. A hmasa ahcun a nupi zohkhenh awk le phungchim rian ṭuan ṭhan khawh awkah Jehovah sinah rian hrang ṭuannak thonginn in ka luatter tiah thla a cam. Asinain zarhhnih a rauh hnuah Jehovah nih luatnak lam hunpiak dawh a si lo ti kha a hun hngalh. Cucaah hitin thla a hun cam: “Jehovah tuahter na ka duhmi kha ka hmuhsak hram ko.” Cun a dang thong a tla vemi unau pawl kong kha a hun ruah. An lak i tampi cu an nupi le an fale kong ah an lungre a thei tuk. Cucaah unaupa Poetzinger nih hitin thla a cam: “Jehovah ka rian thar caah kaa lawm tuk. Ka unau pawl thazaang pek awkah ka bawm.” Mah hnu kum kua tiang rian hrang ṭuannak thonginn ah thong a rak tla.

8. Thla kan cam tikah zei a biapimi kong dah kan i cinken awk a si?

⁸ Jehovah nih aa tinhnak cu ri a khiahmi caan ah a tlinter lai ti kha kan i cinken a hau. Mah aa tinhnak ah leiser ral, zawtnak le thihnak ti bantuk tuchan ah kan tonmi sifah harnak a chuahtertu buaibainak vialte kha zungzal ca in a hrawh dih cikcek lai timi aa tel. Jehovah nih a Pennak hmangin a duhnak kha a tlinter lai. (Dan. 2:44; Biat. 21:3, 4) Asinain mah caan a phanh hlan tiang Jehovah nih Satan kha vawlei uk awkah nawl a awnh.b (Johan 12:31; Biat. 12:9) Atu ah Jehovah nih minung buaibainak kha a tawnghtham ahcun Satan uknak cu ri pakhat tiang a hlawh a tlingmi a lo kho. Cucaah a biakam cheukhat a tlin lai caan kan hngah lioah Jehovah nih bawmh loin a kan um tinak a si lo. Kanmah bawmh awkah Jehovah nih a tuahmi thil cheukhat kong kha i ruah hna u sih.

Tuchan Ah Jehovah Nih Kan Thlacamnak A Kan Leh Ning

9. Biakhiahnak tuah kan herh tikah Jehovah nih zeitindah a kan bawmh? Tahchunhnak pe.

⁹ Fimnak a kan pek. A ṭhami biakhiahnak tuah khawh awkah nan herhmi fimnak kaan pek hna lai tiah Jehovah nih bia a kan kamh. Innchunghawi kan ngei lai maw, ngei lai lo ti bantuk kan nunnak cung ah huham a ngei khomi biakhiahnak kan tuah tikah a hleiin Pathian fimnak kan herh. (Jeim 1:5) Nungak a simi unaunu Mariac hmuhtonnak kong kha ruathmanh. Unaupa pakhat he an i ton lioah nuam tein hmaanhmaan hmaikal a ṭuan lio a si. Hitin a ti: “Hawikom in pakhat le pakhat kan i tlaihchannak cu a fek chinchin. Cucaah biakhiahnak ka tuah a hau ti kha ka hngalh. Mah kong he aa tlaiin voi tampi thla ka cam. Jehovah lamhruainak ka herh ti kha ka hngalh, asinain Jehovah nih ka caah biakhiahnak a ka tuahpiak lai lo ti zong ka hngalh.” Jehovah nih fimnak caah thla a cammi kha a ka leh tiah a ruah. Zeitindah? Kan cauk pawl kha a hlathlai i a biahalnak a phi hmuh awkah a bawm khomi capar kha a rak hmuh. Zumhfekmi a nu i a ṭhami ruahnak cheuhnak zong kha a ngaih. Mah ruahnak cheuhnak nih Maria kha a ruahnak i dothlat ṭhan awkah a bawmh. Cucaah a donghnak ah a ṭhami biakhiahnak a rak tuah khawh.

10. Filipi 4:13 ningin Jehovah nih amah a biami hna bawmh awkah zeidah a tuah? Tahchunhnak pe. (Hmanthlak zong zoh.)

¹⁰ Inkhawhnak thazaang a kan pek. Lamkaltu Paul a bawmh bantukin Jehovah nih kan tonmi harnak inkhawh awkah a herhmi thazaang a kan pek lai. (Filipi 4:13 rel.) A harmi thil sining ah inkhawhnak a ngeih nakhnga Jehovah nih Benjamin timi unaupa a bawmh ning kong kha ruathmanh. A no lioah Benjamin le a chungkhar cu Africa i ralzam pawl umnak hmun ah an rak um. Benjamin nih hitin a ti: “Jehovah sinah atu le atu thla ka cam i a lung a lawmhtermi thil ka tuah khawh nakhnga thazaang ka pe tiah ka hal. Jehovah nih lungdaihnak, phungchim peng awkah ralṭhatnak le amah he i naih peng awkah kan cauk pawl a ka peknak thawngin ka thlacamnak kha a ka leh.” Hiti zongin a ti: “Zumtukhat unau pawl an hmuhtonnak kong relnak le inkhawhnak ngeih awkah Jehovah nih a bawmh hna ning kong hngalhnak nih zumhfek tein um peng ding timi ka biakhiahnak kha a fehter chin.”

11-12. Jehovah nih kan thlacamnak leh awkah thlaraulei kan chungkhar pawl kha zeitindah a hman khawh hna? (Hmanthlak zong zoh.)

¹¹ Thlaraulei kan chungkhar pawl kha a hman hna. Jesuh nih a thih lai zan ah lungtak tein thla a cam. Pathian min a chiattertu in sualpuh a si nakhnga lo Jehovah sinah a nawl. Jehovah nih mah ningin tuahpiak canah amah thazaang pek awkah a unau a simi vancungmi pakhat a thlahnak thawng in Jesuh kha a rak bawmh. (Luka 22:42, 43) Kannih zong Jehovah nih unau pakhatkhat kha kanmah phone chawnh awk asiloah len awkah a forh hnanak thawngin a kan bawmh khawh ve. Kan dihlak in zumtukhat unau pawl cungah “dawtnak bia” chim awkah caanṭha kha kan kawl khawh.—Ptb. 12:25.

¹² Miriam timi unaunu hmuhtonnak kong kha ruathmanh. A vapa a thih hnu zarh tlawmpal ah Miriam cu inn ah amah lawngin a um, a ngaih a chia tuk i a lung a dong tuk. A ṭap peng i mi pakhatkhat he biaruah a duh. Hitin a ti: “Mi pakhatkhat sinah phone chawnh dingin thazaang ka ngei lo, cucaah Jehovah sinah thla ka cam. Ka ṭah buin thla ka cam lioah ka phone a ra. Anih cu ka dawt tukmi ka hawikom a simi Khrihfa upa a si.” Miriam cu Khrihfa upa le a nupi sinin hnemhnak a hmu. Amah phone chawnh awkah Jehovah nih mah unaupa kha a forh ti kha a zumh.

13. Jehovah nih kan thlacammi leh awkah zumlotu pawl zeitindah a hman khawh hna ti kha tahchunhnak pe.

¹³ Zumlotu pawl kha a hman khawh hna. (Ptb. 21:1) A caan ah Jehovah nih a miphun pawl i an thlacamnak kha anmah bawmh awkah zumlotu pawl a hman hnanak thawngin a leh hna. Tahchunhnak ah, Nehemiah nih khuapi remh ṭhan awkah Jerusalem ah kir dingin a halmi kha nawl awnh awkah Siangpahrang Artazaksis kha a forh. (Neh. 2:3-6) Tuchan zongah kan herh tikah kanmah bawmh dingin Jehovah nih zumlotu pawl hmanh kha a forh khawh ve hna.

14. Soo Hing hmuhtonnak kong he aa tlaiin zeidah na sunsak? (Hmanthlak zong zoh.)

¹⁴ Soo Hing timi unaunu nih a siibawipa hmangin Jehovah nih a ka bawmh tiah a ruah. A fapa cu a zual tukmi lungthinlei zawtnak a ngei. A fapa cu ṭih a nung tukmi accident ah aa tel ve caah amah le a vapa cu amah zohkhenh awkah an rian in an i din. Cucaah tangkalei ah an chambau. Soo Hing nih mah leng in a dang lungretheihnak cu ka ing kho ti lai lo tiah ka ruah tiah a ti. Cucaah a lungthin dihlak in Jehovah sinah bawmhnak a hal. Mah tikah siibawipa nih amah le a chungkhar bawmh khawhnak lam kawl dingin bia a khiah. Mah ruangah cozah pawl sinin umnak inn le bawmhnak an hmu. A hnuah Soo Hing nih hitin a ti: “Jehovah nih a kan bawmh ning kha kan hmuh. Anih cu ‘thlacamnak Ngaitu’ a si.”—Salm 65:1.

Jehovah Nih A Kan Lehmi Cohlan Awk Le Hmuh Awkah Zumhnak Ngeih A Hau

15. Jehovah nih a thlacamnak a leh ning hngalh awkah unaunu pakhat kha zeinihdah a bawmh?

¹⁵ Kan thlacamnak kha khuaruahhar lam in leh kan si tawn men lai lo. Asinain a kan leh ning cu vancung kan Pa cungah zumhfek tein kan um khawh nakhnga kan herhmi a si. Cucaah Jehovah nih na thlacamnak aan leh ning kha hngalh awkah i zuam. Yoko timi unaunu nih Jehovah nih a thlacamnak kha a ka let lo tiah a ruah ko nain Jehovah sinah a halmi kong kha cauk ah aa ṭial hna. A caan a rauh deuh tikah a cauk kha a zoh ṭhan. Mah tikah Jehovah nih a thlacamnak tam deuh cu a leh ti kha a hmuh, a cheu cu a philh cangmi kong hmanh an si. Cucaah atu le atu Jehovah nih kan thlacamnak a kan leh ning kha kan ruah a hau.—Salm 66:19, 20.

16. Kan thlacamnak kong he aa tlaiin zeitindah kan zumhnak kan langhter khawh? (Hebru 11:6)

¹⁶ Jehovah sinah thlacam lawng si loin kan thlacamnak a kan leh ning kan cohlannak thawng zong in kan zumhnak kha kan langhter. (Hebru 11:6 rel.) Mike le a nupi Chrissy hmuhtonnak kong hi ruathmanh. Bethel ah rianṭuan dingin hmuitinh an ngei. Mike nih hitin a ti: “Mah kan hmuitinh kong he aa tlaiin kum tampi chung Jehovah sinah atu le atu thla kan cam. Asinain sawm kan si bal lo.” Mike le Chrissy nih a rianṭuan awkah a ṭha bikmi lam in zeitindah ka hman hna lai ti kha Jehovah nih a hngalh tiah an zumh. Cucaah a herh deuhnak hmun ah hmaanhmaan hmaikal an ṭuan i Jehovah bupi i innsaknak project hna ah an i telnak thawngin an tuah khawhmi paoh kha an tuah peng. Atu ahcun khualtlawng rianṭuantu in rian an ṭuan cang. Mike nih hitin a ti: “Jehovah nih kan thlacamnak kha kan i ruahchanmi lam in a kan let zungzal lo. Asinain kan mitthlam ah kan cuanter khawhmi nakin a ṭha deuhmi lam hmanhin kan thlacamnak kha a kan leh.”

17-18. Salm 86:6, 7 ningin zeidah kan zumh khawh?

¹⁷ Salm 86:6, 7 rel. Salm caṭialtu David nih a thlacamnak cu Jehovah nih a theih i a leh ti kha a zumh. Nangzong cu bantuk zumhnak na ngei kho ve. Hi capar i kan i ruahmi kong hna nih inkhawhnak ngeih awkah Jehovah nih kan herhmi fimnak le thazaang a kan pek lai ti kha a kan zumhter. Lam cheukhat in a kan bawmh khawh nakhnga thlaraulei kan chungkhar le atu ah amah a zum lomi hna hmanh kha a hman khawh hna.

¹⁸ Jehovah nih kan i ruahchanmi lam in kan thlacamnak kha a kan let zungzal men lai lo nain a kan leh lai ti kha kan hngalh. Kan herhmi te kha kan herh lio caan te ah a kan pek hrimrhim lai. Cucaah Jehovah nih atu ah a ka zohkhenh lai i a ra laimi vawlei thar ah ‘kan dihlak in kan herhmi kha tling tein’ a kan pek lai timi zumhnak he thlacam peng.—Salm 145:16.