“Konbat sa Bon Konba dan Lafwa”
1 Lapot Pol ti konsey Timote pour “konbat sa bon konba dan lafwa.” (1 Tim. 6:12) Pol li menm ti viv an akor avek sa parol. Ver lafen son lavi, i ti dir avek lasirans ki i ti’n personnelman konbat en bon konba. (2 Tim. 4:6-8) Par tou mwayen, i ti pourswiv minister avek lardyes, kouraz ek landirans. An imitan son legzanp, nou kapab annan sa menm lasirans dan nou, ki nou pe fer nou mye dan nou konba pour lafwa Kretyen.
2 Aplik Zefor ki Neseser: Pol ti travay dir dan minister. (1 Kor. 15:10) I leka avek nou osi kan nou resers tou bann ki diny dan nou teritwar. (Mat. 10:11) Pour zwenn serten, petet i enplik lev gran maten pour temwanny avek bann ki nou zwenn lo semen. Oubyen i kapab enplik travay dan tar apremidi ou boner aswar pour zwenn dimoun apre ki zot in retourn se zot.
3 I demann disiplin lo nou par ek en bon progranm pour ariv aler kan nou pe zwenn avek nou group letid liv pour predikasyon. Par egzanp, dan wikenn serten manm lafanmiy Betel i vwayaz ziska 60 minit pour ale e parey pour retournen, pour partisip dan minister avek zot kongregasyon respektif. Nou kapab admir osi serten proklanmater ek fanmiy dan nou kongregasyon ki vwayaz en gran zistans me ki touzour aler. I diny lo nou par pour imit bann tel legzanp lo zel ek bon lorganizasyon.
4 Nou devret motive pour swiv tou lentere ki nou trouve. Menm kan nou plas piblikasyon an semen oubyen dan kad enformel, nou bezwen fer en zefor pour ganny ladres sa endividi oubyen son nimero telefonn. Apre nou kapab telefonn li pour devlop son lentere e trouv en mwayen pour konmans en letid Labib.
5 Vin Regilye dan Servis: Pol ti konsistan e konplet dan son travay predikasyon. (Rom. 15:19) Me ou? Eski ou partisip regilyerman dan minister? Eski ou’n deza konmans donn ou par dan predikasyon sa mwan? Bann kondikter Letid Liv i enterese pour vwar ki sak dimoun dan son group i partisip dan minister pandan mwan Out. Zot pou ed ou pour fer sa.
6 An imitan sipor total ki Pol ti donnen anver sa bon nouvel, nou pou kontinyen “konbat sa bon konba dan lafwa.”