Fer Temwannyaz par Telefonn Vin en Sikse

¹ Nou lobzektif konman Temwen Zeova se pa pour senpleman partisip dan proklanmasyon sa bon nouvel me osi pour rankontre plis dimoun posib avek sa mesaz Rwayonm. (Akt 10:42; 20:24) Menm si travay port-an-port i kontinyen reste nou metod prensipal pour rankontre dimoun, nou konstate ki menm par sa metod sistematik nou pa ganny kontakt avek tou dimoun. Alor pour ‘plennman akonpli nou minister,’ nou pe servi lezot metod—enkli temwannyaz par telefonn—pour trouv bann endividi ki resanble mouton.—2 Tim. 4:5.

² Dan bokou landrwa, dimoun pe viv dan bann apartman ki ekipe avek sekirite, bann konpleks abite par plizyer fanmiy, oubyen bann rezidans ki fermen avek piblik, ki fer li difisil pour angaz dan nou metod tradisyonnel port-an-port pour rankontre dimoun. Menm dan bann teritwar kot nou kapab travay port-an-port, en bon nonm dimoun pa kot zot lakour. Sepandan, bokou proklanmater pe ganny bann bon rezilta kan zot kontakte sa bann rezidans par telefonn. En bomaten dan travay port-an-port, en koup ti ganny nef absan. Apre ki zot ti’n retourn kot Lasal Rwayonm, zot ti get sa bann ladres dan en liv telefonn ki donn bann nimero telefonn dapre ladres. Zot ti apel sa bann nimero e zot ti dekouver ki wit sa bann dimoun ti kot zot!

³ Eski ou ezite pour enkli temwannyaz par telefonn dan ou minister? En frer ti admet: “Mon pa kontan ki dimoun i telefonn mwan kot mwan pour vann mwan okenn keksoz, se pour sa rezon ki mon ti vwar li en problenm pour mwan fer sa kalite temwannyaz.” Sepandan, apre ki i ti’n telefonn zis de dimoun, i ti dir: “Mon kontan fer li! Mon pa’n zanmen panse ki mon ti pou kapab fer sa, me mon kontan li! Dimoun i alez lo telefonn, e ou annan tou keksoz ki ou bezwen lanmenm. Sa i tre efikas!” En ser ti annan en reaksyon parey: “Mon pa ti vreman enterese avek temwannyaz par telefonn. Pour dir ou laverite, mon pa ti anvi fer li. Me mon ti esey li e dekouver ki i donn bann bon rezilta. Mon annan 37 retourn vizit atraver temwannyaz par telefonn e plis letid Labib ki mon kapab fer!” Si ou pare pour esey fer temwannyaz par telefonn, ou osi ou pou reisi.

⁴ Organize Pour Fer Temwannyaz par Telefonn: Aktivite predikasyon kongregasyon i tonm anba sipervizyon sirveyan servis. Depandan lo bezwen, konsey bann ansyen i kapab swazir en lot ansyen oubyen en asistan ministeryel kalifye pour travay ansanm avek li pour organiz temwannyaz par telefonn. Sa frer ki responsab pour bann teritwar i devret osi enplike, vi ki i pou donn bann teritwar e gard en rikord azour. Pareyman, sirveyan rezyonal pou osi enterese dan progre sa progranm.

⁵ Si i annan landrwa dan ou teritwar ki pa kapab ganny akse avek par temwannyaz port-an-port, konsider zot konman bann teritwar telefonn. Sa frer responsab pou fer en lalis ladres bann lakaz dan sa landrwa ki ganny pou konverti konman en teritwar telefonn, ki devret ganny garde ase tipti afen ki zot ganny kouver regilyerman. Tou bann kart teritwar ki annan sa bann landrwa lo zot devret ganny note avek en remark ki spesifye ki sa bann seksyon spesifik in ganny dezinyen pour temwannyaz par telefonn.

⁶ Kote ki ou kapab obtenir bann nimero telefonn? En liv telefonn ki lis bann nimero telefonn par bann ladres kapab disponib dan libreri. Si en konpleks ki ekipe avek sekirite, i annan son prop lalis telefonn, petet ou kapab ganny zot nimero ladan. Oubyen, i kapab posib pour kopi bann non sa bann rezidans ki trouve dan liv dan larantre e pour regard zot nimero dan en liv telefonn.

⁷ Bann ansyen i kapab pran en lentere aktif dan sa travay par aranze pour ki sa bann ki annan leksperyans dan temwannyaz par telefonn i form lezot, petet atraver progranm Pionye Ed Lezot. Detanzaot, en bezwen lokal dan Renyon Servis i kapab ganny dedye pour ogmant sikse sa laspe temwannyaz.

⁸ Ler bann ansyen i fer bann vizit pastoral kot bann envalid ki pa kapab sorti oubyen bann ki malad, zot kapab mazinen pour ankouraz sa bann dimoun pour partisip dan temwannyaz par telefonn. Petet en ansyen i kapab fer detrwa kou-d-telefonn pandan ki sa proklanmater i obzerv li. Apre sa proklanmater i kapab pran plezir dan fer en kou-d-telefonn. Bokou ki’n konmans dan sa fason i pas detrwa minit sak zour dan sa travay, e zot vreman kontan fer li.

⁹ Bann Sizesyon Pour Reisi: Ler Zezi ti anvoy son bann disip pour al prese, i ti anvoy zot “de par de.” (Lik 10:1) Akoz? I ti konnen ki par travay ansanm zot ti pou aprann e ankouraz kanmarad. I osi leka dan temwannyaz par telefonn. Par travay konman partner, ou kapab aprann avek kanmarad, diskit ou bann rezilta, e ofer bann sizesyon pour prosen konversasyon. Menm pandan en kou-d-telefonn, ou kapab ed kanmarad trouv bann lenformasyon apropriye.

¹⁰ Pour promouvwar en panse kler ek konsantrasyon, asiz dan en landrwa kot ou kapab ouver ou bann piblikasyon pour predikasyon—Labib, liv Comment raisonner, brosir Ekspekte, magazin, ek lezot—devan ou. Ekrir serten prezantasyon, e met zot kot ou kapab vwar. Prepare pour gard en rikord konplet e egzakt, enkli dat ek ler afen ki ou pou konnen kan ki ou pou pourswiv lentere.

¹¹ Dimoun i souvan fer atansyon ler zot antann en lavwa ki zot pa familye avek lo telefonn. Alor montre ou amikal, poli e avek santiman. Sa met lakaz i annan selman son ou lavwa pour determin ou karakter ek senserite. Montre ou kalm e koz sa ki dan ou leker. Koz lantman e klerman e ase for pour sa dimoun tande. Donn loportinite sa dimoun pour koze. Servi ou non konplet, e mansyonnen ki ou viv dan sa kominote. Nou pa anvi dimoun panse ki nou pe fer lavant par telefonn. Olye dir ki ou pe apel tou rezidans dan en batiman oubyen konpleks partikilye, fer sa dimoun konnen ki ou pe telefonn li personnelman.

¹² Bann Prezantasyon Telefonn: Bokou lentrodiksyon lo paz 9-15 dan liv Comment raisonner i kapab ganny adapte avek temwannyaz par telefonn. Ou kapab dir: “Mon pe apel ou lo telefonn parski mon pa kapab vin vwar ou personnelman. Rezon akoz mon pe telefonn ou se pour demann ou lopinyon lo en kestyon byen enteresan.” Apre demann en kestyon.

¹³ Sa premye prezantasyon anba soutit “Crime/Sécurité” i kapab ganny servi dan sa fason: “Alo. Bonzour mon apel _____. Mon reste dan zanmirant. Mon anvi asir ou ki mon pa pe vann okenn keksoz oubyen pe fer en serve. Mon pe telefonnen parski mon konsernen avek sekirite personnel. I annan en kantite krim otour nou, e sa i afekte nou lavi. Eski ou panse ki en zour tou dimoun pou kapab mars dan semen aswar e santi zot an sekirite? [Les li reponn.] Les mwan lir ki Bondye in promet pour fer.”

¹⁴ Kan nou servi en lapros direk pour ofer letid Labib lo telefonn, sa in anmenn bann bon rezilta. Ou kapab demontre konman letid i deroule dan detrwa minit. Ofer pour vizit sa dimoun kot li pour kontinyen sa letid, oubyen si sa dimoun i ezite, ofer pour kontinyen sa letid par telefonn en lot zour.

¹⁵ Ler ou pe termin en konversasyon, mazin en keksoz ki ti a fer ou vizit sa dimoun oubyen poste en piblikasyon pour li. Si sa dimoun i ezite pour donn ou son ladres, ofer pour telefonn li ankor. I kapab pran plizyer kou-d-telefonn avan ki i santi li ase konfortab pour envit ou kot son lakour.

¹⁶ Pran Linisyativ: En ser aze 15 an ti konmans son servis bomaten par en kou-d-telefonn. I ti koz avek en madanm ki ti dakor pour aksepte en liv Konnesans. Ler sa ser ti delivre sa liv kot sa lakaz, sa madanm ti anvi konnen konman sa zenn ti konn son nimero telefonn, vi ki sa nimero pa ti dan liv. Sa ser ti’n fer sa nimero par lerer! Sa madanm ti aksepte en letid e i aprezan en proklanmater non batize.

¹⁷ En ser ti pran en kart teritwar telefonn me i pa ti fer sa teritwar pour trwa semenn akoz lafreyer. Kwa ki ti donn li sa kouraz pour konmanse? I ti rapel en lartik entitile “Lorsque je suis faible, c’est alors que je suis puissant” dan Réveillez-vous! le 22 Zanvye 1997. Sa lartik ti koz lo en Temwen ki prese an servan telefonn kantmenm i annan limitasyon fizik. Sa ser ti dir: “Mon ti priy Zeova e mon ti demann li lafors. Mon ti demann li pour donn mwan bann mo apropriye pour mwan fer mon prezantasyon.” Ki rezilta i ti gannyen son premye zour ki i ti temwanny par telefonn? I ti raporte: “Zeova ti reponn mon lapriyer. Dimoun ti donn mwan zot latansyon, e mon ti aranze pour fer retourn vizit.” Plitar son temwannyaz par telefonn ti fer li ganny en letid Labib. I konklir: “Zeova in ansenny mwan ankor enn fwa pour met konfyans dan li e non pa dan mwan menm.”—Prov. 3:5.

¹⁸ Prezant laverite par telefonn in vin en metod ki raport bokou sikse dan sa travay pour pres bon nouvel. Prepar byen, e partisip avek tou ou leker. Pa dekouraze si ou resevwar en reaksyon ki pa favorab lo ou bann premye kou-d-telefonn. Priy pour gidans Zeova, e konpar ou bann not avek lezot ki pe pres dan sa fason eksitan. Avek en dezir pour pa mank okenn dimoun dan nou teritwar, fotespere ki nou akonpli nou minister oprofon, konsyan ki letan i kourt.—Rom. 10:13, 14.