“Bann Proklanmater Rwayonm zele” Lasanble Distrik bann Temwen Zeova 2002
1 “Mon ti rezwir ler zot ti dir mwan: ‘Annou al kot lakaz Zeova.’ ” (Pson. 122:1) An egzaminan lekspresyon sa psalmis, remarke (1) konman i ti santi kan i ti ganny envite pour zwenn dan ladorasyon Zeova, (2) bon konpanyon ki i ti annan, ki ti osi vreman enterese avek vre ladorasyon, e (3) preparasyon neseser ki ti’n bezwen fer pour sa lenvitasyon, pour rasanble ansanm, e pour fer sa vwayaz ziska kot lakaz Bondye.
2 Eski parol sa psalmis pa fer nou rapel nou prop santiman kan nou antann ki preparasyon pe ganny fer pour nou prosen lasanble? Nou ranpli avek leksitasyon kan nou rapel sa lazwa ki nou ti annan dan bann lasanble ki’n pase ek sa posibilite pour nou rasanble ankor avek nou bann konpanyon ki kontan Zeova. Bann laranzman in ganny fer pour trwa zour Lasanble Distrik “Bann Proklanmater Rwayonm zele” partou dan nou bann zil Losean Endyen an 2002. La i sa moman pour fer nou plan pour asiste e pour nou benefisye plennman atraver sa festen spirityel ki pe esper nou.
3 ‘Lesklav fidel e pridan,’ in konmans prepar nouritir spirityel ki apropriye ki pou ganny servi dan lasanble. (Lik 12:42) Sak kongregasyon in ganny anvoye dan en lasanble spesifik afen ki napa en kantite dimoun dan landrwa lasanble e dan bann lotel dan serten rezyon. Deplis, en kantite frer in konmans organiz diferan departman lasanble afen ki ‘tou keksoz i mars byen e dan lord.’ (1 Kor. 14:40) Avek en kantite keksoz ki’n deza an plas pour nou benefis ek konvenyans, ki nou kapab fer personnelman pour prepare pour sa lasanble?
4 Plàn la konmela pour asiste tou le trwa Zour: Eski ou bezwen demann ou anplwayer serten zour òf pour ou kapab asiste lasanble tou le trwa zour? Zeova i konpran ki serten anplwayer i “difisil.” (1 Pyer 2:18) Me nou lasanble i vreman enportan, e nou oule fer en gran zefor pour asiste progranm antye. Dan lapriyer koz avek Zeova lo sa size, resers son gidans pour ganny en bon rezilta.—Nee. 2:4.
5 Get dan Kongregasyon: Si nou okouran ki en frer oubyen en ser i dan bezwen swa fizikman oubyen materyelman ki kapab fer difisil pour li asiste lasanble, eski nou kapab ‘elarzi’ nou lanmour e donn serten lasistans? (2 Kor. 6:12, 13; Det. 15:7) Sa i leta lespri ki Pol ti ankouraze dan 2 Korentyen 8:14. Akoz ou pa envit sa bann dimoun pour al lasanble ansanm avek ou? Si zot pionye, i probab ki zot annan bann bon leksperyans pour partaze pandan ki zot pe ale. Si depi byen lontan zot dan kongregasyon, zot kapab annan en listwar teokratik merveye ki ou pa’n zanmen tande. Eski asosye avek sa bann frer ek ser pa pou fer en bon lenfliyans lo ou ek ou fanmiy? Zot pou apresye ou zenerozite e Zeova pou rekonpans ou.—Prov. 28:27; Mat. 10:42.
6 Kantmenm bann fanmiy Kretyen i pran swen avek bann ki annan bezwen spesyal dan zot fanmiy, bann ansyen ek lezot dan kongregasyon ki okouran sa bann bezwen zot kapab avek lanmour asiste sa bann fanmiy pour fer bann laranzman neseser. (1 Tim. 5:4) Kan bann form Special Needs Room Request i ganny prezante avek Komite Servis Kongregasyon, sa komite i devret revwar ka sak aplikan avan anvoy sa bann form kot servis lozman. Sekreter kongregasyon i devret enkli son nimero telefonn lo sa form afen ki servis lozman i kapab kontakte li si i annan okenn kestyon. Poste sa bann form ki’n ganny aprouve kot ladres lasanble ki trouve lo sa let ki pou donn detay konsernan lasanble avek tou bann kongregasyon.
7 Ofer ou led volonterman: Pandan lasanble, plizyer santenn volonter i asiste avek fonksyonnman bann departman. Bann manm servis lakey dan lasal e dan parking i asiste nou pour ganny en plas asize e sirvey nou transpor pandan lazournen. Departman netwayaz i annan sa privilez pour mentenir nou bon repitasyon pour lapropte, par gard sa landrwa ki nou pe servi tanporerman pour ladorasyon pli prop ki i ti ete oparavan. Eski nou kapab ed sa bann departman ki bezwen nou sipor? Eski ou pou volonterman ofer ou led pour servi “zepol kont zepol” avek ou bann frer?—Tsef. 3:9.
8 Eski Dimoun i vreman remark sa ki nou fer? Pandan lasanble distrik lannen pase, en zonm ki ti’n aret etidye avek bann Temwen Zeova pour plis ki 20 an pase ti pe travay dan en lotel. I ti dir avek serten Temwen ki i pe mazin pour rekonmans son letid Labib e asiste bann renyon. Akoz? Akoz sa bon fason ki bann Temwen ti tret li pandan bann zour ki zot ti pe reste dan sa lotel.
9 En reprezantan lotel ti dir sa lo nou bann frer: “Zot sa pli bon group ki reste kot nou lotel. Zot dimoun i vreman pasyan e poli.” Vreman sa i fer nou Papa seles fyer ler i vwar nou pe swiv konsey Zezi: “Alor zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.”!—Mat. 5:16.
10 Fotespere ki nou imit latitid Lerwa David, ki avek lazwa ti antisipe pour al kot lakaz ladorasyon Zeova. Nou lasanble distrik i en sours nouritir spirityel ki vreman enportan e en loportinite enkonparab pour bann moman agreab avek nou bann frer ek ser. Alors, avek lantouzyasm nou envit ou pour konmans fer ou laranzman pour asiste tou bann sesyon tou le trwa zour Lasanble Distrik “Bann Proklanmater Rwayonm zele” pour sa lannen!
[Bwat lo paz 3]
Ler Progranm
Vandredi ek Sanmdi
9:30 bomaten - 5:00 apremidi
Dimans
9:30 bomaten - 4:00 apremidi