Senkyenm Parti—Kondwir bann Letid Labib ki progrese
Deside ki Kantite Lenformasyon pour kouver
1 Ler Zezi ti pe ansennyen, i ti pran konsiderasyon limit son bann disip. I ti koz avek zot “dan en fason ki zot ti kapab konpran li.” (Mark 4:33; Zan 16:12) Dan menm fason, bann ansennyan Parol Bondye ozordi i bezwen evalye ki kantite lenformasyon pour kouver ler zot pe fer en letid Labib. Lakantite lenformasyon ki pou ganny egzaminen pou depan lo abilite ek sitiasyon sa ansennyan ek sa etidyan.
2 Batir Lafwa ferm: Serten etidyan Labib i kapab bezwen de oubyen trwa sesyon letid pour konpran en lenformasyon ki lezot etidyan i kapab konpran li fasilman pandan en sesyon. I pli enportan ed en etidyan byen konpran sa lenformasyon ki pour kouver en kantite lenformasyon dan en pti gin letan. Sak etidyan i bezwen en baz solid pour son nouvo lafwa dan Parol Bondye.—Prov. 4:7; Rom. 12:2.
3 Anmezir ki ou kondwir letid sak semenn, pas kantite letan ki neseser pour ed en etidyan konpran e aksepte sa ki i pe aprann dan Parol Bondye. Evite tay avek letid ki fer sa etidyan pa benefisye avek vre valer laverite ki i pe ganny ansennyen. Dedye sifizaman letan pour konsantre lo bann pwen enportan e pour konsider bann verse Labib enportan ki sa lansennyman i baze lo la.—2 Tim. 3:16, 17.
4 Konsantre lo Tenm: I vre nou pa anvi tay avek letid, me anmenmtan nou pa anvi diskit lezot topik pandan letid. Si en etidyan i tant pour koz en kantite lo bann keksoz personnel, nou kapab fer laranzman pour koz sa bann keksoz apre letid.—Ekle. 3:1.
5 De lot kote, nou lantouzyasm pour laverite i kapab fer li difisil pour nou pa koz tro bokou pandan letid. (Ps. 145:6, 7) En pwen anplis ouswa en leksperyans detanzaot i kapab anrisir en letid, me nou pa anvi fer li souvan e gaspiy bokou letan lo la ki kapab anpes sa etidyan ganny en konnesans egzakt lo bann lansennyman debaz dan Labib.
6 Nou ed bann etidyan Labib “mars dan lalimyer Zeova” ler nou kouver en serten kantite lenformasyon ki rezonnab dan sak sesyon letid.—Iza. 2:5.