Byen servi ou letan dan predikasyon
1 Sirman i annan en kantite pour nou fer dan predikasyon e napa bokou letan ki reste. (Zan 4:35; 1 Kor. 7:29) Si nou byen organiz nou e fer bon plan davans, nou pou kapab byen servi sa letan ki nou’n met dekote pour al dan predikasyon.
2 Preparasyon: Avan ou al renyon predikasyon fer sir ki ou annan tou piblikasyon ki ou pou bezwen e ki ou kapab mazin byen ou prezantasyon dan ou lespri. Apre ki lapriyer in ganny fer, deswit konmans prese. Sa pou permet ou ek sa bann ki pe travay avek ou pour kapab fer otan pandan sa letan ki zot pou prese.
3 Si ou’n ganny demande pour kondwir renyon predikasyon, konmans aler. Gard li kourt, pa plis ki 10 a 15 minit. Avan ki zot konmans kit landrwa kot randevou i ganny fer, fer sir ki tou dimoun i konnen avek ki i pou travay e kote i pou travay.
4 Dan predikasyon: Osito ki sa renyon in fini pa bezwen kal kale pour nanryen ditou, plito konmans fer bann lakaz. Si ou pe aret pli boner, petet ou kapab fer laranzman pour travay avek en dimoun ki pe osi aret boner, koumsa larestan i ava kapab kontinyen. Kan ou pe pres avek group, montre konsiderasyon pour lezot ki kapab pe esper ou fini en konversasyon. Avek bon zizman, ou kapab fer sa kan ou aret ou konversasyon avek en dimoun ki pe zis argimante, oubyen ou kapab fer laranzman pour retournen pour kontiny ou diskisyon avek sa dimoun ki’n montre lentere.—Mat. 10:11.
5 Kan ou fer bann vizit, ou kapab evite fer bann deplasman ki pa neseser par fer tou ou bann vizit dan en distrik avan ki ou al dan lot. I kapab byen pour telefonn serten dimoun avan ki ou al kot zot pour fer sir ki zot pou la. (Prov. 21:5). Si ou pe al fer en vizit e ou konnen ou pou tarde, ou kapab fer laranzman pour ki lezot dan ou group i pres dan sa landrwa kot ou pe ale oubyen fer en lot retourn vizit.
6 Nou pe viv dan en letan kot i annan en gran kantite rekolt ki bezwen ganny fer. (Mat. 9:37, 38) Byento sa travay pou fini. Alors, nou devret anvi byen servi sa letan ki nou annan ler nou al dan predikasyon.