Temwannyaz lo semen ki efikas

1. Nonm en fason ki nou kapab imit Zezi.

¹ Zezi pa ti ezite pour koz avek bann dimoun ki i ti zwenn lo semen ek lezot landrwa piblik pandan son minister lo later. (Lik 9:57-61; Zan 4:7) I ti anvi partaz sa lenformasyon enportan avek otan dimoun posib. Ozordi, temwannyaz lo semen i en bon fason pour ed dimoun ganny sa lasazes ki sorti kot Bondye. (Prov. 1:20) Nou pou ganny en pli bon rezilta si nou pran linisyativ e servi nou disernman.

2. Ki mannyer nou kapab pran linisyativ kan nou pe fer temwannyaz lo semen?

² Pran linisyativ: Normalman i pli bon si nou apros dimoun dan plas debout oubyen asiz dan zis en sel plas e esper zot vin kot nou. Fer en sourir avek sa dimoun, get li dan son figir e azir dan en fason kalm e zantiy anver li. Si ou pe travay avek lezot proklanmater, i pli bon si zot pa apros dimoun ansanm. Nou osi bezwen pran linisyativ pour pourswiv lentere bann dimoun ki nou zwenn. Si i apropriye, a lafen sa konversasyon, demann sa dimoun zantiman ki mannyer ou pou kapab kontakte li ankor. Serten proklanmater i souvan fer temwannyaz lo semen dan menm landrwa e sa i fer ki zot koz avek menm dimoun plizyer fwa e pourswiv zot lentere.

3. Ki mannyer nou kapab servi disernman kan nou pe fer temwannyaz lo semen?

³ Servi disernman: Servi bon zizman letan ou swazir en landrwa pour debout e avek lekel ou pou koz avek. I pa neseser pour pres avek tou dimoun ki pase. Obzerv byen. Par egzanp, si sa dimoun pe degaze plito les li ale. Kan nou pe pres devan en landrwa biznes, servi disernman pour ki nou pa deranz manedyer sa landrwa. I pli bon pour apros bann dimoun ki pe kit sa landrwa dan plas bann ki pe antre. Apros zot dan en fason amikal ki pa pou fer zot per oubyen sote. Osi, demontre disernman kan nou pe ofer piblikasyon. Si sa dimoun pa demontre sitan en gran lentere, ou kapab ofer li en trak dan plas en magazin.

4. Akoz temwannyaz lo semen i en form predikasyon ki efikas e gou?

⁴ Temwannyaz lo semen i ed nou pour senm bokou lagrenn laverite dan en ptigin letan. (Ekle. 11:6) Serten dimoun ki nou zwenn i kapab sanmenm sa bann ki nou pa’n arive zwenn kot lakour kan nou pres portanport. Akoz ou pa fer laranzman pour partisip dan temwannyaz lo semen, en form predikasyon ki gou e efikas?