Amelyor nou abilite pour prese—Not bann ki enterese
“Vey byen ou lekor e fer byen atansyon avek ou lansennyman.” (1 Tim. 4:16) Sa konsey ki zapot Pol ti donn Timote i montre ki nou devret fer zefor pour progrese, ki swa nou nouvo oubyen nou annan leksperyans. Pour ed nou fer sa, pou annan en nouvo seri ki annan pour tit “Amelyor nou abilite pour prese” dan Nou Minister Rwayonm. Sak lartik pou diskit lo en abilite enportan e donn serten sizesyon lo ki mannyer pour amelyore. Pandan le mwan, tou dimoun i ganny ankouraze pour donn en latansyon spesyal lo sa abilite. Apre ki sa mwan in fini, nou pou ganny loportinite dan en parti Renyon servis pour fer komanter lo konman ki nou’n benefisye par konsantre lo sa abilite pandan le mwan. Sa mwan nou ganny ankouraze pour not bann ki’n enterese.
Akoz i enportan: Pour ranpli nou devwar, nou bezwen fer plis ki zis prese. Nou devret retourn kot bann ki’n montre lentere e ansenny zot. Dan sa fason nou pe aroz lagrenn laverite ki nou’n plante. (Mat. 28:19, 20; 1 Kor. 3:6-9) Sa i vedir ki nou rezwenn sa dimoun, koz lo son bann konsern e kontinyen devlop plis nou konversasyon. Alor, kan nou zwenn dimoun ki enterese, i enportan ki nou note.
Ki mannyer pour fer li:
• Fer sir ki ou annan sa ki neseser dan ou sak pour not lentere bann ki ou’n zwenn. Gard ou bann not prop, byen organize e azour. Not deswit apre ki ou’n fini koz avek sa dimoun.
• Ekri lenformasyon konsernan sa met lakour. Ekri son non, ladres, nimero telefonn oubyen ladres imel. Ki ou’n obzerve konsernan sa dimoun ek son fanmir ki kapab enteresan?
• Ekri bann detay sa konversasyon ki ou’n fer avek li. Ki bann verse Labib ki ou’n servi? Ki sa dimoun in dir konsernan son krwayans? Ki piblikasyon ki ou’n kit avek li? Note ki ler, ki zour e ki dat ou’n vizit li.
• Ekri sa ki ou’n plàn pour fer la prosenn fwa ki ou vizit sa dimoun. Ki ou’n promet ou pou diskite? Kan ki ou’n dir ou pou retournen?
• Kit ou bann not azour sak fwa ki ou retournen. I pa en problenm si ou ekri plis lenformasyon ki ou bezwen.
Esey sa pandan sa mwan:
• Kan ou note dir sa bann ki ou pe travay avek sa ki ou pe ekrir.